عمري 20 سنة .... زوجي أكبر مني بِ سنتين يعني ... 22 سنة
متزوجة صارلي 11 شهر وتاريخ 24 من هَـ الشهر راح اكمل السنة معاه
تزوجته بعد قصة حب مو طويلة ، لأنه بسرعه تقدملي وتزوجني
يحبني بِ جنون ... وابادله نفس الحب
في بداية زواجي صادتني مشاكل وياه
اكتشفته مره إنه يخوني ... ما كلمته ولا قلت له شي زعلت معاه وراضاني
وحاولت امشي الموضووع ماخذيت منه وعود ولا أي شي
لكن اكتشفته مره ثانية يحاجي بنت في المسنجر ... وكنا في رمضان اللي طاف
واتصلت لأبوي في نفس لحظة اكتشافي وكان ريلي يمي
قلت حق ابوي انت كلمه آنه تعبت نفسيتي معاه ولا ابيه تعال خذني من بيته
بس ريلي كلم ابوي وقال له سامحني عمي آآنه قبل لا اخونها خنت الأمانة
وان شاء الله اوعدك ماراح يتكرر
ابوي قال له قبل لا توعدني اوعدها وقال له " اما امساك بمعروف او تسريح بإحسان "
إذا ماتبيها ترى بيتها مفتوح لها بأي وقت ..
ولا تفكر ان احنا مستغنين عنها ولا يهمنا إن قالوا بنتنا امطلقه
باجر تتخرج من جامعتها وتشتغل
وعندها سيارتها والليسن
ولا تحتاجك في شي .. وألف من يتمناها
قال له ريلي آآسف قال له ابوي تأسف لها
ولا تتأسف اذا انت منت حاس بغلط ولا انت ندمان
قال له ريلي انا ما كلمتك إلا لأن فعلاً ندمان وآنه احب بنتك ومابي اخسرها

وفعلاً ريلي وفى بوعده لي ولأبوي .. ومن يومها ما تجرأ يكلم احد
وكنت اراقبه ومن غير ما يحس اجيك تيلفونه
وايميله
والمنتديات ووو إلخ
بس فعلاً وفى بوعده لي ..

مع إن الحين اتصدينا مشاكل
بسبب غيرتي .... بسبب خوفي إن يروح لغيري
وهو حاس بالندم للحين لأن غيرتي الزايده والمفرطه سببها اهوهـ
وآآنه قلت له ابي احس بالأمان
قال لي شلون احسسج اكثر من جذي ؟
انه مو قاعد اسوي شي
قلت له ادري
بس اخاف اخاف ترجع لقبل ..
قال مابرجع والله مابرجع

بس غيرتي وخوفي ذابحيني !! شسوووي ..
وحتى عصبيتي من اتهاوش معاه اهو يظل ساكت وما يرد علي
عشان لا يكبر المشكلة ... وكل ما شفته ساكت آآنه احاول انرفزه عشان يتكلم
واظل اذكره بخيانته لي ... ساعتها صج ينقهر بس يسكت
يقول لي مابي ارد عليج عشان لا تكبر بينا المشكلة ويقوم عني ويخليني
آنه احبه وايد .. واشياء وايد حلوه فيه
ومن يوم وعدني ما سوالي شي يضايقني
ويحاول كثر مايقدر يرضيني

بس مادري هل المشكلة فيني ؟ لأن مو قادره انسى !
او شالحل حق غيرتي ؟
وشلون انسى اللي صار ؟