السلام عليكم والرحمة ..
لدي صاحبة ثانية طلبت رايي في مشكلتها
تعرفت عليها باحد المنتديات وعرفت بها لاهلي
معرفتنا فقط بالنت واستشارتني في امور كثيرة ايام خطوبتها وملكتها وتجهيزها للزواج
لكن عجزت اقول رايي في مشكلتها الحاليه

واليكم هذه المشكلة كما كتبتها هي :

كل مرة نتخاصم فيها يتطور العنف بينا
انا ما اسب ولا اسوي حركات بيدي عليه
لكن لما هو يسوي اي شئ سواء قول او فعل ابدا اصير بـبغاء
يعني لو سبني اسبه نفس السبة
لو سب اهلي اسب اهله نفس السبة
لو قرصني اقرصه
\اليوم لما تخاصمنا تطورنا بالتصرفات
ضربني كف ضربته كف
تفل على تفلت عليه
خنقني خنقته
لكن اليوم .. ضربني براسي ضربة صعيدية تورمت جبهتي .. ضربته بيدي
رفع رجوله على وجهي ودفني من فمي .. انصدمت وما عرفت اردها له
بكيت بعزة ..\ ورحت اجهز ملابس بشنطتي بارجع لاهلي
وقلت لا تلمسني مابيك اطلع من البيت بعدين تعال بعد3ساعات نتفاهم .. خلص اشغالك برا واختبر اختبارك النهائي وتعال نتفاهم بعدها ووديني لاهلي
صحيح اني ما ابيك بس مابي اخرب مستقبلك .. يارب اذا تطلقنا تعيش سعيد مع وحدة غيري وانا اعيش سعيدة مع غيرك
قام يبكي ويقول اسف وحاول يراضيني بنفس اليوم لكني ما رضيت تقول رجولك بوجهي وفمي قويه
جلس يتكلم معي بالجوال ساعه يقنعني مافي فايدة .. قال لاجيت رديها لي بوجهي وبابوس رجولك بس ترضي
قلت ايه احط رجولي بوجهك واضربك برجولي على فمك .. قال مواااافق بس الطلاق لااا انا احبك وابغاك
طبعا لما جاء قال رديها لي قالت مابي مو من اخلاقي اوصل للاهانه هذي قال قالي ابوس رجولك ورفضت بقوة
لكن تغافلني وخذها باسها
انا ابي اتطلق لان مارتحت كثير معه ولا مع اهله ولا مع غربتي عن اهلي
محتاره هل ابقى معه بعد الاهانة الكككبيرة وهل يمكن يتطور الامر قدام ؟
اذا باتطلق بعدين اتطلق الحين احسن دامني فالنص الثاني من العشرينات
ماكنت موافقه ع الزواج بس استحيت ارفض عشان ما يقولون متكبره وعشان صليت استخاره وتيسرت الامور

(طبعا هي من ززمان تقوله ابي اتطلق طلقني مومرتاحه معك وماحبك وهي اصلا ما تعرف حقيقة مشاعرها اتجاهه لكن تقول طيب وحنون
لكن هو يقول انا احبك وابغاك ومستحيل افرط فيك انتي عاقلة وطيبة وحلوة
لكن ليش لما تعصبين تثورين ؟ ليش لما اعصب ما تمتصين غضبي وتعانديني اكثر
لهم 3سنوات متزوجين وعندهم طفله
نقول تعبت من كثر المشاكل اللي تجرح
ودايمن يقول لها اذا تطلقتي باحرمك من بنتك وبانشر صورك بالنت وبافضحكم
تقول مستحيل احب انسان بهالافكار انا حتى لو تطلقت منك ماحرمك من بنتك وباذكرك بالخير وباقول سبب الطلاق عدم توافق في الاطباع الله يوفقه وهو بعيد
وهو بعد تعب جاه الضغط وهو بعمر الثلاثين بسبب مشاكلها مع العلم ان مشاكلها معاه فقط مو مع اهله ولا مع اي انسان على وجه الارض لأنها هي اصلا طيبة وعاقلة .. بس كيف تتحول لشخص ثاني لماتتهاوش معه مدري حيرتني هالبنت الله يهديها

__________________
اللهم صلي وسلم على سيدنا وحبيبنا محمد وعلى اله وصحبه اجمعين
سبحانك اللهم اني كنت من الظالمين