السلام عليكم ورحمة الله وبركاته

عندي مشكله يا بنات في الرضاعه مع عبودي

انا كنت ناويه ارضعه طبيعي 100% بس بعد ما ولدت تفاجات انه كمية الحليب جدا قليله عندي وسببتلي احباط كبير لاني كنت مستعده نفسيا للطبيعي..
وتفاجات كمان انه الحلمه اليمنى عندي صايره مسطحه ماني فاهمه ليش مع اني كنت ادهنها بزيت زيتون وليمون في فترة الحمل لكن للاسف ما تجاوبت معي..
طبعا بشرب مويه كثير وسوائل واخذت حلبه وخرابيط ثانيه لعل وعسى يزيد الحليب لكن ماني حاسه بتحسن..وقلت يمكن انا طبيعتي زي امي واختي كانو يعانو من قلة الحليب.

في البدايه استمريت رضاعه طبيعيه وكان عبودي كثير مضايق و24 ساعه بكاء وبيزرق لونه من كثر البكاء كمان وزنه نزل فقررت اني اعطيه حليب صناعي كمكمل للي بينقص في الحليب الطبيعي كتبلنا هو طبيب الاطفال اللي كان متابع عبودي..

بالنسبه للحلمه المسطحه بالبدايه حطيت الحلمه الصناعيه عليها لكن ما قبلها عبودي ابدا فصرت اشفط منها الحليب بالشفاطه واعطيه اياها بالببرونه..

عشان اجبره على الحليب الطبيعي بستناه يجوع بعدين اعطيه صدري يمص منه الين ما يبدا يبكي لانه يكون وقف الحليب ينزل بعدين اكمله بالصناعي عن طريق الببرونه..
الوضع تمام الى قبل كم يوم صار الافندي ينام على صدري،،يعني ما بيكمل الرضعه واحاول اصحيه مافي فايده او الاعبه او اكلمه برضه ما نفع..اشيله احطه بسريره اقول يمكن يبغى ينام وبس احطه يضرب بالصراخ ونعيد كل شي من جديد (احطه على صدري- يشفط شويه وينام ويبغى الحلمه في فمه ما اشيلها).ونبقى عالمهرجان هذا طول اليوم.

انا ممكن اعطيه الصناعي على طول بس حابه انه يستفيد من الحليب الطبيعي كمان حتى لو كان قليل يعني شيء ارحم من لاشيء..


حلولي المشكله هذي خصوصا انه صار عندي اكتئاب وتانيب ضمير لاني حاسه انه ما بغذي ولدي كويس وكثير كثير مضايقه..

انتظركم.

__________________