المشاركة الأصلية كتبت بواسطة عطر الفجر

السلام عليكم ورحمة الله
كيف حالكم ؟
قريت في موضوع هنا رد لعضوة عن افضل صفة يحبها زوجها فيها وتذكرت معاناتي لاني عكسها تماما
قالت انه يحب فيها كونها فرفوشة وتحب الضحك
ما احد فينا ما يحب الفرفشة والضحك .. بس فيه ناس ما تعرف ..
ايه صدق وانا منهم
كنت بالبداية ماخذه دور الجدية والبرستيج .. بس بعدين تاصلت فيني وماعد عرفت افك
اتذكر لما كان ابوي يقنعني بزوجي قال سالت عنه بالعمل كل زملاءه يقولون مزّاح ويحب الضحك ، للاسف كان اكثر شي اكرهه فيه .. كنت ابيه جدي وعاقد حواجبه زي ابطال الروايات، و انقهر من جوا عليه احس الضحك مو من الرجولة.
بالدوام نفس الشي ما اضحك بسهولة مو اني مكشرة ونكدية.. بس اذا قلبوها تنكيت وتهريج ما انسجم حتى لو حاولت
بالافلام دايما خياراتي دراما رومانس ما اميل للكوميدي كثير اتحسف بوقتي عليه
بيتنا فرفوش وواخواني وخالاتي وعماتي عيارين درجة اولى وانحط معهم بمواقف بايخة لاني اتعامل بجدية ويصير بالاخير مزح..
وش بعد حتى بجمعات البنات صديقاتي وقريباتي المفروض اصير ماخذة راحتي وافلها .. بس للاسف ما اعرف اضحك من قلبي واتسدح زيهم حتى لو شفت او سمعت شي يفطس ضحك
احس اني صايرة عجوز نقادة .. ودي افك شوي .. وافرفش ابي اضحك بصوت عالي ابي يتطور عندي حس الدعابة واعرف انكت واتهرب من المواقف بالمزح
ساعدوني .. اعرف الموضوع صعب وياخذ وقت بس باحاول