روح ماشاء الله أحسك نظاميه مررره الله يحفظك صدقيني الحمدلله تغير زوجك كثير واكيد بيعرف يتصرف مع عمله انتي قاعده تتعامله زي الأم وانتي مو حاسه لأنك نظاميه ماتحبي تأجلي أعمالك ...
لاتقولي له مره ثانيه اساعدك مادري اذا الكلام هذا بيعجبك ولالا حاولي تعامليه زي المحبوبه تقوميه بدلع وتودعيه بدلع وترسلي له رسائل حب وهو في عمله استدرجيه بالحب حتى يعطيكم من أجازته ..

وصدقيني الرجال ربي خلقهم للعمل لا تشيلي هم انه الوظيفه الثانيه رح تتعبه شوفيه لما تعب اخذ كفايته في النوم وزياده ..
الله يوفقك

مع متفاءله
وحسيت حياتك كد في كد وجد في جد
حسيت وانا اقرا ما ابي اتزوج اذا بعيش كذا😂

لكن شخصيتك حلوه وقويه حبيتها
بس ينقصك شيء من المرونه
ولا تزعلي مني مع شيء من "الانوثه"


اتوقع زوجك نمطه غربي
متعته في الحركه والشغل وموتو الحبسه في البيت

__________________

سمعت كلامك أمس ، و تركته براحته ..
صحيته المغرب و أخدنا عشاء من برة و رحنا تعشينا مع أهله و جلسنا لحد الساعة 9 و رجعنا البيت ..
و قال لأمه ، ما أعرف ليش فيا كسل من كم يوم ..

و بعد ما رجعنا البين ..
جلس شوي و قال لي بيروح شغله .. و قلتله يجلس شوي معاي ..
و جلس معايا ساعة تقريبا و نمت بدون ما أحس و نيم الأولاد .. و بعدين خرج و راح شغله و رجع بعد الفجر ..

.
.

ترى أقول له أساعدك ، بس كذا .. أبكش عليه ،.
تعلمت منه ..

لو قالي ايوة .. راح اتهرب و أقول له سويه بنفسك ..

.
.

مشكلة الوظيفة التانية ، مو بس لإنه بيتعب ..

السبب : لإنه لما يتعب و يطيح .. يعني أنا اللي راح أتحمل و أتعب ؟؟
مو كفاية علي أولادي ، أجلس اهتم فيه هو كمان ؟

شفتوا كيف ماحد فاهمني ؟
تعلمت منه كيف أحب نفسي و أفكر بنفسي ..

.
.

و بعدين مسألة الأنوثة و الدلع ..
أنا قدام أخواتي أو حتى صحباتي استحي اتكلم أو ألمح ..

عشان كذا تحسوا إني جدية مرررررة ..

لو أوصف لكم كيف أصحيه من النوم ، أغلب روايات عبير بالوصف ..
بس شخصيتي بالكتابة توصل الجزء العملي مني .. لكن في الحقيقة ( أنا سالي مو انسة منشن )

.
.

طموحة ..

أنا طول وقتي ألعب مع أولادي و اجلس معاهم .. و نضحك سوا و نتشارك مع بعض كل شي ..
و بالعكس ، أنا ليه بأشتكي دحين من انشغال زوجي 24 ساعة ؟
و لإني تعودت على إني اعطي لنفسي و لأولادي و له هو ..
أوقات للترفيه .. و أنا الي دايم اقترح و اجهز للخرجات و الطلعات ..
و لإني انخنقت و ما تعودت على كذا .. حياة كلها جد ..

أنا اللي دايم أقول له ، تعال نفطر في كوستا سوا ..
أو اعزمه على مطعم أو اعمل له مفاجات .. ( هو روتيني )

و في استشارية للحياة الزوجية .. لما زرتها مرة ..
قالت لي ( عندك درجة الذكاء العاطفي عالي جدا )

لكن أكره ( الإتكالية و استغلال الآخرين ) ..
عشان كذا تلاقيني اعمل أمور تخليني ما أحتاج لأي أحد .. و لا أخلي اولادي يحتاجوا لأحد ..

و أنا أبغاه يشتغل في أيام الأوف ..
مو عشان ابغاه يشتغل و بسسس .. لكن لإنه بيضيعها على ولاشي ..
و لإنه تعود يعيش - فاضي و يعتمد عالآخرين و بس ينام و يتهرب من العمل - ..

و الله لو إنه يخرجنا كل يوم و يجلس معانا ..
فأفضل لي من إنه يتركنا و يشتغل ..

لكن يجلس فاضي و يلفلف و يصيع مع أصحابه و يجلس 4 أيام فضاوة ..
هذا كيف يربي أولاده ؟
عالأقل خليه يشغل وقته بشي يفيده و يتعود ما ياخد فلوس الناس .. و يعرف قيمة القرش ..
و لا حتى يعتمد علي ..

.
.

^

انت متخيلني عكس الصورة الحقيقية .. و حاطني بقالب غلط ..

بالعكس ، أنا سبب ضيقي عن انشغال زوجي ..
هو هذا السبب ..

صارت حياة مملة بالنسبة لي ..

أنا ما أحب كذا .. لكن ما أقدر اشرح أكثر و اتفصل ..

الله يسهلك أمورك يا روح وييسر لك كل خير

__________________
سبحان الله وبحمده..سبحان الله العظيم

ماشاء الله عليك ياروح
الله يحفظك ويسعدك ويوفقك ويعينك
انت زوجه بقلب أم مثاليه ورائعه
هنيئآ لزوجك بك تبارك الرحمن
وابشري بالخير والإعانة من رب العالمين
دائما كرري الدعاء التالي
( ربنا هبَّ لنا من أزواجنا وذرياتنا قرة أعين واجعلنا للمتقين إماما )

ام يوسف و سما

هذا جدولي من امس لحد اليوم ..
لانه اليوم رجع كل شي مثل ما كان قبل ..
و راح اتفصل شوي .. عشان توصل الصورة بشكل أوضح ..

- رجع بعد الفجر و كنت بالمطبخ اجهز رضاعة ولدي .. وقف شوي و سألني الاولاد نايمين !؟
بعدين تسدح في الصالة و عنده طبعا اجازة من وظيفته الاولى ..

و متسدح يتفرج على مقاطع فيديو مضحكة للي أرسلوه اصحابه بقروب الواتس حقة العمل
و كنت سبقته و شفتها من جواله و هو نايم .. لكن ابتسمت معاه في المقاطع الي ورآني هي و ما بينت له انها قديمة ..

و جيت جلست قدّامه .. لاني كنت مشغولة اجهز اغراض الاولاد و أغراضي للحضانة و العمل ..
( كان قبل لا يجي بثواني .. ولدي الكبير خرج من البيت و راح المدرسة مع السواق ..)

تركت كل شي من يدي .. و جلست و سألته متى خرج امس و كيف كان شغله ..
و سألته .. ايش التقرير الي طلبه منه صاحبه و لو يحتاج مساعدة فيها ..
قالي ملف خاص بالشغل و لسى ما سلمه .. و سهل و بسرعة يصير و يخلصه اليوم بالمكتب ..

المهم قلت له يوصلني المشغل الساعة 8 الصبح لانه صار لي شهور ما رحت .. و فيه مشغل مشهور بطريق عملي
و بعد ما نوصل الاولاد للحضانة .. قالي طيب ..

سألته لو عنده شغل اليوم الصبح !؟
قالي ايوة الساعة 9 الصبح .. و سألني كم يبغالك عشان تجهزي الاولاد و كانت الساعة 7
قلت له نص ساعة ..

قالي اخد غفوة لحد ما تخلصي .. قلت له خلاص انت نام لك ساعتين و ارتاح
و مو مشكلة نروح الساعة 9 .. و نام شوي

.
.

جهزت الاولاد و شنطتهم و اغراضهم و أغراضي و لبستهم و لبست ..
و فطرت بسرعة عالواقف .. و لعبت ولدي الصغير و ضحكته ..
و الوسطاني لبسته و هو نايم و مو راضي يقوم ..

.
.

الساعة 9 صحيت زوجي ..
و زوجي من يوم تزوجنا .. بالنادر جدا انه يفطر و ما يحب ياكل شي لما يقوم من النوم ..

.
.

هذا هو نظامنا في الصبح غالبا ..

.
.

و لو عندي يوم أوف .. أغيب عن العمل و اجلس معاه او اقول له نودي الاولاد للحضانة و نروح نفطر مع بعض ..
ما يحب يفطر ..

و لو رضي يفطر فما يحب في كودو او ماكدونالدز او ستار بوكس ..
يحب محلات الي يبيعوا مليس و مفرومة و كبدة الي في الشارع ..
و انا اقرف منهم .. لكن ما ابين له و عادي اكل معاه ..
المهم انه نتشارك مع بعض و نفطر سوا و بالسيارة كمان .. لكن ما اتشرط و لا اقول له لا ..

و مرات لو عنده الشفت في وظيفته الاولى .. بفترة الليل لحد الظهر ..
فاضطر اروح الدوام مع السواق .. او مع التاكسي ..

و ما احب اروح مع السواق لانه يتكلم كثير و ملقوف و يسال عن كل شي ..
.
.

و زوجي من يوم مسك الشغل التاني .. فلو عندي يوم اوف وغبت عن العمل ..
هو يخرج من البيت و ياخد الاولاد للحضانة و ما يرجع لانه بيروح يراجع الدوائر الحكومية عشان العمل ..
فما اشوفه لا ليل و لا نهار ..؟

.
.

لكن بشكل عام .. لو هو مثلا جالس في الصبح بالبيت و ( ما عندي شغل ) ..
اترك كل شي و اجلس معاه ..

الفترة الاخيرة بسبب دوامه التاني ..فيا يكون نايم و يشخر او ينام و يصحى و يخرج خلاص ..
او جالس مكشر و يفكر بالعمل او يعصب عالاولاد و ياخدهم الحضانة ..

و انا طبعا الي اقرب منه كل شوية .. و اروح جنبه و حتى لو كان نايم و يشخر ..
حتى لو ماني نعسانة .. بس كذا اروح جنبه و اخلي الجوال في يدي و اتفرج سنابات ..

معليه لاحظت اني أردد كلمة يشخر كثير
لكن شخير زوجي يوصل للجيران ماشاء الله ^_^

.
.

كذا الصبح بشكل عام ..

و الويك اند اصحى و أفطر الاولاد و اغير لهم و لحد ما اتطمن انهم شبعانين و نظيفين
و اتركهم يلعبوا و يتصارعوا و اروح اجلس شوي عند زوجي لو كان نايم .. و هو مو حاسس بيا طبعا ..

و اولادي يفتقدوني لو غبت ربع ساعة
فاضطر اتركه نايم و اجلس في غرفة المكتبة اخلص اشغالي او اروح اطبخ الغداء

.
.

هذا الصبح بكل حالاته ..

الكلام مو مرتب يمكن عشان من الجوال اكتب ^^^

الزبدة بخصوص فترة الصبح ..

يا يجي بعد الفجر أو قبل الفجر بشوي و هلكان و ما يقوم لصلاة الفجر ..
أو يكون بوظيفته الأولى لو الشفت كان بفترة الليل لحد الظهر ..
أو يقوم يوصلنا الدوام ، أو ينام و يقوم الساعة 8 أو 9 يروح يكمل شغل المكتب في الدواير الحكومية أو المحكمة ..

ما صرنا نفطر مع بعض مثل زمان .. و صحيح هو ما يحب يفطر ..
بس مرات كان يصلي الفجر بالمسجد الي جنبنا لو كان مصحصح .. و يجيب فول و تميز ..
أو في الطريق للدوام ، ياخد ساندويتش من المحل الي يعمل ساندويتشات و اللي أقرف منه بس أكل غصب عشانه ..
بما إنه مشتهي يفطر ، أو عالأقل ناخد قهوة بالطريق ..

دحين كذا صار الصبح ممل و ماله طعم ..

و كمان قبل .. مرات لو كنا في الويك اند و عنده اجازة و نايم طبعا ..
أصحيه بعد الظهر ، لإنه ما يحب يفطر .. و أقول له ناخد الأولاد لمطاعم السمك و يلعبوا و نتغدى ..
و نرجع البيت ..

بس أنا ساكتة عشان وظيفته الثانية ..
لكن حتى إجازة الترمين كنا محبوسين في البيت و ما رحنا أي مكان .. عشان دوامه ..

لكن ممكن لو ينظم وقته ، بنلاقي عالأقل شوية وقت ..

مدري ، هل تصرفي صحيح ؟
أو أكلمه أو اصبر أو اسكت خلاص ؟

.
.

و طبعا بقية اليوم ..

يرجعني من الدوام الساعة 2 و نص الظهر و ياخد الأولاد من الحضانة بطريقه .. و أكون مخلصة غالبا من الساعة 12 الظهر ..
بس هو يكون مشغول و يجي متأخر ، حتى مرات الحضانة يتصلوا و يقولوا لا تتاخروا .. يقفلوا الساعة 3 الظهر ..

و صار مرات يتصل عالسواق و يقول له إنت رجعهم البيت ..
و يكلمني يقول .. مشغول و ما خلصت لسى .. و خلي السواق يرجعكم و أنا أحاسبه عالمشوار ..

.
.

بعد ما نرجع البيت ، ينزلنا و يروح شغله في المكتب و يقول تأخرت ماقدر أدخل البيت ..
أنيم الأولاد و اجهز الغداء لهم ، أو نكون أخدنا في الطريق أكل جاهز .. و أولادي مثل ابوهم يحبوا الرز و الدجاج ..

و طبعا اذاكر للكبير دروسه ، و اخلص شغلي حقة الدوام ، اجلس معاهم و مرات يطفشوني و يتضاربوا و مرات يلعبوا و زي كذا ..
و بعض المرات اخدهم المول لوحدي و أأكلهم و ألعبهم ، و يتعبوني في السوق .. بس أقول خليهم يغيروا جو و يلعبوا ..
و ارجع لوحدي مع التاكسي أو السواق ..

.
.

و خلاص ، ما يجي غير قبل الفجر الساعة 3 أو 4 ..

و أنا أنام وسط أولادي ، و ينبسطووووووا ..
يتجمعوا كلهم حواليني ماشاءالله و يتضاربوا عشان كل واحد يبغى يكون جنبي نايم

و مرات يعصبوني و أهددهم لو ما ناموا اضربهم ، بس يطنشوني ..
لو أبوهم موجود ، يخافوا منه و يسمعوا كلامه ..

.
.

هذا هو الجدول الحالي ..

.
.

ملاحظة متفشلة منها و ما كنت بأكتبها و مادري إذا مهمة أو تفيد أو لا ؟؟؟

ما عندي غرفة نوم من 3 سنوات ..
و الشي هذا مضايقني ، و قبل كم يوم زعلت يوم كامل من زوجي بسبب الموضوع هذا ..

.
.

و كمان ملاحظة ..

العمل ضاغطين علي ، أجيب الترم هذا قبول ( دكتوراة ) ..
و أنا ماقدر أنجز شي ، لو بيوم زعلت من زوجي أو تنكدت .. لإني بأنكد كذا على نفسي ..

.
.

جبت شغالة تجيني بالأسبوع مرتين ، عشان اتفضى لأولادي و زوجي و العمل ..
و سواق ولدي الي بالمدرسة برضو أنا جبته عشان ولدي لا يتأخر و لا يغيب عن المدرسة ..

.
.

و مرات لما ادق عليه ، يكون فعلا بالدوام و فيه صوت رجال و سيارات و يقول لي مشغول اكلمك بعدين ..

.
.

الجمعة عنده يوم اجازة من شغله الثاني بالمكتب .. لكن نروح بيت اهله و نجلس لحد العصر ..
يجيبنا البيت بعد العصر و يخرج ، يقول عندي شغل .. و مرات يوافق يوم الجمعة اجازة من عمله الأساسي أيضا

فأقول له .. اجلس معانا شوي ، أو نخرج نتمشى ..
يقول طيب و أجي بعد شوية ،، و يخرج و يتأخر بالعمل لحد الليل و الأولاد يكونوا ناموا ..
هذا الشي الي يضايقني و يخليني أتكلم ..

يقول لي صاحب العمل دق عليه و قاله فيه معتمرين و تعال نحل المشكلة ..
أتضايق لإنه اليوم الوحيد الأوف الي عنده ، و ما استفدنا من اليوم هذا بشي ..

فعلا أنا متضايقة مع نفسي و ساكتة ..

و ماعندي أحد افضفض له غيركم ..
تحملوني ..

__________________