خطيبي يوجه كلام كالسهام بل هو أشد حدة .. - منتدى عالم الأسرة والمجتمع

26-05-2010, 10:00 AM

تعويذة عشق

عضو دائم

تاريخ التسجيل: May 2010

المشاركات: 87

خطيبي يوجه كلام كالسهام بل هو أشد حدة ..

السلام عليكم و رحمة الله و بركاته ..

صباح الخير ..

أنا عضوة جديدة انضميت لموقعكم مؤخرا .. كنت ابحث في النت عن حل لمشكلتي

حتى اهتديت الى موقعكم .. تصفحت بعض جوانبه و شفت عقول نيرة و آراء سديدة .. و أتمنى اني انهل من ينابيع حكمتم و آرائكم

و لكم مني دعوة خالصة في ظهر الغيب

عشان ندخل بالموضوع على طول ..

أنا مخطوبة صار لي 3 شهور و نص تقريبا ..

خطيبي سافر للخارج للدراسة بعد ملكتنا بـ 3 أسابيع .. بصراحة خلال هذي الثلاث اسابيع عشت معاه أحلى الأيام .. كان رومانسي و رقيق و كريم و كل شي مان ماشي اوكي ..

لكن لما سافر .. ما بقول تغير كثييييير .. حراام

لكن أقول ان تواصلنا مع بعض ما عاد مثل أول .. صرنا نتخانق على اتفه الاسباب .. و وصل الأمر في مرة من المرات أننا ناقشنا انفصالنا .. بعدين تراجعنا ..

انا دلوووعة كثير .. و بنفس الوقت حساسة كثيييييييييير و يمكن هذي مشكلتي

هو كان يقول لي .. انا طيب و حليم بس لما اعصب ما بصرخ بس يمكن اقول كلام يجرحك !

و ياليته ما عصب .. و ياليته عاد عصب على شي يستاهل ..

احيانا اعذره .. اقول عشان هو آخر سنة في دراسته في كلية طبية و أكيد صعبة .. فأخليه على راحته ..

يتصل أو يرسل مسج واحد الساعة 4و نص باليوم و بس ..

و اقول ما يخالف تحملي يا بنت .. اكيييد برا التسعيرة حق المكالمات غالية و يمكن هو ما عنده وقت ..

لما يتصل .. يتكلم بسرعة و يقول اللي عنده و يخربط شوي .. بعدين يقول لي سامحيني حبيبتي مرررة تعبان و عندي محاضرة بكرة بدري .. اعذريني محتاج انام ..

و ما اقول شي و اسكر .. مع انو احيانا يكون وااضح من صوتي اني تعبانة و ما يكلف نفسه يسأل ليه صوتك متغير ... و الله العظيم ولد خالتي الصغير سألني وش فيه صوتك تعبانة ؟ و لا شكلك تصيحين ؟

و بالنسبة للأمور المادية .. أنا مقدرة ظروفه مع ان اهله مقتدرين .. بس اقول انا مو ناقصني شي في بيت ابوي .. فما ابغى اضغف عليه يمكن هو ما يبغى يلجأ لأهله ..

بس حصل الاسبوع الماضي .. و قلت له.. حبيبي ابي خاتم معين _ هو يعرفه _

قال لي من عيوني لما ارجع و اشتغل اجيبه لك

قلت له و انا اضحك امزح معه .. لا ما ابي عنونك .. ابي الخاتم .. عنونك يمكن تحتاجهم مني و لا مني

هو فهمها بطريقة مدري كيف ..

و جلس يعاتبني و يقول لي .. انتي المفروض تعيشين عيشة زوجك و ما تحملينه فوق طاقته و مدري وشو

و خواااتي ما عمرهم قالوا لأزواجهم كذا و كلام واجد ..

المهم بالنهاية قال لي الكلمة اللي حسيت انها غيرت كل نظرتي له .. قال لي .. بصراحة اعذريني بس هذي قلة ادب منك !!!!!

انا كنت في مكان عام لما قال لي هالكلمة .. ما رديت و ما زدت على كلمة .. الله يسامحك

بس بكيت بيني و بين نفسي ..

من لما صار هالموقف بيينا قبل اسبوع .. الى اليوم و احنا ما نكلم بعض عدل .. و المكالمات اللي كنا نجلس احيانا بالساعتين صارت من خمس الى عشر دقايق !!

أنا اعرفه لما يكون حاس انه غلطان .. يقوم يتلصق بزيادة و يقول لي كلام حلو واجد و يرسل مسجات كلها شوق و خرابيط ..

بس انا كما اسلفت حسااااسة كثيييير .. ما تقبلت منه كل اللي قاعد يسويه

انا حاسة اني انجرحت في كرامتي .. خصوصا اني مقهورة الى اللحين لاني ما رديت عليه و ما بقدر ارد عليه حتى لو أنعاد الموقف مرة ثانية ..

يعني هو بيقول لي قليلة ادب و انا بقول له انت قليل الادب و هو يرد علي بكلمة اكبر و انا نفس الشي .. وش المستوى المنحط اللي راح ننزل له .. أنا ما ارضاها

المهم حاليا .. هو في مرحلة اختبارات نهائية .. بعدها راح يرجع السعودية و المفترض ان برجعته خلاص نجلس نجهز و نخطط لزواجنا ..

بس و الله يا اخواني .. احس اني كارهته و مالي خلقه .. حتى لما يجلس يسوي له حركااات على التلفون و يرسل قبلااات .. احس تلوووع كبدي لاني مالي خلقه ..

انا في حالة كآآآآآآبة شديدة .. رب العالمين اعلم فيها

موعد رجعته للسعودية قرب .. و انا مالي خلق استقبله .. لان شخص ما احترمني و لا قدرني .. ليه احبه ما يستاهل

و الله الناس حاسدينا و يفكرون عيشتنا عسل .. و يقولون دكتورة و تزوجت دكتور و ما يدرون باللي حاصل بيننا

اللحين رجع على عادته القديمة .. اللي مسج واحد او اتصال الساعة 4 و نص .. بس اللي يفرق اتصال اللحين عن اتصال قبل .. ان اتصال اللحين صار 5 دقايق ما يتجاوزها بحجة زحمة المذاكرة و انشغاله الدائم و انه فيه النوم ..

و بالتالي احنا ما نناقش مشكلتنا .. و بالتالي تمر الأيام على مشكلتنا و عدائيتي ناحيته تزيد ..

عطوني رايكم ..

و لو كنت غلطانة .. وجهوني ..

و كيف اساعد علاقتنا عشان تطلع من هذا المأزق ..

الله يجزاكم عني خير الجزاء و احسنه ..

التعديل الأخير تم بواسطة وردة بين الثلوج ; 26-05-2010 الساعة 01:40 PM السبب: حجم الخط

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه