السلام عليكم ورحمة الله وبركاته

اتمنى تساعدوني في مشكلتي

انا متزوجة من 7 سنوات ومعايا ولد عمره 5 سنين

زوجي طيب وحنون يهتم فيني ويهتم بولده ودايماً احسه مايبغى غير رضاي ،،
للللللكن المشكله الكبيره فيه انه مو متحمل المسؤوليه وعايش حياته عالبركه ،، تعبت معااااه لدرجة حسيت كأني انا الرجل ،، فكرت اشتغل وكان مخي كله مشغول بمشاريع وافكار كله عشان أأمن مستقبلي ومستقبل ولدي
دايماً يقول لي : اكله وشاربه خلاص اش تبغي احمدي ربك عالنعمه،،
عنده الحياه بس اكل وشرب ونوم لا يفكر بالمستقبل ولا بالتزامات ولا يهم مستقبل ولده ودراسته

غير عن المشاكل من بداية زواجنا وكنت اسامح واتغاضى عن اشياء كثيييييره بس الحين خلاص وصلت لمرحلة انه ماني قادره أصبر ،،، تحملت وصبرت لعله يتغير بس خلاص تعبت مررره ،،، كان كل همي ولدي ،،، كنت كل ماافكر بالطلاق ارجع افكر بولدي واتنازل وارضي نفسي بنفسي
بس الحين ماقدرت ،، تمر السنين وهو مثل ماهو
اكتشفت خيانات واشياء مااقدر اتكلم عنها ،،، يعني فكرت وفكرت انه تنازلت عن حقوقي ونفقتي
( كان كل مصروفي من اهلي) ،، فكرت اني تنازلت وبالنهايه اكتشف خيانات ،،، بس خلاص لحد كذا وماقدرت

أهلي من بداية الزواج وماعجبهم وضعي بس ماعمرهم قالوها لي بالصريح ،، كنت احس انهم يبغوني انفصل عن زوجي ،،، ،،، يعني يتأثروا من غير مايبينوا لي بس كنت احس هذا الشي يوصلني الاحساس

كان يشوفوني من كثر همي طلع لي شعرات بيضاء

الحين تركت البيت واخذت كل اغراضي وولدي ورحت بيت أهلي ،،، ونفسيتي الله أعلم بحالها

ساعات افكر بالطلاق وساعات اتراجع

بس اتفقت معاه عالطلاق يوم سبت البيت وكان راضي

لكن بعد ماتركت البيت بأسبوع بدأ يتصل على ابوي واخوي يبغى يرجعني وحااااااول كثييييير لكن ابوي ينصحني بالطلاق ويقول ماهو مرتاح له من زمان

امي وابوي مأيدين الطلاق مع انه ماحكيت لهم تفاصيل المشكله الاخيره ،، يعني مايبغوني ارجع ومو عارفين عمايله الاخيره معاي ،،، لأن ابوي لو عرف بتصير مشاكل كبيره وانا عندي ولد منه وماابغى المشاكل عشان ولدي

فكرت استر عليه لان عندي اخوان وولد ،،،

وكمان الناس ماترحم ،،، اذا انا واهلي نسينا ،، الناس ماتنسى وممكن لو كبر ولدي يوصل له الخبر
وهذا مهما كان أبوه
خصوصاً اأبوه يحبه ويموت فيه والولد متعلق بأبوه مره
عشان كذا كنت اتغاضى واتنازل كله عشان خاطر ولدي
بس فكرت انه من مصلحة ولدي انه مايعيش مع أبوه
التربيه انا اربيه واكيد حيكون يشوف ابوه

وللحين وانا في حيره وماني عارفه اتخذ قرار

أتمنى تساعدوني