قلبي معك يا كنافة
استمري بالدعاء وبصلاة الليل و ربي ماراح يخذلك.
زوجك يعشقك لكن طباعه صعبة جدا
وهالشتايم اللي يرسلها والتخبط اللي عايشة بسبب انه خايف يفقدك صدقيني.
رأيي ان والدك يناقشه مبدئيا في خيار انكم تبتعدون عن بعض فترة وجيزة حتى تهدأ النفوس (حتى لو كنت مقررة الطلاق)
وتكون الفكرة ابتعاد مؤقت حتى ما يتهور زوجك.
والأفضل انها تأتيه مباغتة بحيث تروحي انت و والدك فجأة ولما يفتح تدخلون وكأنكم تدخلون للنقاش وأثناء نقاشهم يطلب والدك تتركيهم لوحدهم وانت بدورك تجمعي اغراضك الضرورية وتخبريه انها ضروريات بحكم الفترة اللي ستقضينها عند أهلك.
وبعدها افعلي ما يحلو لك
لكن ابدؤوا معاه بالحسنى وبالرفق وتمسكنوا لحد ما تتمكنوا لأن فعلا في توقعي لو وصل زوجك انك مثلا قررت الطلاق سيتحول إلى وحش.
وبالنسبة للوظيفة هل عندك صور لشهاداتك؟
غالبا تكفي وأيضا السي في لوحدها تكفي ومايطلبوا منك الشهادات إلا بعد فترة من توظيفك وهذي حصلت لي شخصيا. الله يسهل امرك ويفرجها عليك يا حبيبتي.

و نقطة أخيرة شهادة لله
رغم ما يفعله زوجك إلا اني أشعر بالشفقة تجاهه
وهذا لم يحدث معي أبدا مع غالب المشاكل هنا
بل اني كثيرا ما أقرأ مشاكل العضوات هنا وأمتعض من رجالهن وأجدني من داخلي اؤيد الطلاق أحيانا أو على الأقل تلقينه درس
لكن معك تحديدا اجدني اشفق على زوجك فهو حاد الطباع بغير ارادته وصعب جدا وبينكما تنافر شديد
لكنه ليس سيء سوء مطلق بل يحاول ويتراجع ويناقش لكنه يفتقد تماما للحكمة.
و الخيار لك في البقاء وتحمل هذا العناء أو تركه

احذري ان تعيدي خطئك السابق
لا ترجعي الا بعد التفاهم ووضع النقاط على الحروف
اسال الله ان يصلح زوجك ويرده اليك ردا جميلا

__________________
ربنا هب لنا من ازواجنا وذرياتنا قرة اعين واجعلنا للمتقين اماما

لاتقدمين على شي الا انتي متأكده منه
سوا" برجعتك او انفصالك
وسبق وقلت لك خلي اهلك بالصورة
وفهميهم عن كل شي عشان ماتندمين
وقولي له انت تدل بيت اهلي رح اتفاهم معهم

__________________
استغفر الله وأتوب إليه

هل تعيشين حياة كريمة معه ؟! لتتمسكي بها
عذرا الأطفال دائما عائق لاتخاذ قرار الطلاق، لكن أطفالك بحاجة لكِ فأي ضرر يلحقك سواءا نفسيا أو جسديا سيتأثرون به ، و أنا لا أرى سوى أنكِ زوجة مستنزفة نفسيا و جسديا وهذا على المدى البعيد منهك جدا !
فكري في نفسك كأولوية من أجلك و من أجل أطفالك

موضوع اوراقك وشهاداتك وذهبك استبعد انه يمد ايده عليها .. موضوع الاستغفال وانك تراضينه وفجاه تاخذين اغراضك وترجعين للزعل مره ثانيه هذا بيزيد الطين بله وتنقلب الطاوله عليكي مره اخره ..
للامانه توني ادري انه حصل بينكم طلاقات سابقه وهذه اخر طلقه على حد علمي .. اللي فيها الرجعه بتكون شبه مستحيله ..
فدخولك اهلك الان .. واهله لحل هذه الاشكاليات اصبح امر لابد منه ..
رغم كل اللي يعمله زوجك الا اني احس انه فيه خير .. بس مشكلته عصبيته الزايده وقلة الخبر في حل المشكلات والتسرع ..
عطي الموضوع وقت اطول شوي .. الى ان تهدا النفوس ولو قليلا .. وكلمي ابوك بالاشيا اللي ودك يتكلم فيها مع زوجك .. بس بدون شد ورفعة صوت .. ترا الرجال مهمى كان ما يحب احد يرفع صوته عليه غير امه وابوه .. غيرهم مستحيل يتقبل منهم ..
وانتي كذلك راجعي حساباتك .. وحاولي ما تدققين على كبر صغيره وكبيره .. في امور ما تستحق الزعل وما تستاهل انه نعمل عليها مشكله ... في امورها لازم نعديها حتى تستمر الحياه ..
اتمنى نسمع خبر قريب بانكم تصالحتوا .. وروحوا لكم سفره .. غيروا جو . . مع اولادكم او بدونهم .. ابعدوا شوي عن جو البيت والمشاكل ..
حياتكم متعبه ومرهقه جدا جدا .. والى الان متحملين بعض .. يعني الحب موجود .. بس كل واحد مخبيه عن الثاني .. فعلى اقل مشكله تصير عندكم حالة استنفار وخوف من انكم تفقدون جمعتكم مع بعض ..

لما اشوف مشاكل المتزوجات
وكيف رغم كل شي حابين ازواجهم
ويشتاقون لهم ويحنون لهم الخ
احس انهم بنعمه انا فاقدتها
لاني كرهت زوجي بكل مافيني
من كل المشاكل اللي تراكمت بحياتي
والنكد اللي شفته منه خلال هالسنه

احيانا افكر باطفالي
والا بكلام الناس
والا ببيتي السابق
واحاول اقنع نفسي بالرجعه
بس ما اقدر.. داخلي صدود الدنيا
اكتب لكم هالكلام لان زوجي يحاول يتواصل
وانا رفضه تماما التواصل معه

اظنه رجع يحاول
لانه استوعب اني فعلا بايعه خلاص
كان يظن اني اتغلى وبرجع له
مايدري اني مع كل يوم مر كرهته اكثر
وعالقه براسي كل اساءاته

صعب اكمل حياتي معه بهالنفسيه
ولا ابغى ارجع له واتصادم معه
واتمنى يتركني بحال سبيلي عشان اقنع نفسي ان الانفصال حل مناسب لي وله

طبعا اقول لكم كل هالكلام
وانا تعبانه من مسؤليه الاطفال
ومن مصاريفهم وطلباتهم
صرت لهم ام واب بنفس الوقت
وحتى نوعية مشترياتنا انخفضت جودتها
وصرت اقتصاديه بالفتره الاخيره

بس كل هذا اهون على قلبي من العيشه معه

أهلا كنافة..

شوي شوي بتفهمي كلام الاعضاء.. ان بيت اهلك مهما يغلوك.. الحياة معهم وتحميلهم مسؤولياتكم مختلفة عن الضيافة لايام واسابيع..

يمكن اكون غلطانه.. بس انتي تصفين نفسك دائما انك راقية وبنت عزّ،، صدقيني جملتك الاخيرة (كلشي أهون من إني أعيش معاه) أشوفك مو قدها.. الحمل ثقيل، وضغط المجتمع، فكري مليوووون مرة قبل تتطلقي..

انتي ما افتقدتي نعمة الرفاهية وسخاء الزوج.. (بشكل عام).. لذلك ما كنتي حاسة بقيمتها، كل زعلك من امور بعيدة عن الفلوس..

حياة التعب والكرف في تربية الأطفال، مقابل حفظ الكرامة، مابيقدر عليها الكل..



اذا زوجك يحاول التواصل.. خلي اهلك يتواصلون معاه اذا انتي عاجزة.. وحلوا الموضوع

اسفه على صراحتي
بس احس لهجتك تغيرت بعد ماحاول يتواصل معك
كنتي زعلانه ومقهوره لما تركك في بيت اهلك وتتكلمي بحقد عنه
بس هاليومين لما حاول يتواصل معك وعرفتي انه شاريك هديتي وقلتي افكر بالطلاق واشوف حياتي
صعب الطلاق عليك ياكنافه وبترجعين له بس فكري بشروطك مضبوط وخلي اولها الوظيفه و مستشار اسري لك وله

وانا مع مسك الليل مهما كان بيت اهلك بس ماراح يكون مثل بيتك انتي تعبتي ولسى لك اقل من شهر فكري لسنوات قدام تربيتهم صعبه لوحدك ويمكن ماتحصلي وظيفه واهلك بتستحي تطلبي منهم كل مره عكس زوجك

بس المره هذي خلي التفاهم بين الرجال
خليه يتفاهم مع ابوك