معليش بخش بالموضوع لأنه اعجبني أسلوب حياتكم مقارنة بنا
أول شي ماشاء الله عليك تبين تفطرين الرجال.. وبعدين من حق الرجال يزعل تاركه الليلة اللي قبل من دون عشاء ومستغربة ليه زعلان ..
ثانياً صعبة أنه يرد عليك قدام الوالد وأصلاً هو زعلان منك ماهو من الوالد فطبيعي إنه يتقبل منه ولا يتقبل منك
ثالثاً واعذريني مالك حق ترفعين صوتك عليه قدام الوالد ممكن نظرة منك كانت تكفي والا حتى ابتسامة تبرده على طول
رابعاً وهو قالها عند الباب ارفعي صوتك علي أكثر يعني أنه اللي مزعله أكثر شي هو رفعة الصوت
خامساً وماشاء الله عليكم تمشين معاه حتى عند الباب وبعدها تنتظرينه في الشباك علشان تشاورين له بيدك والواحد منا اذا صحيت معاه زوجته الصباح أكثر حاجة تقوله شوف الفطور في المطبخ ولا تنسى تجيب معاك خبز ولبن على الغداء ( هذا اذا صحيت أصلاً تسوي غدا لكن زين فيه خبز ولبن ممكن يتغدى بها ) وبعدين وقبل اصلاً ماتكمل إلا وهي نايمة
فيا أختي اللي صار بينك وبين زوجك شي بسيط وممكن يتصلح وبتكبرين في عينه لو اعتذرتي له قدام الوالد لأن أكثر شيء آلمه أنك رفعتي صوتك عليه قدامه والرجال بتكبر زوجته في عينه لما بتعتذر له وحكاية أنه اذلال أو انكسار فلا تنسي يا أختي أنه زوجك وأعز ما عندك في هالدنيا
الله يسعدكم ويخلي أيامكم كلها ود واتفاق

__________________