السلام عليكم جميعا والعشر عليكم مباركه
تقبل الله منا ومنكم صيامنا وقيامنا وجعلنا واياكم من عتقائه من النار
الموضوع ببساطه خطبه بالقوه
من كم يوم كلمت وحده وطلبت امي وقالت لها انها جايه من طرف شخص وسمته باسمه
- كان جاي للوالد قبل حوالي تسع شهور او اكثر
يبي يخطبني لكن الوالد ما ارتاح له هذا غير انه متزوج وعنده عيال
وانا لا يمكن اخذ واحد معه زوجه (موضوع غير قابل للنقاش)
المهم ان موضوعه كان منتهي قبل حتى لايبدأ-
ونسينا الموضوع لحد ما كلمت هالحرمه وقالت اسمه وحاولت تذكرنا به
وقالت انه شاريكم وحاب انكم تعيدون النظر وانه حبيب وفيه وفيه..........الخ
قالت امي والله البنت ماتبي واحد معه زوجه
وتجلس تلح على امي الا تقبلونه
وكل شوي اتصال وبعد تقول طيب كلمي الرجال يبي يقنعك
طبعا امي رفضت وقالت ليه يقنعني مو انا اللي رافضه صاحبة الشان
هي اللي ماتبي
تدرون وش قالت 
اجبروها مايصير تجلس بدون عرس
ولا راح يجي احسن منه
لا اكون قاعده على قلبها وانا ماادري!!!!!!؟
قالت امي هي كبيره وعاقله وتعرف مصلحتها
قالت عطيني اقنعها
طبعا امي عطتني السماعه عشان تتخلص منها
تقول ليه ترفضينه عطيني سبب مقنع وش فيه عشان ترفضينه
- قلت انا ما رفضته لشخصه
لكن ماابي واحد معه زوجه
*ليه وش فيها صدقيني هو شاريك ويبي يسعدك
-بس انا اعرف نفسي وش ماسوى ماراح اكون سعيده بوجود زوجه ثانيه
* طيب كلميه يبي يتفاهم معك
- ليه اكلمه وعلى ايش نتفاهم
المهم انها طولتها وكل شوي مكالمه وتعيد نفس الكلام
وحسيت انه معاها وهي تكلم وهو اللي جالس يلح قال ايش سببي مو مقنع
و هو جاهز لاي طلب اطلبه فوش ابي اكثر من كذا
المهم ما ارده
ليه الرجال مو راضيه تفهم انه مولازم يكون فيهم عيب عشان ينرفض طلبهم
قد يكون كامل ومافيه ولاعيب بس مايناسب
ومو شرط يسعدني
يعني مثلا لو كان عندي بلوزه (قميص ) جدا جميل وانيق مريح الوانه جميله
وعندي تنوره ايضا من افضل التنانير عندي جدا انيقه ولونها جميل وخامتها راقيه
لكن الثنتين مو لايقين لبعض لو لبستهم مع بعض بيطلع شكلي قروي
مع ان كل قطعه لحالها اكشخ من الثانيه
ممكن البس مع القميص تنوره عاديه ويطلع لبسي ولا احلى
وكذالك التنوره ممكن يناسب لها قميص ثاني حتى لوكان اقل من الاول
وقد تكون هناك موانع اخرى مانرغب بذكرها حتى لانتسبب بمشاكل للاخرين
او بمشاكل لنا مع الاخرين
فليه الالحاح هذا اللي ماله داعي
ليه مانحترم رأي الاخرين حتى لو ما اقتنعنا فيه.
واسفه على الاطاله
ودمتم.
10-09-2009, 08:07 AM
خطابه تقول لامي اجبروها
ضوابط المشاركة
العرض الشجري