السلام عليكم

مادري وش أقول ولا ادري هل اللي سويته صح ولا خطأ

ولاحد يرد رد جارح رجاءً

انا كنت طالعه مع اهلي للسوق علشان العيد وانا في محل شفت طليقي الأول

الأول مو الثاني انا تطلقت مرتين

وانا الغلطانه لاني وافقت دون اقتناع بس علشان انسى طليقي الاول

وطليقي الثاني راعي خرابيط وماقدرنا نستمر وشريت حريتي

المهم

دون ما احس رحت اشوفه ومادري اسلم ولا لا

وانا اناظر فيه والله حجابي تمام بس عيوني طالعه ويديني وقفت وسرحت مو اناظر الا ابحلق ههههههه

بغيت اكله هههههههه استغفر الله

هو ناظر وش تبي هالحرمة عرفني

واضح تغيرت ملامحه ووجه مو انه متضايق بس عرفني

قال فلانه شلونك شلون الاهل وانا رديت الحمد الله كلنا بخير وصحه

وانت شلونك وخالتي ام فلان شلونها ورد كلهم بخير وانها دايم تسأل عنك

خذتنا السوالف وامي تتصل علي قلت له لازم اروح قال ابي اتواصل معاك ابي رقمك

قلت ماقدر مابيننا شئ علشان نتواصل

قال ودي نرجع لبعض بس بكلمك قبل بموضوع

رفضت وقلت لا تبي ترجعني تعال كلم ابوي

ورحت وتركته وانا امشي التفت اشوفه يناظرني واصدم بعربية كارفور واعدل نفسي واكمل مشي واقول ما حلتفت خلاص والتفت مره ثانية واشوفه يناظر ووجهه مبهم يعني لافرحان ولا زعلان مادري عاد المهم

احس بفرح مو طبيعي اني شفته وانه ماتزوج للحين طلع احسن مني كرهت نفسي شلون تزوجت انا وماصبرت شوي

احس بندم كان ودي اتواصل معاه بنفس الوقت احس بفخر اني ماضعفت حتى لو قدام العشرة والحب

حتى الحين احس بندم اني فتحت الموضوع لأن اكيد بيجيني عتب ليه تكلمينه وهو غريب عنك ومن هيك كلام

بس مو بيدي احبه انا لما اخذت ورقت طلاقي من المحكمة اغمى علي طحت عليهم وماقدرت اقراها الى اليوم ماعمري قريتها كامله ابد

واللي فرحني اكثر ان خالتي ( أمه ) اتصلت علي تعايد وجلسنا نسولف يمكن ربع ساعة

وبعدها كلمت امي وكانت تبي تزورنا بس كنا مسافرين

احس احياننا اني جالسه افسر الموضوع على مزاجي وكلها اماني انا اتمناها واستنتاجات وانا ما احب افكر بالاحداث علشان ما انصدم بشئ مختلف

لاني عارفة حظي واخاف اموت بحسرتي انه ماصار شئ ولا يبي يرجعني من الأساس

ونسيت شئ بالليل افكر وش كان يبي امس جلست اتقلب ولا نمت ماقدرت انام ابد ابد

باقي شوي واكمل 36 ساعة صاحية بس افكر ههههههههه احس راسي صار ثقيل راس بابا فرحان :14:

يارب يتحقق اللي ببالي ويكتب لنا نصيب نرجع لبعض

احس نفسيتي صارت احسن يارب يارب يارب

حبيت اضيف طلاقنا مو عن مشاكل عائلية او خيانة او شئ من هالامور بالعكس كانت حياتنا الزوجية مثالية للتوضيح يعني

ضروف حصلت وهو كان تعبان نفسياً وجلس فترة عندو اكتآب وصبرت بس ماعاد تحملت

ويارب خير