سبحان الله طليقتك غريبة مو مثلنا احنا المطلقات نلوم أنفسنا ونجلد ذاتنا ونحس بتأنيب ضمير يذبح هذا واحنا ماخنا أزواجنا

صراحة أخوها المفروض يحمد ربه انك سترت عليها ولافضحتها

انا بنتي مصروفها الف ريال
احيان ماخذ من مصروفها عشان اقضي لها

اعتبر مصروفها امانة في رقبتي ولا أفكر اخذ منه شي

وطليقتك موظفة وتطلب زيادة مصروف مافيها شي لو زادت على مصروفهم 200او 300


قبل اسبوعين اخوي يسولف لي عن الي يطلق اكثر من مرة فحكيته عن قصتك وكيف انك سترت عليها وطلاقك الاول كان بسبب خيانة طليقتك والثاني انها ضربت أطفالك
احيان مايكون عيب في الرجال يكون العيب في طليقاته

صراحة الحل الوحيد انك تزوج كفاية تضيع سنين عمرك كفاية عيالك يجلسون مشتتين

تزوج واستقر وقتها طليقتك تموت قهر

الله يعوضك عاجلا غير اجل
اما طليقتك اسال الله لها الهداية

يصراحة مااعرف سبب طلاق اخونا الوحيد لكن هل طلاقك الثاني اللي بسبب ضرب طفلك كانت امهم ام زوجة اب؟ ا

طلاق اخونا الوحيد الاول بسبب خيانة طليقته
وتزوج وزوجة ابوهم ضربت ولده بطريقة وحشية

صحيح اختي فرح
بين الرجال وزوجته حاجات مايعلم فيها الا الله
وماالوم الناس لو اخذوا فكره عني ماهي زينه لان لهم الظاهر والخافي مايعلم فيه الا الله
وانا حاليا مايهمني قهرها كثر مايهمني اني فعلا محتاج للزواج من كل النواحي وخصوصا بعد ماصاروا عيالي عندي
ولكن هالمره راح اختار صح او بالاصح احاول اني اختار صح لاني تعبت من المشاكل ونفسي استقر مثل بقية الخلق

كل ردودكم على عيني وراسي واعتذر على عدم الرد على كل التعليقات بشكل منفرد
لكثرة الردود بارك الله فيكم وجزاكم الله الف خير

بخصوص اللي يقولون اتركها بحالها ولكن ابيها هي اللي تتركني بحالي وتبعد عني
خليني اعرف اعيش مثل الناس امرضتني معاها

المهم اخر الاخبار اتصل علي اخوها اليوم
وجاب شي جديد اول مره ينطرح

اتصل اول شي يسلم ويسألني اذا فاضي قلت ايه فاضي قال ابي اقولك شي بس ابيك تكون هادي وانا مجرد ناقل لرساله من ام فلان اللي هي طليقتي
قلت تفضل
قال ام فلان تقول معك خمس ايام تروح للمحكمه وتكتب تنازل عن العيال
والا خذ العيال عندك على طول
المهم خليته يكمل كلامه وانا مستمع حتى خلص
قلت اول شي كلمة تنازل هذي بحد ذاتها عيب تبيني اتنازل عن عيالي
قال لا قصدها تنازل رسمي عن الولايه
قلت طيب انت شايف اني سفيه والا مدمن مخدرات والا فيني شي عشان تحجر علي وتنزع ولاية عيالي عني
قلت طيب وش الهدف
قال تقول ماابي اربيهم واذا كبروا يجي يقول عطوني عيالي
قلت طيب اللي اعرفه في حالة ان الوالدين اختلفوا على الحضانه ساعتها يكون اللجوء للقضاء والمحاكم للفصل بينهم والشيخ يقول الحضانه مع مين
ولكن انا تعاملت بكل اريحيه وخيرت العيال نفسهم ولما قالوا نبي امنا وديتهم لكم بناء على رغبت امهم ورغبتهم لاني اللي يهمني في الموضوع ان العيال يستقرون نفسيا
طبعا انا اكلمه بكل هدوء
قلت شوف يافلان تدري ان العيال حاليا عندي , واصلا ماراح اوديهم لامهم الا زيارات اذا حبوا واذا ماحبوا ماراح تشوفهم ابدا
تدري ان البارح رمتهم لي على الباب وراحت وخلتهم وجايني الحين تقول ولايه
على العموم انتم ريحتوني ووفرتوا كلام كثير علي
اخر كلام عندي انها هي البايعه بالنسبه لعيالها وانا الشاري
قال طيب فكر قلت اذا عندك كلام وسالفه غير هالسالفه قلها اما هالسالفه انتهت بالنسبه لي
قلت تدري يافلان وين المشكله قال وين
قلت ان اختك مالها كبير
انتم مجرد ناقلين كلام حتى لو مانتم مقتنعين بكلامها تنقلونه بحذافيره ولالكم راي
وانتهت المكالمه

امحق اخوان طلعوا دراويش وشكل طليقتك رأس ...!

__________________
رَبِّ أَعِنِّي وَلَا تُعِنْ عَلَيَّ، وَانْصُرْنِي وَلَا تَنْصُرْ عَلَيَّ، وَامْكُرْ لِي وَلَا تَمْكُرْ عَلَيَّ، وَاهْدِنِي وَيَسِّرِ الهُدَى إِلَيَّ، وَانْصُرْنِي عَلَى مَنْ بَغَى عَلَيَّ، رَبِّ اجْعَلْنِي لَكَ شَكَّارًا، لَكَ ذَكَّارًا، لَكَ رَهَّابًا، لَكَ مِطْوَاعًا، إِلَيْكَ مُخْبِتًا قَلْبِي

بالعكس الدرويش على نياته وتدري انه يسوي الشي لان هذا عقله
ولكن للاسف اخوانها تخطيطهم للشر بس

اكثر الدعاء والاستغفار
لعلى ربي ينهيها من حياتك بصنع يديها وخططها

__________________
سبحان الله وبحمده

الله يفكني شر خلقه

مرحباً أخي

شفت موضوعك من قبل وكنت برد

بس سألت نفسي سؤال وأسمح لي على ذلك وعذراً

ما الفائدة من آراءنا وأنت لا تأخذ بها ..؟؟

منذ بداية قصتك من أول موضوع لك في المنتدى ومع تعدد مواضيعك المختلفة إلا أني أستشفيت

أنك تكتب لمجرد أنك ترتاح في هذا المكان وهناك أُناس بدؤوا معك وشاركوك قصتك وأحداثتها ومتعاطفين معك جداً .. فأنت تكتب من باب المستجدات في حياتك ومن باب إستطلاع الآراء والدعم النفسي والمعنوي . هذا ما لمسته وأرجو أن أكون مخطئاً والله أعلم

ولكن أحببت أن لا أتأخر عن موضوعك كثيراً وأن أكتفي بالدعاء لك .. أن يصلح الله أحوالك ويوفقك ويريح قلبك ويرزقك السعادة وصلاح أبنائك وأن يجعل أموركم إلى خير