كنت هنام وقلت ارد عليهم بكره ، انشغلت عنكم اسفه وكمان جانى انذار من الاشراف خلى مزاجى مش تمام

معلش صباح الفل والورد والوزن اللى هينزل بإذن الله يا بطابيط اليوم وكتاكيت الغد
نبدأ بأول استشاره.

شعاع من نور

وزنك 74 وطولك 165

معدل كتله الجسم عندك حبيبتى 27 انتى فى نص مرحله الوزن الزايد يعنى بعد 10 كيلو تبقى سمنه وال10 كيلو ما اسهل انك تزيديهم وتزيد معاهم بعد الشر امراض القلب والسكر والضغط والشرايين والاكتئاب

لازم وزنك ينزل على الاقل خالص 6 كيلو
يعنى شهرين ده بالمعدل البطىء جدا جدا بدون لا اكتئاب ولا حرمان وده عشان يبقى معدل كتله جسمك 25 بس اى كيلو زياده فوق ال68 اللى هتوصلى لهم باذن الله تانى هنرجع مرحله زياده الوزن والكيلو يجر كيلو وزنك المثالى المفروض 57 كيلو وده مش هدف واقعى دلوقت خلينا نمشى مرحله مرحله
مشكله البطن مشكله طبعا ودى صعبه جدا ومن اصعب المناطق لو شكل جسمك اصلا شكل التفاحه يعنى اكتاف وصدر وبطن عريض مالك الا الرياضه المهلكه للمنطقه دى او حقن اسمها ليبولايبيد مش ميزوثيرابى لان الميزو ماله نتايج والليبو لايبيد بيعملهم طبيب مشهور جدا فى مصر تنحت الوسط والبطن وعمر المناطق دى ما ترجع تانى ابدا زى الشفط فى النتيجه بس بدون عمليه حقن تحت الجلد فى المناطق المطلوب ازالتها وتطرح الدهون مع البول ولا تحتاجين لتكرار الحقن الا لو البطن حجمها مهول
لو ولدتى قيصريه وعملتى الحقن ده هيبقى كويس بطنك هتنحف تماما بس هتفضل عندك مشكله الترهل يعنى لازم شد بطن ودى عمليه مش بسيطه يعنى مؤلمه بس النتايج مبهره ودائمه مدى الحياه بالاضافه لكلفتها
الحقن سعره فى المتناول على فكره .
يارب اكون افدتك

حلوايه حبيبتى

بصى البطن لو خفيفه اوى يعنى نظام طالع لك برتقاله فى بطنك اه الجهاز يشيلها ممكن غير كده الاجهزه والادويه والدهانات كل دى خرابيط وهبل وضحك عالناس
البطن عضله لو اتقطعت بالولاده القيصريه اكتر من مره انسى انها ترجع او تقل هتقل دهون وهيفضل الجلد مترهل
وشوفى ردى على شعاع من نور

ماريا
انا نباتيه ما باكل لا لحوم ولا فراخ فأكيد نظامى حرمان بالنسبه لك وانا عملت ريجيمى من الحاجات اللى انا بحبها فعلا
انا بموت بالمكسرات لو اكلت مثلا فنجان كبير كاجو مثلا ما بتغداش واخد الزينيكال
ولو الشوكولا مش ممكن تكونى مدمنه اكتر منى عليها بأكل شوكولا بس قد ايه ونوعها ايه لو دارك تاكلى مثلا مربعين وسط اليوم حلو اوى مره كل يوم
حابه تاكلى بار حلو او 3 مارس او كيت كات ما تتغديش
والكيك والحلويات نفس الحكايه
انا ما كنتش محرومه بالعكس
بصى انا بحب المشروبات والمعجنات وكل القصص دى بس زى ما قلت انا شفت انا بحب ايه واخترعت لروحى نظام
وانا عمرى ما اكلت سكر بالمشروبات ابدا ابدا مش بحبه اصلا
لو فاكره انى نباتيه وانى ما باكل سكر ده نزل وزنى بالعكس ده خلانى اعانى فى نزول الوزن انتى عارفه انا لو باخد سكر وحلويات ودهون مجرد اى تقليل ولو بسيط كنت انزل بسرعه جدا انما عشان اصلا هم مش موجودين فنزولى كان مميت ببطء

HALA122 حبيبتى
معدل الكتله عندك 26 ونص زيك زى شعاع من نور تمام
وزنك زايد طبعاالمثالى 53 كيلو وده صعب وبعيد
نظامك اخر لخبطه وزنك عشان هه يادوب ندخل مرحله الوزن الصحى لازم يبقى 66 كيلو
كونك تفطرى حلويات وتفضلى عليها لحد 7 بالليل وتدبيها مع جوزك طبعا مش تمام
جسمك اتعود على كده وخايف من المجاعه يعنى برمج روحه دى ممكن تحرمنى فأنا هخزن كل جرام دهون تديه لى
بصى افطرى 2 كيت كات صغيره

بعدها بساعتين موزه

بعدها بساعتين زبادى بدون دسم وموزه مادام مش بتحبى الا نوع الفاكهه ده

بعدها تانى بساعتين كوب عصير طبيعى انتى عاملاه بالبيت ، او ساندوتش عيش اسمر جبنه ومعاه سلطه او تونه او بيض مسلوق وسلطه ولو العيش سن يكون افضل

الساعه 7 لما ييجى جوزك كلى بس فى طبق الشوره الصغير عارفاه امليه رز وخضار على بعض واعملى سلطه لاااااااااااااااااازم واللحمه والفراخ لو سمحتى من فضلك مسلوقين عاوزه تحمريهم يبقى تشترى زيت الرش فريسكو او الزبده وحمرى نصيبك فيهم الزيت او الزبده بيكون مكتوب عليهم 0%FAT

بعد الساعه 7 تقفلى بقك ده خاااااااااااااااااااااااااااااااااااااااااااالص
ولو تعرفى ياريت بعد العشا كوباية زبادى منزوع الدسم..........الزبادى بيقلل امتصاص الجسم للدهون

الشاى الاخضر ما بيخسس لوحده يعنى هو بيزود معدل حرق الدهون او الايض بنسبه 3 % تقريبا بس انما هو يزود الحرق وانتى تزودى الدهون والدهون مش يعنى مقالى بس لا كربوهيدرات كمان وسكر الجسم بيحول جزء كبير منهم لدهون

لو عملتى البراد بتاع الشاى الاخضر اللى بقول عليه بالشمر او من غيره صدقينى وشربيتيه طول اليوم الاخراج هينتظم وجسمك داخليا هيتغسل ومعدتك هترتاح
لو بتاخدى مشروبات بالسكر شاى او عصير او كده لو بتاخدى 3 معالق سكر خليهم 2 ولو بتاخدى 2 خليها واحده
وربنا معاكى

المهاجره للجنان مشكوره على الاطراء
فلافل حمااااااااااااااااااااااااااس عاوزه اشوفك بقيتى غزاله بقى
فيافى نجد اوعى تشترى جديد صدقينى خليهم حافز وهتخسى

الى غزلان المستقبل هيا فلنبدأ من اليوم انا كمان بدأت والحمد لله انا كمان عندى 6 كيلو عشان ارجع غزال البر والبحر مش عارفه البحر ازاى بس هو كده وخلاصياللا تصبحوا على خير يا بطابيط