السلام عليكم ورحمة الله وبركاته...

اول شي الله يتمم عليكم ويوفقكم ويسعدكم ياااااااااارب

ثاني شي اول مره اسمع هالكلام !!

بالعكس انتم بهالفتره وخصوصاً الايام الاولى من الزواج تحتاجون تقعدون بروحكم وبمكان بعيد عن الاهل والأقارب فاأفضل شي السفر
لذلك احجز ولا تشيل هم بالعكس ابتمبسط زوجتك وبتكون هالايام احلى ايام عمرها ان شاءالله..

موفقين ان شاءالله وانتبهو لأنفسكم..

__________________

الله يبارك فيك شهد22 ويجزاك خير....

بس نقعد برووحنا اسبوع اسبوعين بالكثير ثم ترجع لأمها يوم يومين زيارة وترجع لي هذا الوضع اللي اعرفة...
بس السفر اقل رشي 20 يوم يعني حتطووول عن مامتها .....وهذا سبب تخوووفي بس
ويعطيك العافية ...

بس ماقلتولي اش ممكن نواجه مخاطر قلت لكم ماقد سااافرت انا والله !! ومن وشوا نحذر!!!!!!

__________________

ترى يا خوي..لو تبي أيييييييييييييييييييي معلومات عن ماليزيا أنا في الخدمممممممممممممة.....تراني قضيت من عمري سنين فيها و مر علي حوالي 10 سنين عليها...يعني بلدي الثاااانية...لو تبي اي معلومات أنا في الخدمة...بس ترى رح تلقون كثير عرسان و عوائل عربية هناك يا كثرهم ما شا ءالله..بس برضه ما يخالف..ماليزيا فعلا بلد حلوة للسياحة...بس أي شي تبي تستفسر عنه أنا ف يالخدمة..سواء من أسعار..إلى افضل الأماكن..أو محلات تسوق..أو إيش الأشياء الي عليك تتجنبها أو.أو أو أو أي شي تراني في الخدمة......

بس بالنسبة لكيف تتصرف معها...اتمنى الاعضاء الباقين يفيدونك.

و السلام...

SALAM123
كلك ذوووووق والله وان شالله مايحصل لنا اللي حصل لكم

راوني ....

والله في امس الحاجة لخدمتك تكككككفي.........

اولا كم يمكن تكلف ...بالريال....تذاكر(قالوا لي انها تكلف 3500 تقريبا ذهاب وعوده صحيح؟)

وكم احسب حسابي في الفلوووس ؟؟؟؟وهل اعتمد على بطاقة الفيزااا ام اخذ كااااش؟؟؟؟؟

ثانيا اش رايك نروح عن طريق مكتب سياحي وندخل برنامج سياحي والا نسأل ونشوف كتيبات وارشادات وبعدين نسافر هناك ونحجز ونتمشى بدون خدمات المكاتب(هذي النقطة ضرورية)

وبعدين الله لو تقترح برنامج سياحي لنا واهم المواقع لحلوووه والغابات والجزر هناك ررررراح تفيدنا والله كتيررررر. ..

وهل هناك سرقات في الفنادق مثلا او في المواصلات وزحام ومضايقات ....

وكيف سوف نأخذ انا وزوجتي راحتنا (خاصة وحنا محافظين ...هي بالعباية يعني) هل يوجد اماكن خاصة غير الفنادق وبعض المنتجعات يعني في الملاهي كيف نتصررررف وفي الشواطئ تري من جد محتاااار في ذي النقطة وانا اغااااااااار على زوجتي من نسمة الهوووووووووووووا

وشهر واحد ميلادي كيف هل سيكووون برد هناك ....لا ن زواجي بعد ثلاث اسابيع ان شالله قررررب ويمكن نجلس 20 يوم ان شاااالله .... وماهي الأغراض الضرورية الخاصة التي نحملها معنا الى هناك...

هذي استفساراتي وانت وعدتني بالإجاااابة فلا تخيبني ويجزاااك الف خير والله.....

السلام عليكم و رحمة الله و بركاته..أول شي أعتذر يا خوي عن تأخري..و ذا كان لأني كنت أجمعلك كل شي...و لأنك طلبت برنامج سياحي لك..و أنا تشرفني خدمة أي شخص..
و أنا عند كلمتي...


الصراحة يا خوي فاجأتني بهاذ السؤال؟؟؟و شلووون باقي على شهر عسلك 3 أسابيع و انت لساعك ما عرفت سعر التذكرة؟؟؟المفروض هذا اول شي تسويه من أول ما قررت تروح ماليزيا..يعني المفروض على طول تتصل بخطوط الطيران و تسألهم السعر بالضبط....وين همتك يا عريس؟؟؟؟؟؟؟
بس الي سمعته صح هذا هو سهر التذكرة في مواسم السياح و شهر الحج...غير كذا بتكون التذاكر أرخص...و هذا الكلام عن الدرجة السياحية...بس يا خوي برضه اتصل بخطوط الطيران عشان تعرف السعر بالضبط..لأني ما أعرف انت وين بالضبط...
حسابك في الفلوس على حسب ميزانيتك الي انت محددة..و الحدود الي انت حاطتها في الصرف....و هل تعتمد على بطاقة الفيزا؟...اقولك لا تعتمد في كل شي على بطاقة الفيزا..و رح أقولك ليش بعدين..تستخدم بطاقة بنك لسحب كاش بين فترة و اخرى..بس انتبه الكاش لا يتنشل منك...و رح اوضحلك كيف في أسفل ردي

و انا أقول لا لا لا للمكاتب السياحية الاستغلالية...الأفضل ان يكون لك انت برنامجك السياحي بعيد عنهم..كان يجونا اقارب و معارف للسياحة في ماليزيا عن طريق هاذ المكاتب..و كنت أحزن عليهم يوم ما اعرف المبلغ الي دفعوه..بس أقول احسلي اسكت لا يقولوا بخل مني.....يعني سواء شفت السعر معقول او لا الأفضل يكون ليك انت برنامجك السياحي عشان لو فكرت تطول هنا أو هناك أكثر من المدة المطلوبة ما تلاقي شي يعيقك...و كمان دام ان في أحد يعرف المنطقة و قالك ع الأماكن احسن توفر و ما تلجا للمكاتب السياحية.

حاضر رح تلقى البرنامج السياحي و الأماكن الحلوة في أسفل ردي...

رح أوضحلك المحاذير...في اسفل البرنامج السياحي....

الصراحة يا خوي...في الأربع سنين الماضية كثررررررروا العرب في الشواطئ الماليزية....يعني وين ما تحط عينك تلقى عوائل عربية..هذا طبعا بيكون في موسم السياح بالصيف و إجازة الحج...بس كونك بتسافر في موسم مو بموسم السياح..فأعتقد ان الوضع حيكون أحسن كثير..يعني يا رب يكون لك مريح..و تسأل كيف رح تكون الملاهي؟؟؟ يا خوي عايدي..ما فيها شي تروح انت و مراتك هنا و هنا..ما فيها شي...

ماليزيا جوها استوائي طوااااااااال العام يعني ما يتغير أبد أبد..و هاذي العادة و درجة الحرارة تتراوح ما بين 23 ل35...بس تتغير من ناحية غزارة الأمطار يعني تجيلها شهور أمطارها غزيييرة و احيانا كانت تمطر أرع مرات باليوم كل مطرة أغزر من الي قبلها...بالمناسبة الفترة الي حددتها 20 يوم مناسبة جدا...
و ما هي الأغراض الضرورية...
أقول بناء على كلامي السابق لازم يكون معاك شمسية(مظلة) عشان ما ترجعوا كل يوم الفندق مبلولين يعني المظلة شي ضروري جدا في رحلتك لماليزيا ..و في مظلات تنباع تكون صغيرة يعني تنطبق على بعضها عشان ما تكلفك عناء الحمل..و خفيفة بعد...بس ترى هاذي في العواصف و الأمطار الغزيرة الي تكون الريح فيها قوية ما يمشي حالها..يعني في الشمس و المطر العادي..حلوة
بس ما يخالف انك تجيب شمسية كبيرة و قوية..عشان تقضي مع حبيبتك أمسية و انتم تمشون تحت المطر تحت مظلة واحدة تلمكم و انت لافف ايدك عليها..و تقولها كلام حلو..ترى صدقني إن شاء الله ما تنسالك اليوم هاذا أبد ...بس هذا يعتمد على شطارتك في الكلام...بس خرجات المطر ليها تحذيرات رح تلقاها في الآخر مع المحاذير...
و ايش بعد تاخذون...اي اي...لا تنسى الكاميرا طبعا عشان تتصورون و تصورون المناظر ...و ما في مانع لو طلبت من شخص انه يلتقطلك صورة ..ترى الناس في ماليزيا ما تمانع..و غير كذا جيب اغراضك الخاصة بأي سفر..و لا تحمل هم

إن شاء الله بكون عند كلمتي لك...و هاذي اعتبرها هدية مني للعرسان الجدد...و إن شاء الله تعجب زوجتك العزيزة.
و لو عندك اي استفسارات ثانية أنا بالخدمة....


إي نجي الحين للبرنامج السياحي...و أنا خليته لك...كوالالمبور_ جنتينج_ بينانج أو لنكاوي (أو الاثنين) _كوالالمبور...بس يا خوي قلي إذا ودك تروح أكثر من منطقة فيها شاطئ بحر مثل ما أتا خططت لانه المنطقتين حلوة...و قولي وش تحب بالضبط..لو عندك ملاحظات ع البرنامج...أنا بكتبلك البرنامج..و بكتبلك بعدين الأماكن و نبذة عنها عشان انت تختار الي يناسبك..و أي استفسار أو ملاحظات أنا بالخدمة...

أنا رتبتلك المدة في كل مدينة بناء على ال20 يوم الي قلت انك رح تقضيها و بناء على المدة الي أشوفها مناسبة لكل منطقة..

كوالالمبور رح تجلس بيها 7 أيام..جنتينج يومين و ليلتين..و بينانج أو لنكاوي 4 او 5 أيام...و بقية الايام كوالالمبور ثاني..ترى كوالالمبور فيها الكثير من الأماكن...

إي نجي لكوالالمبور...
1-(البرجين)طبعا..أول مكان يقصدونه الناس يوم ما تخطي رجلهم ماليزيا..هو البرجين المشهورة بيهم ماليزيا...و بين كل برج و الثاني في سوق معروف باسم الK L C C بالعربي كي ال سي سي..هذا السوق كان أكبر سوق في ماليزا قبل حوالي 6 او 7 سنوات بس الحين صار 3 أو رابع أكبر سوق في ماليزيا...السوق حلو..و ليه ادوار كثيرة..و في آخر دور فوق يوجد مصلى و عيادات و مطاعم لو جعت..
تحت هذا الدور بحوالي 3 أدوار رح تلاقي ركن أكل..بس ما اعتقد انك رح تحبه كثير..لأنه كثير منه أكل ماليزي..و الي حسيته انه العرب ما ناسبهم كثير الا قلة قليلة منهم.

إي معلومة ما يعرفونها معظم السياح..هو السور الموجود بين البرجين...شوف رغم السنين هاذي كلها الي قضيتها في ماليزيا ما رحته..و لشان تروحوا لازم تكون عند السور الساعة ال7 صباااحا..و ياخذون عدد محدود فقط من الناس..عشان لا يتضرر البرجين من الثقل الزايد.
و كوالالمبور فيها هاذي الأماكن اختار الي يعجبك انك تزورها...و انا كاتبة نبذة عن كل مكان.

2-(KLCC)..و هذا مثل ما قلتلك..انه سوق..بس خارج السوق و بالتحديد في أول دور مو بالدور الأرضي رح تلقى نوافير حلللوة في وسط بحيرة صناعية..بس ترى النوافير ما تشتغل عادة في الصباح تشتغل بالمسا..و في هاذي

المنطقة رح تلقى الكثير من الكافيهات تختار الي يناسبك و يعجبك..و عادة الناس يزورون الK L C C في اكثر من يوم لأنهم صعب يخلصونه في وقت واحد..و انت ممكن كل كم يوم تروح تقضي فترة الصبح في هذا السوق.

3-(حديقة الطيور)
4-(حديقة الفراشات)
5-(حديقة الحيوانات)اممم في في كوالالمبور..حديقة طيور و حديقة فراشات..الصراحة هاذي في ناس عجبتهم و ناس مو كثير..لأنه ما ادري وش السبب تجي أيام تلاقي الطيور مختبئة أو بالأصح موبظاهرة..و أيام لأ..و الفراشات كانت حديقة أكثر من رائعة قبل 10 سنوات لكن اختلف الوضع هالحين...و عشان ما تزعل رح أقولك في حديقة حيوانات طيور و فراشات في منطقة ثانية اسمها منطقة(تايبنج) و تقع بين بينانج و الطريق السريع الموصل إلى كوالالمبور...و تقريبا تاخذ ساعة و نص من بيننج لهاذي المنطقة...و الناس قالوا ان الحدائق هناك جميلة جدا..بس للحق أنا ما رحتها..
إي ملاحظة لو تبي تروح أي حديقة من الحدائق..أنصحك ان الجو ما يكون مشمس بشكل كبير يعني اختار الأيام المناسبة عشان ما تتعب بنت الحلال..و إذا ما قدرت الأفضل انك تجيب و ياك من هاذي المظلات الصغير الي ذكرتلك هي .و الأفضل تروح لحديقة الفراشات و الطيور في الصباح عشان يمديك تتجول في أماكن ثانية بعدين..

6-(الشلالات)....رائعة جدا جدا...أنا رحتها...بس المهم انك تروح الشلالات (الكبيرة) و اسأل الفندق انهم يخصصونلك تاكسي يوديك ليها..بس لا تنسى تاكد ع السائق يوديك الكبيرة مو الصغيرة الي تلقيها قدامك بواحد من الشوارع الجبلية هاذي لا مو هي المقصودة و أكد ع السائق إذا وداك الصغيرة انت ما رح تنزل فيها...الشلالات الي أقصدها كبيرة و تحتاج تطلع و تنزل وسط الأدغال لين تلقاها..ورح تلقى أكثر من شلال غير الجداول الرائعة..ترى مويتها حلوة كثير و باردة جدا في العادة و غير الأحواض المائية ..و صوت الشلال الراااائع خصوصا لو كان كبير....بس انتبه جدا إذا كنت تطلع فوق صخور موجودة ع الماء لان بعضها بتكون غير ثابتة..فقبل ما تدوس على وحدة اتاكد انها ثابتها بأنك تهزها شوي برجلك قبل ما تحط رجلك بالكامل عليها..و عادة الصخور الي لونها فاتح بتكون زلقة جدا فانتبه (و انصحك لا تشرب من الماء بناء على نصيحة طبية..بس الصراحة أنا شربت لأني ما قدرت اقاوم) ..و الأفضل انك ما تشرب...يعني بالمختصر المفيد رائعة جدا جدا الشلالات بماليزيا...

7-(البولنج)...لا تقول أنا مو من رواد البولنج...هذا البولنج رررررررراااااااااائعععععععع بمعنى الكلمة..و ما رح أقولك ليش..لين انت تشوفه و تعرف السبب...بس لا تروحوا بالنهار لأنه ما حتلقيه بالروعة الي أنا أقصدها..رح تلقاه شبه عادي...روحه بالليل..لمن يطفوا الأنوار الي فيه..و هم عادة يطفوا أنواره أبدر من أي يوم لمن يكون اليوم أحد..فاتاكد ان الأنوار مطفية قبل لا تتدخل افضل..لا تستفسر أكثر لأني ما أريد اخرب عليك المنظر ...و يا رب يعجبك...

8(شاينا تاون) المنطقة الي رح تلقى فيها تجمع الصينيين..هاذا لو انت ما عندك مانع تسير في المناطق الشعبية...بغض النظر عن شكلها...و ترى يبيعون فيه (أبو فروة) لو كنت تحبه..و يا رب تطلع حباته لذيذة و هو في الغالب يكون كذا و نادرا ما يكون العكس...

9( بوكيت بنتانج) و هو شارع للتمشية في الكثير من الرسامين والفنانين و الباعة..و المطاعم و الكافيهات..و محلات الملابس..و في 4 أسواق في هاذا الشارع..يعني يبسط للتمشية بس روحه يوم السبت و الأحد و في المسا و الليل موبفترة النهار..و هذا في موسم السياح يسمى شارع العرب..لكثثثثرة العرب الي يكونون فيه و المقيمين في فندق الماريوت الموجود في هذا الشارع..بس إن شاء الله وقت ما انت تروح يكون الوضع مختلف..

10-(سانوي) و هاذي منطقة تقع في كوالالمبور..بس لها اسمها الخاص لبعد مسافتها شوي عن قلب العاصمة...و هنا رح تلقى الملاهي المائية و العادية..الصراحة حلوة الملاهي..و لهاذي المنطقة فندقها الخاص المرتبط بهاذي الملاهي...حلو لو تقضولكم يومين و لا ثلاث هناك...و على فكرة هاذي المنطقة ليها سوقها الخاص...و هو بعد كبير و حلو...

10- (الأسواق) في أسواق كثيييرة بكوالالمبور..بس انا رح أذكر منها الجيد و الحلو...

أولا سوق: (ميدفالي ميجا مول) لو قلت(ميجا مول فقط أو ميدفالي فقط للسائق رح يعرف) و هو اكبر سوق في العاصمة..و الدور الأرضي في المطاعم..و على اطرافه في الدور الثاني اظن رح تلقى مطاعم و كافيهات بس المهم تعرف كيف توصلها..بس قبل سنتين طلع سوق ينافسه في الحجم و هو سوق

(تايم سكوير)هذا السوق جديد..و كبير جدا جدا ما شاء الله...و التسوق بدأ يزدهر فيه..

ال(KLCC...ذكرته لك في السابق..و هو حلو بس الزمن غيره و صار الأسواق الي ذكرتها لك فوق أكبر منه...

(سوناي وانج) هذا السوق اسمه المكتوب عليه يختلف عن طريقة نطقه..و الطريقة الي أنا كاتبتها لك هي الطريقة الصحيحة للنطق لشان يفهمك سواق التاكسي...و هذا السوق مو بحق تمشية هذا السوق يبيله تنبيش و مشي و ما فيه كراسي للجلوس...بس أسعاره معظمها رخيصة...بس ترى مو شعبي...و هو متصل بسوق آخر اسمه (بي بي بلازا) بس ما انصحك بهاذا السوق مافيه شي..

(سوجو) و هو سوق حلو..بس مو مثل الأسواق الأربع الأولى...



اعذرني يا خوي رح اكملك البقية غدا أو بعد كم ساعة إن شاء الله...الحقيقة تعبت من الكتابة و يا رب اتكون راضي عن المعلومات و أي سؤال أنا في الخدمة