بسم الله الرحمن الرحيم


السلام عليكن ورحمة الله وبركاته
اخواني واخواتي..


هذي اول مشاركه لي واتمنى ان اجد لديكن التفاعل....

راح ادخل في الموضوع علطوووول بلاشي اللف والدوران

مشكلتي ياعزيزاتي مثل ما قريتو في الموضوع ...

نعم..
انطردت من بيت ابوي لكن بطريقه غير مبااااشره!!

السالفه باختصار شديد

ابوي الله يرحمه بنى لنا بيت (فله دورين ) ودفع دم قلبه وامي الله يحفظها اقتصدت معه وما تطلب الكماليات عشان يتحقق هالحلم!!

تحقق الحلم وسكننا بيتنا ...

اخوي الكبير تزوج بعد ما سكننا بسنه وسكن فوقنا (غرفتين ودورة مياه)
بعد 5 سنين تزوج اخوي الثاني وسكن بعد فوقنا (غرفتين ودورة مياه)

كانو حريم اخواننا زي العسل صح مالهم استقلاليه والمطيخ بس اللي تحت بس عشنا حياة الكل
يحسدنا ومو مصدق ان ما بيننا مشاكل !!
امي كانت شايلتهم فوق راسها واذا ولدت الوحده تخدم فيها وتسهر على راحتها ..
مرت السنين ...
تزوجت اختي الوحيده ..بعد سنه توفي الوالد الله يرحمه

بعد 3 سنوات تزوجت انا
وبكذا يكون مافي البيت اللي تحت الا امي فقط ...لاني اضغر شي
اقترحت امي اقتراح وكان محط اعجاب الجميييع

الاقتراح هو ان يكون البيت السفلي كله لاخوي الكبير والدور العلوي لاخوي الضغير

طبعا وافقو

وعملو ترميم للبيت وزيادة ملاحق وغرفتي وغرفة اختي صارت لبنات اخوي!وغرفة امي وابوي صارت لاخوي وزوجته!

وامي لها غرفه وحده
انبسطو حريم اخواني بالوضع واكيد لانهم توسعو واستغنو عن الايجار ..

لكن اللي حصل لنا بعد هالفكره ما كنا نتوقعه ابدا ابدا

زوجة اخوي الكبير اللي سكنت تحت وامي عندهم تغيرت جدا ..صارت تقط كلام على امي وانها ما اخذت راحتها زي سلفتها اللي فوق وانها ما تقدر تلبس اللي تبيه!!

امي حساسه جدا جدا وصارت تتضااايق من كلامها وهمزها المستمر!!

احيانا امي تبكي عندي وتقول من يوم مات المرحوووم ما عاد لي مكان بها الدنيا محد يبيني!!
اتقطع اذا سمعت هالكلام!!

امي طيبه ياناس مو عشانها امي لا والله الكل يشهد

يكفي انها تقوم بنفاسها وتمسك عيالها وما تحب احد يقولها شي!!

الان انا لما اجي عند امي الاقي زوجة اخوي مبوزه ومتضايقه وما تبيني اجي!!

وتنطل من ذا الحكي..
امي تطلب مني اسكت ... وانا والله ما اقول شي اسمع منا اطلع منا..عشان الغاليه

تميت على هالوضع 6 سنوات وانا كل ما اجيهم تكشر بوجهها وتحاول تحط ان عيالي مزعين( بنت وولد)
انا مو دايم اجيهم احيانا اروح لاخوي اللي فوق بس والله زوجته محترمه جدا وترحب بي وتحب امي ويحق لها لان امي جدا طيبه
امي بعد ما شافتها تتضايق مني انا واختي اذا جينا قامت حطتلنا غرفتين في الدور الثالث!!
وتخسرت فيهم بس مو مشكله كله عشان امي ترتاح
صرنا اذا جينا لامي نروح علطووول فالدور الثالث كأننا حمام!!
بس مو دايم يعني لازم اجي تحت واقعد شوي بعدين اطلع فووووق!

المهم
هالايام حدثت الصاعقه والامر اللي اتمنى انه ماصااار...

قالتلي امي : بصراحه ام فلان(زوجة اخوي) قالتلي : ياعمه بقولس شي انا والله هالايام جتني حالة ضيقه وخنقه من الناس واذا جاني احد في بيتي اقعد ابكي الين الفجر!!

امي صدقتها..
وقالتلي امي خلاص ما عاد لك جيه تحت علطول فوق او عند اخوك الثاني!!

قلت : الى متى؟؟

قالت:والله اذا وجودك يسبب للمسكينه مشاكل وما تنام الليل ..خلاص روحي لاخوك الثاني !!

والله امي على نياتها :::

انا انفجرت بالبكااا

قلت : يعني وش؟؟ خلاص !! انطردت من بيت ابوي !! اللي كل شبر فيه له ذكريات لي..... من قبل ما ادخل اولى ابتدائي!!

يكفي اني تنازلت عن غرفتي لعيالها.. يكفي انك يا يمه تنازلتي عن غرفتك وغرفة ابوي الله يرحمه لهم !!

والحين ما عاد لنا مكاااااااااان!!

حتى المسيار العادي!! ممنوع!!
قالت امي وش السواه اجل!! وجلست تبكي وقالت كلماتها اللي دااايم ترددها(ياليتني مت معك يا بو محمد الحياه بدونك ولا شي.. انا ضعيفه والكل استغل ضعفي مقدر اقول لاحد لآ ابي ارضيك وارضي بنت الناس وش اسوي!!

انا حاولت اجفف دموووعي وقلت خلاص يمه ما يصير لخاطرك الا كل امر طيب وما راح اجيهم ابد عشان ما تمرض الاخت!!

قالت: المهم اني استحلفك بالله وغضبي عليك الى يوم الدين ان قلتي لاخوك أي شي !!

والان اخوي ما يدري وش الطبخه!!

على فكره(اكثر من مره وانا موجوده عندهم تحت لما يجي اخو زوجة اخوي مسير عليها تدخله جوا البيت !! وانا وامي نقعد في غرفتها لين يروووح!!!

ومع ذلك امي تقول لاتقولي لاخوووك خوفا من المشاااكل!!


ااااااااه بس قلبت اوجاااعي

ابي رايكم اخواتي ومين اللي معاه حق؟؟ ووش الحل في نظركم؟؟

ولو افترضنا انها مرضت الان وصادقه بس ما ضيها ما يشفع لها لانها ما تبينا ابد من صار البيت لها

(على فكره : البيت هذا هو الورث الوحيد لنا يعني لي حق فيه انا واختي بس الشكوى على الله -!!

بانتظاااركم واسفه عاالطاله

والله مشكلة الاشكال الي متل هادي مايبغالها المسايرة بالعكس كلمي اخوك زوجها يعني واشرحي له الوضع لان كل ماسكتي بيطور اكتر بس المهم الهدوء والعقلانية والتروي بالكلام معاه ان شاء الله يكون متفهم ويفهم ويختصر كل هاذي المشاكل ربي ييسر حالكم ماضايع فيها الا الوالدة الحنونة

__________________

هلا وغلا حبيبتي طيب زوجة اخوك لي توها تصيركذا

كانت عندكم سنين ولا تكلمت شوفي عمري انا

ساكنه مع ام زوجي بس انا وهي وزوجي وهي

طيبه وحنونه وقسم بالله تشتريلي كل شي ومستحيل

تروح سوق وماتجيب لي شي مع اني ما عمري جبت لها الا اذا

كنت مسافره وجيت حتى البقاله اذا راحت لها لازم تجيب لي

شكولاتات وشبسات وعصاير وكل شي وتعطيني دايم فلوس

الله يجزاها خير مع ذالك اني ماني مرتاحه ابي استقلاليه وحريه

ما اعرف البس ولا اسوي حركات بالبيت اقصد حركات زوجيه رومنيسه

مثل اني ارش ورد اطفي الانواع اولع نور خفيف او اي شي من الحركات

مقدر البس قصير ولا ضيق وقسم بالله حتى قمصان النوم ما اتهنى بهن

يعني بنص الليل لو ابي الحمام لازم اروح البس شي فوق القميص واذا رجعت افكه

ابي ندخل سوا انا وزوجي للمطبخ ونطبخ كيكه او نسوي حلا سوا وضحك وهيصه

بس ما اقدر وزوجي يستحي لا يسوي هالحركات قدام امه وانتم عارفين يعني انا جدا

متضايقه ما البس زي الناس بنطلونات وباليا الله وطبعا برمودا ما البس قسم اني انقهر

ابي اصير زي المتزوجات عندهن استقلاليه وراحه نفسيه المهم زوجة اخوك من حقها تبي استقلاليه

واما بالنسبه لغرفتك تقولين خذوها عيال اخوك انا اشوفها عادي اني متزوجه وعندك غرفه ببيت زوجك

مو ضروري تكون لك غرفه ببيت اهلك يعني عادي تنامين بغرفة امك انتي شكل عندك استقلاليه

ومو مع اهل زوجك عشان كذا ماراح تفهميننا حنا اللي ماعندنا استقلاليه ع قولتهم مايحس بالنار

الا واطيهاواما بالنسبه انها تتضايق اذا جاها احد يمكن تكون صادقه لاتحطين شي بذمتك ويمكن فيها عين

اما بالنسبه لزوجة اخوك الصغير اكيد بتكون عسوله ومحترمه لان لها استقلاليه وتجينها كضيفه وتروحين

اما اخوك الكبير تجلسين عندهم انتي وامك فهذا شي طبيعي انها تتضايق ولا تاخذ راحتها

انا طولت بالكلام بس اللله يوفقك انا اشوف ان الموضوع جدا عادي واني ما انطردتي ولا شي

والبيت بيتك وعيالها لهم احقيه بالبيت بعد الله يخليلك زوجك واولادك فديتك لاتزعلين من كلامي

ام لؤي جزاك الله كل خير

روع علوش
اشكرك اختي بس سؤال اتمنى تجاوبيه: هل اظهرتي لام زوجك انها مضايقتك؟؟؟مو من اللائق ابدا خصوصا انها طيبه

امي اطيب مما تتصوري

يكفي انها طلعتنا في السطوح علشانها!!


بعدين امي مو دايم عندهم...

غالبا تقضي وقتها في الديره احيانا شهور!

بعدين حبيبتي هذا ورث يعني لو بأطالب بحقي صار لي فوق ميه وخمسين الف!! ولو امي بتطالب بحقها صار لها جناح تحت او الدور السفلي لنا حنا وامي!!

وزوجة اخوي تطلع بسلامتها

اتمنى انك تتخيلي ان امك مكان امي فقط

شكرا

الغلطة غلطتكم من البداية المفروض البيت الي تحت يكون للوالدة وضيوفها واخيك الاكبر يطلع لبيت آخر

بحيث تاخذ امك راحتها وتحضر خادمة تساعدها وتتمتع ببقية حياتها بالاستقلال والكل حوليها من اخوانك وانتي واختك

يجب عقد اجتماع مع اخوانك فقط ومناقشة الوضع

واغلب الحال في مثل حالكم توزيع الارث وشراء البيت ويكون خاصة للوالدة وتؤجر الي فوق لاخيك واخيك الأكبر يستقل

في بيت آخر

وذالك يكون العدل لجميع الاطراف وبقناعة

__________________
اللَّهُمَّ إِنِّي أَسْأَلُكَ الثَّبَاتَ فِي الأَمْرِ وَأَسْأَلُكَ شُكْرَ نِعْمَتِكَ، وَحُسْنَ عِبَادَتِكَ، وَأَسْأَلُكَ قَلْباً سَلِيماً وَلِسَاناً صَادِقاً

معاك تمامآ



امك تسرعت باقتراحاتها اللامدروسة ولازم تصلح نتيجة اقتراحاتها

اي كنة لا تحب الا الاستقلالية هذه خديها قاعدة

وحقكم في البيت لما ينباع وهو الان بيت اخوك

وامك من شأن ولدها اللي هو اخوك يكرمها ويحطها فوق راسها ويخلي زوجته تحترمها

بعدين كل الاقتراحات من امك ليش تقترح بعدين تزعل

ارى ان تظل امك بمسكنها في دورها مستقلة حافظة كرامتها والواجب اخوك يجي يشوفها ويعرف السبب مو اخوك مو مدورها وتبي زوجته تحس

واستقبالها لاخوها وين المشكلة فيه ؟؟؟ واذا تبوا تشوفوه وتسلمو عليه خليكم ما تقوموا للداخل

السلام عليكم ورحمة الله وبركاته

اولا يسعدني أن ارحب بانضمامك لاسرة منتدانا الرائع فأهلا وسهلا بك واعتبري نفسك بين اهلك واخوتك


تانيا عزيزتي أنا اتفهم حزنك وحرقتك ومدى الالم النفسي الذي تشعرين به ولكن عزيزتي انتي لم تطردي من بيت ابيك فحقك محفوظ ومتى اردتي ان تتطالبي به فأنتي تستطيعين فعل ذلك ولكنك لن تفعلي ذلك بطيب خاطرك ارضاء لامك ومساعدة منك لاخوتك فاحتسبي الاجر ولا تندمي ولا تحزني على شي تجدينه غدا في ميزان حسناتك بإذن الله


و احمدي الله انك انتي واختك متزوجات ولكل واحدة منكن بيتا خاصا بها الله يهنيكم ولا يجعلكم تحتاجون لاحد غيره سبحانه وتعالى


اختي لو حللنا اصل المشكلة سنجد انه من الواضح جدا ان أمك طيبة وحنونة وفكرت في راحة زوجات ابنائها قبل كل شي لانها تعرف ان سعادة الزوجة وراحتها ستنعكس على الزوج وهذا ما تتمناه كل ام هو سعادة ابناءها

ولن الومها على طيبتها وحسن نيتها ولكن بما انك انت الان من طرحت المشكلة هنا فاسمحي لي ان احملك بعض المسؤولية انت واختك لانكما لم تضعا انتما الاتنتان احتمال ان زياراتكما برفقة اطفالكما ستضايقان زوجة الاخ؟؟؟؟ مع ان هذا الشي من الطبيعي جدا توقعه فكل انسان يحب ان تكون له خصوصية في بيته وزوجة اخيك تعتبر البيت بيتها بعد ان قدمتموه لها عن طيب خاطر منكم فكيف تغافلتم عن هذا الامر؟؟؟؟؟؟كما هل فكرتم كيف سيتم استقبالكم عند وجود ضيوف اخرين من اهل الزوجة؟؟؟؟

اختي طالما انه تمكنتم من بناء دور ثالث حتى وان كان بسيطا فهذا يعني انه كان باستطاعتكم ان تتشاركوا في بناء الدور الثالث لينتقل احدهم اليه ويبقى الاخ الثاني في الدور الثاني ويبقى الدور الارضي للام والبنات

لانه حتى وان كانت زوجة اخوك طيبة وترحب بكم ولكن يجب مراعاة خصوصيتها في بيتها خصوصا عندما يأتيها ضيوف من اهلها وتكونين انتي واختك وابنائكم في البيت ؟؟؟ من الطبيعي جدا ان تتضايق زوجة اخوك لانها بشر فلا تتوقعي منها تصرفات الملاك

تم هل فكرتما ماذا لو لا قدر الله رجعت احدى البنات لبيت الاب مع اطفالها تحت اي ظرف من الظروف كيف سيكون الوضع؟؟؟؟؟

لو وضعتوا هذه الاحتمالات امام اعينكم لفكرتوا في بناء طابق ثالث لاحد الاخوة بدل من صعودكم انتم الان للطابق الثالث وخصوصا ان الام قد لا تساعدها صحتها على الصعود للطابق الثالث

ولكن الان قدر الله وما شاء فعل وهذا هو الواقع اذا كيف ستتصرفين معه؟؟؟

اولا اقول لك احمدي الله على استقرارك مع زوجك وعدم حاجتك للمطالبة بحقك في البيت واحتسبي اجر صبرك ومساعدتك لاخوتك وعدم طلبك حقك وتذكري ان الله لا يضيع اجر من احسن عملا

تانيا طالما انكما لم تعترضا انتي واختك على رغبة امك في التخلي عن البيت لزوجة اخيك فانسي تماما ان هذه غرفتك وغرفة اختك ولا تفكري في هذا الموضوع حتى لا تشعري بالالم ولا تظري شعورك هذا امام بنات اخوك الصغار لانهم هم ايضا سيتضايقون من ذلك لانهم ببساطة يشعرون ان هذا البيت ملك لهم وحقا لهم ولا حق لاحد ان يشاركهم فيه لانهم بالطبع سيقارنون نفسهم بالعائلة التي تسكن فوقهم والتي لها استقلاليتها الخاصة


كما اني لا انصحك باخبار اخوك بما اسرت به زوجة اخوك لامك سواء كانت صادقه في ما ادعته ام كاذبة واتركيها لرب العالمين هو اللي يحاسبها وهو الاعلم بمدى صدقها من كذبها كما انني لا اعتقد انك ستسعدي بإثارة مشاكل بين اخوك وزوجته

امامك حل من اثنين

الاول ان تقبلي بهذا الوضع وتحتسبي اجر صبرك ومساعدتك لاخوتك وتنسي كل ما حدث
او أن تتفقوا مع اخوتكم على اكمال الدور الثالث وانتقال احد الاخوين فيه حتى يبقى الدور الارضي للام تستطيع ان تستقبل فيه بناتها وضيوفها دون ان تشعر انها تضايق احد ابنائها

اطرحي الموضوع امام زوجة اخيك وانظري ماذا يكون ردها قد تعجبها الفكرة وتشجع زوجها عليها وتنحل المشكلة او تعترض عليها بسبب عدم توفر القدرة المادية على البناء مما يجعلها تفكر مرة اخرى في تصرفاتها

واعتقد انه لو كان باستطاعة اخوك اكمال البناء مع مساعدة الاخ الثاني فهي ستجعه على هذا الحل لانها اكيد قلقة من تفكيرها انكم قد تطالبون بحقكم في اي لحظة مما يجعلها مهددة وغير مستقرة

__________________

اقتباس:

بعدين حبيبتي هذا ورث يعني لو بأطالب بحقي صار لي فوق ميه وخمسين الف!! ولو امي بتطالب بحقها صار لها جناح تحت او الدور السفلي لنا حنا وامي!! وزوجة اخوي تطلع بسلامتها

عزيزتي اسمحي لي ان اقول لك بأنك مخطأة جدا في كلمتك هذه


لاتنسي ان حصة اخوك مثل حصتك انت واختك مجتمعتان

وتأملي قول الله تعالى: "للذكر مثل حظ الأنثيين"


يعني كيف زوجة اخوك تطلع بسلامتها!!!!!!!!!!!!

اختي تعوذي من الشيطان الله يهديك و لا تخلي الغضب يعميك عن الحقيقة

فهي من وجهة نظرها لها الحق في ضعف حقك بينما انتي ترين انها مالها اي حق !!!!!!!!

وعلى هالحال هي تقول لو بطلب حقي بيصيرلي فوق ثلاثمائة الف !!!!!!!!!
ووقتها ممكن تجد مسكن بهذا المبلغ تتمتع فيه بخصوصيتها

هل شفتي الفارق في نظرة كل واحدة منكما للموضوع

__________________

اختي nene

اشكرك اختي على كلماتك النيره


اقتناس:
وعلى هالحال هي تقول لو بطلب حقي بيصيرلي فوق ثلاثمائة الف !!!!!!!!!
ووقتها ممكن تجد مسكن بهذا المبلغ تتمتع فيه بخصوصيتها

طيب اللي حصل ان لها كل شي... وجعلت امي بمكان الضيف مع ان الحاصل العكس..مو المفروض تشوف فضل امي... وتشكرها !!

وتتحمل زياراتنا مع انها معدوده في السنه!!

امي تضحي بصحتها ووقتها في حالة انها نفاس...وتسهر على راحتها اقسم بالله !!

هل تعلمين ان امي تعطيهم قسط شهري بقيمة 1500!! ما فيها شي ذولا عيالها بس مين اللي يسوي كذا في هالزمن؟؟


لما اشوف يدين امي المتجعده من اثار السنين وقد بلغت 63 من العمر غير الامراض المتلازمه معها... لما اشوف يديها تمسك بالجدار عشان تنزل من الدور الثالث...وببطء.. يعتصرني الالم... واكره كل شي!!

هذي نهاية الخدمه يا امي الغاليه...

هذا التكريم ..

الله المستعااان ...

دمعتي متلازمه معي ...دعواتكم بالفرج القريب..