أنا نمامة و خربت بيته ... ساعدوني
السلام عليكم....
هادي أول مشاركة لي بهالمنتدى الطيب و انا من زمااااااااان وانا بفكر اعرض مشكلتي لكنني لم أملك الجرأة قبل الآن
أرجوكم احكمو علي و ساعدوني للخلاص من هاد الهم
و عذرا لو أطلت عليكم......سامحوني
أولا أنا بنت محافظة و ملتزمة الحمدلله بديني و دايما بحط الله قبل أي فعل اعملو
قبل سنتين من الآن في يوم من الأيام بابا قعد معي و قاللي انو ايش رايك أخطبلك ابن خالتك لانو انسان كويس و ابن ناس و انا بالأصل معجبة كتير فيه كنت لكن بعمري ما قلت لأحد و خليت الشي هادا سر بقلبي إلا لأمي طبعا فهي عارفة
المهم انا قلتلو اللي تشوفو مناسب سويه و انا كنت فرحانة و سعيدة جدا
و هو كان باقيلو سنتين على التخرج.....و ححكى بابا مع اهلو و وافقو و هو كان موافق و تقريبا كننا خاطبين بس بين العيلة الين ما يتخرج و بيطلبني رسمي
المهم صار يكلمني بين الفترة والتانية و أهلي عارفين طبعا و استمرينا على هالحال سنة و شوية تقريبا و كل يوم يعبرلي عن محبتو و انو مو مستني يتخرج عشان يتم الزواج
لكن قبل 9 شهور تقريبا انا اكتشفت او بالأحرى شكيت انه فيه شي بينو وبين انسانة أخرى كان هو فقط معجب بزميلة له و فكر يتزوجها و كلم اهله عليها و اهله رفضوها لعدة اسباب منها انو اعطو اهلي كلمة من قبل
لكن انا ما كنت اعرف التفاصيل هذي ابدا لا انا ولا أهلي و استمرينا خاطبين وانا ما اعرف اللي بيصير
والولد قبل شهرين فسخ خطوبتو فجأة منني و قال انني زي اختو ((صارلو سنتين خاطبني و دوبو يكتشف الشي هذا)) المهم انا تضايقت واكتئبت جدا وقتها و سمعت كمان بنفس الفترة عن موضوعه مع زميلتو واللي صار قبل كدة
بعد ما صارحتو انني عرفت كل شي الولد صار صريح معاية و حكى القصة كلها........ وقال انو هو من اول ما كان حاببني لكن قبل فيي لاني جميلة و بنت دين و اخلاق على كلامو لكن لمن حب البنت هديك راح كلمها و حاول يخطبها ولمن ما شاف الموضوع ماشي رجع لي تاني و قفل موضوع زميلتو.......و يقول انو بعد فترة ما قدر يقاوم ففسخ خطوبتي و انو حيتقدم لزميلته و كان صريح معاية
وبعدها بكم يوم اتصلت علي زميلته و قالت انو لا تزعلي لانو ما كان يحبك و عمرو ماحبك و انو حتى لو تزوجك كان ما استمريتو سوا لانو ما يقدر يمثل و انو هم حبوا بعض و هي لمن عرفت انو انا موجودة كنت و هو شبه خاطب على كلامها صارت تتجنبو و كل ما يكلمها تقوللو انو بإذن الله حتحب قريبتك و تسعدها و تقوللي زميلتو انو هم حاولو يقاومو لكن ما قدرو و صار اللي صار
و قالت انو اهلو وافقو عليكي لانو انتي ماشالله اهلك مرتاحين ماديا و تقدري تسعديه و كدة لكن زميلتو تقول انو عيلتهم فقيرة شوي و كدة((طبعا الكلام هادا طلع كذب)) و بالنهاية قلتلها كل الكلام اللي بيننا لازم ابن خالتي يعرف انو صار عشان ما نكون نخبي عليه و وافقت تماما على الشي هادا
و قلت لولد خالتي و اعترف انو كل الكلام هذا صحيح
المهم انا من حرقة قلبي كلمت خالتي ام الولد و هي زي اممي و أعز والله و احكيلها كل اسراري من زمان
و هي صارت تواسيني و كدة و انو الدنيا قسمة و نصيب.....و قلتلها انا انو ما زعلت عشان تركني
انا زعلت عشان طريقة تعاملو معاية و اعطاني آمال كاذبةو ضحك علي و هو كان وراه مصلحة نفسو بس و حكيتلها اللي صار بيني و بين زميلته
خالتي تفاجأت تمااااااااااما و ما كانت تعرف اي شي من الكلام هذا و ما كانت تعرف انو ولدها كان يلف و يدور كدا و كان يوهمني بالحب و كدة.......و الأعظم انو لمن سمعت الكلام اللي بيني و بين زميلتو زعلللللللت
و قالت أقسم بالله طول ما أنا عايشة على الدنيا هاذي ما حتطول ظفر ولدي لو مهما صار
انا صراحة تفاجأت جدا من ردة فعلها و كأنو جبال الدنيا انهدت فوق راسي
اقسم بالله ما قصدت الشي هذا يصير لكن حاولت اقنعها ابددددددددا ما اقتنعت
قالتلي خالتي انو هذي الانسانة حقيرة حاولت تظهر بمظهر المضحية المسكينة و تطلع فوق ظهرك عشان تبان قدام ولدي انها الشهمة المضحية
و هي قالتلك الكلام هذا عشان تنقليه لولدي عشان يحس انه زميلتو اخلاقها كويسة وانو تبغى تصلح بينك و بينها
و انا قلت لخالتي انو هذا ظن اثم و انا اتوقع انو هي فعلا نيتها الاصلاح و حاولت معاها ساعات و ساعات
لكن ابدا مافي مجال للتراجع تقول
بس خالتي أقسمتلي بالمصحف الشريف انو هي راحت تزور اهل البنت (زميلته) و ما ارتاحتلهم ابدا و انو اكتشفت انه امها تكذب بكم شي و ما ارتاحت لهم
و قالت لولدها الشي هذا قاللها الولد انو اللي تشوفوه مناسب سووه.....انتو لكم القرار
و كلمت زوجها و قال أعوذ بالله مستحيل ارمي ولدي لناس زي كدة قفلي عالموضوع خلاص
و حلفتلي مليون يمين انو الشي هذا كلو قبل ما تعرف الكلام اللي انا قلتلها ياه وانهم مقفلين عالموضوع من أول و صارت تشكرني و تدعيلي و تقول انو انا جيتها من عند الله و وضحتلها الصورة أكثر
و انو الحمدلله انو قلتلها الكلام هذا و هي مقتنعة تماااااااااما انو انا اللي سويتوشي كويس عشان ما خبيت و قلتلها
هذا كل اللي صار
لكن أنا حاسسة انني خربت بيت ولد خالتي و منعت من حصول زواج و انني الآن من شياطين الإنس
والله حاسسة بذنب قد الجبال و ماني عارفة ايش اسوي
حاسسة انني دمرت حياة شخصين بكلمة منني و اقسم بالله العظيم انو ما كان قصدي كل اللي صار هذا
و يمكن خالتي معاها حق بس انا اقول يمكن خالتي مزودة الموضوع شوية و البنت كويسة وما كان قصدها الشي هذا
أرجوكم أخوتي اقرأو قصتي و أعطوني حكمكم على اللي سويته
و ايش أسوي عشان اعدل الذنب هذا
والله والله والله ما قصدت اقسم بالله والله يعلم نيتي
لكن هذا اللي حصل.........والله يتوب علي و يغفرلي
اختكم ياسمين
27-09-2007, 04:38 PM
ضوابط المشاركة
العرض العادي
