انا برضه مش فاكرة أول طبخة عملتها لكن فاكرة موقف محرج فى طبخة عملتها وانا فى الاول الثانوى .كان عندنا ظروف مرات خالى بتولد وماما معاها وانا مطلوب منى اعمل ملوخية وفراخ كنت شفت ماما بتعملها واعرف المقادير والطريقة والمشكلة كمان ان خالى هيتغدى معانا يومها وهو لا يرحم وينتقض اى حاجة المهم الوصفة مشيت تمام لغاية خطوة الثوم والكثبرة (التقلية) طلبت من اخويا(6) سنوات وقتها انة يدق الثوم علشان ينعم (لم تكن الكبة اخترعوها لسة) المهم قعد يدقدق شوية وادانى الثوم علشان احطة فى السمن وحصل وبعدين حطيت التقلية على الملوخية وآآآآآآآآه التوم نصفة صحيح زى ما هو تقريبا .جبت المغرفة وقعدت اصطاد التوم من على الوش وانا طبعا بابرطم بكلام من نوعية (هو الواحدة ما تعرفش تعتمد عليك فى حاجة ابدا) وطبعا الكلام موجه للاستاذ اخويا المبجل .لكن باقى اليوم عدى على خير ونلت اعجاب خالى بالاكل ودى كانت شهادة منه اعتز بيها لغاية الان.