نزولا من مرجيحتي و هبوطا في قسم المتزوجين بناء على اقتراح حكيمة المنتدى



فيه شي من زماان ودي اتكلم فيه فينا طبع يا حوائيات ما يعجبني ابدا


و راح اصيغه بداية بمثال و على الله افلح بالتعبير

فايزة و سميرة مع اخوانهم بنقاش عام

قال الاخ : دخلت البارح الاستقرام لقيته كله صور طبخ و مكياج

سميرة : اييه هذا موقعي المفضل دايم ادخله

فايزة : يععع احسه كله حق حريم يدخلونه و ينزلون صور طبخات..!


موقف ثاني ...

سميرة : بنزل السوق فيه اغراض نقصت علي بجيبها

الاخ : هيا فايزة تمشين معنا

فايزة : يا سميرة بطلي حركات حريم كل شوي نازلة السوق خليك شاطرة و جيبيها مرة وحده

( على أساس الشطارة انها تتخلى عن كونها حرمة لان الحريم مو شاطرات )


موقف اخيير ...



الاخ يشتكي من زوجته زعﻻن معها تكون اخت مؤيدة لردة فعله و الثانية تكون مع الحق


و اللي معه أبسط كلمة تقولها الحريم ما ينعطن وجه ﻻ تدلعها

خلص المثال ..يارب احد فهمني






ليش احنا يالحريم كذا ....؟


قسم بالله شي يقهر لما اسمع حرمة تنتقد الحريم كلهم

و كأنها من الرجال تتكلمين معها باي موضوع تقول لاااا حركات حريم

طيب انتي ايش الله يعافيك ..!

نفسي نتدارك هذا الغلط و لما نجي نتكلم ما ندرج كلمة حريم و ننسبها و كأن اي شي يسوونه غلط

او قلة عقل

و هذا الشي اكثر اكثر ما اشوفه بالمنتديات على وجه العموم يوقفون البنات بصف الرجال

و يكبرون راسه بس عشانه رجال مشكلتنا كبرنا و الرجل بحياتنا اخذ اكبر من قدره

حتى الثقه نكتسبها من الرجل متناسين وجودنا و تاثيرنا عليهم و على أيا كان


ترى مو بكل شي الرجل صح و ﻻ هو مﻻك عشان ما نقول ييييع حركات رجاجيل .

ما عمري سمعت رجال يقول ﻻ حركات رجاجيل مااحب كذا

هالفكرة انتشرت بعقول الحريم اننا عقولنا ناقصه مستدلين بالحديث الشريف و ياليتنا نستوعبه صح


معتقدين اعتقاد كامل ان الرجل كل قراراته صح


غلط غلللط


الرجال فيهم عاهات زي ما الحريم فيهم عاهات و من قوة اعتزازهم بنفسهم ما فيهم واحد ينتقد جنسه

حتى شهوتهم يتكلمون عنها انها غريزة و فطرة و سيكلوجية و مدري ايش

لكن حنا الله يخلف بس

غلطة صغيرة من الانثى ما نغفر لها حتى لو كان العقاب عند الله واحد بين الذكر و الأنثى


اقرب مثال الخيانة و نظرة المجتمع لخيانة الرجل و المرأة

الدين يقول عقابهم مثل بعض

بس شي ناقز لنا اسمه مجتمع مكبر حجم غلط المرأة و مصغر حجم الرجل

ليش ما نعذر المرأة مثل ما نعدي للرجل ..؟

لاننا انضحك علينا من قبل المجتمع و البيئة بان غلطة المراة مو مثل الرجل

و كبرنا و احنا نقول يييع حركات حريم

خلونا ننظر لنفسنا اننا شي حلو و نعتز بانوثتنا تكفووون


صار مرة كﻻم بيني و بين اخوي بالمزح قال لي وعد رجال تسوين هالشي ؟


قلت ﻻ وعد حريم يا حبيبي قال بس خلاص عرفت ان السالفه قاضية

قلت وعد الحرمة اصدق من وعد الرجال

ماسكها علي بكل هرجة ام خالد تقول وعد حريم

ماهو مالي عينه وعد الحريم


ما ينلامون اذا حنا نتكلم عن نفسنا و نقول




لااا حركات بنات ما احبها

__________________

‏
الوعي هو الملاذ ..

أستغفر الله العظيم ؛
( الفردوس غايتي )