السلام عليكم زواجي الجديد كان عادي جدا والمدعوين بين العائلتين لايتعدون 20الي 25 شخص رجال ونساء
ووقت دخولي بزوجتي الجديده كان الساعه 3 العصر لانه عندنا رحله الي ماليزيا الساعه 11 بالليل بنفس يوم الدخله
زوجتي جدا جدا جدا جميله وهي مطلقه وفترة زواجها لاتتعدى 9 شهور من زوجها السابق وتم اختيارها لي بعنايه وكلموني قرايب لي بمواصفات وخطبتها وشفتها النظره الشرعيه ونبهرت ونصدمت بجمال هذه المراءه وسال نفسي كيف الغبي زوجها الاول طلقها وانا طالع من عندهم بعد ماشفتها مع ابوها تكلمت مع قريبتي الي وصفت لي زوجتي الجديده وهي الي اختارتها لي وزف لها نباء هديه نقديه قيمه لحسن اختيارها لي لهذه الزوجه او هذي الجوهره النادره ودايم اقول يارب انت تحبني وتبي تعوضني خير عن عناد ونكد وتطنيش زوجتي الاولى الله يرحمها الي ولا يوم تهنيت فيه معاها اربع سنوات نكد وتطنيش ولا حتى كلمة حلوه او رساله او هديه او اي شي او اتصال يعني حضوري وعدم حضوري واحد
زوجتي الجديده عاجبتني الف بالميه ولاكن عندها عيب فيها سوف اقوله اخر الموظوع ؟؟
.................................................. ...........
يوم زواجي وانا طالع الظهر من البيت لحقت بي المرحومه عند باب المجلس وقالت لي فلان تاريخ اليوم وش يذكرك فيه قلت اي تاريخ قالت تاريخ اليوم هو تاريخ يوم زواجنا قبل 20 سنه
والتفت عليها ولا قلت ولا كلمه عطيتها 3 هدايا ساعه 2800 ريال وطقم ذهب 3350 ومبلغ
7 الاف ريال ترضيه ونزلتها زوجتي عند المرايه الي بمدخل البيت ولا شافت ايش الهدايا وقالت لي متى اقلاع رحلتلك قلت اليله الساعه 11 بالليل قالت بصوت مبحوح وحرقة وغصه ونقطاع بالتنفس ؟؟؟؟
انتبه لنفسك والف مبروك زواجك والحمدلله تحقق الي انت تبيه بعد اربع سنوات
قلت المفروض متزوج من زمان بس انا اعطيتك مليون فرصه بالاربع سنوات تتعدلين ونتي مطنشه ع الاخر ...... قالت كلام الفائت ماله طعم انتبه لنفسك والان انت مسؤل عن زوجتين وبيتين وانا متنازله عن ليلتي ومتنازله عن حقي الشرعي ومتنازله عن المبيت عندي ومتنازله عن اتصال الجوال والسوال عني ومتنازله عن اي شي
اهم شي لاتظلم اولادك ولا تظلمنا ونتبه تنقص بمصروف الاولاد
قلت لها باذن الله ماراح ينقصكم شي .....
وستغربت من زوجتي الاولى الله يرحمها ماسالتني عن اسم زوجتي الثانيه ولا سالتني عن عمرها ولا سالتني هل هي مطلقه ارمله بنت بكر
لاني اعرف ان الزوجه الاولى تسال زوجها عن ضرتها ايش اسمها وكم عمرها هل نحيفه او سمينه هل هي طويله او قصيره كيف طبخها كيف شعرها وكيف وكيف وكيف
ودعت زوجتي عند مدخل البيت وركبت سيارتي وفتحت الكراج بالريموت وهي تنظر لي وتبتسم ابتسامة الموادع الحزين وفعلا هذاك الموقف هو اخر مره شفت فيه ام اولادي الله يرحمها وكان بريق في عيونها يقول لي ليش سويت كذا ليش ليش جت عيوني في عيونها وباب الكراج ينزل شوي شوي
. واخيرا جاء اليوم الي انتظره من زمان .... انا بعد ساعتين عريس
ذهبت عند عم زوجتي الجديده لان كان الاجتماع عند عم الزوجه الجديده
لان اهل الزوجه الجديده يسكنون 80 كيلو عن الرياض ولا معي وقت اروح ورجع للرياض وطلع المطار للسفر الي ماليزيا ,,,,,,,
تغديت عندهم وصليت العصر واخذت ( الملكه )زوجتي معي وذهبت لفندق صحاري المطار لانه قريب من مطار الرياض ..... دخلت بزوجتي والحمدلله يارب كنت راضي كل الرضى عنها وكل شوي اطالع بوجها الملائكي ياسبحان الله اشهد ان لاالله الا الله
المهم جاء وقت حضور المطار وذهبت الساعه 10 مساء الخطوط السعوديه وتم الاقلاع للاسف الساعه 12.40 صباحا بتوقيت الرياض
والطياره بالمدرج تمشي شوي شوي جاني اتصال من بنتي تقول امي انهارت وجاها صرع وفمها يطلع رغوه بيضاء يشبه البوده حقت الاطفال وعيونها انقلبت الي اللون الابيض وتصرخ وتبكي بنتي وماني عارف ايش وكانت بنتي تتكلم بسرعه مافهمت شي منها
قفلت الجوال واقلعت الطياره ... وقمت افكر بالموظوع قلت اكيد هذا كيد النساء الي يقولون عنه مع اني اعرف كيد النساء من زوجتي الاولى كانت ماخذه ماجستير بالنكد والتطنيش والكيد والعناد والراس اليابس ....
وصلت العاصمه كوالمبور وخذت شقه فندقيه برج ( اسكــــــوت ) لانها قريبه من الاسواق وبرج التؤم ....
جلست في العاصمه يومين وطلعت مدينة ( بينينق ) وجلست 9 ايام وبعدين طلعت جزيره العرسان ( لانكــــاوي ) وراح اجلس اسبوع كامل بها.... شاليه على البحـــــر
اليوم الرابع جاني اتصال بالليل من اخوي وقال امسك نفسك وتمالك اعصابك راح اقول لك خبر قوي شويه ولازم تتحمل الصدمه وهذا كله بامر الله وكلنا ماشين على هذا الطريق الكبير والصغير ....فسكت ثواني معدوده .... وقال ....
فلانه تطلبك الحــــــل ..... قلت ايش ايش ؟؟ انت وش تخربط وش تقول انت ....
قال ام فلان توفيت بمستشفى قوى الامن والان انا تحت بالبدروم عند الثلاجه انا وولدك فلان
دارت الدنيا ودارت ودارت وتوقفت ودارت ودارت ورجعت تدور عكس عقارب الساعه واظلمت الدنيا وتصبب عرقي وزاد نبضي وتعرقت يديني وحسيت بثقل غريب بقصدري كانه حجر كبير فوق صدري وطاح الجوال من يدي .....
صحت بزوجتي الجديده وكانت بحديقة الشاليه وقلت لها ان زوجتي فلانه توفيت اليوم بالرياض ..... قالت هون على نفسك حبيبي تمدد على الكنب ولا تتحرك وجابت لي ماء بارد وعدد اربع حبات اسبرين قالت الان بسرعه كل الاسبرين عندك اشتباه بجلطه وتصلت على الاستقبال وحضر دكتور وشرحت له ايش صار طبعا كله باللغه الانجليزيه
هي من رتبت العوده وقطع الاجازه فورا مع ان كان التخطيط نجلس 28 يوم في ماليزيا
قالو يبيلكم يومين عشان نلقى حجز لكم الي الرياض حاولت زوجتي وحاولت بجميع الخطوط المتجه للسعوديه .... ولاكن مافي فايده ....
رجعت الي العاصمه كوالمبور وحجزت العوده ورجعت الرياض بعد يوم ونص من تلقي الخبر وقابلت ولدي واخواني واخوان زوجتي بالمطار ...
وبعدين عرفت من ولدي ان امه صابها تشنج الساعه 11 بالليل وطرشت دم اسود من فمها
وصابتها رعشه وتقفل فمها .... الله يرحمها ...

هذي كل القصه الي صارت معاااااي .... انا مسامح زوجتي بتطنيشها لي وعنادها لي ..
وبالنسبه للعيب الي بزوجتي الجديده هي ( بالفراش ) .....................
وسبب طلاق زوجتي الثانيه من زوجها هو هذا السبب ... او مايعرف بالشبق الجنسي ................
قلت لها انا عمري 48 ماقدر اسوي معاك الي انتي تبينه ....
...................
قلت انا مريض سكر ومعي جلطه وضغط دم ....
كرهتني بالجنس وكرهت نفسي ...
بس هذا الي كنت بكتبه لكم وعندي نصيحه لجميع الرجال الي ناوين يتزوجون على زوجاتهم صدقني صدقني الي مع الزوجه الثانيه نفس الي مع الزوجه الاولى ...
يعني لو اكلت برتقال في حائل او جده او خميس مشيط او اي مكان
ترى طعم البرتقال نفسه ماراح يتغير ....
هذي كل قصتي وارجو من الجميع الي بيكتب رد يكون رد عقلاني تحياتي لكم ؟؟

عظّم الله اجرك في زوجتك الاولى

مبارك عليك زواجك الثاني الله يعطيك خيره ويكفيك شره

اعان الله كل واحد منكم (انت - الزوجة - العيال) على الايام المقبلة

الموضوع طويل جداً ومهم

وشاكر لك سرد التفاصيل ( لأن فيها فائدة وزيادة خبرة في الحياة لمن يقرأ قصتك)

اسأل الله لكم التوفيق والعون والسداد

اخي الفاضل

لفت نظري في موضوعك عدة اسطر

قد تكون هي مربط الفرس

ولي عليها بعض الملاحظات

الأسطر هي :

فمربط الفرس هنا

انك من الناس التي لاتفهم ولاتتعظ ولاتصدق الا اذا جرّبت بنفسها

وهذا يفسّر لنا ضربك بالحائط للكلام الذي يقوله والكلام الذي قد قالوه الاعضاء هنا لك في هذا المنتدى

الملاحظات:

- نصيحتك هذه غير نافعه، لأنك كنت تعرفها (قد قالها لك احد قبل كذا ، بالاضافه الى مذكورة في مواضيع كثيرة متفرقه) ومع هذا اقدمت على الزواج (لاسبابك الخاصة + عدم تصديقك انهم كلهم برتقال (على حسب تشبيهك) وبالتالي الاخوان اللي مثل تفكيرك سوف لن يصدقوا كلامك وسوف يقدمون على الخطوة هذه مثلك، لا وازيدك من الشعر بيت ، سوف ينصحون غيرهم بعد الزواج الاضافي بعدم التجربه لأنه اكتشف "بنفسه" انهم كلهم برتقال او تفاح او موز او اللي هو

الخلاصة :

موضوعك موضوع سردي فقط

وبالتالي مافي داعي احد يزعل او يتوتر من الاعضاء

لأن صاحب الموضوع وببساطة مش جاي يسألكم

وانما جاي يخبركم عن تجربته عشان تستفيدوا منها !

__________________

قلت فاصبت اخي لماذا نتزوج

__________________
أيّــــها الحـاملُ هـمــاً .. إن الـهم لا يدوم
مثـــلما تــفــنى السعـــادة .. هكذا تفنى الهموم

يا أخي أنا ما لي علاقة بالموضوع وبس قرأت انك حاب تسكن زوجتك الجديدة
بس انا قرأت حسيت صدقا بألم طعنني في قلبي.. .. عقليتك وطريقة تفكيرك فقطططط بمصلحتك..يعني خل الكل يتعب اهم شي ترتاح..فكر انك ممكن بأي لحظة تكون مكان زوجتك اﻷولى والدنيا حياة وموت..

صدمة الزواج على الزوجه قويه عليها وتتفاوت الصدمه بحسب محبتها لزوجها
كلما كانت محبتها لزوجها قويه كلما كانت الصدمه اقوى ويصاحبها قهر اذا كان هو مهملها ومغلط بحقها وفوقها يتزوج عليها هنا يصير وقع الخبر عليها قاتل ..يقتلها هم وحسرة ..

ولا اظن زوجته مهملته كطبع لها
وانما هو يكون مغلط عليها ونتيجه لهذا اهملته
وكثير من الازواج مايشوف نفسه غلطان انما يحط اللوم على زوجته
فغالبا اهمال الزوجه ياتي ك ردة فعل على تصرفات زوجها

نعم معقولة جدا..وحدثت في محيطنا قصة شبيهة..عندما أحضر رجل زوجته الثانية التي تزوجها بالسر للزوجة اﻷولى للتعارف .من فجأة الصدمة جاءتها نوبة قلبية وتوفيت..الله يرحمهم برحمته ..متى يشعر الرجال بصعوبة هذا اﻷمر على النساء فيراعي مشاعر زوجته المتفانية من أجله

لفت نظري في موضوعك القديم رأي أستاذنا البليغ ونصحه لك بأن زوجتك ذهب وحافظ عليها ولا تتزوج عليها..الله يرحمها ..ادع لها بالرحمة واهتم بأولادك وأولادها ...وكن لهم اﻷب واﻷم كم كانت هي رحمها الله

الحين انت ندمان لو مو ندمان مافهمت
انا من شوي قرأت موضوعك الأولي
والذي وجه لك الاّعضاء ماذا تريد بالضبط منها
فتكتفي بتكرار الكلام انها تتجاهله و الخ دون تحديد

فعلت أمورا سيئة هداك الله
تركت الصلاة
جلست جلسة سوء و انرسل الفيديو لزوجتك و تغاضت عنه
سكتت عن شكك
تقول انك فقط عليك الفلوس للبيت و هي شايلة كل شيء

وقلت انك تريد (((حرق قلبها )) بزواجك عليها
وهاأنت حرقت قلبها و خلصت
هل يفترض ان ذلك يرضيك
ويجعلك تجيب ماذا كنت تريد بالضبط؟؟

__________________

والله ندمان وخاصه الاولاد وحزنهم علا فراق امهم الله يرحمهما برحمته انا مسامحها عن كل شي سوته معاي
ولاكن قالت لي كلمة غريبه يوم زواجي
قالت هل تتذكر هذا التاريخ قبل عشرين سنه
قلت اي تاريخ قالت تاريخ يوم زواجنا قبل عشرين سنه
وفعلا صدفه من غير ميعاد ان زواجي يوافق يوم زواجي الاول قبل عشرين سنه
وانا بالطياره كلامهما يرن براسي كيف صارت هذي الصدفه الغريبه
وانا مو جايب خبر للتاريخ
كم كنتي عنيده معاي وكم سنه ونتي مطنشه يازوجتي الغاليه الله يرحمك
لن ولن انساك ي ( ؟؟؟؟) الغاليه

__________________