بسم الله الرحمن الرحيم
احبتي حقيقة أنا ممتن لكم كثير وأبيكم أخوة وأخوات تشاطرونني مشكلتي التي ساشرع في حلّها بعد مشورتكم بعد قليل.
زوجتي بقا لها تقريبا 13 يوم ويقضي نفاسها وتعرفون الوحدة بآخر النفاس لا بد تتسوق وتآخذ بعض الحاجيات وتخيط لها فستان عشان الطلعة من النفاس ومشكلتنا هو هالفستان .
أحب زوجتي كثيرا وأكن لها كل تقدير واحترام ويظهر منها كذلك لي والله تعالى اعلم لكن قلت لها أنا أنتي عندك قماشة سوي لها موديل همن دخليها على الخياط عشان الخياطين الرجال أقل كلفة من المشاغل النسائية بكثير هذا بأول النفاس قالت الله يعين بنفس مب راضية .
جت زيارة أهلي لها ( عماتي وخالاتي ) المهم كلفتني تلك الزيارة الكثير كله عشان البهرجة والدعدعة وعشان ينقال والله فلانة ضاربة بانفاسها شيئ ما يوصف المهم ثارت بيننا مشكلة عشان ذاك الموضوع وانتهت أنه بأنه مالك ياصالح إلا اللي يرضيك وأنا تحت أمرك بعد ماراحت تشتري أشياء ما لأمها داعي وضربت ضرب والله إني أتحسر عليه لأني مديون لحد أذاني وهي ولا مقدرة ولاشيئ .
انتهت زيارة أهلي وعادة الأمور إلى مجاريها نوعا ما المهم بدينا بسالفة أغراض الطلاعة من النفاس اشتريت لها بعض الامور بصحبتها اللي أدري انه مافيه مشكلة لو ارتفعت قيمتها شوي لانها بتستعملها .
ورجعنا للفستان وكنت انا هاليومين مطفّر والله يشهد مامعي غير ميّة ريال هي كل ما أملك هاليومين وأنتم تعرفون أنه بقي مصاريف وأمور غير انه لا يكلف الله نفسا إلا وسعها ليش الواحد يكلف نفسه مالا يطيق .
اشترينا بعض الأمور المتعلقة بالفستان وقالت هي أنه الموديل والمقاس جاهزات بقي وين تحطه انا أقول خليه عند خياط ماهر بيطيح ثلاثة أرباع القيمة عن المشاغل النسائية اللي مايرحمون قالت أنا ابغاه عند مشغل أزين وأركز ومن هالكلام الفاضي صراحة أنا ماتحملت وانطلقت عليها هي زعلت وركبت راسها ياعند المشغل ولا ما أبغى فستان خلني أطلع بقميص .
كان هالكلام بمكالمة قبل المغرب أمس وتصك السماعة زعلانه تركتها وسفهتها لأنه الموضوع ماعاد يحتمل أنا أكدّ بالفلوس من صباح الله خير لحدّ الساعة ثنتين ونص وهذي تجي بكل برود وتبعزق الفلوس بكل غباء وعدم وتصرف وياليت الراتب عاد 15000 لا والله 5000 يروح منها أقساط وأمور الله أعلم بها .
اتصلت البارحة تقول أنت ليش زعلان قلت أنا مازعلت أنتي اللي ماتبين النقاش لامنك بغيتي شيئ صممتي من دون ماتراعين ظروف زوجك قالت أنا امقلت لك عطني فلوس ( لأنه جايها هدايا فلوس من بعض أهلها وأهلي ) قلت حتى ولو كان الفستان ماراح ينخاط إلا عند خياط عادي موعند مشغل واللي تبغينه سوّيه .
زعلت ثانية وللحين ماكلمت ولا شيئ صراحة أنا مليت من المشاكل ومن هالبنت اللي ماتقدر ظروفي وحالتي .
أنا ماقلت لها لا تفصلين أنا قلت خيطي وفصلي لكن بالمعقول المشغل راح ياخذون فرضا على خياطة ذالفستان 500 الخياط العادي راح ياخذ 150 والفرق واضح يعني الباقي نستغله ببعض الأغراض الثانية والحاجيات الأخرى .
أنتم الحين عرفتوا المشكلة وقريتوها
أنا مقرر من أمس إنه والله ماأرفع السماعة عليها وإذا شفت المسألة طولت وشمّخت أروح لها ببيت أهلها وأجلس معها واقول ها بالحرف الواحد ( أنتي تبي تمشين بشور زوجك ألف أهلا وسهلا تبي تركبين راسك وتبي تصممين زين الأيام اللي راحت الله يسهّل دربك وبنات الأجواد كثير وعيال الأجواد أكثر )
فكرت بمولودي الجديد ليش أهدم حياته من أولها وأقهره بعزّ طفولته فقلت لابد من حلّ الليلة بعد شوركم أسوّيه لهالمشكلة اللي صارت تاكل وتشرب معي .
وأنا يوم أقرر هالقرار لأنه بكثير من الأمور هي تخالفني وتحاول تصمم على شورها وكلامها وأنا رجال كتوم شوي أتحمّل وأنفجر عليها بهواش هي مب مستوعبة ليش أنا اهاوشها بينما أنا كتمت مشكله كبيرة بصدري وتجاوزتها وجت بعدها هذي صغيرة وذي صغيره وكل شوي تكبر بصدري لمين يجي موقف صغير يفجرني تفجير
انتظركم
01-04-2008, 08:57 PM
ضوابط المشاركة
العرض العادي
