عشان أوضح الأمر قليلاً

أول ما تزوجنا و قبل الغربة ، وعدني بتحسين الوضع مجرد ما نسافر للخارج و اصبري ووو إلخ ..
و صبرت وقتها لإني ما كنت فاهمته و صدقته - كنت هبلة على نياتي - ،
ثم يتحجج بالظروف ..
و مجرد ما تتحسن الظروف يضحك علي بكلمتين حلوييين
و لإني أكره الزعل و النكد و أرضى بسرعة و أسامح ، أنسى بسرعة ..


و يوم سافرنا للخارج ..
وعدني بتحسن الوضع بعد ماتصير شغلة معينة .. و هكذا على نفس المنوال .. لحد ما حفظته خلاص
و أحسه يمشيني بس بكم كلمة .. و أنا هبلة أصدق .. لإني بداخلي حنونة و بسرعة أحزن عليه ..

في الخارج ، قلت له بيوم من الأيام ..
( رجاءً .. من دحين لازم نحسب حساب إننا بنرجع بيوم من الأيام لبلدنا ، و أنا من جد تعبت و تحملت
المسؤوليات كلها في الغربة عشان ظروف الحياة في الخارج .. و إنت عايش حياتك و تلعب و فاضي ..
و ماني مستعدة أتحمل أي - حجج للظروف في المستقبل - من دحين لازم ندبر أمورنا قبل لا نرجع ،،

و رسمت له تماما .. كيف راح يكون وضعنا يوم نرجع من الخارج و ماحنا متجهزين للظروف الي بتواجهنا ..
يعني قلت له ، أحسب حساب من دحين إننا ما راح نستمر في الخارج و مصيرنا نرجع بيوم ..

و أخذت موقف جاد وقتها ، و قلت له .. وقتها ما راح أتحمل و أصبر مثل ما كنت من جد)

و أهوووووه ..
نزلنا و رجعنا من الغربة ، و اللي قلت له في الخارج وقتها .. و دخله من هنا و خرجه من هنا
صار بالضبط .. و أنا اللي بأتحمل النتايج ، و هو أبرد ما عنده ..
بس يتحجج بأي حجة ،، يا ظروف ؟ يا مادري إيش ؟ إلخ
و زوجي شاااااااااااااااطر في التصاريف درجة أولى ..

.
.


و لإني حفظت الموال عن ظهر قلب .. صرت أتغافل و أعيش حياتي
و هو عاجبه و مرتاح و متطمن ..

لإنه يا زوجته تتحمل المسؤوليات ، و لا بنجلس كذا ( محلك سرّ )
و ما أبغاه يتعود إني أنا اللي أشيل الحمل و الهم ..

هو في الغربة كان مرتاح و أنا اللي تعبت و انهلكت هناك ..
و ما راح أتحمل نتيجة ( كسله هناك و طيشه )


إيش محتاج أكثر من كذا راحة و حرية ؟؟؟؟
<- ( وجه مقهور و غضبان )


علشان كذا .. أنا ما أبغاه يتغير و لا أبغى أتكلم معاه ، براحته ..
أبغى أغير من نفسي ، أبغى أتعلم كيف أكون أنانية مثله ..
أكون عديمة المسؤولية .. أكون وحدة همها نفسها و ولدها و بس ..


أبغى أعيش كأني عزوبية .. لحد ما يحس شوي و لا هو بنفسه بيبني حاجز جليدي..
لإني إذا صابني التبلد ، فمافيش أحد ( أكثر بلادة و لا مبالاة مني )
خليه يسأل أمي


أول خطوة .. ما راح أتصل عليه أبدااااااااااااااا .. و مسحت رقمه من جوالي
بس المشكلة إني حافظة رقمه ..

ثاني خطوة .. بأردد كل شوي في داخلي ،،
أكرهك ، أكرهك ، أكرهك ..

ايوة ، فيه نقطة ايجابية فيه ..

إنه زوجي قلبه طيب و حنون و يقول إنه يحبني ..
بس للأسف ، أبرد من الثلووووووووج كلها و كسول و سلبي و يكره القيادة و يكره المسؤوليات ( يعني رجل جنوبي بإختصار )

بس إذاا زعلت و خلاص في الأخير بعد تقريبا - شهر من السكووووت و التطنيش عن أي أمر -
أحسه يعطيني بس زي ابرة المخدر ، يعني يهديني بكم كلمة حلوة و أنا أصدقه و أرضى بسرعة ..

دايما أعذاره ، نفتح صفحة جديدة ..
قلت له ، الدفتر خلصت صفحاتها من كثر ما نقلب الصفحات

أحس لإنه تعود إني أرضى بسرعة و ما أتحمل الزعل ..
خلاص يقول بداخله ، مصيرها ترضى ..

ما أبي أغيره ، أبي أغير من حالي ..
أبي أتعلم كيف أكون مثله في بروووووووده ؟؟؟؟

أبغى أعرف كيف أطنشه ؟ كيف أصير مثل بعض الحريم .. يطنشوا أزواجهم بالأيام ؟؟؟
المشكلة إني مثلا أكون زعلانة منه ، أقوم أطنشه بس 10 دقايق .. لإنه الكلام ما ينفع مع زوجي
يجي يكلمني و أنسى بسرعة ، بعدين يوم يشوفني نسيت .. يرجع هو يطنشني ؟؟؟؟

أبغى أعرف المرأة الجنوبية كيف عايشة حياتها ؟
مشكلتي شمالية ..


سامحوني تكلمت كثير اليوم ..
بس من جد عجزت من نفسي .. و هو باااااااااااااااااااااااااااااااااااارد مرة

ياحبي لك يا طير..

عارفة .. أحسك كتضايقة و مو عارفة وش تبين..

على العموم..

أول شي.. انتي تبين تغيرين نفسك عشان ترتاحين ولا عشان تقهرينه؟!!

لو قلتي عشان ارتاح اقولك أوكي انا معاك..
لكن لو قلتي عشان أقهره صدقيني راح تنتكسين..

لأنك تغيرتي عشان تقهرينه وتحسسينه بنفسه.. وراح تشوفين انه بالعكس انبسط أو ما حس فيك انك تغيرتي

فأنتي راح تنقهرين زياااااااادة..

فحددي انتي وش تبين؟؟

الشي الثاني.
انتي وش اللي مضايقك منه؟؟
وش الوضع اللي انتي تطالبينه فيه؟؟

طريقته بالحياة ولا التزاماتكم ولا موضوع المعيشة ولا شنو؟؟

__________________
سئلت اي الرجال تحبين؟؟
قلت : من اختلط عنده الحب والخوف علي..
عذرا- ليس هناك حب كحب ((أبــــــي))

يا حبي لك يا أحلانا كلنا
خليتيني من جد أخجل من حالي

يمكن معاك حق ؟
مو عارفة إيش أبغى بالضبط ؟؟؟؟؟ لو كنت أعرف ، ما كنت جيت طلبت مساعدتكم

أنا في حيرة و أعمل نفسي مطنشة ظاهريا ، بس أكل في نفسي و أحاول أتغافل ..
يوم عجزت ، جيت هنا

و المفروض وزني يزيد ، لاغربة و لا دراسة و لاشئ ..
و شغالة أهلي تقوم بكل شئ و أكل من طبخ أمي أو السوق ؟

---------------------------------------------

أول شي.. انتي تبين تغيرين نفسك عشان ترتاحين ولا عشان تقهرينه؟!!
عشان ارتاح ، و عشان ينقهر ..
لإنه تعبني ، و ما أبغى أفكر فيه .. أبغى أتفرغ لنفسي ..

يعني زوجي يوم أطنشه ، يبدأ يتعلق فيا أكثر و يدور عني ..
فأنا أمثل عليه ( ظاهريا ) إنه و الله ما همني .. بس أنا أتمنى من جد إني أكون كذا ( بدون احساس ).. و أتمنى إنه من جد يكون وجوده و غيابه عني ( واحد و مو فارقة معي ) ..
لإني أنا أصلا كذا مع أي شخص أحطه في البلاك ليست ، بس زوجي ما قدرت أبدا ..

---------------------------------------------

لو قلتي عشان ارتاح اقولك أوكي انا معاك..
أهم شئ عندي عشان أرتاح ، هذا الأهم من جد ..

لكن لو قلتي عشان أقهره صدقيني راح تنتكسين..
لأنك تغيرتي عشان تقهرينه وتحسسينه بنفسه..
وراح تشوفين انه بالعكس انبسط أو ما حس فيك انك تغيرتي
فأنتي راح تنقهرين زياااااااادة..
بديت أحس إنه ( قالب ثلج ) ، لو تنطبق السماء عالأرض ما يهتم ..
يمكن لإنه ( صامت ) ؟

بس بأتغير في الأصل (أو بالأصح .. بأرجع لطبيعتي الحقيقية قبل لا أتزوجه ، يوم كنت لا مبالية أبدا)
عشان أبدأ انتبه لنفسي و اهتم في صلاتي ..

زوجي يحب أصلا إنه هو اللي يهتم ، مو العكس .. فهمتي علي ؟
بس لازم يكون ( بالك أطول من باله ، و أنا بالي قصير )

فمرات أحسسه إنه ما همني ( فيبدأ يهتم فيني ) ،،
يوم يشوفني أبادله الإهتمام .. يطنشننننننننننننننننني للدرجة اللي أجلس أصيح فيها من القهر ..

---------------------------------------------

حددي انتي وش تبين؟؟
أبي أقتل احساسي العاطفي تجاهه + أقتل احساسي باالمسؤولية و أكون أبرد منه

لإنه يستغل الحركات اللي يعملها في وجهه و يخليني أحزن عليه ..
و بعدين انقهر من حالي ..

فيا طبع من صغري ، أحزن مرة على الأيتام و الفقراء و الضعفاء و كذا ..
فزوجي يحسسني إنه هذا أكثر شئ قدر يعمله ( عشاني ) .. و أنا غبية أصدق بسرعة ..

---------------------------------------------

انتي وش اللي مضايقك منه؟؟
وش الوضع اللي انتي تطالبينه فيه؟؟

طريقته بالحياة ولا التزاماتكم ولا موضوع المعيشة ولا شنو؟؟

هذه لازم أكتب فيها عن اخر الأحداث في الفترة الأخيرة بشكل سريع،
لإنها هي اللي مذبذتني و مخليتني كذا ..

و تعبت و أنا أفكر من جد ..
لحظات و أجي

أختي أحلاهم و أتحداكم .. تكملة لردي على :

انتي وش اللي مضايقك منه؟؟
وش الوضع اللي انتي تطالبينه فيه؟؟

طريقته بالحياة ولا التزاماتكم ولا موضوع المعيشة ولا شنو؟؟

احترت إيش أكتب ؟
بس حياتنا الزوجية تتقسم لـ3 مراحل ( قبل الغربة - الغربة - الوضع الحالي )

----------------------
قبل الغربة :
كنت راسمة حياة مثالية و خيالية و كنت قريبة من ربنا و أقرأ كثير .. و بعيدة عن أي أجواء فيها مشاكل
،. تحملت ظروف زوجي من يوم زواجنا و كنت أقول عشان ربنا .. و عشان أكون زوجة صالحة .. إلخ
( زوجي كان مختلف عن دحين .. و استغل وقتها طيبتي و تسامحي و ماكنت أدري ).

كان يوعدني و يسكتني إذا انتهى صبري وبكيت بإنه بيعوضني عن تحملي و بيقدرني أكثر ..
و يعطيني من الكلام الحلو و الرومنسي و يوعدني بس خلينا نسافر للخارج و إنه راح يثبت لي كيف
بيتحمل المسؤولية و يتغير.. حجته ( الظروف حاليا أقوى منه و ما تساعد )
فأقوم أحزن و أسكت و اصدقه ، عشان لا أضغط عليه أكثر ..

طبعا كنت شايلة مصاريف نفسي و أهلي شايليني و شايلينه ..
صدقت زوجي ، إنه في الغربة راح نبني مستقبلنا وووو رسم لي حياة خيالية و بنكون مع بعض و كذا..
و رحنا للخارج .. و كنت معتبرة زوجي كل شئ بالنسبة لي و من جد كنت أحترمه و كنت غيييير معاه ..

----------------------
في الغربة ( مرحلة قبل تغييره + مرحلة بعد تغييره للأفضل ) :
طلع كل اللي قاله من وعود ( مجرد سراااااب ) يعني كان بيسكتني بها..

تحسنت ظروفه في الخارج .. و صار يبعزق الفلوس ( على قولة المصارية ) على نفسه و ماكنت أدري ؟
يوم أسأله يتحجج إنه كل شئ غالي هنا و أصدقه.. أتاريه بيسافر مع أصحابه و يتمشى و أنا أهلك
نفسي في الدراسة ، و الإهتمام فيه و في البيت .. و يروح مطاعم و يسهر وووو إلخ .. عايش حياته
يعني .. بس اكتشفت إني أحرم حالي ، و هو يصرف الفلوس على نفسه ؟

نسي وعوده إنه بس يتحسن حاله ، بيوريني كيف راح يتغير و يتحمل المسؤولية و نبني حياتنا..
و يوم أكلمه ، يطنشني ..شفت الحال من جد ما ينسكت عنه أبدا .. و صار يهددني ( يا أنا ، يا ولدك )
؟ و يضغط علي .. يعني يبغاني أرسل ولدي لبيت أهلي ، بحجة إنه المصاريف ما تكفي ..

سنة و نص عد عالموضوع هذا في الغربة ..

.
.

هنا ..
بديت التغيير من نفسي و إني أكون حازمة أكثر و أحط النقط عاالحروف، و وقفت وقفة جادة و قوية ..
لإني من الناس اللي ( اتق شر الحليم إذا غضب ) .. و مع الأحداث اللي حصلت هناك و مشاكل
عشناها و ذبذات و مد و جزر.. بدأ يتحسن زوجي في تحمل المسؤولية بنسبة أفضل من قبل ..
لإني كنت جادة وقتها بكل ما تعنيه الكلمة.. و قسيت قلبي ..


قلت له ( مجرد تهديد .. حتى يهتم ) و كان اتفاقي معاه وقتها على النقاط هذه :
1 - جاتك فرص كثيرة هنا عشان تحسن وضعك ، إنت ضيعتها و ما راح أتحمل نتايج أخطائك في
المستقبل.. يا تستغل الوقت الباقي لنا من الغربة و لا من جد ما بأتحمل أي نتايج..!!!
2 - مصيرنا بنرجع بيوم للسعودية .. و تحملي السابق قبل الغربة بحجة الظروف، ما راح يتكرر ..
و إذا رجعت ما راح أصبر .. و أهلي مو مسؤولين عني و عنك ..
3 - ما راح أصرف شئ من راتبي ، و بأصبر شهر في بيت أهلي حتى تأمن لنا حياة..
و بيكون لنا بيت و سيارة.. و لا تقول لي ظروف ، لإني ما راح أقدر و لا تلومني وقتها.. دحين فرصتك ..
4 - تدور على وظيفة من دحين و الإيجار و الفواتير و المصاريف كلها عليك في السعودية يوم نرجع..

.
.

ما أكذب ، إنه تحسن زوجي عن قبل كثيييييييير و لمدة سنة و نص من دحين ..
بس كان لازم أمشي ورااه و أحركه و أحفزه و لا يرجع مثل قبل .. أشد مرة و أرخي مرات ..
و في الخارج مثل ما نعرف ، كل شئ عن طريق النت يصير بضغطة زر و بسهولة.. و كنا نتعاون سوا ..
يعني نجلس سوا و نطقطق عالكمبيوتر و نحجز و نرتب و نخطط سوا ..

تحسنت علاقتنا أكثر من قبل لإني فهمت إيش يحب ؟ بس هو ما يحاول يفهمني إلا يوم أتكلم
و أقول له .. أبغىى كذا و كذا ..

أقلمت نفسي على طبايع زوجي و فهمنا طبايع بعض أكثر من قبل .. مع وجود بعض المنغصات منه
يعني أقدر أشبه وضعي ، كأني في غربة .. و عندي ( طفلين ) ..

المضحك ، إنه زوجي عاجبه كذا .. مو أنا اللي عاجبني كذا ، بالعكس متضايققة و أسكت ..
يقول لي لازم تنبسطي لإنك تشكليني على كيفك ؟


كنا ممشين حياتنا في الغربة .. و مرات أفكره إنه يستغل الفترة و يقدم على وظيفة من دحين ..

عشان أأقلم حالي على طبايع زوجي و مع الغربة و طبايع الناس اللي عاشرتها..
أنا اللي تغيرت من جد .. و للأسف.. نظرتي صارت واقعية تماما..
قلبي قسي عن قبل و صابني تبلد في الشعور.. و صرت بعيدة عن ربنا و متضايقة من حالي ..

بس اللي ما قدرت أتغير فيه ..
( إني ماقدرت أقسي قلبي على زوجي .. لو زعلني بيوم و تحجج بظروف كالعادة ..
و تنسد نفسي عن الأكل و ما أكل و لا أذاكر و لا أعمل شئ و حتى ما أقدر أقوم أصلي
إلا بالقوة إذا زعل مني بيوم و لا طنشني.. على عكسه هو ، لو طنشته ، بيطنشني أكثر)

----------------------

حالياً .. رجعنا من الغربة و الحمد لله:
ما كنا لسى قررنا ،، بنجلس و نأجل و لا نكمل في الخارج .. بس من شهر اللي قررنا نأجل الدراسة؟؟؟

و من يوم رجعنا من هناك، جلست عند أهلي و هو عند أهله.. و هو لقي وظيفة و الحمد لله مؤقتة..
بس صاير يتحجج دايما إنه مشغول بوظيفته .. و أنا بديت أتضايق من بعده و بأتحمل زي قبل ما نسافر
و حجته ، الظروف ..

طيب أنا عند أهلي و ما يقصروا معاي أبدا من إجازة الكريسميس من شهرين و نص ..

إذا قلت له ، بأروح السوق .. يقول روحي ..
إذا قلت بأسافر لعند أختي .. يقول طيب ..
إذا قلت بأنام عند أخوي .. يقول طيب ..

الكل يشوفها ميزة .. بس هو عشان يريح راسه من مسؤوليتي و مسؤولية ولدي..
طيب ليه تزوج ؟

خلاص كلمته من شهر و قلت له .. تعبت من بعدك و ما فيا أصبر أكثر من كذا..
المشكلة إنه في بيت أهلي ، جايبة معاي شنط فيها ملابسي و أغراضي و أغراض ولدي..
و مو معقولة كمان يفضوا لي دواليبهم عشاني و أخرب نظامهم ؟

و يوم أشتاق له ، وو أقول عدي لو نص ساعة أشوفك ..
يقول لي ( نعسان ، بأروح أنام ) .. يجلس يتغلى علي
أمس يوم طنشته و جفيت، جاء بعد صلاة الفجر يزورني في بيت أهلي و عينه منفخة من النعاس ..؟

إذا اهتميت في ولدي ، يقوم ينقهر و يغار .. و إذا اهتميت في زوجي .. يقوم يطنشني و يهملني ؟


فقلت في داخلي..
ليه أتعب مخي من التفكير ؟؟؟؟

مو يبغاني أطنشه ؟ مو يبغاني أتغلى عليه ؟ مو يبغاني أنشغل مع أهلي ؟
خلاص بأعمل اللي هو يبغاه ، و منها كمان أنا أرتاح من التفكير و أهتم في صلاتي أكثر ..

اسفة إذا كلامي ملخبط ..

-------------------------------

و بأضيف شئ ..

أنا ما صرت مثل زمان أتحمل و أصبر ، بس غصب عني ( قدامه ، بأحاول أقسي قلبي )
و أعمل كأني ( وحدة بدون رحمة و أطلب منه يصرف على ولدي)
و أرجع أتضايق من حالي يوم أفتكر إنه من سنة و نص تحسن كثيير ..

بس ( أخاف ) أرجع مثل زمان و يرجع هو كمان مثل زمان ..
عندي الحمد لله مصدر دخل و عندي رصيد .. و مخططة لمشاريع و شراء أراضي و كذا بإذن الله ..
حتى زوجي يوم يشتري أغراض مرات لولده ، أمي تخااااااااااااااصمني و تقول (لا تكلفي على زوجك)
و ما أرد عليها


و الصدق و الله ، إنه زوجي ما صار ياخد مني شئ .. و بيحاول يثبت لي إنه تغير للأفضل
و يقول كنت توويي متزوج و ما أعرف إيش معنى الزواج و إيش هي حقوق الزوجة ..

بس يوم أصير طيبة معاه و حنونة ، يبدأ يطنشني ..
و يوم أطنشه ، يبدأ يهتم فيا ؟

عيشني في دوامه ..

شوفي حبيبتي الوضع اللي انتي فيه صدقيني لانكم مو مستقرين.. أنتي مو قادرة تظبطينه .. وهو مو قادر يتحمل مسؤوليتكم..

والله لو تستقرون تنتهي مشاكلكم .. وتصيرون أسهل في حل المشاكل.. بس يبيلك شوي صبر..

وأنا من رايي انكم ما تأجلون الدراسة.. لأانكم كذا بتطولونها على غير فايدة..
لأانه مو معقولة تأجرون لكم بيت مدة كم شهر او كم سنة وبعدين تتركون البيت واثاثكم وحوسة مالها أول ولا تالي..
مدام وراكم دراسة خلصوا عشان ترجعون وتستقرون..

ولا خلاص بكيف الدراسة حياتكم اولى استقروا وخلاص..

__________________
سئلت اي الرجال تحبين؟؟
قلت : من اختلط عنده الحب والخوف علي..
عذرا- ليس هناك حب كحب ((أبــــــي))

السلام عليكم ...

الحمدلله على سلامتك اختي روح الطير واكيد نورت البلد برجعة اهلها ...

تعليقا على موضوعك ..

ما فيه حبة سحرية تاخذينها وتصيرين زي ما قلتي ...

لكن زوجك ضروري يتحمل المسؤولية وما راح يتحملها طالما فيه غيره شايلها فإنتي لازم تقسي قلبك وترفعي يدك وتتفرجي عليه كيف يتصرف ...
ولا يكسر خاطرك ... اكسري خاطر نفسك .. ارحمي نفسك قبل ترحميه من شي واجب عليه ..

وزي ما قلت لك ما فيه وصفة سحرية لازم تجمدين قلبك خصوووصا ...اني أعتقد ان ما عندكم أطفال حاليا الله يرزقكم يا رب ...

فهذه فرصة ذهبية جدا انك تعودينه على المسؤولية قبل الأطفال ولا ترى بيصير قهرك قهرين ..


الله يساعدك ويفرج همك ويسخرلك زوجك على ما تحبين ،،،

ملاحظة:
صفاته الحلوة تكون ميزة، لو إني اشوفه متحمل مسؤوليتي مع مسؤولية ولده

بس ما أبغى أحرق في أعصابي و أقول ليش و متى ... إلخ ؟
أبغى أعيش حياتي و أطننننننننننننشه ..

و إذا حملته مسؤولية شئ ، لازم يسيئ التصرف و لا يجيب مصيبة لا سمح الله

و على فكرة ..
حتى أهله يشتكوا من طباعه هذه و ما عرفت غير بعد ما تزوجته و جربته
حتى مرة أخته قالت له ( أحمد ربك إنه زوجتك متحملتك و لا لو كنت مكانها ما كنت صبرت)
و قالت لي مرة من سنة ( إنت بتدلعي زوجك مرة و تخربيه بدلعك )

بس ما رديت عليها

رسيـــــل

الله يسعدك يارب ، أنا أجلت الدكتوراة فترة ببسيطة عشان ظروف عند أهلي
و بأرجع إن شاء الله للغربة .. بس ماني حابة أتغرب من جديد غير بعد ما أصلح أمور كثيرة

عندي ولد واحد ، و زوجي عشان يكره المسؤوليات
يتمنى ما يجي غيره ؟؟؟

يعني مثلا ..
قبل 10 أيام .. ولدي مسخنننننن و استفراغ الله يعزك و اسهال شديد و زوجي بارد ،،
بس يبين لي إنه مهتم عشان لا أزعل منه ..

و لإني أقلمت حالي على طبع زوجي و عشان لا أحرق في نفسي ..
فقمت تصرفت من حالي و دفيت ولدي و زي كذا .. لإنه زوجي قالي مو لازم مستشفى ، بس دفيه
قلت له الإسهال من 3 أيام عنده و دحين استفراغ و سخونة .. بس كبرت عقلي و عملت اللي قاله لي و دفيت ولدي

تحسن ولدي شوي ، بس 4 أيام و رجع من جديد - و الله يعزك - استفراغ و اسهال بقووووووة من الصبح لحد بعد العشاء
اتصلت على زوجي من بعد العصر ، و كعادته في التسويف .. بعد شوي ، بعد شوي أجي ..
لحد بعد العشاء .. شفت ولدي نايم زي اللي مغمى عليه و بس يرجع ..

خرجت بسرعة و أخذت تاكسي من الشارع ، و رحت للمستشفى بنفسي و زوجي لحقني هناك ..
بعد التحاليل ، طلع عند ولدي ( حساسية في الدم ) ، و الدكتور انفجع من لون وجه ولدي و قال أكيد فقر دم شديد
و زي كذا


و بعدين .. إيش الحل في وضع زي كذا ؟؟؟؟؟
و إذا وقتها قلبت وجهي ، يقوم يزعل هو و يطلعني أنا الغلطانة ..

و يطلع لك بحجة من تحت الأرض ، مشغول ؟ السيارة عطلانة ؟ إلخ
بس لو له مصلحة في شئ ، ينسى كل الحجج و تلقيه مثل البرق ، يتصرف بسرعة ..


ماودي أتعب راسي معاه .. لإنه هو تربى في بيئة زي كذا
الغربة ما غيرته ، فما راح أقدر أغيره بنفسي ..


أبغى أتعلم قسوة القلب ..
و مع العلم إنه قلبي دحين قسي عن زمان 50 في المية

بس أبغى قلبي يقسىى على زوجي و بس
مو على باقي االناس ، لإنه مالهم ذنب

أها الحين فهمت.. زوجك بارد اتكالي في كلللل شي..
وفي نظره مدام زوجتي بتحل الموضوع وشوله اتحرك انا..

هو صعب يتغير ويتحمل مسؤولية وانتي صعب تتخلين عن حرارة طبعك..

الحل بعد ما تستقرون إن شاءالله تحطين لك سواق ..

الاشياء المهمة عليك .. والاشياء الأهم عليه..


مثلا لو انحرقت اللمبة عندك في البيت..
مستحيل هو يركبها؟!!
يا أنتي تركبينها أو خلي السواق اللي قلت لك عليه يركبها لك..

خلاص أغسلي ايدك منه.. إدا استقريتي راح يتصلح الوضع..
مو منه .. لا.. أنتي راح ترتبين امورك أكثر .. بحيث ماتتعبين.. وبنفس الوقت تنجزين أمورك..

__________________
سئلت اي الرجال تحبين؟؟
قلت : من اختلط عنده الحب والخوف علي..
عذرا- ليس هناك حب كحب ((أبــــــي))