أطلب الفراق .. بعد أن ....؟؟ - منتدى عالم الأسرة والمجتمع

21-10-2005, 03:22 AM

alhanoof

شمعة المنتدى التى لاتنطفئ

تاريخ التسجيل: Jan 2004

المشاركات: 4,250

أختي الحبيبه ..

الله يجزيك ألف خير على هذا الصبر .. والزوجه لازم تعاني .. وكل بيت فيه مشاكل .. لاتتوقعين أن فيه إنسان مرتاح في هالدنيا .. ولكن دائماص كوني على يقين أن حالك أحسن من حال غيرك ...

والغلطه الأولى اللي غلطتيها هي أنك تفكير أنك لوحدك .. وغريبه .. وقلقه .. .. !

غاليتي ..

أحب أذكرك وأقولك .. [ ألا بذكر الله تطمئن القلوب ] .. أذكري ربك .. ليلاً ونهاراً .. وبالفعل .. سوف تحسين بالراحه النفسيه وهذا أول عامل للنجاح ..

ثانياً ..

خليك بدون صديقات أبرك وأحسن من تلك الفتيات اللي يغارون ويحسدون و.....إلخ ..

ثالثاً ..

حطي في بالك .. أن شخصيتك قويه .. ولايهزك ريح .. ولاتحبطين نفسك بنفسك .. لأن العقل الباطن يتأثر بسرعه عجيبه .. ولكن لما تحطين هدف مُعين في بالك يستجيب له العقل الباطن ويتحقق لك ...!!

حتى ياحبيبتي .. لاحظي ..لما تقولين .. مثـــــــلاً .. أنا فاشلة بالطبخ .. شرط أن هالطبخة مستحيل تضبط معاك ...! ليه أنك حاطه هالفكره في راسك .. [ وأتمنى أنك فهمتي مغزى كلامي من وراء ضربي لهذا المثل] ..

رابعاً ..

حلو إن الانسان يتميـــــــــــز بشخصيته .. ومايكون منه أثنين .. وسبب كلامي لك .. لأنك قلتي ....

اقتباس:

تطبعت سريعا بها ، وتأثرت بكلامها

وهذا أكبر غلط .. أنك تتأثرين بطبعها .. وكلامها .....!

خامساً ..

مستحيل أن الزوج يتغير مني والطريق .. حاولي أنك تجلسين معاه .. والمهم أنه تكون اعصابه هاديه .. وحتى لو تنرفز وصارخ .. قولي له .. ياحياتي .. ياحبيبي .. ترا مش كل شي ينحل بالصراخ ... وتأكد لواني ماأحبك .. مستحيل أدور على رضاك ..!

سادساً ..

تفادي الجلووووووووووووووووووووووووووووووووووس مع اهله .. عشان مايقولون له قالت وسوت ... ويفضل أنك تقنعينه انكم تطلعون لبيت مستقل .. لأن اهله مأثرين عليه 99% إذا ماكان 100% .. لأنه على كلامك .. أنه تمر عليه اوقات يكون أوكيه وأوقات يكون معصب ومتنرفز حده ..! وهذا معناه أن فيه أحد يحن على راسه ...؟

سابعاً ..

أكبر غلط سويته ومازلتي تسوينه أنك أهملتي في نفسك .. لأنه من المستحيل أني أحل المشكله بمشكله ...!

اقتباس:

فقد أهملت نفسي جداااا ، كنت أنتظره بأبهى الشكل عند الباب لما يحضرمن العمل
الأن أكون بلبس البيت في المطبخ أو أنظف، والبيت غير منظم ....

رجعي لستايلج القديم .. رجعي حبيبه قلبه وروحه .. رجعي له كما عهد أنه يشوفك بكامل حلاك .. صدقيني أنه يموت فيك ويحبك وأنتي بهمالك هذا قاعده تهدمين بيتك أكثر وأكثر وعلى بالك أن المسأله عاديه .. والدليل أنه يموت فيك ومايستغني عنك هو ..

اقتباس:

سافرت إلى أهلي علي أغير ما بنفسي .. كان يحدثني بدموعه ... رق قلبي ..

وأنتي تحبينه بس هذي سحابه صيف وتعدي إن شاءالله ...

وبعدين من الغلط أنك تدخلين عيالك في هذي المشاكل ... حاولـــــــي أنك تحلين مشاكلك بعيد عن أطفالك وعطيهم كل حُب وحنان ...

اقتباس:

وأصبحت كثيرة الصراخ على أطفالي

حرام .. والله حرام .. لأن من اجمل وأحلى أيام العُمر هي الطفوله السعيدة .. وحرام أنهم يتعقدون أو يتعبون نفسياً .. لأنهم عياااااالك .. وأنتي حاسه بشعور الطفل اللي أنحرم من حنان الأم وحبها ... وعاش أيام فيها ضيم وظلم وضرب وصراخ ...!

لإسعاف حياتك الزوجيه أتبعي التالي

...

1/ تفتحين صفحه جديده ... وتنسين الماضي عشان تعيشين صح وتنقذين زوجك وعيالك من الغرق ..

2/ تحاولين بشتى الطُرق عدم الجلوس كثيراً مع أهل زوجك المهم أن صلتك تكون جيده وبعيده عن المشاكل ..

3/ تحاولين كسب رضى زوجك .. بالإهتمام به وتحسسينه بحبه وتحسسينه بضيقتك الشديده لما يكون برا البيت وتتصلين فيه وتسألين عليه وتدزين له مسجات حُب وغرام .. لأن زوجك قلبه رهيف وطيب فحاولي أنك تكسبينه وبسرعه ..!!

4/ لما يكون موجود في البيت [ليلاً] .. نومي الاطفال وتفرغي له تفرغ كلي .. والعصر سوي له كعك مع الشاي أو عصير ليمون مع نعناع عشان يروق دمه وخليه يلعب مع عياله شوي وبعدين وديهم غرفة الألعاب .. يعني لاتمللينه لأن من طبيعه الرجل عدم التحمل كثيراً ..

5/ كلميه بأسلوب راااائع .. ولاتقولينه له فلاااااااااان .. بالعكس .. قولي له .. حبي .. نور حياتي .. أو اسم دلع .. وشوفي النتائج الفتاكه !

6/ لاتدخلين صديقاتك في المشاكل .. لأنهم يزيدون ولايقللون من حجم المشكله .. عشان كذا أحسن لك أنك تعيشين بدون صديقات كرسي حياتك لزوجك وأبنائك واهتمامك بالمنزل والديكور والنظااااافه ..

7/ لاتنسين بأن تدعين له بالهدايه في صلاه قيام الليل .. والله العظيم أن قيام الليل فيها سحر عجيب ومضمون 10000000000% ..

8/ دائماً .. لو تنرفز أو تهاوش معاك .. لاتراددين .. بالعكس كلميه باسلوب .. إن شاءالله .. من عيوني .. أنت تامر امر ...وهكذا .. وصدقيني أنه هو اللي بيخجل من نفسه وبيعدل أسلوبه معاك ..

9/ تأكدي .. أن أنـــــــــــــــــــــا وجميع اعضاء المنتدى نرحب بكِ .. أخت ... وصديقه ... وحبيبه ... ولاتترددين من طلب أي شي منا كنا لأن وبكل سعادة وسرور بنساعدك ...

10/ أتمنى أني فدتك .. وتأكدي أن ربي بيجزيك كل خير على صبرك .. وإن الله يمتحن الإنسان ويشوفه يشكر او لا .. فكوني ياغاليتي من الشاكرين ..

أتمنى أني ماطولت عليك .. وأدعي لي بالذرية الصالحه

.. وإذا بغيتي اي شي امريييييييييييييييني يالغاليه

..

أتمنى لكِ .. حيااااااااااااااااااه سعيده جداً جداً مع زوجك ... بس تفائلي بالخير وشوفي ... وشيلي من راسك كلمه يأست وتعب ..!

وتذكري مقولتي الدائمه .. [ أضحك للدنيا تضحك لك عصباً عنها

] ..

تقبلي تحياتي ياعمري ..

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه