معا نحو الرشاقة (الجزء الثالث) - الصفحة 5 - منتدى عالم الأسرة والمجتمع

09-03-2010, 11:05 AM

#41

sa33

قلب المنتدى النابض

تاريخ التسجيل: Aug 2003

المشاركات: 2,588

نكمل بقى يا حلوات
كنت وقفت عند انى عرفت ان الرياضه نقطة مهمة جدا فى الرجيم لا يجب أبدا تجاهلها فبدأت أفكر ازاى اعمل رياضه وانا فى بلد صغير جدا ليس بها نوادى ولاحتى حديقة والبيت عندى كله على بعضه غرفتين وصاله
قلت ما فيش غير انى اشترى جهاز سير رياضى وطلبته من زوجى ولكنه لم يوافق لأنه جاب لى وانا فى مصر من كام سنه جهاز اوربت تراك وما استخدمتهوش مرتين ثلاثة ورميته وهجرته فقال لى انا مش هأجيب أجهزه رياضية تانى .....المهم حاولت معاه لحد ما ربنا هداه واقتنع انه يشتريه ولكن للأسف لم أجد فى قريتنا الصغيرة اى أجهزة رياضية لا جديدة ولا مستعمله ولازم علشان اشترى جهاز زى ده اروح المدينه اللى تبعد عن قريتى 350 كيلو !!! فلغيت الفكرة تماما من رأسى وقررت الاعتماد على ربنا سبحانه وتعالى ثم على نفسى وعرضت على زوجى انه يخرج يمشينى كل يوم نصف ساعه ولكنه طبعا لم ينفذ فهو بييجى من شغله آخر النهار مهدود ومش قادر يقف على رجليه
اتضايقت جدا وحسيت بالإحباط لكن بجد كانت ارادتى قوية ومصممة على هدفى مهما واجهت من صعوبات فقررت فقط أن أمشى بداخل المنزل
نعم بداخل منزلى الصغير ( ومازالت هذه هى رياضتى اليومية) أمشى من بداية غرفة المعيشه وأقطع الصاله حتى نهاية غرفة النوم ذهابا وإيابا لمده نصف ساعه وبسرعه معتدله يعنى لما أحس ان نفسى بدأ يتقطع ومش عارفه اتنفس كويس ابطئ سرعتى شوية ولما احس انى بطأت قوى ارجع أسرع حبه
طبعا مش عارفه اوصف لكم مدى الألم والتعب الشديد اللى أصابنى فى أول أربع أيام تعب بظهرى وأوراكى ورجولى وكل حته فى جسمى لدرجة انى كنت بآخذ مسكن بروفين بعد كل تمرين
وكمان طلعت لى فقافيق ما بين صوابع رجلى وفى كعب رجلى وفى قدمى من الأمام ودى بقى كانت تعبانى ومجننانى لأنى كده خلاص مش عارفه امشى كل ما أمشى الفقافيق دى تنفجر وتطلع ماء وتتسلخ جلدتها وأموت من الألم فجيبت لها علاج من المستشفى مرهم كده وكنت بأربط كل قدمى بالشاش والقطن وأمشى أيوه مافيش حاجه هتوقفنى لا تعب ولا الم ولاحتى تسلخ قدمى
وتشافت والحمد لله خلال اسبوع وبعدها إشتريت حذاء رياضى وشرابات قطنيه وأصبحت من يومها للآن لا أمشى للتمرين الا بعد لبس الشراب والحذاء الرياضى ومشى الحال والحمد لله
وبدأت أزود بقى فى مقدار الرياضه يعنى زودت كل يوم خمس دقائق على النصف ساعه حتى وصلت الى ان أمشى ساعه ونصف متصلة يوميا
وبدأ الوزن فى النزول والتزحزح ولكن ببطئ شديد أيضا
وقرأت فى هذا الوقت عن فائدة شرب الماء وأهميته للجسم كله وأن الماء ليس كباقى المشروبات فجسمنا يحتاج للماء فى صورته الطبيعيه يعنى ما ينفعش اقول ما انا بأدخل لجسمى سوائل بالشاى والقهوة لأ الفايدة فى الماء والماء فقط فبدأت بشرب كوب من الماء قبل كل وجبة وكان شيئ مقرف جدا بالنسبه لى وبالذات ان كان فصل الشتاء بدأ والماء لابد يكون بارد يعنى اما من الثلاجة او بدرجة حرارة المطبخ لو كان الجو بارد والجو عندنا هنا ثلج فكنت اول ما أشرب الماء أشعر بالبرد اشديد جدا لدرجة ان أطرا أصابعى لونها يصبح أزرق أو بنفسجى وكذلك شفتاى ولكنى تعودت رويدا رويدا حتى أصبحت أشرب لتر ماء قبل كل وجبة بربع او نصف ساعه
وبدأت حبيبتى أم جمانه تدخل معانا على الموضوع وتشجعنا بكلامها اللى زى العسل واسلوبها الشيق الجميل وطريقتها اللى لازم تقبلى بيها اى نصيحة منها ربنا يجزيها الجنه يارب
وبدأت تشجعنى وحتى لما ما انزلش خالص تقول لى يا أم عمار ما تزعليش لما تثبتى أحسن من لما تزيدى ولما انزل فقط 200 جرام او حتى 100 فى بعض الأسابيع تقول لى ولا يهمك 100 جرام على 100 جرام مع الصبر ومرور الأيام هيبقوا كيلو والكيلو هيجر وراه كيلو وتلاقيكى بقيتى فراشه ... فكانت كلماتها بمثابة البنزين الذى يشحن طاقتى فأستمر وأستمر وأنا كتبت هذه الجزئية متعمدة لكى تعرفن فائدة ودور الدعم النفسى والتشجيع على الرجيم ....... بجد بجد لازم تلاقوا حد يشجعكم ويدعمكم لو مش من المحيطين بكم يبقى من النت او من اى مكان المهم يكون دايما فيه حد يدعمكم.
وبدأت معنا أم جوجو رجيم إقترحتى علينا وهو رجيم تخليص الجسم من السموم ومدته اسبوع وكنا مسميينه رجيم الأرانب لأن أكلنا كله وقتها كان خس وجزر وخيار وخضار زى الأرنب وكا رجيم عذاب كان فيه ايام مافيهاش اى أكل جامد ولازم كله سوائل وأيام تانية خضار بس وكده يعنى المهم ان الاسبوع مر على خير ووزنت نفسى فلقيت المفاجأة !!!!!!!!!!!!!!!!!!!!!!!!!!:14: لأول مرة أنزل فى اسبوع واحد 1300 جرام وكان ده بالنسبة لى انجاز رائع .
ولكن طبعا الرجيم ده مدته القصوى اسبوع وما ينفعش نكرره تانى الا كل فتره وللأمانه انا لم أكررة تانى ابدا.
وقرأت وقتها عن رجيم نوع الجسم وعجبنى واقتنعت بيه وقلت أجرب خصوصا انه أكثر حاجه كانت غيظانى فى شكل جسمى كانت أوراكى والجزء السفلى عامة واتبعت رجيم نوع الجسم التناسلى ....... ونزلت عليع كيو ونصف او اثنين كيلو لا اذكر تماما ولكننى ذهلت من نتيجته وفرحت جدا وجيت هنا فى المنتدى وعملت فرح وقعدت اشكر لكم فى الرجيم ده جدا جدا لدرجة ان كل العضوات تقريبا سابوا رجيمهم واتبعوا رجيم نوع الجسم وكل واحد وشكل جسمها لكن بصراحه هو كان اجح جدا معايا لكن ماكانش ناجح مع ناس كثير غيرى
ولكن انا ظللت متمسكة بيه وخصوصا ان مدته شهر كامل قابل للتجديد حتى الوصول للوزن المثالى وظللت عليه فترة كبيرة جدا يمكن ثلاث شهور او اربعه وكنت بأنزل بمعدا رطل اسبوعيا يعنى 450 جرام وأحيانا أكثر فأصل للكيلو او 900 جرام وأحيانا أقل فأنزل 200 جرام فقط وخصوصا فى وقت الدورة
آه وبمناسبة الكلام عن الدورة الشهرية افتكرت معلومات مهمه عنها
أولا الدورة مظلومه فعلا معانا فى الرجيم فاحنا بنأخذها الشماعه اللى بنعلق عليها فشلنا فى الرجيم عامة فاللى ما تخسش اسبوع تييجى تقول اصل الدورة خلاص على وصول وتلاقى جسمى مخزن ماء واللى تقول اصلى لبخت فى الرجيم علشان الدورة هتييجى بكرة ولا بعده وانا ايامها بأبقى مش قادرة احوش نفسى عن الحلويات وبأبقى هأتجنن وآكل اى حاجه حلوة او مسكرة ........ وطبعا تنهال عليها الردود بأننا كلنا كده فى الوقت ده وكلى مايهمكيش بس بحذر !!!!!! وطبعا الأخت تفتحها على الرابع لأنها اول ما تذوق أول قطعه من الشيكولاته ما تقدرش تمسك نفسها ولا تحس بحالها الا والبار كله خلصان ويمكن العلبه كمان

وطبعا كل دى خرافات !!!!!!!!

استنوا على بس انا عارفه انكم هتقوموا تضربونى دلوقتى وزمانكم بتقولوا لأ بقى يظهر ام عمار خرفت.........

لأ يا حبيباتى ...... الموضوع وما فيه ان الجسم بيحبس حوالى نصف كيلو فقط وبالكثير كيو الا ربع من السوائل قبل الدورة بثلاث ايام ومع نزول اول دم للحيض يبدأ هذا الاحتباس فورا فى الزولان وخلال اول يومين للدورة بيبقى الجسم خلاص تخلص من السوائل المحبوسه وبيبقى فاض بس باقى دم الدورة اللى كله على بعضه مش هيعمل 250 مللى يعنى الواحده ما تبقاش زايدة 2 كيلو مثلا وتقول اصل ده من الدورة طبعا الكلام ده مش مظبوط
طيب نييجى لتانى نقطة فى الدورة وهى الرياضه
تلاقى كل واحده تدخل تقول لك لأ اوعى تلعبى رياضه فى ايام الدورة اذا كان ربنا سبحانه وتعالى بيريحنا فيها من الصلاه علشان هو عارف تعبنا فى الايام دى يبقى احنا لازم نريح فى ايام الدورة وما نعملش رياضه وطبعا احنا ما نصدق ونمسك فى الكلمة وإديها طناش مدة خمس ست سبع ايام بلا رياضه شهريا
طبعا كل ده كلام فاضى لأنها لو ضرر كان ربنا حرم علينا الحركة بقى فى ايام الدورة وكنا نبقى قاعديين فى بيوتنا ومانخرجش وما نتحركش لكن احنا بنخرج ونزور بعض ونتحرك ونجرى ورا العيال فى البيت لكن تييجى لحد الرياضه ولأ بقى طيب أقل حاجه تعملوها امشوا مشى عادى حتى بلاش سريع ووالله انى جربت الاثنين جربت ما اعملش اى رياضه نهائيا اول اربع ايام من الدورة وجربت انى اعمل رياضه عادى جدا فى كل الأيام ووجدت فرق هائل فالدورة مع الرياضه بتنزل أكثر ومن غير مغص ولا تعب وتكون سهله جدا وجربوا بنفسكم بس أهم حاجه الاهتمام بتغيير الفوطه الصحية قبل البدء بالتمرين حتى لا تصيبكم التسلخات اثر احتكاك الفوط الصحية بالجلد اثناء المشى
أما عن آخر نقطه فى موضوع الدورة ده علشان نقفله بقى ونكمل
هو الرغبة الشديدة فى تناول الحلويات قبل مجيئ الدورة بثلاث اربع ايام وأول يومين من بعد نزولها هو ان مستوى الهرمونات فى الجسم يتغير فهى عمليات كيميائية وهرمونات لا دخل لنا فيها فكلنا ينتابنا هذا الشعور وأولكم انا

بس أنا كنت بأتغلب على الموضوع ده بحاجتين
أولا : انى اقول لنفسى ان السبب هرمونى وليست فجعه منى فأطمئن وابدأ ألهى نفسى بالشغل الزيادة أو بمشروب القرفه .......... هل تعلمن ان القرفه توازن السكر بالدم وبالتالى لو شربتى كوب من القرفه عندما تنتابك حالة النهم على الحلويات وتحليها بسكر دايت طبعا فلن تحتاجى الى الحلويات مطلقا
ثانيا : عندما تصل معى لمرحلة لازم هآكل حاجه حلوة والا هأقوم أضرب الناس اللى معايا فى البيت بقى

بآخذ قطعة حلوى من اى نوع متوافر تحت ايدى وأقوم بمضغها فقط وبمنتهى البطئ وأحس بكامل طعمها فى فمى ثم عند مرحلة البلع لا ابلعها بل اتفها فى الزباله وهذه الطريقة كانت تعطينى احساس بالرضا وكأننى تناولت تلك القطعة ماما ولكن بدون آثارها السلبيه على الوزن طبعا وعلى نفسيتى وتأنيب الضمير الذى يحدث لنا جميعا بعد تناول الحلوى. ولكن كثيرا من العضوات اعترضن على طريقتى هذه ومن اولهم ام جوجو حبيبتى وقالت ان ده اهدار لنعمة ربنا وكده حرام .

__________________

http://www.66n.com/forums/showthread.php?t=194675

09-03-2010, 11:20 AM

#42

sa33

قلب المنتدى النابض

تاريخ التسجيل: Aug 2003

المشاركات: 2,588

أكملكم بقى مشوارى مع الرياضه اللى هى محور حديثى معاكم النهارده
ولاحظن معى انى بدأت آهو أتعدل شويه شويه يعنى فى الأول كان رجيم بس وبعدين بقى رجيم وشرب ماء وبعدين بقى رجيم وشرب ماء ورياضه ولسه فيه تطورين مهمين آخرين .
المهم بدأت اتعب من موضوع ساعه ونصف مستمرة رياضه دى فقلت طيب اقسمها أخليها ساعه مشى ونصف ساعه ايروبكس علشان جسمى يتشد كده وما يترهلش بعد الرجيم ( بصراحة كانت نيتى فى الأول كسل يعنى بدل المشى والواحد واقف على رجوله لأ آهو ده أحسن هيبقى فيه مد وثنى وتمارين وانا قاعده وتمارين كمان وانا نايمة مسطحه على الأرض) ولكن طبعا اكتشفت انها أصعب من المشى بمراحل ولكنى انبسطت منها جدا وبقت ادمان عندى وبدأ جسمى يتشكل كده ومعدتى تتقسم زى الرياضيين ( طبعا ده بعد ثلاث شهور متصله من الرياضه) وفرحت بالنتائج
ولكن بقت نقطه تؤرقنى فى موضوع الرياضه وهى كيف اعرف ان هذه الرياضه تناسبنى وما المده اللازمه المناسبة لى وما الوقت الأفضل لممارسه الرياضه بحيث تعطى أفضل وأسرع وأدوم نتيجة؟؟؟؟؟؟؟؟؟؟
كلها تساؤلات قتلتها بحثا حتى توصلت لاجاباتها بفضل الله تعالى
اولا بالنسبه للمدة فاللى عايزة تنزل وزنها لازم ما تقلش عن ساعه ونصف يوميا
ثانيا لا يهم كثيرا متفرقه ولا متواصله على شرط انك لو وزعتيها على مدار اليوم كله فما تقلليش فى المرة الواحد عن نصف ساعه بأى حال من الأحوال لأن الرياضه اقل من نصف ساعه فى المرة الواحده هتحرق سكر الدم وليس دهون الجسم فبالتالى تشعرك بالتعب والجوع فتأكلى وتزيدى وهنا تكون الرياضه جابت نتيجة عكسيه ......إذن فأفضل شيئ هو التمرن لمدة نصف ساعه او ازيد حسب مقدرتك بحيث يكون مجموعها فى اليوم ساعه ونصف رياضه وركزى معايا رياضه مش شغل البيت ولا وقفة المطبخ دى لا تحتسب من الرياضه فى شيء
طيب نيجى بقى لأنسب وقت لعمل الرياضه
ثبت ان أنسب وقت لعمل الرياضه هو بعد الاستيقاظ من النوم مباشرة وبدون تناول اى طعام يعنى على معده فارغه فهذه الرياضه تستهدف دهون الكبد والتى هى من اخطر انواع الدهون على الصحة وكمان انتى بتكونى ماأكلتيش قبلها بحوالى عشر ساعت نوم وفترة ما بعد العشاء يعنى بيكون مستوى السكر فى الدم منخفض جدا وبكده يبقى انتى مش هتحرقى سكر الدم انتى كده هتحرقى الدهون 100%
وبهذا أنهى معكم حديثى اليوم
وأكمل لكم فى وقت لاحق مع تحياتى لكن جميعا وتمنياتى بأن تكون المعلومات التى أزودكم بها جديدة ومفيدة بالنسبة لكن. موفقين بإذن الله.

__________________

http://www.66n.com/forums/showthread.php?t=194675

09-03-2010, 01:45 PM

#43

روح2001

موقوف

تاريخ التسجيل: Sep 2009

المشاركات: 446

السلام عليكم
انا قرات الموضوع من اول صفحة
و مبروك يا ام عمار وصولك للوزن المثالي و ان شاء الله تحافظي عليه
وعقبال لكل واحدة حابة تخس
واتمنى انكم تقبلوني عضوة في هالنادي الاكثر من رائع
وان كان هناك فضل فهيكون لبنت مكة بعد الله سبحانه وتعالى لانها من دلني على هدا النادي فانا شاكرة ليها وجزاها الله كل خير وجعلها من الرشيقات اللهم امين

واشكر كل من سيشجعني ويدعمني

وانا هاطرح مشكلتي اللي سبق واني طرحتها بالامس في موضوع
http://www.66n.com/forums/showthread...=1#post2371051

ولكن حابة انكم تعرفوا بعض الحاجات التي لم ادكرها
اني حاليا كل يوم بتمشى مش اقل من نصف ساعة يوميا واحيانا تصل لخمس ساعات مرة واحدة بالاسبوع
وانا مشكلتي ان عندي بطن وصدري مضايقني كبيييير وحتى لبس صار مو حلو عليا نهائيا
وبالنسبة للاكل اللحم الاحمر بجميع انواعه مااكله فقط الدجاج والصدر بس واكل السمك
وكمان الارز مااكله
وانا اليوم بدأت بالرجيم وكان فطوري
كوب حليب نسكافيه ومعاه رغيف حجم صغنن وفيه جبنة فيلادلفيا ومعاه 1زبادي لو فات

بس بصدق كنت حابة اني اصل لغاية 60 كيلو بس الان تشجعت وحابة اكون رشيييييقة جداااااا واصل لعند 50 كيلو

واتمنى انكم تساعدوني وقبل ماتساعدوني انكم تقبلوني من بيناتكم عضوة

تقبلو تحياتي

09-03-2010, 04:08 PM

#44

بنت مكة2008

كبار شخصيات المنتدى

تاريخ التسجيل: Apr 2009

المشاركات: 7,516

اقتباس:

وان كان هناك فضل فهيكون لبنت مكة بعد الله سبحانه وتعالى لانها من دلني على هدا النادي فانا شاكرة ليها وجزاها الله كل خير وجعلها من الرشيقات اللهم امين

امين امين امين يارب

الله يسمع منك ويتقبل دعوتك وينحفنى وينحفك وينحف كل واحده تحلم بي الرشاقه

العفو ياعسل ماسويت شي

اهلين بكي بيننا في النادي الحلو والاسره الاحلى ويالله نشجع بعض عشان نوصل للوزن المثلى وهدفنا بي اذن الله

انا لسه راجعه من النادي واليوم الكابتن اخدت قياساتى طبعا نهاية كل شهر في قياس

الحمدلله كان في فرق كبير وواضح بس الوزن مو كتير والحمدلله الاحباط حسيتوا خف لمن شفت الفرق في الارقام السابقه والحاليه

فطرت بيضه وقطعه رغيف اسمر وكوب شاي

واتغديت ربع دجاجه وسلطه وقطعه رغيف اسمر

وان شاء الله اتعشى زبادى وفاكهة

مازلت متابعه ياام عمار وننتظر البقيه

__________________
ياررب ارح قلبي وعوضني خير

التعديل الأخير تم بواسطة بنت مكة2008 ; 09-03-2010 الساعة 04:12 PM

09-03-2010, 04:36 PM

#45

kokar_2001

قلب المنتدى النابض

تاريخ التسجيل: Jun 2004

المشاركات: 1,872

مساء الخير يا بنات

بجد ام عمار انا فرحانة ليكى جدا جدا
الاول انتى بطلة مش عشان خسيتى لأ عشان استحملتى كلام جوزك
بجد ربنا يكون فى عونك
و معلش حتة كدة عاوزة اعرفها من الكنترول قبل ما تكملى القصة
كان ايه اثر خسسانك عليه
ساب الخسسان و اتكلم على الترهلات برضو؟

انا ابتديت من امبارح
هو ريجيم مش ريجيم انا اصلا صايمة الفترة دى ورا بعضها باخد اجازة جمعة و سبت عشان اجازة جوزى و بكمل باقى الاسبوع
عشان عليا شهر رمضان كله فطرته بسبب الولادة
المه انا امبارح فطرت على تمر لحد ما جوزى جه و بعدين فطرت معلقتين رز + حتيتين ستيك صغيريين مشوى + سلطة
و شوية و اخدت حتة كنافة صغيرة و خلاص نمت على كدة
بس امبارح اشتغلت على الاوربتراك لمدة 20 دقيقة بس بعد كلامك ان شاء الله ازود لحد ما اوصل لحد ساعة و نص

انا وزنى دلوقتى 72 و عاوزة اوصل لحد 62
بس عاوزة افرح نفسى مراحل
الاول انزل لـ 69 و بعدين اوصل لـ 65 و بعدين انقنق لحد ما اوصل لـ 62
ياااااااااااااا رب اوصل
بس بجد بعد ما لقيت التجمع هنا بقى عندى همة كبيرة جدا

فعلا لازم تشجيع

و يا رب نشجع بعض كلنا يا رب

__________________
ربنا يحفظلى اولادى من كل سؤ
فَأَنْبَتْنَا فِيهَا مِنْ كُلِّ زَوْجٍ كَرِيمٍ /اللهم ارزق اخواتى بالذرية الصالحة

09-03-2010, 09:59 PM

#46

سندريلا 97

عضو جديد

تاريخ التسجيل: Mar 2010

المشاركات: 2

السلام عليكم ورحمة اللة وبركاتة
حياكم اللة اخواتى وجزانا واياكم خير الجزاء
لى طلب صغير ان تقبلونى بينكم
ومن ثم فانا اود التفاعل معكم فقد قرات الموضوع من اول صفحة
واريد ان اسال الاخت الكريمة صاحبة الموضوع :
عندما يثبت الوزن وهذا يحدث كثيرا ماذا افعل
انا الان وزنى 75وطولى 170
وعندى مشكلة فى العمود الفقرى فقد اجريت جراحة فية من حوالى 7 شهور
والوزن الذائد بالنسبة لى مشكلة كبيرة
والمشكلة الاكبر ان وزنى ثابت من فترة كبيرة فقررت ان اترك الرجيم لمدة كم يوم واعود مرة ثانية
لا اعرف هل هذا صح ام لا
فباللة عليك اجبينى لان نفسيتى .......................
وبارك اللة فيك

10-03-2010, 02:29 AM

#47

بنت ناس^_^

عضو متألق

تاريخ التسجيل: Dec 2009

المشاركات: 1,050

^^
مو دبه كثير ماشاءالله جسمك مقبول بالنسبه لطولك
كيف صارت عندك مشكله؟
الثبات شي حلو بس انتي اعملي رياااااااااااااااااااااااااضه

__________________
لايقدر على رفع بلواك إلا الله متى تحرر في قلبك أنه لايرفع البلوى إلا الله
فاعتبر أن البلوى رفعت
(صالح المغامسي)

10-03-2010, 10:40 AM

#48

sa33

قلب المنتدى النابض

تاريخ التسجيل: Aug 2003

المشاركات: 2,588

أختى روح اهلا بكى معنا فى نادى الرشاقه واتمنى ان تصلى لهدفك بأسرع وقت باذن الله وبكل الصحة
بالنسبه لعلاج كبر البطن فأحسن حاجه تنزل البطن هى رياضة المشى . إمشى مشى سريع لمدة نصف ساعه الى ساعه ونصف يوميا على حسب مقدرتك ولكن ليس اقل من نصف ساعه
أما عن كبر حجم الصدر فهو سينزل تلقائيا مع اتباعك للحمية الغذائية الصحيحة وبعدك عن كل ماهو مقلى او محمر وعن السكريات يعنى باختصار لازم تتخلصى من حبك للشيبسى والشيكولاته وتحبى الرشاقه اكثر منهم فهما أكثر شيئين يدمران الرجيم وموفقه باذن الله ..... آه ،،،، نسيت اقول لك ارجعى للنظام الغذائى اللى نزلته هنا واتبعيه وهتخسى عليه ان شاء الله. وبالنسبة لأكلك بالليل مع جوزك كلى ولكن مش أكل الوجبة الرئيسيه يعنى هو ممكن يكون بياكل رز وخضار ولحمة اما انتى فاكتفى بالجلوس معاه على الطاوله وكلى ثمرتين فاكهه من المسموح بها وكوب زبادى منزوع الدسم
ولو كان لازم ولا بد تأكلى وجبتك الرئيسيه بالليل معاه يبقى لازم تكون قبل النوم بثلاث ساعات على الأقل وهذا سيعطيكى نتيجة جيدة ولكن ليست كنتيجة اتباع الرجيم كما هو بمواعيدة وقوانينه سيكون معدل نزول الوزن ابطأ .
عزيزتى بنت مكه برافو عليكى ايوة كده عايزة نفسيه ومعنويات مرتفعه وواصلى وربنا معاكى
حبيبتى كوكار مشكورة على تشجيعك وكلماتك الحلوة وبالنسبه لسؤالك عن رد فعل زوجى بعد الخسسان فلا رد فعل لدية يعنى ملتزم الصمت تماما لا بيقول وحش ولا بيقول حلو لكن انا عارفه ومتأكده من جواه انه مبسوط جدا بالنتيجة بدليل انه دايما يحكى لمريضاته ازاى انا خسست نفسى وينصحهم يعملوا زيي ويمشوا على نظامى .
أما بالنسبة لنظام أكلك ياست الكل فهو كويس فيما عدا قطعة الكنافه اللى ضربت لك النظام على آخر اليوم
بصى بقى علشان نتفق......... الحلويات ممنوعه ما عدا يوم واحد فى الاسبوع بعد الوجبة المفتوحة وتكون حته فى حجم نصف كف اليد ......تمام كده؟؟؟؟ وزودى الرياضه بالتدريج شويه شويه وربنا معاكى واى استفسار انا تحت امرك
أختى العزيزة سندريلا أهلا بيكى معنا عضوة فعاله فى نادى الرشاقه والف سلامه عليكى ماتشوفى شر يارب
أما عن سؤالك عن ثبات الوزن لفتره كبيره فهو وارد جدا ويحدث مع كثيرات من متبعى الحميات فيما يعرف بالبلاتوه وله أكثر من حل
أولا تعملى زى ما عملتى كده وتأخذى يوم او اثنين فرى ولكن ما تلخبطيش جامد فى الأكل يعنى يكون لخبطة بحدود معقوله ثم تعودى لرجيمك من تانى
أو ثانيا تتبعى رجيم اسمه رجيم البطاطس وده بيعلى مستويات الحرق فى الجسم ويساعدك انك ترجعى تخسى
ولو عايزاه وهتتبعيه قولى لى وأنا أكتبه لك هو معايا ( أصل انا عامله دفتر بكل الرجيمات من اول اسبوع لحد دلوقتى)

وتحت امرك فى اى استفسار

__________________

http://www.66n.com/forums/showthread.php?t=194675

10-03-2010, 11:19 AM

#49

sa33

قلب المنتدى النابض

تاريخ التسجيل: Aug 2003

المشاركات: 2,588

صباح الفل على عيون كل الرشيقات
اتكلمنا امبارح عن الرياضه وأهميتها وازاى زودت وقت الرياضه بالتدريج لحد ما وصلت لساعه ونصف فى اليوم ساعه مشى ونصف ساعه ايروبكس ولكن بعد ثلاث او اربع شهور تقريبا تركت الأيروبكس وظللت على ساعه مشى متواصل يوميا وده لظروف خارجة عن ارادتى وسأحكيها لكم بعد قليل ولكن اولا حبيت قبل ما انسى اقول لكم معلومتين كده فى السريع عن الرياضه
اللى عايزة تخسس منطقة الأرداف والأوراك ( اللى هى مغلبه كل ستات العرب) يبقى تعمل رياضه صعود السلم يوميا لمدة نصف ساعه متواصلة
واللى عايزة تخسس منطقة البطن ( اللى هى كمان مطلعه عين كل الستات) يبقى تعمل رياضة المشى كل يوم ساعه ونصف يوميا
طيب نييجى بقى للسؤال انا ليه سبت رياضة الأيروبكس؟
حصلت ظروف صحية قاسيه لوالدتى وتدهورت حالتها الصحية (كان عندها مشاكل فى القلب) وقرر الأطباء اجراء جراحة قلب مفتوح لها
شوفوا بقى انتوا يبقى شعوركم ايه لما تكونوا قاعدين فى الغربه وتسمعوا ان احب الناس لقلوبكم هيفتحوا قلبه ويعملوا له عمليه خطيرة وانتى حتى مش معاها ....... طبعا كانت نفسيتى دمار وقررت نزول مصر فور انتهاء ابنى من التيرم الثانى وتحدد موعد العمليه على بعد نزولى بحوالى شهر وفى الشهر ده وبمجرد نزولى لمصر قررت ان رياضتى هى ان اقوم بخدمة امى كما ينبغى والا اتركها تقوم من مكانها ولا تعمل اى مجهود وثقل العبئ على جدا فقد كنت اخدم أمى وأبى وإخوتى طول اليوم ثم اذهب لأكمل من خدمة زوجى وابنى وبيتى باقى اليوم اما الضيوف فحدث ولا حرج كل دقيقه داخل لنا ضيوف يزوروا ماما ويشوفوها وطبعا لازم نضايفهم وكمان ننظف مكانهم وكده فكنت وبلا اى مبالغة لا أجلس على قدمى من اول ما اصحى من النوم الى الساعه العاشرة او الحادية عشرة مساءا وكل يوم على هذا الحال فكانت اعنف من اى رياضه فى الدنيا ولا أنسى كمان ان كانت تمشيتى اليوميه هى السوق لشراء احتياجات المنزلين والرجوع ولكننى ظللت متمسكة بالرجيم كما هو ولو مافضيتش اعمل لنفسى اكل مخصوص من بتاع الرجيم يبقى الغذاء قطعة جبنه قريش ورغيف عيش بر وخضروات
وظللت هكذا طيلة هذا الشهر ولم يكن لدى وقت حتى لأتابع وزنى فى هذه الفترة ولا أقف على الميزان ولكن كل من حولى كانوا مذهولين بالتغيير الرهيب فى شكلى وجسمى وطبعا كان منهم المحبطين والحاقدين اللى قعدوا يقولوا لى انتى الأول كنتى أحلى واحنا واخديين على شكلك فى التخن ومنهم المشجعين اللى بيقولوا لى انتى عملتى ايه وبرافوا عليكى وعايزيين نعمل زيك المهم انى لم انشغل بأى كلام وظللت محافظه على هدفى وعزيمتى رغم كل الظروف فلن يقهرنى شيئ.
ودخلت والدتى الحبيبة شفاها الله وعافاها ومتعها بالصحة وأطال فى عمرها بالصحة والستر قولوا آمين

دخلت للمستشفى وكنت انا المرافقه لها وعشت أسوأ أيام فى حياتى ....... يا الله ...... والله انى حتى لا اريد ان اكتب عنها ولا ان اتذكرها طبعا كلكن تعرفن شعور البنت وامها داخله غرفة العمليات والعملية ليست سهلة ابدا وشعوركم وانتوا داخللين غرفة الافاقه والخراطيم معلقه لها وهى غير منتبهه لأى حد وخفقان قلوبكم مع كل دقة قلب لها كل هذه مشاعر عشتها فنسيت بها طعم الحياة ولم اعد اهتم لأكلى ولا لشربى فكل ما يهمنى هو امى وابنى طبعا وكنت متقطعه بين الاثنين ومع الأسف فشلت العمليه الأولى وأعيدت نفس العمليه بنفس الفتح والآلام مرة ثانية ولكن بعد شهر من المعاناه بعد شهر كنت اعد فيه كل ساعه حتى ينقضى فكانت حبيبتى الله يشفيها ممنوعه من القيام او الجلوس وحدها نهائيا لمدة شهر حتى تلتئم عظام الصدر بشكل كامل وكنت أشيلها من تحت ابطها حتى اقومها من على السير وأقعدها بنفس الطريقة ووالله لم تكن ثقيله على قلبى ابدا بل كنت افعله بكل الحب والرحمة ولكن كنت خائفه جدا من ان اكون قومتها جامد زيادة عن اللزوم او ضغت عليها وانا بأقعدها فكنت فى حالة رعب مستمرة واعصابى تلفانه وطبعا الدواء بمقادير محددة وبمواعيد محددة ولازم اتابع كويس جدا مع الممرضات والأطباء ولا اتكل عليهم فى هذه المهمة رغم اننا فى اكبر مستشفى ولكن الإهمال من البعض وارد فى كل مكان لأن العمليه الأولى فشلت بسبب ممرضه اعطتها جرعه كبيرة من دواء السيوله
المهم انقضت هذه الفترة وكنت ملتزمة بنظام غذائى قليل جدا وفقط ورجعنا للبيت والحمد لله بعد شهر آخر فى المستشفى وكانت بداية شهر رمضان وسافر زوجى وحده وتركنى انا وابنى مع امى حتى تتماثل للشفاء وهذا بناءا على طلب منى ووافق والحمد لله.
وظللت معها طيلة شهر رمضان بنفس نظام قبل العمليه من اعتناء بها وبالبيت وبطلبات والدى وابنى والضيافه طبعا وفعلا اتهلكت فى هذا الشهر هلاك تام ولأول مرة اوزن نفسى بعد فترة ثلاث شهور ونصف تقريبا نزلت فيهم من 65 كيلو الى 54 كيلو يعنى 9 كيلو واعتبرت ده معدل ممتاز جدا لأنى ما كنتش مدققه مع اى نظام ولا رياضه وكنت مركزة فى اللى انا فيه بس طبعا النزول كان من المجهود الشاق والامتناع التام عن الدهون والحلويات الا فى الوجبة الفرى.
وبعدما اطمئننت على وضع والدتى الصحى ومع بدء الدراسه اضطررت الى السفر علشان مدارس ابنى ورجعت تانى للقرية الصغيرة اللى مافيهاش اى حركة
وزنت نفسى يوم رجوعى وكان ده من حوالى ست شهور وكنت 49.9 كيلو يعنى خمسين تقريبا و فرحت جدا بالنتيجة وكان نفسى بقى انزل لل45 وأخلص ولكن عانيت فى نزول الخمس كيلوات الأخيرة أكثر بكثير مما عانيته فى كل الرجيم من أوله لآخرة وخصوصا مع بدايه ظهور اعراض مرض تكيس المبايض.
سأكمل لكم فى وقت لاحق رحلتى الشاقه مع آخر خمس كيلوات فقدتهم من وزنى فى 6 شهور!!!!

__________________

http://www.66n.com/forums/showthread.php?t=194675

10-03-2010, 12:40 PM

#50

بنت مكة2008

كبار شخصيات المنتدى

تاريخ التسجيل: Apr 2009

المشاركات: 7,516

الله يطول في عمر والدتك يارب اكيد شي صعب ومولم

يالله 5 كيلو في 6 شهوور تعذيب

متابعه القصه والله يعين

__________________
ياررب ارح قلبي وعوضني خير

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه