في الحياة اشياء بسيطة ..وأشياء معقدة !!

والناس تختلف في تقبلها لهذه الامور حسب إحتياجاتهم النفسية والإجتماعية والإقتصادية ...الخ
مو شرط إنك تكون عالم بكل الأمور ..لكن خذ الخبرات من الحياة حسب إحتياجك وبس !!
اعتبر إن رأسك عبارة عن هارد ديسك (زي اللي في الكومبيوتر) له سعة محددة للتخزين .. ولاتخزن فيه الغث والسمين !!
خزن خبراتك حسب إحتياجك ..ولو أضطررت إنك تخزن حاجة كده على الطاير مافي مشكلة ..
بس أهم حاجة لاتعمل ديليت delete لأنك رح تحتاج للمعلومة هذي في يوم من الأيام ..

ابغا اعطيكم معلومة مخزنة في الهارد ديسك حقي ..جبتها من كتاب !!
تقول ..
( الناس يا أصحابي 3 انواع ..
ناس بتصنع الحدث
وناس تتفرج على الحدث
وناس تقول (ماذا حدث؟ )
عاد شوف انت مين فيهم ..

قيم نفسك قبل لايجي واحد لاتعرفه ولا يعرفك ويقيمك ويتفلسف عليك وفي النهاية تكره نفسك وتكره إن عندك مشكلة من الأساس !!
وصدقني ياصاحبي إن عقلك يوزن بلد ..
بس إنت لسه ماوزنته علشان تعرف ..
حاول قبل لا تطرح مشكلتك إنك تجيب ورقة وقلم وتجلس مع صاحب المشكلة اللي هو (انت) !!
بس لاحظ ..
بما إنه مافي غيرك (إنت) فالمشكلة مارح تنحل !!
علشان كده سوي حركة حلوة (اتعلمتها من واحد مستشار إجتماعي في احد الدورات )..
اسمها حركة (الفصل) !!
بمعنى إنك تجلس مع أطراف المشكلة في خيالك وتنظر للمشكلة من وجهة نظرهم واحد واحد ..
واعطيك مثال علشان لاتقول ان ابو فراس اتجنن
يعني مثلاً ..
وحدة تعبانة من زوجها وأولادها وجاتها حالة نفسية من تعامل زوجها معاها ومن تصرفات اولادها اللي ترفع الضغط ..
تجلس مع نفسها شوية وتجيب ورقة وقلم وتقعد تكتب مشكلتها من وجهة نظرها بالتفصيل ..كده 50% من (الهم والغضب) يروح ..لكن المشكلة لازالت موجودة !!
طيب ..صبرك بالله !!
المشكلة حتى الآن لها وجهة نظر وحدة ..وهي صاحبة المشكلة !!
طيب الآن نيجي للفصل العقلي ..وتفصل هذه المرأة حالتها ووجهة نظرها وتنظر للمشكلة من وجهة نظر زوجها ..
طبعاً الحبيب يمكن مايكون عنده مشكلة لأنه مفتري
لكن لما المرأة تبدأ تنظر بحيادية وتحط نفسها مكان زوجها ..أكيد رح توصل لحقيقة كانت غايبة عنها ..ويمكن تلاقي مجموعة كبيرة من الإجابات لتساؤلاتها !!
وطبعاً لازم تسجل هذه المرأة الإستنتاجات في الورقة من وجهة نظر زوجها ..بس اهم شي لاتكون المرأة مفترية هي كمان وماتشوف ولا حاجة حلوة في الراجل دا
ونفس الموضوع تكرره مع أولادها وتحط نفسها مكانهم ..وأكيد رح تعرف هما بيعملو كده ليه !!
نيجي الآن للمرحلة قبل الآخيرة ..
تنظر المرأة للمشكلة من وجهة نظر (الناس) لهذه العائلة ..
وإسمها وجهة نظر (الحكم) ..زي الحكم اللي في المباريات !!
وتكتب كل ملاحظات الحكم !!
أما المرحلة ألأخيرة وهي الأهم ..
تأخذ كل الملاحظات وتقرأ جميع وجهات النظر ..
وانا ابصم بالعشرة إن الحالة النفسية والعقلية رح تختلف لهذه المرأة وتتجه للأفضل بسبب إنها كانت (منصفة وحيادية) في رؤيتها للموضوع ..
صحيح مو كل المشاكل تنحل بالطريقة هذه ..لكن المبادرة بنية حسنة هي أول طريق لحل أصعب مشكلة بالعالم !!
والمبادرة من صفات الإنسان الإيجابي والمجتهد ..
طيب ..
ايش الفرق بين الطالب الشاطر والطالب الخايب ؟؟

الطالب الشاطر: يجتهد في لحظات حضوره للدرس ويستجمع تركيزه ليفهم ويستوعب كل كلمة ..وإذا فاته معنى او جملة يسأل الاستاذ او حتى زملائه ..ولما يرجع بيته يراجع درس اليوم ويحضر لدروس بكرة !!

اما الطالب الخايب : يجتهد في اللعب والإنشغال في الحصة ويحاول يركز على اي شيء غير الدرس إما بأذية للي قاعد بجنبه او يجتهد بالشخبطة بدفتره واللعب بالأقلام .. وإذا سأله الاستاذ تلاقيه متنح ولا هو جايب خبر الدرس ولا فاهم السؤال من أصله ..ولما يرجع بيتهم اول حاجة يسويها يتخلص من الكتب ويبدا في هبل اليوم المعتاد
معليش لو حسيتم انكم تتفرجوا على قناة طيور الجنة
لكن اليوم انا قررت ابتعد عن التكلف والتفلسف واخاطب قلوبكم قبل عقولكم !!
وسبب هذا التشبيه إني وضعت الطالب النجيب كمثال للإنسان الحكيم في الحياة ..
الإنسان الحكيم ماوصل لمرتبة الحكمة إلا بعد ما أستفاد من كل درس حصل له ..
عنده رصيد كبير من المعرفة بسبب (المشاكل) اللي مرت عليه ..
وهي الحياة أصلاً حياة بدون مشاكل ؟؟
لكنه ما عجز ..ولا ماطل..ولا تذمر ..ولا اصابه اليأس !!
يبحث عن حل حتى لو في المريخ .
الإنسان الحكيم يعرف بإن (الإيجابية) هي سر التفوق ..و (السلبية) اساس الفشل !!
و علشان كده تلاقيه غالباً مبتسم <<< كده !!

اما الطالب الخايب فهو بالتأكيد عكس الكلام السابق تماماً !!
فهو ماصار خايب إلا لأنه عايش مثل التائه !! ..
الحياة بتعطيه دروس ..لكن مايفهم إلا من الدرس القاسي ..وياليته يستفيد منه !!
رصيده من المعرفة بسيط لأنه مايحب التعقيد وعايش كل يوم بيومه ..ومشي حالك ياعم :14: !!
إذا وقع في مشكلة ..اول حاجة يسويها إنه يجزع و يقنط من رحمة الله ويبدأ في الشكوى والتذمر واليأس !!
طيب مو عيب إنك تستشير الناس ..بس لو كانت مشكلتك بسيطة او بايخة لاتشتكي وتقول (إيش اسوي ؟؟ ) لأنك رح تكشف حقيقة سلبيتك امام الناس وبالتالي تكون امام فريقين :
- إما ناس تشفق عليك وتنصحك
- أو ناس تتشمت فيك وتهزئك

وخلاصة الكلام :

(حاول تحل مشكلتك بنفسك مرة وإثنين وثلاثة ...لاتيأس !!
وفي كل مرة حاول تحلها بطريقة مختلفة ..
وانظر للمشكلة بحيادية ومن وجهة نظر الآخرين ..
ولازم تقرا وتتثقف علشان تعمل لك رصيد فكري يساعدك على توضيح الأمور من حولك )

وفي النهاية سامحونا على الإطالة
وربنا يوفقكم ويسعدكم أجمعين

اخوكم ابو فراس

(أعتذر على اللهجة العامية ..فهي حالة تصيبني عندما اكتب من صميم أعماق قلبي)

السلام عليكم ورحمة الله وبركاته

عباره كثيرا مانسمعها (ابغى ارتاح)لاعتقاد قائلها بأنه اذا حلت ماعنده من مشكله ماراح يواجه مشاكل اخرى لهذا تجده

دائمامهموم ومتكدر خاطره وقد نسي بان هذه الحياة ليست بيت للراحه وانما هي ...بيت اختبار وامتحان للمؤمن ليعمل

لأرضاء ربه سبحانه والفوز بجنانه,عندما توقن بذلك ينتابك احساس رائع يسمو بك فوق كل ماتسمى مشاكل بل وتنظر لها

من زاوية اخرى ويوسع ادراكك لها وان عظمت لجأت لله سبحانه ليفرجها لك ف .. لله سبحانه ملكوت كل شيء.

ثانيا\لسانك على ماتعودها ....من الافضل ان الانسان مايتعود يعرض مشاكله للناس ويجعلها موضوع للحوار فهو المتضرر

الوحيد لذلك.مشكلتك انت ادرى بهافحاول حلها بنفسك. ولابأس ان تأخذ استشارة من شخص حكيم تثق برأيه اذا احتجت ذلك.

مشكلة الكثير اصبحت الحكي والهذره الزائده بفائده وبدون فائده للاسف اصبحنا نتكلم الكثير الكثير ولانعمل الا اقل من

القليل فترى البعض قد وصلت به بأن يكذب ويبالغ بكذبته ليحكي شيئا ماحدث منه الا القليل وينسج الباقي من واقع خياله

او ليحدث بما لم يفعل اصلا استغفر ألله العظيم ..

موضوع جدا رااااااااائع بارك ألله فيك وتفكير ايجابي لما تواجهك مشكله ان تفكر بنظرة غيرك او كأن المشكله لغيرك لاجل تكون وجة نظر ك حياديه .

ألله يهدي الجميع لما يحبه ويرضاه.

شكرررررررررررا جزييييييلا

عبارة (ابغا ارتاح ) تدل على ان صاحبها لسه ماارتاح ..
وعمره مارح يرتاح مادام انه (يبغا) ولسه ماسوى شيء علشان يحقق هذه الراحة !!
وعلشان نرتاح لازم نتعب شوية ..

شكراً يااختي على مشاركتك

استمتعت ياأخي بطرحك الرائع بل الاكثرررررررررررررررررررررررررررررر من راااااااااااااااااااااااااااائع

من جد كلامك يدخل بالقلب بدون استئذان ويتربع فيه بالعاااده لما أشوف الموضوع طويل أملوممكن أطلع

ماأكمله لكن موضوعك والله مادريت الا أنا عند خلاص الكلام>>>>>>>>>هذا بالنسبه للموضوع


أما فائدة موضووعك ومضمونه كبيييييييييييييره جدا أتوقع لو كلن يطبق الكلام اللي قلته خلاص ماراااح تلاقي

مشاااكل بالمنتدى

ياليت يرسخ كلامك بذهني!!!! بس ساعة ماتجي المشكله أنسى كل اللي حافظته بالهار دسك حقي

اشكرررك ياأخي مره أخرررى على أسلوبك العذب سلمت أناااملك ودمت

شرفتيني يااختي بكلامك والله ..
صدقيني انا كمان مااحب المواضيع الطويلة
لكن المشكلة إني كنت بأسترسل وأبربر وكأني نازل من دحديرة
وصدقيني لو راجعت الموضوع قبل لا ارسله كنت اترددت كثير ..لأنه مو هذا اسلوبي ولا هذي طريقتي في كتابة المواضيع بالمنتدى ..
لكن كتبته وبعدين ضغطت ارسال وزي ماتيجي تيجي !!
اول حاجة شفتها بعد مانزل الموضوع أنه طوييييل ..فقلت الله يهونها عليكم يارب

وبالنسبة للهارديسك ترى برمجته صعبة وقت المشاكل ..
لأنه بيكون (مهنق)
علشان كده ..
سوي ريستارت وصفي ذهنك قبل لا تحلي اي مشكلة ..
في الغرب بيسوو (يوجا) ..
إحنا ولله الحمد (بنصلي) !!
صلي ركعتين لله بنية إنه يفرج همك وحتلاقي كل حاجة وضحت بإذن الله تعالى

نورتي موضوعي يااختي وشكراً لتعليقك

__________________

اهلاً وسهلاً بك يا اختي وردة بين الثلوج ..
والله إنك صدقتي بخصوص المنتديات جميعها بما فيهم منتدانا ..
فعلاً صارت النظرة العامة كئيبة وسلبية ..
المشكلة إن (السلبية) مرض معدي
يعني الواحد بعد مايقرأ له كم مشكلة يجيله إكتئاب و يمكن لما ينام يتفزز
طيب ايش اسوي لما يكون عندي مشكلة ؟؟
سؤال بسيط !!
بس الإجابة تعتمد عليك إنت
اهم شي لاتكربنا في الألفاظ اللي تستخدمها ولا تحسسنا إن الدنيا معد فيها خير
والله إنك صادقة

نورتي يااختي وشكراً لتعليقك

ماشاء الله طرح رائع واللهجة العامية زادته جمالاً وسلاسة وقربت الطريق والفهم لعقل المتلقي بكل بساطة ويسر .

الأسلوب والتتابع يخطف القارئ فلا يكاد يبعد عينينه عن الكلمات حتى يجد أن الموضوع انتهى ولا مانع عنده من إعادة قرائته مرة واثنين .

حروف تكتب بالذهب .

بوركت يا أخي الفاضل وأزاح الله المشاكل والهموم من حياتك للأبد .

ألف شكر

مرحبا بأختنا الكريمة سعاد ..
تصدقي إني احمد الله الف مرة على إن الواحد أتعلم الكتابة بس علشان يقدر يفضفض ..
وبعدين الذهب غالي ومانقدر عليه ..
خلينا نكتب حروفنا بالكيبورد وربنا يصلح لنا الأحوال ..يارب !

نورتينا وآنستينا يا اختي سعاد

نقل الى مكانه المناسب ... الاشراف

__________________
ارجو الدعاء لامي بان يفرج همها و يسهل امرها و ينصرها و يقويها يارب