أول طبخه سويتها بنفسييييي بدون مساعده إذا ما خانتني الذاكره أعتقد بيض مسلوق يوم كنت بالرابع الابتدائي أذكر تعلمناه في حصة التدبير المنزلي و بعدين رحت البيت طبقت عاد في هذاك الوقت أنا كنت متحمسه للطبيخ و أحب أطبخ عكس الحين ما أحس عدت أستمتع بالطبخ يعني أذكر إن يوم كنا صغار أبوي الله يخليه كان دايم (و إلى الآن) يصحى من بدري يعني ما تجي الساعه 8 إلا و هو صاحي و كنا أيام الخميس أنا و أخوي اللي أكبر مني كمان نصحى بدري فكان أبوي دايم يحب يحضر لنا فطور و إحنا نساعده يعني نسوي سندويشات و شاي و كاكاو و بيض و بانكيك و كورنفليكس و حركات و بعدين لما نخلص أمي تصحى و تقول لنا أفطرتوا؟ نقول لها ايه تقول لنا طيب ليش ما صحيتوني أجهز لكم الفطور؟؟؟ يقول لها أبوي ما يخصك انتي أنا و عيالي ننجاز ما بعضنا و منها صارت عاده إن يوم الخميس احنا و أبوي اللي نحضر الفطور............أيام حلوه
أذكر كمان إني كنت دايم أتليقف على أمي بالمطبخ و أنا صغيره أبي أساعدها و كانت دايم ما تعطيني غير الأشياء الممله أسويها يعني مثلا مسويه مهلبيه و تعالي حركيها لا تلزق (و نفس الحكاية للباشاميل) أو هاتي الطحين و رجعي الحليب للثلاجه و ارمي قشور البيض في الزباله و من هالسوالف

________________
زهرة تراني مره سويت نفسك نسيت أحط بيكنج باودر و طلع الكيكه ارتفاعها 1 سم أذكر يومها صابني احباط و ضاق خلقي مع إن أهلي كانوا يقولون لذيذه و الله صحيح قصيره بس لذيذه و مدري أيش يحاولون يجاملوني ما كان غير أخوي اللي أصغر مني يقول وش ذا؟؟؟؟؟؟؟؟؟ هذه كيكه ولا قرص خبز؟؟؟؟؟؟؟؟؟؟؟؟؟؟؟( فيه أحد يتفق معي إن الإخوان الصغار ثقيلين دممممم؟؟؟؟؟؟؟)

__________________