السلام عليكم ورحمة الله وبركاته

بصراحة انا من زمان بطلت المنتديات وصرت مجرد رحالة في النت اقرا من كل مكان .. وكنت زائر دايم هنا لكني هالمرة سجلت لانه عندي هدف هتعرفوا في اخر الموضوع ..

انا لي متزوجة تقريبا خمس سنين وفي الفترة الاخيرة صارت حياتي مملة وروتين فضيع فيها .. وكثرت الخلافات بيني وبين زوجي ما يمر علي اسبوع الا ولازم نتناقر او نتمشكل .. وانا بديت احس انه ماصار فيه بيننا اي تفاهم او توافق فكري .. وجاني الشيطان ولعب في راسي وقالي مالكم الا الفراق ..

وبديت ادخل اقرا في ساحة المطلقات .. إلى ان وجدت مواضيع الاخ الفاضل عميد الجامعة الله يجمعه في محبوبته ويختار لهم الخيرة ..

بصراحة اسستفدت من موضوعه بطريقة غيرتلي حياتي لاني حسيت بصدق حبه ومشاعره ..

فكرت كثير في وضعه وخرجت بالاتي :
1- اني ما جربت الحب وحارمه نفسي وزوجي منه
2- ليش انتظر مين يجي ويعيشني الحب ؟
3- هل انتظر وحدة تجي تاخد زوجي مني وتحسسه بحلاوة الحب ؟

لا شعوريا انا صرت افكر في الحب واني ابغى احب يا ناااااااااس انا ابغى احب

وبعد تعمق في التفكير لقيت انه السبب اللي احنا فيه هو طريقة تربيتنا

احنا تربينا على انه الحب حرام وعيب وما يصير وبعد ما يجي العريس كل حاجة تصير حلال ..

انا احب زوجي وزوجي يحبني بس نترجمها بالافعال والاهتمام .. شخصيا كنت اجد صعوبة في اني اقول لزوجي كلمات غزل في حين استسهلها بالمسج او الماسنجر ... فيه تصرفات ابغى زوجي يعملها بس انقهر انه ما يعملها وكمان اخجل اني اطلبها منه ..

وبما انه احنا بشر واحنا محتاجين الى غذاء عاطفي بجانب الغذاء الروحي والجسدي .. عواطفنا جيعاانة يا ناس لانه بصراحة مو متعودين نعبر عنها بالكلام نترجمها افعال في حين انه احنا محتاجين نسمعها ونقولها ونظهرها ونعترف فيها ..

فقررت اني اطلق العنان لنفسي عشان تحب وتعشق .. ولقيت نفسي لا شعوريا ابرمج عقلي الباطن انه يحب .. ولقيت نفسي باحب ..

نظرتي لزوجي تغيرت .. تصرفاتي معاه تغيرت .. والفرق كان فقط اني غيرت طريقة تفكيري وقررت احب ..؟


عشان كدا انا سجلت في المنتدى عشان نغير تفكيرنا وتشبع عواطفنا فنحن نستحق ان نُحب وننحب ..

ابغى اعمل تجربة او حملة " تعالوا نحب ونتعلم الحب " .. اغلب المشاكل الي جالسة اقراها انه احنا مو عارفين كيف نحب والكرامة ذابحتنا والثقل هالكنا مادري ليش احنا معذبين نفسنا مع انه الحياة ابسط من كدا !


مدة التجربة :

3 اسابيع راح نبدأه ان شاء الله يوم الاثنين



الهدف منها :

بناء اسر سعيدة خالية من المشاكل الزوجية بتغذيتها عاطفيا ولانه من حقنا اننا نحب ونجرب الحب ونذوق حلاوته ..



فكرة التجربة :

انه على كل عضو في التجربة انه يجي يكتب كل يوم فكرة او حركة عملها اثرت فيه او في شريك حياته .. وكل اسبوع يكتب المسجلون التغير الي طرا خلال هذا الاسبوع

بعد 3 اسابيع راح نشوف النتائج ونحلل التصرفات والنفسيات :


المطلوب :

اللي وده يتغير ويجرب الحب .. ويجدد من حياته انه يسجل في التجربة عن طريق الرد في هذا الموضوع .. وياليت لو يكون المسجلون من كلا الجنسين ..



نجاح هذي التجربة قائما اولا واخيرا على الردود ومدى مصداقية المسجلين فيها ..


اتمنى فعلا انه تنجح التجربة ونجرب الحب اللذيذ لاني بجد استفدت وتغيرت نفسيتي خلال 3 ايام ..


اخيرا : في تصرفات كثيرة لقيت نفسي باتصرفها وبتجيني افكار لتجديد حياتي فقط لاني حبيت واطلقت العنان لنفسي انها تعبر عن مشاعرها بكل شفافية راح اذكر بعض الافكار بعد ما اشوف عدد المسجلين ..


الي عنده اي استفسار او افكار نرحب فيها ..