المشاركة الأصلية كتبت بواسطة أفيدوني

حــــــــــــــــلـــــــــــــــــــــــــت ولله الحمــــــــــــــــــــــــــــــــــــــــــــــ ـد



بارك الله فيكم اخواني واخواتي والله يوفقكم ويرزقكم ويسعدكم ويحقق لكم اللي تسعون له ان شاء الله



التفاصيل ( علشان تستفيدون مني ) << اووخص يالفلته


رحت لها الساعه 10 في الليل البارح وكالعاده بين كل اسبوعين اسوي لها زياره , المهم دخلت وسلمت وجلست وجابت لي عصير وحركتات , المهم مديح وحركات ومن عادتي ما اخلي هالجانب , امدح اللبس والعصير والتسريحه وكل شي , المهم سألت عن اخباري وسألت عن اخبارها ومن هالكلام


قربت منها وقلت هاتي يدك , واخذت يدها في يدي وبديت اتكلم , قلت لها انا ما حبيت ادخلك معي من الحين في ديوني وهمومي لكن مجبر اني اعلمك بكل شي , قالت : تفضل , قلت : يا بنت الناس انتي عارفه اني احبك وما راح اقصر معك في شي ولو تبين عيوني عطيتك اياها , قالت : عارفه , قلت : انا وانا وانا ( علمتها بديوني كلها ) وباقي وراي مصاريف الزواج وانتي تعرفين امور الزواج ومشاكله الماديه وانه مكلف ومن هالكلام , وانه ما يرضيك اني اغرق في ديون ما لها نهايه تأثر علي وعليك في المستقبل


انتي طلبتي مني مصروف شهري وقلت لك ابرد بك بس خليني افكر , وانا والله يا بنت فكرت وفكرت وفكرت ولي كم يوم ذابحني التفكير لان ما ودي اظلمك معي


اولاً من ناحية المنطق والعقل , فكرت ونظرت لوضعنا وطلع وضعنا يناقض اللي طلبتيه , لانه مو معقول اصرف عليك وانتي في بيت ابوك , ولو قلتي لي عادي وهذا حقي , ابطلب انا حقوق لي مثل ما طلبتي وكلن يطلب حقه وكلن يعطي الثاني حقه , لكن انا ما افكر كذا لانها مالها داعي تصير هالامور , وقلت لها اوكي ابعطيك مصروف بشرط اني اجيب لك ملابسي تغسلينها واشتري لك اغراض وتطبخين لي ثلاث وجبات يوميه , ضحكَت باستغراب وقالت لو طلبتها مني تامر امر ههههههه ضحكت انا وقلت : لا تحديني وربي لاسويها وانا اعرف انها راح تضايقك هالحركه لان مالها داعي لكن خلينا واقعيين


ثانياً من ناحية الدين , وقلت لها انا رجال اخاف الله ولا ابي اظلمك معي في شي نهائياً وكنت خايف اردك من هذاك اليوم لكن قلت اسأل ومن هذاك اليوم ما نمت اكثر من ست ساعات ( طبعاً هذي صيغة مبالغه شوي ههههه ) بسبب خوفي اني اظلمك معي , المهم اني اتصلت على الدكتور خالد بن سعود الحليبي نائب المشرف العام في مركز التنميه الأسريه التابع لجمعية البر في المنطقة الشرقية


أنا : السلام عليكم .. الخ

د. خالد : هلا وعليكم السلام ..

بعد السلام والسؤال عن الأحوال قلت : انا وضعي كذا وموضوعي كذا ... الخ ( كما قرأتم في الموضع ) وانا في الحقيقه يا شيخ قرأت من أحد الأخوه أن النفقه لا تجب على الزوج إلا إذا تبعته إلى بيته ومكنته من نفسها !! فما رأيك يا شيخ فأنا والله الذي لا إله إلا هو أني انسان عاقل ومتعلم ولولا خوفي من ربي لما اتصلت عليك وسألتك .

د. خالد : بارك الله فيك , الحقيقه انه كما قلت ان النفقه ليست واجبه عليك وخصوصاً انها هي من طلبت تأجيل الزواج من شهر 8 هجري إلى شهر ذي الحجه , اما لو انك انت الذي اجلت الزواج وطلبت منك النفقه , فعليك ان تنفق عليها .

وطلب مني بعض الامور والتفاصيل ووضحتها له , وانتهت المكالمه .



طبعاً قلت لها هذا اللي عندي بخصوص المصروف وانتي وش رايك الحين !! وبالنسبه للجوال ابشري ابغيره لك بس مو الحين خليه لحد ما تتحسن ظروفي .


قالت شوف ( وعيونها فيها شوية دموع ) : الحقيقه ان كلامك مقنع جداً وما اقدر اقول شي بعده ولو جبت لي مصروف تأكد اني والله ما راح آخذه منك لاني بنت ناس واعرف اللي لي واللي علي وماني ردية نفس اضغط عليك وانت حالتك صعبه وترا هالموضوع كان مجرد اختبار ( طبعاً هالكلمه ضايقتني نوعاً ما ) , قلت : بارك الله فيك وتأكدي لو ان ظروفي تسمح ما راح اكون قصرت عليك ولو قدرت واعطيتك مصروف فعلي الطلاق ما يرجع في جيبي لاني كريم وابوي كريم لكن الحاله مستوره ونمد اللي نقدر عليه .


وانا كنت حاسب حساب انه يكون اختبار , بس توقعتك بتختبرين المشاعر وما توقعتك بتختبرين الجيب .


عموماً أنا سقطت في اختبارك اللي سويتيه وبروح ادرس مره ثانيه . ( طبعاً حسيتها خافت يوم قلت هالكلام )


وجلست ساكت ولا قلت شي ولا ناظرت فيها حتى لاني دايم ما انزل عيوني من عيونها وتقهويت بسرعه وشربت شاي واستأذنت , وقالت وش فيك فيك شي , قلت لا ابد ما فيني شي مع السلامه ( طبعاً انا معودها اودعها وداع خاص شوي وهالمره ما سويتها ) وابتسمت ابتسامه مدري كيف وطلعت من عندها .. المهم لحقتني وفتحت باب المجلس وجلست تطالع فيني وتناديني وما رديت عليها ومشيت .


طبعاً قلت بسوي زعلان شوي وقفلت جوالي من البارح لين الحين وهي انواع المكالمات , بس قلت اعلمها ان موقفها ما كان له داعي .


وفقكم الله ولا تنسوني من صالح دعائكم ..