أختها تتدخل وتقلل قيمة ما اهديه لخطيبتي - منتدى عالم الأسرة والمجتمع

11-04-2009, 12:21 AM

عضو دائم

تاريخ التسجيل: Apr 2009

المشاركات: 63

أختها تتدخل وتقلل قيمة ما اهديه لخطيبتي

السلام عليكم ورحمة الله وبركاته

بدون مقدمات .. عندي مشكله فقعت مرارتي نوعاً ما ..

السالفه وما فيها اني انسان متملك والحمد لله تملكت على انسانه طيبه وخلوقه وكويسه جداً وما صار لنا تقريبا شهرين ..

لكن المشكله بدت قبل فتره قريبه ..

البنت اشتريت لها جوال ورتبت امورها وقمت ازورها بين كل فتره وفتره تقريبا في الشهر مرتين الى ثلاث مرات لاني في مدينه وهي في مدينه .. والبنت قنوعه ..

لكن انا حاس ان فيه ناس يتدخلون في امورنا يعني مثلا أختها .. لاني اشتريت لها الجوال وحصل بيني وبينها سوء تفاهم بسيط بسبب انها طلبت مني اركب لها برنامج في جوالها يشغل مقاطع الصوت وتأخرت عليها بسبب بعدي عنها لكن قامت وكبرت الموضوع وارسلت لي رساله انك ما منت مهتم فيني وما تنفذ طلباتي ومن هالكلام وان اصلا الجوال مهوب اللي في الخاطر وان حتى الرقم سوا مو فاتوره وانا قد قلت لك اني ما احب السوا وابي فاتوره مع اني ما اقصر معها في الشحن ..

طبعاً انا رجال طيب مرره بعد ما ساءت الامور جلست يومين ما كلمتها بعدين دزيت لها رساله وقلت لها انتي انسانه عاقله ومن هالكلام وامورنا بنحلها تمام ..

دقيت عليها وحسيت انها كانت تنتظر مكالمتي وقلت لها دام الجوال مهوب اللي في الخاطر اغيره لك مع انه كويس جداً وخيرتها وش الجوال اللي تبيه وقالت لي لكن ما قالت لي في نفس المكالمه قالت ابفكر واعطيك خبر وهذا اللي شككني انه فيه تدخل خارجي .. المهم وطلعت لها رقم فاتوره باسمي وقلت اذا جيت بعطيك اياه ..

طبعاً قبل الجوال قدمت لها دبله هديه في اول يوم مثل ما انتم عارفين وبعد فتره لاحظت انها ما تلبسها وسألتها ليه ؟ قالت تبي الحقيقه ما اعجبتني .. !! قلت ابشري اغيرها لك ورحت لسوق الذهب وشريت لها اطلق دبله وبعد ما صورت لها الدبل وارسلت لها الصور وسايط واختارت وحده .. مع انها مكلفه وقيمتها تقريباً 1500 ريال بس انا ما فكرت دام هالشي بيرضيها ..

المهم وبعده حصل مشكلة الجوال اللي قلت لكم عنها ..

المهم قبل كم يوم جلست معها .. وفتحت معها باب النقاش ..

قلت لها انتي تبين حياتنا تكون امور عاديه جوال وما جوال وخرابيط والا تبينها حب وقلوب طيبه .. طبعاً تكلمت معها في كل نقطه وكنت جدي بزعل نوعا ما بس ما كنت قاسي علشان ما اسوي مشكله ..

البنت من اول ما جلست لين ما طلعت وهي ساكته ... اقول لها تكلمي ناقشيني اذا انا على خطا .. طبعا هي ما قالت شي لانها عارفه ان معي حق ولانها طيبه وكويسه بس الاحظ ان اختها تتدخل الله يصلحها .. حتى ان مالها حجه علي .. طبعا حتى اسلوب الوداع مو مثل كل مره ولا طولت معها كالعاده ويوم جيت ابطلع حسيت انها حست انها غلطانه حتى ترجتني ما اطلع وان ما ودها اطلع من عندها وانا متضايق بس انا قلت ما عليك مني وضيقتي ما تهم ومشيت وحسيت ان ودها تبكي واتوقع انها بكت بعد ما مشيت ..

وخلال اللقاء قلت لها اني اكتشفت انك تشوفين الهديه بقيمتها لا بمعناها واكتشفت ان اي شي اجيبه لك ما يعجبك ولازم اغيره لك بعد فتره .. حتى قبل يومين نزلت السوق وحاولت اشتري لك شي بس اخاف يطلع مهوب اللي في الخاطر مثل الجوال وغيره مع انها كانت هدايا .. وهي قد اهدت علي عطر وقلت لها تخيلي اني بعد ما طلعت من عندك قلت لك ان العطر اللي اهديتيني مهوب اللي في الخاطر .. وش راح يكون موقفك ؟ المهم سكتت وشفت في عيونها دموع لكن مسكت نفسها وما بكت ..

المهم وش رايكم انا احس ان اختها تتدخل بكل كبيره وصغيره مع انه في الغربيه وهي في الشرقيه لكن التلفونات موجوده .. واعرف ان اختها راعية هالسواليف حتى اني استعجلت وحددت موعد الزواج مع ابوها وانه يكون بدري شوي ..

المهم انا ابي ابعد اي تدخل خارجي مع اني حذرتها لكن هي طيبه مرره واكيد بتتدخل اختها وتغير البنت علي مع اني ما اقصر معها في شي .. ووش رايكم هل اقطع عنها الهدايا علشان تحس ؟ وهل اقلل من المكالمات لاني حسيت اني مسرف شوي ؟ يعني هل اثقل بزياده .. ؟ وهل تصرفي كان معها كويس في الجوال ؟ لاني توقعت يكون اختبار هل انا بخيل او لا .. ؟

انتظر ردودكم الله يخليكم والله اني في حيره ولا ودي اظلم نفسي والا اظلمها معي وخصوصا ان الظروف الماديه مهيب ذيك الظروف لكن تمشي الحال ..

بارك الله فيكم جميعاً ....

الاشراف : عذراً تم تغيير العنوان ليناسب المضمون , بالتوفيق

التعديل الأخير تم بواسطة !!حنيين!! ; 11-04-2009 الساعة 12:51 AM

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه