السلام عليكم


مالي إلا إنتم بعد الله

أحس راسي بينفجر مدري لمين أقول

لاقلت بتترتب علي قولي كثير أشيا بتضر بحياتي أو حيات إختي

أنا البنت الصغيره في البيت وخواتي متزوجات ..

المشكله في زوج إختي الوسطى أحسه يبي يتقرب مني


مافي شي واضح بس أكثر من موقف بيين لي هالشي ..

قبل لاأعدد المواقف

باقولكم على شي رجل إختي من النوع اللي مايبين عليه وشي يحس فيه يعني لو يكذب الناس كلها خبر خير تصدق بالراحه ..

أو حتى لما يمزح ويقط نكته يتكلم عااااادي مو مبين إنه ينكت كنه يتكلم جد ..

أول موقف ..
إختي توهقت بسالفه وبغتني و ماعندها جوال إنقهرت وقالت لرجلها شلون أكلم (وحده من البنات )وانا مو حافظه رقمها قال عادي رقمها مسجل بجهازي !! فكت حلقها ومن وين جبته .. بكل هدوء كنت أفتش بجوالج بعدين ليه العصبيه لاحتجتج ومارديتي على جوالج بادق عليها تخليني أكلمج ؟؟!

> شوفو أول نصبه البيت معبى أخوان شباب هذا غير رقم جوال أبوي ورقم تليفون بيتنا لاحتاج إختي يجيني أنا ؟؟؟

وإختي على نياتها صدقته ..

الموقف نمبر تو

جيت بيتهم طلبت من إختي أشغل النت فتحت جهازهم جيت أحط اسم الموقع ع الويب ألاقي منه درزن طلع الاخ يراقبني بالمنتدى اللي أدخله ووشنو مشاركاتي فيه

ومره موقف غلط علي انا :

كانت إختي محتاجه تطلب منه شي وتبي ترسل له رسالة منمقه قلت من باب المساعده أساعدها لإنها ماعندها أسلوب في تصفيف الكلام دزيت الرساله غراميه مرفق معاه الطلب دقيقه وكلم إختي قالها وحده من البنات هي اللي دازه الرسالة ؟؟!


ومرة ثانيه ..

دخلت الماسنجر أكلم إختي وكلمت وسولفت وهذرررت وطلعت حرتي كلها طلع بالنهاية زوج ختي ! وقام يسولف معي وبكل برود قالي قولي لإختج أنا من شفتها دايركت قلتلها السالفه وغير ماكنت متوقعه طلعت ماتعرف بشي .. وإنه كان يكلمني أكثر من مره وهي ماتدري إنهارت وقامت تبكي وتقول اللي قاهرني إنه يقول ياليتني كنت متزوج (وحده من البنات ) ولا متزوجج .. !!


آخر مره ..

اللي هي أمس كنت نايمه عندهم كنت سهرانه باليل عشان أرسم لوحاتي اللي باقدمها للمدرسة وإختي نامت وأنا بقيت بالغرفه اللي أنام فيها قام زوجها وكلمني من ورا الباب إن كنت محتاجه شي أو لا فـ رحت تغطيت بالبطانيه والصدق إني ماكنت أسمعه ففتح الباب شوي شوي لين مادخل وأنا أتكلم معه من ورا البطانيه يرحب فيني ويقول إن البيت بيتي ومن هالكلام بعدين سألني ليش اللمبه مو مطفيه قلت له أبي أكمل رسمي قالي تحتاجين شي أطفي باقي اللمات قلت له أيه راح ورد مره ثانيه ودخل برضو وقال إذا انا محتاجه الكمبيوتر وقام يعتذر عالى لوحه خربها لي صرفته ومشى وهو يحوس بالطبخ والمطبخ قدام الغرفه اللي أنام فيها> بصراحه أحس إنه يدور كلام عشان يتكلم معي


هذا غير يوم كنت أقدم ع المدارس أنا وأختي

ورجعنا معه بالسياره وسأل عن أخبارنا وقال إذا وافقو تشتغل أختي فيها أو لا فكان رده عادي قال خيره لج لإنها إنرفضت وبعدين سأل عني وجاوبت إختي بإني إنرفضت بعد قال هم الخسرانين اللي يرفضون وحده من البنات !!

بعد شوي قامت إختي تطلع له قهرها عن مديره المدرسة وكيف إن عينها قويه قال أشوه إن وحده من البنات ماداومت فيها كان طلعت عينها .. !!



بالله شرايكم ؟؟

ممكن أكون ظالمته ؟؟
ولا إحساسي صدق

وش التصرف الصحيح اللي لازم أتصرفه شورو علي

لو سمحتي مشرفة القسم إذا ردو اأخواني الاعضاء وإستفدت من إجاباتهم ياليت تسكرين الموضوع أو تحذفينه لإني ماضمن إنه مايفتش عن مشاركاتي بعد هينا !!