السلام عليكم ،،،


الصراحة عندي موضوع شاغل بالي ،،، فيه اكثر من موضوع متشابكين و الله اعلم انه في موضوع اخر وراهم

انخطبت من حوالي 4 شهور لشاب يكبرني ب 7 سنوات ،، مطلق بدون اولاد و دام اول زواج له حوالي 4 سنوات ،، اول زواج كان عن حب و بمعارضه اهله ،، و قالي سبب الانفصال انه شغله يتطلب السفر الدائم و زوجته لم تتحمل السفر ،،

الخطبة تمت بشكل تقليدي و لانه من اقاربنا ،، الوالد تساهل في موضوع السؤال عن تفاصيل الزواج الاول و حتى لم نعرف اسمها او اي تفاصيل تقودتنا لمعرفة سبب الانفصال من طرفها - اللي فهمته انها هي طلبت الطلاق - بعد 4 شهور الوالد قالي تاخر الوقت لنسال عنها و المفروض يكون هالموضوع في اول الطريق


في ملاحظة انه من اول ما التقينا و بدينا نحكى في موضوع الخطبة صرنا نراسل بعض في البلاك بيري ،، و حتى بعض الخطبة ما في اتصالات ابدا ،، في بداية هالمرحلة سالني عن مكان الزواج و اخترت انه في بلدي ،، طبعا هو بيقربلي من طرف الوالد لكنه من جنسية اخرى

لما زارونا في البيت و طلبوا والدته قالت انه العرس في بلدي مثل ما اتفقت معه ،، و بعد الخطبة بشهرين اختلفت الامور و قالولي والله صعب علينا و خليه في مكان اقامتنا حاليا و انا ما مانعت و قلت مشي و كبيري عقلك يا بنت

بعدها بفتره رحت اجازة بلدي و قالي انه راح يزورني ،،، و قام باتصالات مع الفنادق و استعلم و بعدين تم يوعدني انه راح يسافر ،، واتفاجات انه لغاء الموضوع بدون ما يخبرني و خلاص ،، و بعدين لما فاتحته بالموضوع قالي انا كنت بستفسر عن الاعراس ،، قلتله كيف مو اتفقنا انه راح يكون ببلد اقامتنا ،، قال بنشوف اكثر من خيار ،،، الموقف ما عجبني و حسيت في شي ثاني ورا هالكلام و قلتله انك مو صريح و واضح معي ،، قالي انا انسان رومانسي و مسالم و ما توقعتك في يوم تناقشيني ،، قلتله النقاش بين اي شخصين امر طبيعي لازم نفهم بعض

و اصريت على والد يحاوره ،، لانه شخص قليل الكلام ،، مع انه مجال عمله في المبيعات ،، مره سالته ليش اول مرتين زرتنا ما حكيت و لا كلمة واحده ،، قال نحن في المبيعات علمونا نشوف و ندرس قبل ما نتكلم

المهم بعد ما اصريت على والدي انه يساله شو الوضع و خاصة انهم سكتوا عن موضوع العرس ،، قاله والله احتمال ينقلوني في الشغل لبلدي ،، و هالشي بعد شهر و نصف ،،، طلع احساسي صحيح و ما ،، فوالد قاله ليش ما خبرت بنتي ،، لازم تعمل حساباتها و تكون على معرفة باوضاعك ،، فوعده يصير يصارحني ،،، مر اسبوعين و كان كل الوقت مسافر ،، و طلعنا مبارح تغدينا ،، طول الوقت بكلمني عن اصحابه و ما جاب موضوع حياتنا و ترتيبتنا و خاصه بعد ما هو ينتقل ،، فبديت اساله ،، قلتله انت من امتى عارف انك راح تنتقل ،، قالي لسه ما في شي اكيد ،، قلتله طيب كيف عندك الشركة بينقلوا موظفين بهالطريقه ،، يمكن يكون عندهم التزامات و مدارس ،، قالي لا ما عندنا هيك و راح يبين خلال يومين

اول شي طالبة رايكم بالموضوع اللي فوق ،، و في نقاط محيرتني ،، و من صده و مراوغته في الاجوبة مو قادره افهمه ،، يعني قله حكيه مصيبه ،، بعد 4 شهور مو قادره افهمه و لا اعرف انفعالاته هل هو مبسوط،،زعلان ،، في شي شاغل باله ،، انا انسانة صريحه و دايما بحب استشير النااس الي حولي ،، هالنقاط هي

1 - جاف بعواطفه ،، يعني ممكن بالمسج يكتبها ،، اما عمره ما قالها لي ،، هل هو نوع من الخجل ؟ و في رجل بيستحي بهالطريقه ،، يعني اول مرة مسك ايدي كان بعد 3 شهور و خطفها خطف كانه بصراع داخلي مع نفسه ،، هل هو انسان بارد و ما عنده مشاعر ،، يعني مثال مرة مرضت و خبرته اني مريضة كتير بعتلي مسج بس انه هو زعل لاني مريضة و بس ،، لا حاول يتصل او يتطمن علي لا هاليوم و لا اللي بعده

2 - السكوت ،، هالسكوت مشكله ،، و بعد ما الوالد كلمه ،، قالي انه عارف انها مشكله فيه و راح يحاول يغرها بس ما في تطورات مع اني بفتح معه مواضيع و بحاول اخذ رائيه في امور حتى يتشجع و يصير يتكلم

3 - عندي احساس انه ما بيهتم لرأيئ .. المهم الامور ماشية حسب ما هو شايف مناسب و انا مو مهم اعرف،، مثال لما قرر ينتقل ،، ما اخذ بالاعتبار اني لازم مثلا اشوف شغلي اذا في مجال انتقل او لا ،، و مثال وقت العرس ،، صحيح لما سالني ،، بس ما اخذ بكلامي ،، و كمان لما قالي راح يزورني لما سافر لبلدي و ما سافر و لا حتى حاول يقولي السبب ،، خلاص كانه الموضوع منتهي بالنسبة له

4 - اول مرة قرر انه يفتح قلبه قالي انا للان ما كونت نفسي ،، مع انه شغله اكثر من ممتاز ،، و في نفس الوقت ما شفت كرم غير طبيعي حتى ما يكون مكون نفسه ،، يعني مثال على العيد جابلي سلسله كريستال ،،، يعني اقل من عادي ،، حسب عاداتنا لازم قطعه ذهب خاصه انه وقت الخطبة ما قدم غير خاتم الخطوبة و بس


والله محتاره ،، الامور متلخبطة عندي و مو قادره اخذ قرار ،، خاصه انه قرار ترك شغلي راح ياثر تاثير مباشر على اهلي ،، يعني مابعرف هالانسان هل هو جيد كزوج حتى انا اترك اهلي و شغلي ؟