مرحبا مهووووره

شحالج عساج بخير فديتج

انا وااااااااايد مستغربه حبيبتي .. تعلمت منج الحكمة والتفكير المنطقي .. تعلمت منج اشياء كثييييره .. بس الحين ما اشوفج تطبقينها في مشكلتج .. شو ياج مهره .. يالسه تاكلين بعمرج .. ومستويه عصبيه .. استهدي بالله يا بنت الحلال وهدي
شوي علشان تفكرين صح ..

حبيبتي اذا تحاولين توصلين مشاعرج للموجودين فاختصر عليج الطريج واقول لج ما بتقدرين الا مستحيل توصل مشاعرج
لاي احد ولا بتقدرين تعبرين عنها او توضحينها .. مشاعرج في هاللحظة ما يعرفها الا رب العالمين ومن ثم انتِ ويمكن وحده ولا هنتين جربن اللي انتي تجربينه الحين ..

شوفي يالغاليه كلامي اللي بكتب لج اياه اكيد تعرفينه لكن ما في حرج اذا ذكرته لج .. حياتنا فيها سعاده واستقرار وفيها مصائب وابتلاء فيها التعب والزعل وفيها الرضا وراحة البال ومب كامل الا وجهه سبحانه وتعالى .. اعتبريه ابتلاء واطلبي رب العباد انه يرضيج فيه ويصبرج .. اما زوجج فاذا كان من النوع اللي يراكض ورا الحريم وهذا اللي فهمته من كلامج .. فعندج اكثر من طريقة او اسلوب يوقفه عند حده ويخليه يترك هالامور
لكن علشان تنفذينها يبالج تريحين مخج من التفكير السلبي وتتفيجين له صح

والله اكثر من وحده يتني العياده وبمشاكل مثل هذي وبتوفيق من الله ثم بعذ النصائح والاساليب والخطط تصلحت الامور
ياحبيبتي ما في شي بالدنيا ما له حل الا الموت واصعب واكبر مصيبه من الموت ما شي

ما بنصحج لان الانسان في الضيج ما يدور النصيحه .. كثر ما يبغي حد يفهم مشاعره .. بتريا ردج فديتج

شوفي مهره .. زين يوم انج اعترفتِ انج متغيره
حبيبتي ما بعطيج حل مثالي لكن بقول لج حددي بالضبط شو اللي تبينه .. لا تقولين ما أعرف لانج اذا ما حددتي اللي تبينه تصرفاتج كل ما ياها وبتسيء اكثر بمعنى انج بتتصرفين بدون حكمة ولا نضج وشكلج بيكون امامه غلط ما لاحظتي انه يعلق على كل تصرف تتصرفينه بجملة (( الله يهديج )) او جملة (( هل هذا عقل )) لانه تصرفاتج تبين له انج ضايعه ومب عارفة شو تبين اما اذا حددتي الشي اللي تبينه الحين من زوجج او من علاقتج معاه حل موضوعج بيكون اسهل بوااايد
اما يلسج بهالطريقة ويأسج وزعلج وضيجج ما بيوصلج لشي .. انتي عارفة شو الصح وشو الغلط بس في امور صعبه عليج
حكمتي العاطفة حبيبتي ومب لاقيه الا الهم والقهر والضعف والتعب النفسي .. حكمي عقلج الحين وجربي ..
ما عليه الغاليه اسمحي لي على هالكلام بس تصرفاتج واااايد بعيده عن المنطق والنضج وما اقصد القهر والضيج اللي انتِ حاسه فيه بس اقصد تصرفاتج مع المشكلة بشكل عام ومع زوجج بشكل خاص .. مهره اعتبري اني انا اللي صايره معاي هاي المشكلة وانتظر منج ترشديني شو بيكون رأيج ؟؟ انا ما عندي شك في انج قادره تتعاملين مع مشكلتج بس مب عايبني ضعفج
وتفكيرج المحدود في هالوضع بالذات يا حبيبتي الدنيا ما توقف عند شخص ولا السعاده بتحصلينها عند اي انسان

اتريــــاج فديتج