في بادئ البدء ......... السلام عليكم ورحمة الله وبركاته...ومبارك عليكم العيد وتقبل الله طاعاتكم....

الأمهات الأفاضل ...ومن لديه الخبره أرجو إعانتي في المشكله التي أمر بها مع طفلتاي (الله يحفظهم لي ويبارك فيهم)..الكبيره عمرها أربع سنوات ونصف والصغرىثلاث سنوات وشهرين... وأنا من النوع العصبي (كعادة الكثير من النساء)..وزوجي هادي الطباع في أغلب الأحيان....أصبحتا عصبيتان ولا يسمعن الكلام ولا يخافن من أبوهن لأنه ما يحب يرفع صوته عليهن ..والحين إن رفع صوته ..خلاص مايخافن منه....وأشير أيضا إلى تأثير أهل زوجي على أطفالي وما يلحقه من دلع وتلبية طلبات ...فإذا قلت لا ..بالبكاء قالوا لهم نعم...والممنوع عندي مسموح عندهم.........وهكذا....
صرت ما أقدر عليهم...لا العقاب ولا الصراخ..يجيب فايده..وش أسوي...

وفي الفتره الأخيره أي من أيام...صارت الكبرى (وانتو بكرامه)تعملها في ثيابها مع أني ادخلها الحمام وحتى لومن خمس دقايق طالعه من الحمام ..وقبلها بفتره كانت تحبس نفسها علشان اللعب أو أنها عيازه..حتى توسخ ملابسها الداخليه ..أهاوشها مره ومره أسكت عنها ومره أكلمها بهدوء..وما من فائده..مره قمت ورميت ثيابها الداخليه في الزباله وانتو بكرامه..قدامها وقلت لها بتخلص ثيابك وبعدين ما بيصير عندك ثياب ..وما باشتري غيرها لك..علشان أخوفها ...قالت لي حاضر.ووعدتني انها بتعدل سلوكها ....في المرة التاليه ماذا فعلت؟؟؟؟؟..رمت ثيابها بنفسها وقالت :خلاص رميتها لانها وسخه..انا شاطره..

أطلت عليكم ...السموحه..لكني اعيش مشكله تؤرقني...أرجو منكم المساعده...خصوصا انها في الروضه واخاف تفشلني وتفشل نفسها قدام الاطفال.....لا أعرف أخصائي اطفال اتواصل معاه.وصعب عليه....واللي عنده حل يساعدني..يسعده الله...ويجزاكم الله الجنه وثمرها...