افضل ان اخوك ما ينكسر..

نعم لازم يرتدع وما يمد يده عليك لكن باسلوب..

والسبب أنه من ردودك يظهر لي ان اخوك ليس نذل او لئيم

بل هو ساذج وغير مسئول... لا يحسن التصرف..

وتدخل عمك ينبغي ان يكون بحكمة وباسلوب لين وسياسي وودي..حتى لا ينتج عنه نفرة بينك وبين اخوك..

فيشعره مثلا انه من كمال الرجولة..ان يقوم بشئونك وأخواتك.. وان يكون امانا لكن..وان هذا هو الظن به.. خصوصا حال غياب والدك...

وان العائلة ككل تترقب تصرفاته..وتقيمه في ظل غياب والدك.. ومن هذا الكلام بلين ورفق..حتى لو كان

خلال طلعة عشى بينهما او ما شابه..

وبصراحة..احيي فيك روحك الطيبة تجاه أخيك.. فبالرغم انه مد يده اكثر من مرة حتى ظهر اثر ذلك عليك..

الا انك حنونة به ومشفقة عليه..وتراعي مشاعره..ما شا الله..

__________________
سأكتبُ شعريَ الباكي ..... بدمع القلب لا الحبرِ
أُسَطِّرُهُ على كبدي ..... وأتركُ دَفْتَرَ الشِّعْرِ
جراحُ أحبتي في الأرضِ ..... تبعثُ عاصِفَ الفِكْرِ

اكتب لكم وانا الدموع بعيوني صار شي غريب
كنه فيلم هندي

شوي وبرجع اكمل وارد على باقي الردود
لكن شكرا لكل من وقف معاي و ساندني و حس فيني
جزاكم الله كل خير

- شوف اخوي صح كلامك
وانا لو أبغى أكسره و اهدم شخصيته كامله و اشوه سمعته
رحت دخلت اي واحد من خوالي .. و ع طول خوالي بياخذونا عندهم
وبيذبحونه من الضرب
عندهم الضرب خط أحمر !

بس انا دخلت عمي عشان العكس
عمي شخص محترم و خلوق واسلوبه لين و ابغاه بس يناقشه ب أفكاره و يبين له انه هو غلطان

لكن بقول شي
ترا انا لجأت لعمي الكبير اللي ما وصاني عليه ابوي هههه
لانه عمي الكبير حازم جدا ( وهذا موضوع ضرب يحتاج حزم ، و الحزم زي ما هو معروف مو شرط بالصراخ او الضرب لكن ب الادب و الثبات و و )
و قريب من الله كثير و عنده علم واسع
انا هدفي انه بس يناقشه ب أفكاره ينصحه يصححها له
يبين له انه غلط اللي سواه

وسبحان الله كلمت ابوي و استشرته
واستخرت
و رحت كلمت عمي الكبير و جات ردة فعله زي ما اتمنى
جدا رائعه

- امم بالنسبه لأخوي احسه ساذج فعلا وغير مسؤول بالاضافه لكذا اناني ( لانه يسمح لنفسه يطلع و ياكل ويشرب ويشوف اصحابه واحنا لا ) + فيه فرض سيطره و عدم غيره على عرضه
+ و غيور ( لما يحس ان في شخص ممكن يكون افضل منه ) و يمكن فيه نقص ( ب شخصيته ) لكن اللي متأكده منه انه فيه نقص بالدين ك معلومات لانه آيات قرآنيه واحاديث واضحه يفهمها فهم عجيب .. حتى لما حكيت لعمي مو مصدق يقول انه يمكن يكذب عليكم و يبرر لنفسه قلت له لا والله العظيم هو مقتنع انه هالآيه معناها كذا و هالحديث معناه كذا !! وانا ابغاك توعيه ! + نقص بالدين ك صلاه وعبادات وقراءة قرآن

- والله اني احبه و اعرف انه طيب و اعرف انه فيه خير
و اعرف انه بعد يحبني و له مواقف كثيره معاي زي اول راتب له - قبل يمكن 4 شهور
عطاني اياه كامل واشترى لي فيه اثاث لغرفتي كامل من و إلى !
كذا من نفسه انا ما طلبته

يعني في له معاي مواقف حلوه قويه

و بغض النظر عن المواقف ، حتى لو ما سوا لي شي
العائله الام الاب الاخوة الخوات الاقارب ( كل هذولا احس نفسي لازم احفظ لهم شعور بالمودة تجاههم مهما صار لأن الله سبحانه وتعالى وصى بالرحم )

اختي اسجدي لله
فهو يعلم مافي ضمير الصامتين
متابعة معك منذ البداية

__________________
الحمد لله..اللهم صل على محمد و ال محمد

التفريغ المنهجي

و نعم بالله
خير رفيق وحبيب وصديق و سند

غبت عنكم لاني رحت أسجد له

جزاك الله خير لأنك ذكرتي الله ب ردك

خليني اقول لكم ايش صار معايا خلال هالساعتين

كنت قافله على نفسي الباب و اخوي صار يطلع ويدخل
ويقفل البيبان بققققوه من العصبيه وانا خايففففففه خلاص الدموع ب عيني !

جلسنا كذا ربع ساعه
بعدين بكيت لأن اختي قالت : اكيد عمي دخل و عطاه الفلوس
قلت لها : صح كلامك و اكيد بياخذها له

خلااااااص ضاقت فيني حسيت كل شي تقفل
وجوالي مافيه رصيد و عمي الثاني ينام بدري ( اللي يدري بكل الموضوع )

..

ضاقت فلما استحكمت حلقاتها فرجت وكنت أظنها لا تفرج

فجأه اسمع صوت ينادي بإسمي مررررررره خفت
قلت لأختي لا تردين

والصوت يناااااادي يناااادي مستمر
لما دققت لقيته صوت عمي ( اللي جاي يعطينا فلوس )

فتحت له وانا ميته خوف
ابتسم وقال شفيكم ؟؟
ماتبون تفتحون لي ؟
( و واضح من ملامحه انه وجهه مقلوب و اخوي قال له )

قال شخباركم و مد يده يسلم !
وانا التفت لأختي اقول لها وريه وريه
وهي ساكته وانا اقول لها ب تورينه ولا اوريه
ورفعت بلوزتها شوي مكان الخصر اوريه اثار الضرب
و انا أأشر له على وجهي اثر الكدمات والصفعات على خدي و عيني

قلت له شوف اخوي ضربني و اصييييييح
ع طول ضمني

قلت له خايفه منه وقعدت ابكي ابكي وهو ضامني ويهدي فيني
قال لا تخافين .. تخافين منه ما يخوف ؟

هو بس خايف عليكم انه طلعتوا مع السواق
قلت له : بس احنا مستأذنين من ابوي وقلنا له
قال انا مالي دخل بأبوي
وبعدين هو ما يطلعنا من بعد يوم العيد وهو حابسنا

المهم قام عمي قال بنبره حازمه : مشاكلكم المفروض ما تطلع
انتوا اخوان تتهاوشون و ترضون مهما يكون

المهم ظلينا نتكلم معاه مده قصيره وهو واقف عند باب غرفتنا
وانا طول كلامي ارررررجف من الخوف وابكي خلاص احس تكسر كل شي فيني
عن جد ارعبني

يوم شافني ما هديت
قال البسي عبايتك بسرعه وشيلي اغراضك
وتعالي بسرعه برا انتظرك

لبسنا عباياتنا واحنا نبكي
وصادفنا اخوي بالشارع ومعاه عمي
وعمي يعاتبه يقول له والله عيب عليك مهما يكون خواتك
وهو يقول والله ادري اني غلطان بس هم نرفزوني

المهم شافنا اخوي ومسوي يعنني عادي قال على وين يابنات
قال له عمي وهو مبتسم باخذهم معاي نتعشى ونسولف شوي وننبسط
تعال معانا
قال له لا شكرا انا بطلع اتعشى

دخل عمي السياره
قال طيب يمكن انتي ظلمتيه يوم قلتي ما يعطينا فلوس
يمكن ماعنده
قلت له مافي انسان ماعنده ويطلع كل يوم
والدليل توه قال لك طالع يتعشى
ولا حتى فكر يمر ع خواته يسأل عليهم كلوا ولا لا ؟؟

المهم وعمي سألني عن كل شي
وقال لي انا بالبدايه لمتك انتوا خبرتينا توقعت هوشه عاديه
ماتوقعته شوهكم كذا ، ماتوقعت اللي بوجهك منه

بالعكس تصرفك صح
قلت له اساسا انا ما دخلتكم بالموضوع الا لانه ابوي مو موجود
و راح يطول ب سفرته
واخوي عطاني مهله 3 ايام قال لو قهرتيني ب شي خلال هالمده
ب ارجع امد يدي
وانا حابسه نفسي بالغرفه يومين من الخوف تعبت نفسي
بعدين لازم احد يتصرف
وانا مسامحته ولو غلطت بعتذر بس مابي يمد يده علي مره ثانيه
قال لا ما بيمدها ان شاء الله


وتناقشنا كثير وسولفنا وضحكنا و ودانا بنده نتقضى للبيت ونتعشى
اللي طلع فيه من الموضوع انه قال :
تصرفكم وطلعتكم مع السواق لو انا مكانه بنقهر ترا
قال بس ما يحق له يمد يده
وسالفة تنظيف البيت ما تستدعي الضرب لانه بيتكم مافيه الا انتوا
وانتوا كبار مو بزران توصخون البيت

وبيتكم طول الوقت تقريبا نظيف
بإيش بيتوصخ
وقال اي شي تحتاجونه كلموني ، فلوس طلعات
واذا مارضى يطلعكم كلمونا حنا عمامكم

قلت له طيب امانه شرايك بأفكاره
قال والله مو صاحي المشكله أفكاره مو على عمره يعني عيب
قريب يدخل الثلاثين

قال لي ايش بتسوين لو تدخلوا خوالك و راح حكى لهم
قلت له مايقدر يحكي والله لا يذبحونه لو درا انه مد يده
انا دخلتكم انتوا لانكم بتتفهمون اللي صار ، خوالي ماعندهم بهالسوالف


وقلت له انو لما دخلوا علي الحراميه وانا لحالي قبل اسبوعين
رحت ماحكيت لاحد عن هالسالفه و راح اخوي نشرها
( من باب ماله داعي اخليهم يحشون ف اخوي ويتكلمون عليه )

قلت له بس تدري خوالي نادوني هذاك اليوم كلهم
دخلت عندهم المجلس
قالوا لي ما يستحي اخوك ؟ شلون يدخلون وانتي بالبيت ؟
قلت لهم نسى الباب مفتوح
قالوا تشيلين اغراضك وتجين عندنا خليه يولي

و رفضت انا بأدب

وقال لي عمي لاتروحين معاه برا
قلت له اكيد بعد الكفوف اللي خذتها هههههه
قلت له عاد وناسه هناك حقوق انسان وشرطه و سجن
قال لي لا والله تكفين لاتفشلونا هناك
يجي يعطيك كم كف لانك ما ذاكرتي هههههه


المهم دلعنا و مشانا وعطانا فلوس وعشانا
و لما راح دق يتطمن علينا
((( كذا المسؤوليه )))

قلت لعمي شوف اذا يبغى يتحمل مسؤوليتنا
يتحمل كل شي ولا يشيل يده ويخليني اتبع شوركم و شور ابوي بس
وهو ماله دخل !

و الحمدلله تقريبا انتهى الموضوع ع كذا
بس باقي عمي الثاني بيناديه ويجلس معاه بكره ويناقشه بأفكاره وينصحه !


الحين انا مره متوتره من ردة فعله ......
و بس : )

الحمدلله هههههههههههههه
ربي ارسله لك ..
لاتستفزينه وخليك هاديه ..
وان شاء الله تكون اخر مره ..
ولازم اللي يتكلم معاه يتقهم شخصيته عشان يكسبه
ويقنعه مو فرض بالقوه لا تمد يدك وخلاص ..
الحمدلله اذكري ربك ونامي وارتاحي وعمك الثاني جاي يكمل الموضوع وينهيه
ان شاء الله ،، دعواتي لك يائمر ..

__________________
اللهم أجمعني مع أحبتي في الفردوس الأعلى من الجنة ،،


[IMG]http://im67.***********/mg87DX.gif[/IMG]

[img]http://im81.***********/aTanJF.gif[/img]

والله اعمامي الاثنين ردة فعلهم جدا حلوة
انا كنت واثقه من عمي الكبير بس تفاجئت من عمي الصغير
على فكره عمي الصغير هو اللي وصاني ابوي ادخله بالموضوع
اثنينهم نصحوه انه حرام عليك خواتك خليتهم يخافون منك و و !

الحمدلله حمدا كثيرا
جزاك الله خير ياعمري ما قصرتي

أنا ماكنت معاك من بداية المشكلة .. ومالة فايدة ردي بس إلا بـ أرد : )
صراحة موضوعك غريب شوي وشدني .. صحيح تصير مشاكل بينا وبين اخوانا بس ماتوصل للضرب ،،
الله يهدية .. اجمل مافي الموضوع وقفة عمانك معك ، وانهم ماتخلوا عنك الله يخليهم لك ..
صدقيني اختي الحياة ماتكمل لأحد بس انتي الحمدلله ناجحة في كل جوانب حياتك إلا مع أخوك
يعني اخوي ولا أم او ابو او زوج ...
وبما اني قريت كل موضوعك اهنيييك كثير تبارك الرحمن على حرصك ع الدين وع تطوير نفسك
واشغال نفسك بالمفيد ...
بيني وبينك انا كثير اتحسر ع نفسي وفي اشياء كثير اتمناها ويعجبني نمط الحياة اللي كذا ..
بس حاليا بيت وابناء وزوج بس ولو لو أحصل الحد الأدنى بس ماآقعد مكتوفة اليدين ..
كني طلعت عن الموضوع .. معلية اعذريني بس مكتئبة من وضعي وجيت افضفض في موضوعك ..
ع العموم حابة افيدك بالنسبة لأخوك وماقريتة عن شخصيتة ...
انتي تصرفك صح بإدخال طرف ثالث في الموضوع لان الموضوع قوي والضرب مو شي سهل يعدي وخلاص ..!
بس في نقطة ليتك تنبهين اعمامك عليها ، اذا نصحوه يستخدمون الفاظ مثل انت رجال
وماهقيناها منك .. وماشاء الله عليك سمعتك زينة ويعتمد عليك ماتوقعنا يطلع منك كل هذا ..
اهمال وضرب ووو ...
يعني يلعبون ع الوتر الحساس منها قرصة اذن ( انو ياويلك ان مديت يدك على اختك ومن هالكلام )
ومنها مايكسرونة ويعاملونة مثل خوالك اللي كلامهم اساس معاملتة لك بهالشكل هالكلام والتحقير والتقليل من الشأن )
احنا صحيح نعامل الطفل بهالشكل لما يكون يغلط كثير نحاول نعزز جوانبة الحسنة وانك افضل واكبر من إن تتعامل بهالأسلوب وانت شاطر ورجال وكذا .. بس مايمنع اننا نتبع هالأسلوب مع بعض البالغين ..
خصوصا اللي عندة عقدة نقص وامور انزرعت فية من الصغر خلتة يطلع بهالشخصية المتناقضة نوعا ما

طولت عليك بالكلام بس ماحبيت اطلع من موضوعك بدون فايدة ..
الله يوفقك يارب ويهدي اخوك ويردة للصواب .. مافي اجمل من انك تكونين سبب في هداية
اقرب الناس لك واصلاح خلل شخصيتة او تخفيفة ع الأقل ..
في حفظ الله .

__________________
سبحان الله وبحمدة .. عدد خلقة .. ورضا نفسة .. وزنة عرشة ..ومداد كلماتة

الا بالعكس ردي ياعمري يهمني ردك ، و رد اي شخص يحس عنده اضافه
مو شرط تكونين معاي من بداية الأحداث وانا مانزلت المشكله الا عشاني اطمع تفيدوني لو ب حرف
( أن تأتي متأخرا خير من أن لا تأتي ) هذي قاعدتي : d

- صح كلامك كثير تصير مشاكل بين الاخوان ومو بس بين الاخوان
بكل العلاقات كذا طبيعه الحياه بس في اشياء تحسين لازم تحطين لها حد

- الحمدلله على هالنعمة الله يحفظهم اعمامي ويطول ب اعمارهم

- شوفي انا ما اعتبر نفسي فشلت مع اخوي ابدا
لأن طبيعة الحياه بين جزر و مد ( ولقد خلقنا الإنسان في كبد )
يعني هي مشكله وصارت ما اعتبرها فشل لأنها جزء من طبيعة الحياة ككل
انا ماني في الجنه عشان تكون حياتي كامله
واحس هالمشكله خيره خيره خيره و رحمه من ربي
لأني سبق و قلت اني قدمت ع الابتعاث وانتظر اسمي يطلع خلال هالأسبوع
طيب افرضي ما صار هالموقف و رحت سافرت معاه واندبغت هناك ههههه ؟؟

الشي الاخير - سبق وكتبته ب رد سابق
الاهل الام والاب والاخوه والاخوات والاقارب هذولا اشخاص محوريين
مهما توترت علاقتك فيهم خلي بينك وبينهم جسر من الموده لا ينقطع وخلي في خط رجعه
لسبب واحد ( ان الله سبحانه و تعالى وصى بالرحم )

و ترا مريت ب مرحله الذبذبه مع الام و الاب هههههه يعني عادي
ما انولدت وحياتي كامله وممتازه والاشخاص اللي حولي رائعين وعلاقتي فيهم رائعه
كله يبي له مجهود

و تمر الايام و نكبر ونتطور في ديننا ونقرب من الله اكثر ونصير نتجاوز و نعقل
والحمدلله على كل شي

- جزاك الله خير على كلامك الطيب الله يجبر بخاطرك زي ما جبرتي ب خاطري
بس ممكن توضحين لي اكثر يعني من كلامك عن نفسك فهمت ان حياتك صار محورها الابناء و الزوج فقط قصدك ودك يكون لك انشطه خارجيه ؟؟


- شوفي انا دخلت عمي الكبير فقط
وعمي الصغير درا من اخوي
و اثنينهم كانت ردة فعلهم حلوه يعني نصحوه بطريقه مهذبه و عاتبوه
وانا كنت متأكده من هالشي من ناحيه اعمامي بالذات ان ردة فعلهم بتكون حلوه
لاني اعرفهم زين

بالنسبه لخوالي شوفي معاملته لي مو اساسها تحقيرهم
وهم ما يحقرونه بالعكس جدا يحبونه
بس كانوا يقارنونه فيني من باب انه ودهم يتعدل ويخجل
وكانت كل مقارناتهم ب نبرة عتب او مزح !
بس انا شخصيا اعتبرها شي يجرح و شي وارد انه يكون كلامهم اثر فيه
بطريقه سلبيه لانه كان يضربني وهو يقول انا حاقد عليك من زمان وشايل !

- اللهم امين شكرا لك على دعواتك الحلوه
بس لازم ترجعين تجاوبيني ع سؤالي بخصوص حياتك
قلبناها سوالف ههههه