السلام عليكم ورحمة الله وبركاته جميعا

من زمان ما كتبت موضوع..ماعاد فيني حيل أفضفض وأشتكي..يمكن السبب اللي أمر فيه ألحين..أحس إني صرت انطوائية بشكل غريب وبسرعه..صديقاتي صرت أعصب عليهم كل الوقت..وما أجلس معاهم..ولو جلست أظل ساكته..

ما أتصل فيهم ولا أرسل لهم رسايل..مو بس أنا..حتى هم قطعوني مرة..هم انشغلوا بحياتهم وأهلهم بس صار الموضوع فجأة.. وأنا وياهم كل يوم بالدوام..

أحس إني حاقدة عليهم..ليش تركوني..ليش الكل قاعد يبعد عني..أنا واثقة إن أحاسيسي هذ مو صحيحه لأن صديقتي أمس جلست معاي لحطات لحالنا وظلت تقول لي وتحلف لي إنها تحبني مرة وولهانه علي..بس أنا ظليت أسخر من كلامها لأنها لو مشتاقة صحيح ما تركتني كل المدة هذي بدون ما نجلس سوا مثل أول ونسولف ونضحك..

صرت متجهمه على طول بالدوام..ويالله يالله أبتسم مجاملة لزميلاتي..وكرهت صديقاتي والسبب إبليس..يظل يقول لي " لو فيهم خير ما بعدوا عنك الفترة اللي مضت"

وصلت فيني الحالة لأني صرت ساكتة حتى بالبيت..ما أبغى اشتكي لأحد من ألم أو ضغط بالعمل أو أي شي..حتى هنا بالمنتدى..والله إني غصب أكتب ألحين..بس أبغى أحد يجبر بخاطري ويقول إنه يمر بنفس الإحساس..

ليه صديقاتي ماعاد يهتموا فيني..ماتغير عليهم شي..بس هم تغيروا علي..حتى قريباتي تغيروا علي..

وش فايدة الدنيا بدون صديقة أجلس أفضفض لها واحكي لها..

أنا حتى صرت أغار من زميلاتي..اللي اجتماعيه والكل يسولف معاها..اللي جيابه طبق والكل يمدحه..صرت مثل الأطفال بغيرتي..شي سخيف بس مو قادرة أسوي شي لإحساسي..حتى إني صرت أسوي لفت انتباه بشكلي وبعض الأشياء اللي أجيبها ولما ألقى المدح وتفاعل الزميلات أفرح مثل الطفل وودي ما يسكتوا..

وش اللي قاعد يصير لي..رح أنجن..فمي مسكر ما أقدر أشتكي لأحد..وأحاسيسي متهيجة وأبغى أحد يرضي رغبتي بالإحساس بالأهمية

__________________