اشكركم جميعا على الردود
وابشركم الاوضاع طيبه جداً راح اقولها بالاخير
بس برد على الردود وتاكدوا ان مافي شي قلتوه الا وانا طبقته يعني الضرب جاء كحل اخير
اختي سما بوضح لج شي لانك تكلمتي عن الضرب وقسوته كثير
انا نادر استخدم الضرب وماحبه تماما بس استخدمته كاخر حل !!
اول شي تخيلي شكلي وشكل ولدي في الحجم انا طولي 166 وطوله 163 ووزني 63 ووزنه 73
تتوقعين ممكن اقدر اضربه بيدي وأأثر فيه والا ممكن اقدر اضربه ضرب مبرح او ممكن بحجمي اقدر اضره !!!

بعدين انتي تعرفين الضرب للصلاه من 10 سنوات وانا طول هالسنوات اكلمه باللين والنصح والخوف عليه
ومع هذا قام يتدلع وبالعافيه يصلي ولازم اترجاه يصلي لاني خايفه عليه من النار واحكيله قصص
وآخر مره وريته مقطع بلوتوث بالجوال لميت عذب في قبره لانه تارك الصلاه وارسلتها له لجواله يتذكره دايما
صحيح تاثر وخاف بس ثاني يوم نسي !!
اذا الحل الضرب وانا ماضربته الا وهو 14 سنه يعني تاخرت في الضرب وضربته بعد ماعجزت معاه
ووالله اني ماحب حد يضرب عيالي حتى لو كان ابوهم وحتى لو بيصارخ عليهم ازعل
بس انا ضربته مو تجبر او كره انا ضربته خوف لصلاته لمن شفت استهتاره في الصلاه
وعني انا والله اني راضيه عليه حتى لو عصاني والا رماني بالعجزه انا راضيه عليه دنيا وآخره وحقي انا متنازله عليه ومسامحته بس خايفه عليه من رب العباد انه يعاقبه لاهماله في الصلاه وتقصيره فيها واحنا وش نبي غير الجنه والفائز هو اللي فاز بالجنه وانا ابي الجنه لعيالي
وبالنسبه لاخوانه واني سمحت لهم يدخلون غرفته انا تكلمت باختصار والتفصيل بالضبط اني لمن دخلت غرفته ودخلوا وراي على طول صارخ عليهم وماعبرني قلت له اللحين اطلعهم واسكت خلاص
وقعدت اطلعهم وواحد منهم سحب معاه شريط سوني وصارخ عليه سحبت من يده الشريط ورجعته
الثاني وقبل يطلع خذى ورقه فاضيه بس يبي يقهره ورد يصارخ على الثاني وشليت الورقه وقلت شفيك حتى على ورقه فاضيه تصارخ
ولمن وصلتهم الباب واحد فيهم يحط رجله داخل غرفته يبي يستفزه وعلى طول صارخ عليه وهاوشه طلع رجلك يا ... ويا... والله اذبحك .... الخ
وقتها انجنيت خبل فيني وجنني ماقدرت اتحمله حسيت ماحاط لي اعتبار انا امه وقاعده اسمع كلامه واطلعهم وهو بس يصارخ ويهاوشهم ومالي قيمه عنده وقتها قلت له على عدم احترامك لي رغم اني اطلعهم نحاسه لك ماراح اطلعهم ويدخلون غرفتك ولو تمسك واحد فيهم ياويلك
وتخيلي معاي انتي تقولين ماعندك عيال بس عندك ام واب تخيلي ترفعين صوتك عند امك وابوك وتهاوشين اخوك او اختك جدامهم وانتي عارفه ان هالشي يزعلهم تتخيلين راح يرضون وماراح يزعلون من تصرفك وانك ماحترمتيهم !!!

انا هذا اللي حسيت فيه انه ماحترمني رغم اني اطلع اخوانه وهم عارفينه ومستوقيين جدامي صحيح يسمعون كلامي ويطلعون بس يسوون حركه بسيطه ويستفزون اخوهم هذا غير اللي مايسوي شي بس يقهره بتفرجه ولمن ولدي يصرخ عليه ويهاوشه يقولي انا سويت شي انا واقف في مكاني !!! طيب وقفته معناها عند اخوه شماته فيه وانا حاسه فيه

بس هو الله يهديه جنني ماخلاني اعرف اتصرف وعاندته كعقاب له لين ماشركني في الهواش ويقول هذي ام يا ناس وفي ام تسوي بولدها جذيه وبعدين دخلنا بموضوع الصلاه وحب يناحسني فيها وانا كنت بسكت على اسلوبه معاي بس ماقدرت اسكت على الصلاه
وبس حبيت افهمك الموضوع عدل انه هو استفزني باسلوبه والا انا عارفه انه شي يقهر ويستفز لمن حد يدخل على حد وهو نايم ويزعجه
واشكرك جداً على المرور والرد
واسال الله ان يرزقك الذريه الصالحه

__________________

اشكرك اخي فيصل وكلامك اراحني
وانا اسوي جذيه امتدحه اذا سوى شي طيب واقوله انت عجبتني حسستني انك رجال
بس احيانا يرفض ومايفهم وش معنى طلبي له يجي معاي ويقولي كل مره انا !!!
ولو انها طلعه للسينما والا الالعاب والا المطاعم ماقال كل مره انا وبيكون اول واحد بالسياره !!
ولمن اقوله انا ابيك لان شكلك رجال بتحميني يرد علي ويقولي ليش شفيها يعني بيسرقونك !!!!
مايفهم اللي اعنيه واصلا لو راح معاي السوق بيجنني وكل شوي عطيني فلوس بروح هاللعبه والا بروح اشتري شريط سوني والا جوعان بشتريلي وجبه وانا اعطيه حتى يسكت ويظل معاي هادي
واحيانا من البيت اقوله بعطيك فلوس ووجبه ووو حتى يجي معاي مع ان اخوانه اللي بعده مو مثله بس ولدي تدلع كثير وغير انه مايفهم وش معنى وجوده معاي وانه يحميني
وانا سمعت ان الولد اذا بلغ سن الحلم يتغير 180 درجه ويصير يفهم بهالامور لدرجة ان في واحده شكتلي غيرة ولدها عليها وعلى خواته وانا اقول يمكن اذا بلغ يتغير ويفهم معنى حاجتي له

بالمقابل هو عند الرجال ولد مؤدب ومحترم والكل يمدحه لي ويقولي ماشاء الله ولدك مؤدب ورجال ويحترم الرجال
وراح ينفعك ان شاء الله وانا اقولهم الحمدالله واسكت ( وانا ماشفت منه شي بالعكس اترجاه وارشيه حتى يجي معاي محرم بس !!)
فهو عند الرجال غير ويتصرف كرجل وثقيل ومايخربط بس انا اقولكم واقعه معاي وشلون يتصرف معاي
واتمنى انه يكون رجال بكل شي مع امه واخوانه بعد مو بس امام الناس

اسال الله ان يهديه ويصلح حاله وحال جميع المسلمين واولادهم

__________________

اختي العزيزه والغاليه دفء الحياه
انتي فعلا اسم على مسمى
كلامك هادىء ومريح ودافئ فعلا
عزيزتي دفء الحياه صدقيني مافي شي من اللي قلتيه ماسويته بس بالنسبه للكتب عطيته مره كتاب فيه قصص واقعيه ومؤثره وهو كتيب حتى ماهو كتاب عباره عن 3 قصص قلت له يقراه وراح اساله عليه ( حتى اظمن انه قراه ) رد علي وقال اقريه وقوليلي شفيه ماني فاضي قلت له طيب اقراه واذا قريته بعطيك فلوس ومع هذا رفض
فيه كسل لو انها قصه والا فلم بيقعد بالساعات وطبعا اضطريت احكيله القصص هو يحب يسمع مني قصص ويتاثر بس فعل لا يمكن بنفس الوقت ايه بس بعدين يتكاسل
في السياره طول الطريق اشرطه وقصص ويتاثر والحمدلله يعني ولدي يكره التدخين ومايحبه والحمدلله وربعه مثله وفيه خير يعني يحب يتصدق ويرق قلبه لو شاف فقير او شايب يطلب ويعطيه اللي في يديه ويقولي يمه كسر خاطري ويقعد يكلمني وهو متاثر يعني فيه خير كثير بس فيه دلع اكثر !!
يحب كشخته اكثر من صلاته ويقعد يعدل هالغتره ويهتم بالنشأ فيها وتقوم القيامه لو اخوانه حركوا غترته بالغلط ويهتم لنظافة ثوبه ومنظره انا مامانع بس لمن تكون كشخته اهم من عبادته وقتها مايعجبني واعطيج مثال في عيد الاضحى هذا قومتهم لصلاة العيد وجهزت عيالي والبسوا ملابس العيد وقلت لهم يركبون السياره بسرعه حتى نلحق على صلاة العيد ( لاتسالون عن ابوهم هو حاله ثانيه اذا بعتمد عليه بنام كلنا للساعه 8 لانه هالفتره منتكس المهم انه من ازعاجنا قام وصلى الفجر في البيت وطبعا متاخره وراح بروحه يصلي صلاة العيد ) انا خذيت عيالي معاي وفي السياره طول الطريق وهو يعدل هالغتره ومن العجله نسيت السجادات ولمن وصلنا تذكر هو السجاده وقالي يمه الله يسامحك ماجبتي سجادات اللحين شلون اصلي قلت له خلاص مو لازم قالي الا لازم تبيني اوصخ ثوبي بالتراب قلت له خلاص حط غترتك على الارض وصل عليها قلت له هالجمله واستخف يقولي وشو مستحييييييييييييل اصلي على غترتي انتي صاحيه ... قلت له انا نازله ووالله لو ماصليت ياويلك باي طريقه تصلي وقلت لاخوانه صلوا على الارض او حطوا غتركم مافيها شي وانا والصغار والخدامات رحنا صوب الحريم وهو يناديني يمه جيبيلي حل صدقيني مستحيل اصلي على غترتي وبدت الصلاه وعني انا لقيت مكان فيه سجادات وصليت انا والصغار والخدامات وقعدت للخطبه وانا اسال صلى والا لا وبعدها سالته بالجوال وقالي صليت ايه لقيت هندي عنده سجادته وصليت معاه انا واخوي
يعني فيه دلع وفيه تواضع بس لو مالقى سجاده بيترك الصلاه والسبب الكشخه !!!!

وانا انتظر اي اضافه جديده منج اختي دفء الحياه غير الحنان صدقيني ماني مقصره معاه بس زعلي منه الدلع وتقصيره بصلاته وحركاته مع اخوانه المستفزه راح اقولك عنها بعدين

واشكرك جداً

__________________

اختي الكريمه أم البراء25
آميييييين وجزاك الله كل خير
واشكرك على مرورك الطيب ودعائك لي يعتبر مساعده والله يوفقك ويحفظ ولدك
تحياتي لك

__________________

اخي صاحب راي سديد
قلت :
* عمر 14 سنه مرحله تحول كبيره في حياة الشاب والتغيرات الهرمونية لذا يحتاج الشاب إلى عناية خاصة ومسياسه حتى تمر هذه المرحلة بسلام .

طيب قولوا لي شلون يعني هالعنايه الخاصه والمسايسه علموني


وقلت :
* لا بد من وجود القدوة في حياته وأفضل يكون أباه .

لا لا ابوه حاليا ماينفع هو طيب وفيه خير بس حاليا ماينفع طايح على التدخين وماكان يدخن ومتهاون في صلاته بعد ماكان يصليها في المسجد الشي الزين ان ولدي مو عاجبه تصرف ابوه وفاهم انه غلط ومايقارن بين كلامي له بالمحافظه على الصلاه وبين فعل ابوه

وقلت :
* لا تضربيه فالضرب لن يجدي بل سيكون المردود عكسي .

انا ماستخدم الضرب كوسيله للتربيه ومع ولدي استخدمت كل الوسائل الا الضرب وهذي اول مره اضربه والسبب صلاته
بس تصدق اني سعيده صار فيه تغيرات بعد ماكنت حزينه وزعلانه اني ضربته ثاني يوم صلى الفجر لانه كان سهران وفي صلاة الجمعه قلت له يقوم يصلي وقام ولمن جهزت وقلت باخذهم كلهم للمسجد لقيته قاعد على السرير ضاق صدري وقلت بنفسي يعني مافي فايده وماعاد لي حيل اتعب اكثر و قلت له للحين ماقمت !!!
ومتوقعه يرفع صوته علي او يقولي من الكلام اللي متعوده اسمعه زين اووف .... الخ
بس لقيته يكلمني وهو مبتسم ويقولي لا يمه انا قمت وتسبحت وجاهز بس باقي البس الثوب
انا ماصدقت اللي اسمعه يكلمني بأدب وخايف ازعل والاهم انه قام من سريره وتجهز للصلاه !!!!!
قلت له وانا مسويه عمري معصبه طيب بسرعه يالله البس ثوبك
وكنت سعيييييييده جدا ومو بس كذا لقيته يقولي يمه شوفي اخوي توضى ورد للسرير مالبس يقول بردان
( فرحت اكثر انه زعلان على اخوه بعد انه مالبس وبنتأخر ) قلت له عليك في اخوك واذا ماقام قولي اوريه شغله
كان ولدي سعيد اني سمعت كلامه وانا كنت اكثر منه سعاده
ورحنا كلنا المسجد لصلاة الجمعه بس طبعا لازم حركات ولدي من اهتمام بالغتره ولمن نزلنا من السياره قعد يشوف اخوه اللي بيصلي معاه مرتب والا غترته مو عدله والثاني يناحسه يقوله كيفي خلها خربانه مو شغلك
فقالي ولدي ترى مالي شغل فيه ولا كانه اخوي بصلي لحالي وردت سالفة الهواش حتى وهم رايحين يصلون
المهم انا قعدت ادعي له وكنت جدا فرحانه وسعيده ان ولدي ياخذ كلامي في موضوع الصلاه بمحمل الجد ويخاف اني اضربه وهذا اللي كنت ابي اوصله
والظاهر ان ولدي كان فعلا يحتاج لضرب وصدق رسول الله اضربوهم لعشر بس انا اخترت اللين معاه ومانفع في حالة ولدي كان يبيله ضرب حتى يعتدل والحمدلله اللحين اقوله صليت والا لا ويجاوبني انه يا صلى او انه اللحين بيصلي ويقوم يصلي فعل مو مثل اول يتفلسف علي

واشكرك جداً اخي صاحب رأي سديد على دعائك والله يسمع منك

__________________

اختي الغالية صريحة جدا

والله سعدت جدا بالتطورات الجديدة عسى ربي يصلح لك ذريتك ويجعلهم قرة عينك ويرزقك برهم اللهم امين

اختي الغالية .........الله يصلح لك ابناءك ويصلح لك زوجك ........

جزاك الله خيرا مانتي مقصرة بتربية عيالك ما شاء الله لا قوة الا بالله

جهودك بتربيتهم عظيمة الله لا يحرمك برهم وصلاحهم يارب

استمري وراهم بالصلاة ........والله انه جهاد الله يعينا على تربيتهم والله يصلحهم

اختي الغالية لا تنسين امر مهم جدا ..........الا وهو الدعاء دائما ادعي لهم في كل وقت

بالنسبة لاهتمامات ولدج بالكشخة والتعدل والتزين .........فهذا شيء عادي وما فيه شي

الله جميل يحب الجمال ...........وعيالنا الحين كلهم جذي ..........الزم ما عليهم كشختهم

لكن .........علميه انه لا تعارض بين طلبه للجمال والكمال وبين طاعته لربه

وان الاجر من رب العلمين اكبر من اجر الدنيا من اجر العباد المادحين للكمال في الجمال

حسسيه ان هذه النعم التي هو بها من فضل رب العلمين الله انعم بها علينا

وينبغي لنا الحمد والشكر لله حتى يزيدنا من فضله ويتم نعمته علينا

واذا لم نشكر الله بالمحافظة على الصلاة وما امر فربما يمنع عنا فضله

لكي يعرف قدر الله سبحانه........

اختي الغالية اعاننا الله على تربية ابناءنا كم هي مسؤلية كبيرة ومتعبة

خاصة في زمننا هذا عندما تخلى الاباء عن القيام بهذه المسؤلية

لكن اجرنا على الله ........وما يضيع شيء عند رب العلمين

نسأل الله لنا ولابناءنا الجنان ونعيمها ورؤية العظيم المنان الجميل سبحانه

وأسأل الله ان يجيرنا وابناءنا من عذابه وحسابه اللهم امين برحمتك يا ارحم الرحمين .

اختي الفاضله hasarym
وبالنسبه لما ذكرتي فقد جعلت نفسي مكانه
وتذكرت انه حين كان يأمرني والدي ان اصلي فقد كنت اصلي واقوم بدون نقاش
بل كنت ارفض ان يوبخني فكيف ان يضربني !! فلم الوضع مختلف مع ولدي !!!
بعد تجربتي مع ولدي في الضرب عرفت ان السبب هو عدم وجود من يخوفه بامر الصلاه بطريقه جديه ومؤثره
فاللين والنصح والدلع والدلال لم يعد يجدي مع ولدي لانه تشبع منه وكان لابد من طريقه اخري جديه وصارمه
والحمدالله نجحت هذه الطريقه لانه لم يعتد عليها من قبل بل كان بحاجتها
والحمدالله هو الان افضل ويسمع كلامي حين امره بالصلاه

اسال له له الهدايه والتوفيق والصلاح له ولجميع ابناء المسلمين

وجزاك الله كل خير

__________________

اختي الكريمه ام اثير4
قلتي
لابد من مصارحه زوجك و تذكيره بالمثل القائل ان كبر ابنك خاويه


لا اختي عند زوجي ان كبر ابنك اصغر انت !!
زوجي ماينفع يخاوي عياله ابدا واذا بعتمد عليه بيضيع ولدي
هالفتره زوجي عايش حياته ويبيني اعيش معاه هالجو جو اللا مسؤوليه
جربت اعيشها معاه حتى اسعده ولقيت نفسي بضيع وبضيع عيالي لاني قمت احيانا ماشوفهم حياتي مع زوجي عباره عن سهر للصبح وطلعات برى البيت من كوفي لمطعم ويقعد يدخن باستمرار وفي الليل يبيها سهره معاه ويبي لبس ووناسه وانا اقول بسعده وبتحمل بس كل يوم ماصارت !!! شفيه انا لمن تزوجته ماكان كذا !!!!
اروح الدوام وانا نعسانه وتعبانه من السهر وصلاة الفجر معدومه ماصليها الا قبل اروح الدوام والسبه السهر
وغير عيالي ماعدت اشوفهم يا محبوسه معاه بالغرفه او برى البيت معاه واجي اخر الليل الاقي عيالي الصغار كل واحد نايم بحضن خدامه والباقي نايمين في الصاله على التلفزيون ولمن اشيك على كتب عيالي اللي يدرسون الاقي عليهم اختبارات مادرسوها وواجبات ماحلوها حياه فوضويه وضياع
ومادري عن عيالي وش كلوا ووش سووا ودرسوا والا لا !!!!
ويظل ضميري يانبني عليهم وزوجي يناديني يالله نكمل السهره طيب وبعدين وش اخرتها انا فرحت باول اسبوع دلع وطلعات وثاني اسبوع قلت يالله اكيد بيمل ولقيته على هالحال شهر ويبي يواصل حياة المراهقه والاستهتار واللا مسؤوليه نبهته وقلت له وعيالنا انت شفيك هذول من لهم !!! ولا كاني اكلمه وكانه توه عريس لاعيال ولا هم !!
غير ان عيالي اشتكوا من اهمالي لهم وقاموا يزعجونا يدقون باب غرفتنا بطريقه مزعجه وينخشون وعلى هالحال يبغون يزعجون ابوهم ويخلوني اطلع من عنده و كل شوي يطلبون مني شي ويكلمونا باي شي تافه المهم يخربون علينا
ولمن يسمعون اغاني لان زوجي ماتعجبه السهره الا باغاني يقولون لنا من ورى الباب حرام اغاني ويوجهون الكلام لي يمه الاغاني حراام ماتخافين من النار وقتها اسكر الاغاني واقول لزوجي احنا قدوتهم ونسوي الغلط
وهو عادي عنده واخر مره قالوا لي يمه ياريتك تتهاوشين مع ابوي ولا تتركينا على الاقل بتقعدين معانا مو تظلين محبوسه معاه بالغرفه ومن يشوفون ابوهم يقولون له يبه طلع امي احنا نبيها لا تحبسها
فكرهت هالحاله وقلت له خلاص انا ماراح استمر انا سايرتك بس انت ماعندك حد ونسيت عمرك ونسيت ان ورانا عيال
وقمت اشوف عيالي وادرسهم واقوم فيهم وهو له وقت بعد مااخلص تدريسهم وانوم عيالي كلهم اروح له مو طول اليوم وعجبه او بكيفه يسهر لحاله او مع شلته اللي خربته وحاليا اعتدل شوي مايسهر كثير حده الساعه 12 ومافي دش وخرابيط وباقي مشكلته التدخين وتاخير الصلاه يصلي بس لا في مسجد ولا في وقتها وان شاء الله الله بيهديه ادري
انها مراهقة سن الاربعين وانها فتره وتعدي بس طولت عنده لكن عندي امل يرد مثل قبل ومالي الا ادعيله والله يهديه


وبالنسبه لكلامك عن عدم اعتذاري لولدي فانا فعلا سويت هالشي وماعتذرت منه وكلامك سليم ميه بالميه

وبالنسبه للخروج معاي انا بعد سويت نفس اللي تقولينه بس هو عنده بدائل اذ انا بحرمه بيطلع مع ابوه واذا ابوه بيحرمه بيطلع مع ولد خالته والا عمته وفي بدائل
يعني انا اقوله عقاب لك ماراح اوديك هالمكان فالاقيه يطلع مع غيري واذ حرمته من الفلوس ربعه راعين الفزعه كل واحد يعطيه وهو يسوي لهم نفس القصه اذا واحد منهم امه والا ابوه عاقبه وحرمه من شي قلوبهم واحده ماشاء الله

وبالنسبه للصرامه مع ولدي في هالحاله ماينفع جربت اكثر من مره ومانفع كنت اقوله تعال معاي وبعدين اوديك المكان اللي تبيه واعطيك فلوسك ووالله انه يرفض ويقعد في البيت ولا يروح معاي ووقتها اعصب وكل محاولات ربعه باقناعي انهم ياخذونه ارفض واقولهم السبب حتى يفهمونه انه غلطان وانه على سبب تافه خرب على نفسه هالطلعه بس مادري هذي المشكله عجزت معاه فيها وابوه عجز معاه فيه عند عجيب حتى على حساب مصلحته يعاند

وبالنسبه لتسجيلهم في مراكز تحفيظ القران مايلتزم فيها اسجله فيها ويداوم اسبوع ويطلع يتملل بسرعه وبالنسبه للنوادي الثانيه يداوم فيها زين و ماشيه معاه ويحبها
ومادري اذا هالسن تخليه شوي ينفر من امور الدين ويحب الامور اللي تبهره من كمبيوتر والعاب ونوادي وسباحه
لاني ملاحظه عليه هو بس اللي كذا اخوانه عاديين ولو ماعجبهم بس يلتزمون بالمراكز الدينيه


اخيراً جزاك الله كل خير اختي ام اثير4 على المساعده وجعله الله في ميزان حسناتك
وتقبل الله دعائك والله يسمع منك

__________________

اختي العزيزه والغاليه دفء الحياه
كعادتك كلامك يسعدني ويريحني ويشعرني بانني لست الوحيده وان هذا شي طبيعي
اشكرا جدا اختي دفء طمنتيني بخصوص الكشخه وانها شي طبيعي لانه رفع ضغطي
وحسبت ان هالشي فيه هو بس لكن طالما انها شي طبيعي فالحمدالله راح افهمه واوضح له انها ماتكون على حساب الدين
تدرين اختي دفء وشو افكر احيانا اسوي في ولدي ؟؟
افكر اسجله في الجيش !!! ويغيب عني شهر بس ويردونه حتى يشوف حياة الخشونه شلون
بس لمن سالت لقيت ان سنه صغير وغير كذا قالوا لي انه اذا دش خلاص بيستمر فيها ومو سهله انه يدش الجيش ويطلع بسهوله وانا مابيه يشتغل في الجيش ابدا
بس ودي يدخل شهر بالكثير شهرين يصطلب ويرد لي ابيه يشوف الحياه الخشنه ويتربى ومافكرت بهالشي الا لغفلة ابوه في هالفتره ولاعتماده علي في تربيته

وبعدين قلت بدخله كاراتيه ووديته اول يوم يشوف بالنسبه لاخوانه عجبهم وهو قعد يتطنز ويقول شنو هالاصوات والصراخ وتبيني اتعلمهم ومدخلتني كاراتيه حتى اقعد اصارخ ترك التدريب والتسخين ومسك لي الصراخ ورفض اسجله لانها اجازه مايبي اجازته تخترب بسبة التدريب يبيني اسجله بس بايام الدراسه مو على حساب اجازته يتشرط بعد !!!


الله يهديه ويصلح حاله هو مو كله عيب فيه خير كثير انا احب اسولف معاه كاخ او صديق مو كولد واضحك على سوالفه وحركاته ومافي اسرار بينا ولازم اقوله بكل شي وماخبي عليه بس من حبي له ابيه يكون احسن واحد ومابي فيه شي ينقص من قدره
بس مشكلته الدلع وعدم وجود الصرامه لان ماعنده اب يخاويه هالفتره وانا كأمره صعب علي بروحي يعني صحيح اوديه المسجد بس يدخل قسم الرجال وهو وحيد بدون اب او معاه اخوانه الصغار واخليه مسؤول عليهم ولو ابوهم قام من غفلته واهتم لامور الصلاه وكل امورهم ماهتميت ولا شلت همهم وحصرت وظيفتي معاهم في البيت مو في كل شي

والحل مثل ماقلتي الدعاء ومالي غيره
اخيراً
اشكرك على دعائك الطيب والله يسمع منك ويصلح حالنا وحال اولادنا ان شاء الله

تحياتي لك والله يسعدك

اختك صريحه جداً

__________________