السلام عليكم ورحمة الله وبركاته
اشكر كل من انار موضوعي بخطى انامله
فمنكم من انار لي زاوية لم اكن اراها ومنكم من قراء بعمق و ستخرج النظرة المنصفة من نصيحتي و ومنكم للاسف من قفز على السطور بنظرة سطحية وفهم اني ادعو لمغالاة المهر ورفع قيمته والوقوف ضد تيسير الزواج !!!!!!!!!!
اخبرتكم ان اختي في مشاكل مع زوجها من يوم ماتزوجها ....وهي عمرها ما شتكت ولا تتتكلم ابدا لكن نعرف انها في مشاكل من تصرفات زوجها معها المكشوفة امام الجميع و احينا من تعابير وجها وسرحانها المستمر وكأبتها ولما نسألها تقول هذي اسرار بيتي ولا تتدخلون فيها ,,,,وحنا نحترم تحفظها هذا
احيانا يجبها زوجها عندنا فجأة بدون ملابس او شنطة ويتركها عند الباب ويروح بدون حتى مايسلم على ابوي او اخواني و بعدين يجي بعد مدة ياخذها واحينا ياخذ حتى العيال منها واحيانا يكلم اخواني الصغار ويجلس يسب اختي ويتلفظ عليها بكلام مو كويس
واحينا نشوفهم مع بعض مثل السمن على العسل تمشيات وروحة وجيه وسفر
واحينا يعند ويسوي الشي بالعكس مثل اخر مرة ولدت في بيتها وعي ينزلها عندنا تتنفس ولما قربت تخلص من الأربعين جابها عندنا وتركها فترة طويلة بعدين جى خذها .
ومرة اتفق مع أزواج خواتي يرحون مطعم و يتعشون وفعلا اخذنا كبينتين وحدة لرجال وثانية للحريم وكان مبسوط وسوالف معهم وقبل ما يجي الطلب استأذن و اخذ اختي وطلع من المطعم فجأءة وهو معصب ولا احد يدري شسالفة
والمواقف كثيرررة ,,,,,,,,, ولما يسأله احد عن السبب يلف ويدور في الكلام ويحط حجج واهية او يقول كفي انا حر .
واخر مرة هدد بالطلاق
وابوي الحين صار رجال كبير ومريض ومايتحمل .
قالت امي انا بطلع له للمجلس الرجالي واكلمه وشوف شسالفت هالرجال قامت اختي رفضت وقالت (
يا يمه ,,,, لاتنزلوني في عينه اكثر من كذا يكفي من يوم ماخذته وهو يعايرني ابوك باعك لي برخيص)
غير كذا اختي ما اباحت بشي ابدا ومتكتمة على امورها.
وسالفة المهر وتنازل عن الذهب والهدايا هذي حنا ندري عنها من اول ....اهله لما درو عنها في الخطوبة تعجبو من تصرف ابوي وسو هذرة بس كنا مفكرين انهم ينظرون لبوي نظرة اعجاب وتقدير ومثالية وان تصرفه نادر وما مصدقينه
ما توقعنا ان السالفة بالعكس يعني مو بس زوج اختي اللي يعايرها لالالا طلعت اختي طايحة من عيونهم كلهم حتى اهل زوجها
والدليل ان بعد فترة من زواج اختي ....خطب اخوه بنت من جماعتهم وجلسو اهل زوج اختي قدامنا في الزواج يتفاخرون وبمهرها (65000 ) ويتباهون بقيمة ذهبها وهدياها وحنا نفكرهم يشتكون من الخساير
وتونا نفهم الحقيقة بعد هالسنين
حتى ولدها يعاير امه ويقول... امي يجيتي تركبين السيارة سكري الباب بشويش ترى السيارة اغلى منك يقول ابوي
يا اخوان الظاهر ان البيئة الاجتماعية عندهم بيئة تفاخر بمهر العروس وهداياها وذهبها وفلة عرسها يعني السالفة مظاهر وفشخره وتنافس في الامور المادية
هذا اللي فهمناه منهم
ياجماعة والله ان بوي يحط على جهازنا ومهرنا شي وشويات زود من جيبه ويقول هذا حق الله علي هذا غير عطياه في المناسبات وهدياه لعيلنا حتى اذا رحنا وشاف جمعتنا طلع اللي في جيبه ووزعه بتساوي على العيال وهذا من فرحته فينا حتى اذا راح السوق يحسبنا ....ولما راح للحج جاب لكل وحدة فينا قلاده ذهب والله يشهدعلى كذا .
في اليومين اللي طافت حاولت اسحب اختي في الكلام لكن للاسف ماعطتني صورة واضحة وقلت لها كان فهمتي زوجك ان ابوي سوى كذا مع كل خواتي قالت يقول ( اي يبغى الفكة منكم ) المسألة ان تربى على مفاهيم غلط
اختي تبغى شي واحد بس تربي عيالها قدام عين ابوهم تحت سقف واحد ...تقول انا همي عيالي لايتشتتون ويضعون
ولا يفهم البعض اني احارب زوج اختي في موضوعي واصوره بالظالم الجبار.... يشهد الله ماطلنا منه شر او سوء
ولا ابرء اختي ولبسها ثياب المظلومة المكسورة
ولا هدفي اني اكسب نظرة التعاطف منكم مع اختي
كل واحد له سلبياته وإيجابياته وما يعلم الغيب الا الله
انا انبه الأباء لنقطة مهمة ( قبل لاتتنازل عن حقوق بنتك لازم تعرف حقيقة معدن الرجال وطبيعة بيئته وتفكيره ومجتمعه )
لاتظلم بنتك بطيبتك وحسن نيتك
وفي النهاية يجيها كلام مثل زوج اختي ( ترى كلك على بعضك ماكلفتيني غير ثلاثين الف ) اللي يسمعه يقول وارث ملايين ولا عنده املاك ولا راتبه مغطي الحساب ,,,, وهو يدوب يسدد اجار شقته
الله يهديه
هذا كل اللي عندي وارجو تكون رسالتي وصلت لفهمكم والصورة واضحة للجميع
حبيت ابين لكم مسألة مهمة وكتبت قصة اختي كمثال واقعي لكم وليست مشكلة ابحث لها عن حل
واعتذر عن الاطالة .....عسى الله ان يصلح مابين اختي وزوجها ويجمع مابينهم على المعروف وحسن المعاملة
دمتم بود وعافية من الرحمن
25-07-2010, 12:02 AM
ضوابط المشاركة
العرض العادي
