خطيبي والعلاقات العائلية هل انفصل عنه ؟؟
السلام عليكم
ع فكرة دى اول مشاركة ليا ف المنتدى دة بعد مادورت ف منتديات كتيرة قوى لاقيت انة دة احسن منتدى بصراحه للمشاكل والحلول
المهم
احكيلكم الحكاية او المشكلة بمعنى اصح بس الله يخليكو تفكروا معايا وتحطوا نفسكوا مكانى واعتبرونى اختكوا لانى بجد حاسة انى هتجنن من كتر التفكير والحيرة ف الموضوع ده
وساعدونى باى حاجة اى فكرة تخطر ع بالكوا
انا عندى18 سنة وشوية والدى متوفى من13 سنة وعندى اخين اكبر منى الفرق مابينا سنة والدتى موجودة والحمد لله ااعمامى عاملين معانا مشاكل بقالهم10 سنين ومالهمش دعوة بينا خالص
اخوالى اخوات ماما مالهمش ف اى حاجة انا كدة حكيتلكوا ع الظروف تعالو بقى للمشكلة
انا اتخطبت من 7 شهور لاقيت ف خطيبى كل حاجة بتمناها يعنى راجل بمعنى الكلمة واهم حاجة انة شخصيتة قوية جدا ودى اكتر حاجة بتعجبنى وكمان اللى لاحظتة فية انة بيحبنى قوى وبيخاف عليا جدا حتى من نظرات الناس او حتى تفكيرهم فيا هو قالى انة هيحافظ عليا قوى ووعدنى انة هيسعدنى ع قد امكانياته وهو ع فكرة عمرة ماكدب عليا وانا بثق ف كلامة جدا جداكلامة كلة ليا وعد وبينفذة لانة مابيقلش كلمة هو مش قدها
المهم ف اول الخطوبة حصلت مشاكل ماما صممت انها تدخل اعمامى ف الموضوع علشان الاصول انا بصراحه اعترضت انهم يدخلوا بس المهم انهم ادخلو
وكانوا عاوزين يفركشوا الموضوع
فماما كلمت خطيبى وحكتلة ع المشاكل اللى بينا وبينهم وانا زعلت يومها انها حكتلة واضايقت قوى
هو قالى ساعتها انا ميهمنيش اى حد من اللى عندكوا المهم عندى انتى وانا بحبك انتى ومش عوز غيرك
شوية شوية لما بدا يدخل عندنا ويعاشرنا عرف ان اخواتى ماهمش ف اى حاجة زى اغلب الشباب يعنى ومافيش حد مثلا يعمله حساب بمعنى اصح
بلاحظ ف كلامة عن اهلى انهم ميهمهوش ف حاجة اقلة مثلا هتكلم اعمامى ع الشبكة امتة مع انه معندهوش اعتراض ومش بخيل ابدا خالص بس انا مش فاهمة لية رد وقالى كدة
قالى هاتيلى كبير اتكلم معاه منين انتو بتقوللولى اعمامى صورة بس قدام الناس ومنين دلوقتى عوزينى اتكلم واتفق معاهم؟دى اول حاجة
خالى كان تعبان اقلة تعالى نزور خالى يقلى انا مبزورش اى حد كدة ومش هروح ازورة(هو صيدلى) قالى خالك معندهوش حاجة دة بيدلع مع انى كنت قبلها بيوم معاه عند اختة ابنها كان عامل عملية وهى كمان كانت والدة قبل كدة
زعلت منة وقلتله هو احنا مش قد المقام قالى انا مقصدتش كدة انا اقصد انة مش تعبان يبقى نروح نزورة لية
اقلة طب نزورة علشان خاطر ماما يقلى لا بردوة
انا بصراحه بدات ازهق اضايق من الاسلوب دة والطريقة كمان
خايفة قوى من بعدين خايفة يبعدنى عن اهلى هو بيقلى انا مش اجتماعى وماليش ف الزيارات هو عايش لوحدة من زمان قوى هو اللى عمل لنفسة الصيدلية محدش ساعده باى حاجة يعنى بيبنى نفسة بنفسة
من زمان كان ف مشاكل عندهم ف البيت وهو سايب البيت ومبيرحش غير قليل وعايش لوحدة
انا فكرت كتير ف الانفصال بس مش عارفه خايفة من حاجات كتيرة قوى
هو علمنى حاجات كتيرة قوى بتفيدنى وهتفيدنى بعدين بيعلمنى ويقلى حتى لو مكناش لبعض بس انا عوزك احسن انسانه ف الدنيا
ع فكرة هو طيب وحنين قوى
اى طلب بطلبة منة مابيرفضهوش خالص بالعكس بيبقى مبسوط قوى
بس انا نفسى افهم الحكاية كويس
الفكرة اللى ف دماغى دلوقتى هى الانفصال بس انا محتارة
ساااااااااااااااااعدونى الله يخليكوا
الاشراف: عذراً تم تغيير العنوان ,كما نرجو الابتعاد عن اللهجة المحلية قدر الامكان., بالتوفيق .
التعديل الأخير تم بواسطة !!حنيين!! ; 14-06-2008 الساعة 11:24 AM
14-06-2008, 12:28 AM
ضوابط المشاركة
العرض الشجري