شوك قلبي
انا كتبت امس اني اعتذرت له بالسياره واحنا بطريق السوق
وهو سبني ودعى علي وطنشت
بعدين تسوقت بحسابي (يعني ما اخذت حقي زي ماقلتي)
ولما عطيته الفيزا حقته شكرته مارد
واليوم سويت الفطور كالمعتاد ما اكل ولا لقمه

ما اخذت حقي لا ماديا ولا ادبيا ولا معنويا
ترى لي شهر اتلطش مو الحين بس
ولأول مرة بحياتي احط له الاكل على سفره لحاله

كنافة يا حياتي أنت
إلا أخذت حقك كامل مكمل
من ركبتوا السيارة إلى أن تسوقتي ورديتي الفيزا!
المفروض خلاص كذا صرتوا صافين
مو تجين تكملينها اليوم وتخلينه ياكل لحاله وشايله صينيتك لحالك
ترى هالحركة بالذات قياساً على اللي عندي تخليهم يحقدووووون بزيادة
ما يطيقون هالحركة.
شوفي وفاء وش صار لها لما حلفت بهالشي !

__________________
.
هناك من يتذمر لأن للورد شوكاً، و هناك من يتفاءل لأن مع الورد شوك.

عارفه انا ليش سويت كذا
لانه قال لي مثلي مثل الخدامه بعقد
ويجدد العقد متى ما بغى
فعاملته وكأني فعلا خدامه
احط الاكل وامشي
بس ماتكلمت ولا كلمه


هو عطاني طراق قوي بذكرى زواجنا
وضخم لي زله غير مقصودة
فأنا بعطيه ذكرى جميله لعيد الفطر
بستمر بصمتي وبلم اغراضي لبيت اهلي زي ماطلب
ومتأكدة ماراح يتهنى بسفرته والوضع بينا كذا
وهذا هدف من اهدافي
الا اذا هو فعلا عمل حركة تبين تقديره لي هاليومين
هنا بحاول اطيح الحطب
مع اني قلبي ضااااااق والله العظيم
حتى اني اليوم مبسوطة انه زعلان
بالعادة احاتي واتنكد.. الحين أقول قلعته
ترى الشتايم مو شي بسيط خصوصا اذا استمرت
لكن الله يصلح الحال
دعواتكم

المشكلة انك تكتبي ( سبني ، عايرني ، تكلم عني و عن أهلي ..... إلخ )

لكن ما تكتبي النص الأول ..
و ما تقولي انت ايش عملتي ، و خلاه يقول و يعمل و يفعل كذا ؟

مثل موقف الفطور ، كتبتي فوق اليوم سويت الفطور كالمعتاد ..
و ما أكل و لا لقمة

مع انك ما سويتي الفطور كالمعتاد ..
تركتيه يفطر لوحده كأنه ( سواق و لا عامل و لا شغالة )
و رحتي تفطري انت و بنتك مع بعض ؟

الله يصبر زوجك عليك يا أخت كنافة

سبق جبت خدامه
زوجي بصباص وملقوف
ومتعود ياخذ ويعطي مع الخدم
ولو اقول له خلي التفاهم معي يزعل
موضوع كبير صعب ادخل بتفاصيله




والموضوع مافيه حلقه مفقوده
هو ركبه شيطان بعد اللي صار بتوصيل هديته
حكيته بالتفصيل في موضوعي
وضخم زله غير مقصوده
ولقاها حجه يردد كالعاده: ماتستاهلي


انا اتمنى اطلب شي
وزوجي يقول: مامعي فلوس.. مااقدر
هذا عينه قويه.. يقول ماتستاهلي
هالشهر سمعتها منه يجي 4 مرات
على اشياء تااااافهه
مستقعدلي
وانا اذا بشوف نفسي
طول الشهر اخدمه
اتصل اسأله ابش مشتهي عالفطور
وبالليل اشاوره بالسحور
عملت مأدبه كبيره لاهله
عزم اصحابه 4 مرات سحور فطور وقمت بالواجب
يغلط علي وارضى بسرعه
بكل مشكله انا اللي اتنازل
حتى العلاقه الخاصه صاير اناني فيها
جاني مرتين قبل اذان الفجر بدقايق

ولما عاتبته قال اعوضك بعدين
ماهمه الا نفسه وراعي كلام
يدور الزله عشان يقول ماتستاهلي
طايح لي بهالجمله
اذا زوجته ام عياله ماتستاهل من اللي تستاهل؟

انا ما احط بذمتي.. بس كلمته قويه
والاقوى تلطيشه بامكاناتي الماديه
عينه قويه بزيااااااااده
ولما جاب لي هديه كبر راسه
ودايم يردد: انا مافي حرمه لها منه علي
كل شي بفلووووووووسي
الله ياخذ الفلوس
التربيه قبل المال يا جماعه

اجل قايل لي بنص رمضان بناخذ عمره ونرجع
وانا بكيت من الفرحة وبست راسه
وطلبت من امي تمسك الاطفال
وتجهزت وحددنا اليوم
صار شي تافه
مرض ولدي وصرخ علي لاني تاخرت بالدوا
بهذلني واني مو ام ومو كفو تربيه
قلت له ما اسمح لك تغلط علي
قال هذا اللي فالحه فيه المرادد
نمنا وصحينا طبيعي
بعد الفطور سألته عن رحله العمره
قال كنسلت كل شي
ماتستاهلي بعد اللي عملتيه!!
قلت مين غلطان انا والا انت؟
قال حتى لو اغلط فيك المفروض تسكتي
وربي انزل السكينه علي ذاك اليوم
وقلت براحتك يمكن خيره
رغم اني ماشفت مكه من تزوجته
هذا موقف عابر
فاض فيني
وصار رضاه وزعله واحد

نصيحه لك كنافه للايام القادمه ،لاتاخذي قراراته بكامل الجديه وتصدقيها وتبني احلامك عليها..لاترادديه ،،طنشيه ،،وسايسيه وقولي له سم وآمر وبالاخير سوي اللي براسك..لاتحومين حوله كثير بتتعبين لانو زي ماقلتلك شخصيته للاسف شخصية طفل غير ناضج

الحين وش هدفك من الحياة الزوجيه؟

تبين تستمرين ولا تبين تتطلقي؟

تصرفاتك تصرفات واحدة لاتريد تستمر ولاتريد تتطلق

طيب ليش قاعدة بالنص!

__________________

زوجك غلطان من راسه لرجله

طيب وبعدين؟

تريدينه ولاتريدين الطلاق؟

مافي شي اسمه يتغير

تريدينه مثل ماهو ولا لا؟

اذا كان فيه تغيير فأنت اللي لازم تتغيري

لاتغيري من مبادئك وقناعاتك

وانما غيري التكنيك والاستراتيجية وردة الفعل الداخلية لديكي

__________________