شريت الهدية ، واهديتها المدام :14: ،هذا المساء لكن باقول وش القصة اللي صارت قبل ما أقول ايش هي الهدية

بعد ما كتبت ردي الأخير خذت الورقة اللي سجلت فيها الإقتراحات ودخلت عليها وقلت يا أم فلان هذا صديقي أبو فلان
يبي يهدي زوجته هدية ، فقالت وليش تقول لي يعني علشان انقهر قلت لا بسم الله عليك من القهر بس اقول لك علشان
صديقي هذا قال لي خل زوجتك تختار الهدية بنفسها لأن ذوق الحريم مو مثل الرجال بشرط تكون من الموجود في
الورقة ، فقالت يعني تبغاني اختار الهدية علشان ازود قهر بعد قلت لا يابنت الحلال بس الرجال مزعل زوجته
ويبغى يراضيها ويفاجئها بالهدية فقالت ياما زعلنا وما شفنا هدايا قلت لا حول ولا قوة الا بالله اللي بيننا
أثمن من كل الهدايا قالت ايه سكتني زي العادة ثم قالت هات الورقة اشوف وقعدت تقرا شوي وقالت ما شاء الله
ماركات وحركات الله يديم المحبة بينهم بس كيف صديقك هذا يعرف كل الماركات اللي في الورقة؟لأن اللي كاتبهن شكله
مو رجال هذا مره قلت ليش قالت الحريم هم اللي يفهمون كل الأشياء هذي مو الرجاجيل قلت لا بصراحة اجتمعت وايا اصدقائي علشان هدية صديقنا لزوجته وكل واحد حط اقتراحه قالت بس ما شاء الله اصدقائك فاهمين في الماركات والحركات الحلوة في الذهب والساعات مو مثل رجلي ياحظي قلت المهم ياحياتي عطينا الزبدة وانا اقول في نفسي لا تخليني اهون

قالت شف ياحبيبي أنا أشوف انك تختار من بين هالخيارات شنطة يدوية لأن الشنطة اذا كانت ماركة من هالماركات الحلوة اللي في الورقة تقدر زوجة صديقك تكشخ بها ، وكمان تكون معاها على طول في اي مناسبة وطلعة شايلتها في يدها وتتذكره دايما فقلت شورك وهداية الله يا الله مشينا نروح ندور لهم شنطة .

ولما ركبنا السيارة قالت تصدق ان الشيطان كان يوسوس لي وانا البس كنت افكر ليش ما يكون الأن قاعد يخدعني وهو متزوج علي وحدة ثانية ويبغاني اختار لها هدية من اللي هي كاتبتهن
قلت تعوذي من أبليس وين تبغين نروح قالت الماركات هذي موجودة في محلات جنب بعض ورحنا لهن بس يوم وصلنا صار اليوم الجمعة وما كان فيه فاتح إلا محل واحد وهو جفنشي ودخلنا وأعجبتها شنطة ، وقالت ياخي شناطهم من أحلى الشنط لكن غاليه شوي اكثر من ألف قلت نبحبحها شوي ، وقالت شف هذي بألف وميتين بس أخاف صديقك يزعل ليش زودتوا المبلغ قلت لا هو قايل ما عليش لو زودتوا الى ألف وميتين وشريناها وغلفناها احلى تغليفة

ولما ركبنا السيارة سلمتها لها في يدها وقلت هذي هديتك يا بعد عمري مو هدية زوجة صديقي وما كانت مصدقة حلفت لها وقلت هذي حركة مني علشان تنبسطين :14: :14: والأراء اللي في الورقة كتبها لي الأخوات في المنتدى الله يسعدهن مو أصدقاي اللي كلهم مثلي ما يفهمون فكادت تطب وتطير من السيارة من الفرحة لولا اني مقفل السيارة قفول داخلية عن الأطفال ثم شكرتني ودعت لي من قلبها، وقالت بأوصيك وصية ياحبيبي انك تنقل شكري ودعائي لكل الأخوات اللي شاركوك في الرد على موضوعك وقل لهم تقول زوجتي الله يجزاكن ألف خير
وهذا أنا انقل للاخوات شكري وشكر زوجتي ودعائنا لهم بالتوفيق والسعادة.


الأخت الفاضلة أسرار ما عليك خلي زوجك يشوف الموضوع لعله يفكر صح ، وما فيه أي فضيحة لأنكم مومعروفين وترى من أسباب أني أهديت زوجتي الهدية قرائتي لبعض الموضوعات في المنتدى وتوضيح الأعضاء لاثر الهدية على الحياة الزوجية .

__________________
https://soundcloud.com/abo-faisal-9/...5-wa0024-mp3-1