ناوي أتزوج على زوجتي لأنها ما تصلح تكون أم !!!
ليش ما تصلح تكون أم:
1) أنا شاب قريب أكمل 30 سنة , قبل تقريبا ثلاث سنوات خطبت و أستمرت خطوبتي لمدة سنة ونص. ومن أول يوم زيارة لخطيبتي والى اليوم ( بعد أكثر من سنة ونص من زواجنا) و أنا أنتظرها !!
كيف أنتظرها ؟ أقول لكم, تقريبا 99 % من زياراتي لها في بيت أهلها أيام الخطوبة لازم أنتظرها أقل شي ساعة كاملة و أحيانا توصل ساعتين ونص لين ما تجهز , أنا بطبيعتي صبور , ولذلك كنت ساكت في البداية ، بس البنية إستمرت على هالحال لين طفشتني فكلمتها مرة وثانية وثالثة أسأل عن السبب , بس مالقيت جواب منها ولا تجاوب, قلت يمكن الوقت مو مناسب فصرت أجي شوي بدري بس هم مافية فايدة صرت أتأخر ما فيه فايدة . قلت يمكن مشغولة في الكلية بس الوضع كان نفسه ( ويمكن أسواء) في الإجازات. طبعا أنا ما أجي الأ متفق على التلفون من اليوم اللي قبل (اذا مو الأسبوع اللي قبل) على موعد الزيارة معاها .
أنا أدري أن البنت باردة (بطيئة) بس مو لها الدرجة
في يوم من أيام الخطوبة قلت لها : شوفي انتي مو راضيه تعلميني وش اللي يأخرش ولا راضية تعتدلين , بس أن شاء الله بعد العرس بأشوف ويش السبب و بأقطعه.
اللي قاهرني أن هالتأخيرات كانت في كل شي مو بس الزيارات
زين وصار العرس ( وطبعا حتى ليلة العرس ما وصلت الا الفجر)
وتبين لي بعد العرس أن سبب تأخيراتها هو مزيج من برودها + عدم اهتمامها في الوقت + عدم ترتيبها لوقتها + كسل + خيابة + هَوَس يخليها تدخل الحمام لكل صلاة بمعدل ساعة ونص
والحين صار لنا أكثر من سنه ونص من عرسنا وطول هالوقت وانا أحاول أغير فيها بس ما ألاقي الا الوعود بالتغير.... وما زلت .........................أنتظرها ......... أنتظرها لما أجي من العمل عشان أكل لي لقمة , أنتظرها لما بنطلع , أنتظرها عشان يعتدل حالها !!!
2) طبعا الحين صار لنا ثلالث سنين(من الخطوبة), يعني خبزنا بعض زين, يعني صرت أعرف ويش ممكن يتغير فيها وو يش مستحيل تغيره , من الحاجات اللي مستحيل تتغير فيها الوفاء بالوعد ، الى درجة اني وصلت الحين الى درجة اني اذا سمعتها تقول انها بسوي الشي الفلاني أتيقن على طول انه عمره مابصير, وبالعكس اذا ما قالت بتسويه يكون عندي أمل انه بيحصل ، مع اني أشجعها و أحاول أساعدها.
3) مرتي وحدة تهتم بالنظافة المجهرية لجسمها ولا تجيب خبر للنظافة المرئية , يعني تحب تستعمل الديتول حق كل شي وتستهلك الكلينك بشكل مخيف ، بس لو ان درام الزبالة المليان من كلينكسها منكب في نص الصالة ماتجيب خبر ولا حتى يصير عندها شعور ان هذا وسخ المفروض ينشال ( ابدا ما أبالغ) تمر عليه ولا كنها شايفتنه. يعني لو تشوفون حمامها بتعرفون أنه أقذر(مو بس أوسخ) من أي حمام عمومي شفتوه ، ولذلك قلت "حمامها" لأنه بعد سنه من الزواج صرت ما أستحمل أدخل حمامنا من حالته وصار لي أكثر من ستة أشهر أستعمل حمام المجلس وأنظفه بنفسي.
4) في بداية زواجي كانت زوجتي تطبخ وتستعمل المطبخ زي ما تبغا وأنا أحاول أساعدها بس هي ما ترضى ، وساعات اروح بعد ما أجي من العمل واصلي المغرب,انظف الصحون أو أطبخ من وراها ( خلال ساعات الحمام !!) ولما تكتشفني بدل ما تشكرني ، تسمعني ذاك الكلام اللي يعور القلب مثل "أن شاء الله طبخت لروحك بس لأني ماني ماكله اللي تطبخه" ، بس أنا أضل ساكت لأني مو من عادتي أصارخ. أنا كنت أطبخ وأغسل عشان أولا أساعدها وثانيا انا أسرع منها بمراحل ، وثالثا من وساختها وعدم ترتيبها!! يعني أنا لما كنت أطبخ كنت عادة أغسل الصحون اللي باستعملها ( لأن الصحون نادرا ما تكون مغسولة ،دايما مرميه في السنك) وبعدين أطبخ وأخلص و أغسل الصحون اللي أستعملتها وهي بعدها ما تخلص صلاتها (الواجبة بس !!) هذا اذا كانت اصلا طلعت من الحمام (فمتى بتسوي طبختاها اذا لحد الحين ما أبتدت؟؟). والله يسلمها لما تطبخ تعفس المطبخ فوق تحت :الأرض والفرن وحوله والطاولة ، مو مشكلة بس المشكلة ان المطبخ يظل بعد الطبخة زي ما هو لأسابيع ، يعني لما مثلا ينسكب شوي شوربة على الارض ما تمسحها أو لما تقطع الخضرة على الطاولة ما تشيل القشور والبقايا أو لما تتناثر حبات الرز أو المكرونه على الفرن تبقى لين ما تتفحم. وتعالوا تخيلوا كيف بيكون شكل المطبخ بعد أسابيع من ألاستخدام !!
ولا تتخيلون أنها تطبخ كل يوم ، تقريبا مرتين في الأسبوع بس.
تصدقون أن من أهمالها لمطبخها أن بعض الحبوب اللي تطيح في السنك تزرع وتطلع لها أوراق ( ترى ما أمزح) من طول المدة اللي ظلت في السنك ،والخضرة في الثلاجة مثل الخيار مو بس تعفن إلا تصير شبة الماي من كثر ما تحللت . لذلك صرت أسمي ثلاجتنا "درامنا الثاني" لأني لو ما أنا أجي وأرمي الحاجات المنتهية والخايسة ، زوجتي ما بتنظف شي ، ألا ما ندر.
5) الترتيب ، أنا ما أبغاها ترتب البيت وتنظمه ، كلي اللي أبغاها تنظم حالها و أغراضها!! تخيلوا أن عندنا غرفة فاضية حطينا فيها النشافة ، لو تشوفون ذيك الغرفة بتفكرون أن واحد من بزارين الجيران جاء وأخذ سلة الثياب الوسخة وقعد يرميها في كل مكان في الغرفة !!
تخيلوا أن في نفس الغرفة أنا حاط صندوق عدتي ، لما أحتاج مثلا مطرقة أو سكروب، لازم أول أشيل هاف ولا ستيانه أو ثوب نوم من على الصندوق!! مع أن الغرفة واسعة بس زي ما قلت لكم الثياب مرمية في كل مكان.
وقيسوا على هذا غرفة الغسيل والمطبخ وغرفة المكتب ودولاب الثياب......الخ.......هذي حرمه هذي ؟؟
6) بالنسبة للفراش، زوجتي عندها حالة خاصة مو مثل باقي النسوان ، يعني باقي الحريم عادة دورتهم سبعة أيام أو اكثروالباقي نقاء.
بدون أي مبالغة ولا تضخيم، اذا انا اخذت معدل الأيام التي تكون زوجتي نقية فهي العكس حوالي سبع أيام فقط!!!
أدري انها حالة غريبة وزوجتي راحت أكثر من مستشفى وبلعت حبوب كثيرة بس ما قدروا يسون لها حل بالإضافة ان الدورة مالها موعد يعني ممكن تجيها في أي يوم.
طبعا هذا الشي مو بيدها ولا ألومها عليه ، بس حتى في الشرع اذا كان الرجل عنين فمن حق الزوجة أن تطلقه .....صح لو لا ؟
أيش أنا سويت؟
أنا بشهادة اللي يعرفوني رجال عاقل وصبور ودايما متفأل و دايما أنتبه لنقطة الماي اللي في الكاس ولا أفكر في باقي الكاس الفاضي في أمور حياتي، فلذلك كنت أحاول أخذ الأمور شوي شوي معاها بالكلمة الطيبة والتدليع ومد يد المساعدة و محاولة التثقيف وفهم الأسباب. أعطيكم مثال كيف تعاملت مع تـاخرها في الحمام:
طبعا زي ما قلت لكم، انا في البداية أكون ساكت ، بعدين مع الايام بكل لطف صرت أقولها مثلا " حبيبتي لا تتأخرين" أو " ممكن أساعدش في حاجة" بعدين صرت أمزح معاها وأقول مثلا " ترى بادخل وياش الحمام عشان تخلصين بسرعة" وبعدها ثقلت المزح شوي " ترى بأطفي الماي عليش اذا تأخرتين" وشوي شوي لين ما صارحتها وقلت لها " ترى الحمام بيت من بيوت الشياطين فلا تضيعين نص يومش فيه" بس ما فيه فايدة وصرت مثلا أحاول أدخل الحمام قبلها وأتروش وأطلع في دقايق عشان تشوف و لعل تحاول تقلدني، بس ما فيه فايدة.
وتصدقون حتى صرت أتعطر بالعطر اللي تحبه وامر قريب الحمام عشان تشتمه وتشتاق لي وتطلع، بس ما فيه فايده ، مع اني اسمعها من داخل الحمام تقول ريحتك حلوه. ومن الحاجات اللي كنت أسويها بعد أني صرت أضرب عليها الباب و أكلمها بلهجة حادة وأسألها عن سبب تأخرها.
زي ما قلت لكم السبب في التأخير داخل الحمام هوه الهوس في النظافة والطهارة وبعض ظروفها الخاصة ، بس ساعة ونص قبل كل صلاة!!!! وكثيرا تكون أطول
بعدها بشهور أخترب ماطور الماي اللي حق البناية اللي انا فيها وصار مافيه أمان انها لو طولت في الحمام لصلاة المغرب انه بتلاقي ماي تستعمله عشان صلاة العشاء، فبدل اني اصلح الماطور ( زي ما انا أصلح كل شي في الشقة) طنشت كان يفيد فيها........................بس لا حياة لمن تنادي. والحين صرت ما أهتم تأخرت لو ما تـاخرت لأنه بح صوتي من الكلام والمحاولة.
طبعا هذا مثال واحد بس وقيسوا على اللي أنا سويته في هالمثال معاناتي الباقية معاها. فمثلا توقفت عن الطبخ وغسيل الصحون وقلت لها أني أفضل انها لا تطبخ وناكل من المطاعم أسرع وأنظف ،
بعد شهور من المحاولة معاها والكلام اللين وبعدها الكلام الخشن ، كنا مرة نسولف وسألتني " تذكر أيام الخطوبة لما قلت أنك ما تتخيل أن عمرك تتزوج من مرة ثانية؟ ومو متخيل ليش الناس أصلا يتزوجون من ثانية!!" فرديت عليها وقلت أن هذا الكلام كان لول ، بس الحين أنا أحس أن بعض الرجال عندهم حق!! وترى السبب هو انتي
طبعا بعدها قعدت تصيح و تبكي ، فبعد ما سكتها قلت لها ، ترى الزواج من ثانية بالنسبة لي كان باب مقفول والحين انا ابدا ما أفكر بالزواج مطلقا لكن الباب المقفول صار مش مقفول لكن بعده ما ينفتح و شطارتش أنك تقفلينه مرة ثانية.
وفهمتها بعد أني ابغى يهال بس قبل اليهال أبغى من يكون كفو انه يعتني بهم !!
طبعا كعادتها بعد ما أعطيها مثل هالكلام تقوم اليوم اللي بعده تطبخ أو تغسل أو تمسح ، وبعدها تعود زي ما كانت!!
زين بعدها بكم شهر قلت لها ترى الباب انفتح ....وقعدت تصيح.....نظفت شوي ......و بعدها ابو طبيع ما يجوز عن طبعه.
أخر شي قلت لها يا بنت الناس أنا واحد مو صغير ومن زمان ابغي يهال ، بس ما أبغى يهالي يتربون في الشارع أبغى أم تقوم بهم لما أكون انا في العمل بس أنتين تحتاجين أم تقوم بش !! وانتين ما عمرش بتتغيرين فأنا خلاص ما بأحاول أعدلش وأنا ناوي أتزوج مرة ثانية....متى ومن من مو شغلش.
تخيلوا حتى هذا ما فاد فيها !!!
عادة لما أسمع عن واحد يبي يتزوج مرة ثانية ، الناس تقوم تسأله حرمتك مقصرة في شي أو شايف منها شي ؟؟ وعادة الجواب يكون بالنفي لكن الرجال يبغى يعدد لنزوة أو للسنة أو أن وحدة ما تكفيه.
لكن أنتوا الحكم هنا ،،، هل ممكن أجاوب مثل هالإجابة عن مرتي؟؟
يمكن البعض يقول أنها مشغولة بالدراسة عن بيتها!
طبعا ممكن ،،، لكن انا كان عندي ثلاث خوات درسوا في نفس الكلية وكانوا يذاكرون أضعاف مذاكرة مرتي (لأنها مو طاقة خبر الكلية) ومع ذلك كانوا قامين بالبيت ودايما يساعدون أمي و كانت وحدة منهم قايمه فيني شخصيا.
غير كذا أنا جربت مرتي في أيام العطل وأجازة الصيف مثلا وحالها كان نفس الشي !!
ويمكن تقولون أن البنيه متعودة ما تسوي شي في بيت أبوها ويبغالها وقت لين ماتتعلم ،
للأسف هذا لحد ما صحيح، لكن المفروض تتعلم كيف تصير ربة منزل شوي شوي ، بس سنة ونص ولحد الحين ما شفت تغيير ملموس !!
طبعا أحد الحلول أني أجيب شغالة!!!
والله عيب ، احنا أثنين ونجيب شغالة!! غير انها اهي نفسها ما تبغى شغالة ولا تطيقهم ابدا
ويمكن البعض يقول يمكن تتغير بعد ما تجيب يهال؟
بالله عليكم فيه احد ممكن يجازف هالمجازفة وجيب له ياهل كل يوم مرضان من ثيابه الدايما وسخة أو سوء التغذية أو ممكن يوم يغص مثلا بحاجة وحضرتها قاعدة ساعة ونص لين ما تطلع من الحمام أو يجيله تسمم من وساخة مطبخها. ولو قدر الله وعاش هالولد بس أمه ماتغييرت و وصل حالنا الى الطلاق ، ويش بيكون مصير الطفل هذا؟
20-01-2007, 01:39 PM
ضوابط المشاركة
العرض الشجري