أعطوني حل يفكني من تصرفاتها
بذكر قصتي مع اختي الكبيرة بإختصار
أختي الكبيرة تزوجت قبل عشر سنوات وهي كانت في سن المراهقة وحصلت مشاكل بين عائلتنا
وعائلة زوجها وتم الطلاق بينهم بدون ذنب منها وكان زوجها يحبها لكن أهله ضغطوا عليه لحد ما طلقها
وبقيت عشر سنوات وقد تقدم لها الكثير من الخطاب لكنهم غير مناسبين ورفضتهم ...
وانا اختها اللي اصغر منها تزوجت قبل اربع سنوات من رجل يكبرني ب سبع سنوات كان رجل على قد حاله
لكن الحمدلله فيه خير وطلبت مني أمي وأختي الكبيرة أن ألمح لزوجي بأن يزوج أخوه من أختي الكبيرة
وبالفعل نفذت طلبهم وصرت دايم امدح اختي عند زوجي واقول لو يتزوجها اخوك كان بيصير سعيد حظ
لانها كذا وكذا ....
والحمدلله تم زواجهم من بعض الى حد هنا تمام
لكن المفاجأة اللي ما توقعتها أن اختي بعد زواجها قلبت عليّ وصارت تعاملني وكأني جارتها
ف مره وصلني كلام قالته لزوجها عني ووالله ان الكلام كذب في كذب ومدري وش فايدتها !!!
ومره ذكرت لها عطر رااائع جدا قالت أنا بشتري هذا العطر بس انتبهي تشترين مثله عشان اتميز بعطري
!!!! انا استغربت قلت هالحين اعلمك باسم العطر وتقولين لا تشترينه وقلت :
انتي تعطري عند زوجك وانا عند زوجي وين المشكله !!
ومن ناحية الاطفال إذا تهاوش أحد من اطفالي مع اطفال خواتي تقوم وتقوم الدنيا وما تقعدها
وطبعا ضد أطفالي في كل الاحوال وتلمح بالكلام وتقول بعض الامهات كذا وكذا
والله العظيم مهيب مره ولا مرتين ولا ثلاث كل ما نجتمع تحول جلستنا لنكد وهوشة
أقسم بالله انها ترافب أطفالي مراقبه عجيبة مع انها لاناقة لها ولا جمل
نفسيتي تعبت وكرهت المكان اللي هي موجوده فيه
وزيادة على هذا كله دايم تحرض امي علي وتحسس أمي اني مقصرة معها وأمي تتأثر بكلامها
ومره دخلت عليها هي وزوجة اخوي وهي تحرض زوجة اخوي عليّ من ناحية الاطفال
ما اذكر اني سويت لها شيء سيء الا مره وحده ووالله انه بدون قصد مني وهي (((((مره جاتني
في بيتي هي وزوجها وراح زوجي يشتري عشاء شوي سمعت احد في الصالة ينادي ظنيت
انه زوجي والله اني كنت اظنه زوجي طلعت مسرعه في الصالة والمفاجأة انه طلع زوج اختي
وقتها كنت لابسه تنورة جنز قصيرة وبلوزة حمراء عارية .... طبعا انصدمت ودخلت على طول
فلما عرفت اختي قالت طلعتي له بهذا اللباس ؟؟؟!!!
قلت والله اني مدري انه زوجك ...
طلعت هي راحت لزوجها ولما رجعت قالت وهي معصبة: زوجي قال انه ناداني باسمي
قلت والله ما سمعته يناديك باسمك ... المهم شكلها ما صدقتني ...
ولما عرف زوجي اني طلعت بهذا اللبس جن جنونه وصارت مشكله كبيرة بينه وبين اخوه وطلب
من اخوه ما يدخل الصالة بدون استأذان )))))))
هذي القصة هي القصة الوحيدة اللي اذكر انها بعدها صارت تكرهني كره العمى وتحاول تنكد عليّ
جلساتي مع خواتي ومع امي وحتى زوجة اخوي
تكفووووووووووووووووووووووووون أسألكم بالله العظيم ان تعطوني حل يفكني من تصرفاتها
التعديل الأخير تم بواسطة المجاهد ; 28-04-2007 الساعة 11:16 AM
26-04-2007, 02:09 PM
ضوابط المشاركة
العرض الشجري