السلام عليكم ورحمة الله

ان شاء الله انكم في اتم الصحة والعافيه

اولا صراحه حبيت هالمنتدى من طريقة التسجيل السهله والميسرة ومن المواضيع المفيدة والي بتفيدنا الي زي حالاتي المقبلين على الزواج

ثانيا ندخل بالسالفه دغري

قبل اسبوع خطبت عند ناس من الجماعة

وصراحه الخطبة كان شعور هستيري بالنسبة لي

طلعت مني تصرفات عجيبه ولا شعوريا ههههههه

قبل كل شي في البداية رحنا انا والوالدة الله يحفظها عند اهل البنت

والوالد المشكله ما جاء معي لانه كان مسافر وهذي مشكله حد ذاته بالنسبه لي انا ولا اقدر اقول اني بأجل الخطبه لان ما عاد فيه وقت ابد وصراحه بيني وبينكم ابي البنت هذي من زمان

طبعا جيتهم من زمان بس قالوا لازم اختها الكبيره تتزوج والحمدلله جاء يوم زواجها وراحت

المهم دخلت بيتهم وجلس في المجلس وسواليف مع الاب والاخوان وطول الجلسه ابي اصرف اخوانها الي بيصيرون في المستقبل انسابي ان شاء الله ناشبين في حلقي حتى من الله طلعو من المجلس ومابقي الا انا وابو البنت واللحين جاء الوقت الصعب وشلون ابدا هههههههه وقتها كنت محتاج الوالد الله يحفظه على شان يتكلم بدالي ولكن تجرأت وتكلمت وطلبت يد البنت

المهم يوم الاب قال لاولاده ازهمولي فلانه انا قلبي من وقتها جلس يرقص سامري وركبي ترتجف تقول كأني داخل قاعة اختبار حتى الشاي شربته في جغمه وحده وهو حار بعد توه صبوه لي بس ما حسيت شي هههههه

وجاني خجل مو طبيعي طول الوقت جالس اناظر اسفل وانا من عاداتي احب الفله والوناسه والضحك

يعني بأختصار شين وقوي عين

ومن يوم دخلت البنت وجلست قدامي مدري ويش جاني طالعت فيها عيوني ما نزلت عنها

حتى رمش واحد ما رمش قازها قز مو طبيعي حتى ابو البنت يقول يابنت طالعي فيه وهي المسكينه ما قدرت تطالع انا ما اعطيتها فرصه حسيت اني اناني

المهم طول الوقت امها وابوها جالسين يقولون لها يابنت طالعي فيه وهي ماهي قادره ترفع راسها حتى انا بيني وبينكم طفشت وقلت لهم خلاص يالله انا بطالع فوق بالسقف هههههههههههههه احس انه تصرف دلخ مدري بلاهه مدري وشو مني .. من جد انا مدري ويش جاني ذاك اليوم حتى يوم قلت كذا كل الي بالجلسه ضحكوا ومستغربين مني

المهم بعد سلمنى عليهم وطلعنا جالس افكر طول وانا ماشي على الطريق وشلون هالتصرف طلع مني واخاف انهم يقولون هذا واحد دجه ما نبيه لبنتنا والا شي

المهم امس الحمدلله جانا خبر ان اهل البنت والبنت وافقوا وانا وافقت والحمدلله انتهت اول مرحله من مراحل المقبلين على الزواج

ونسأل الله العلي القدير بأن تتم لي على خير وعلى جميع المقبلين على الزواج

وسؤالي هنا ... هل التصرفات الي طلعت مني هذي عاديه ؟؟ وتصير عند كل مت يخطب ؟؟

هاذي ربشة الموقف ههههههههه

بتجلس انت وهي تضحكون عليها بعدين هههههه

الله يوفقك خيو وييسر لك

عادي يا أبو الشباب

تصير حالتك لكثير من الشباب

ربشة


وربكة

ولخبطة بالكلام

وتصرفات وخفة عقل مؤقتة


وكل أنواع التقلبات النفسية تصير


نقول مبرووووووووك

والله يتمم لك على خير




عزوبي بس رجل

__________________

يا حي يا قيوم برحمتك أستغيث أصلح لي شأني كله ولا تكلني إلى نفسي طرفة عين

الله يوفقك ويتمم بينكم على خير يارب
والله جدا ضحكتني وفرحتني يا اخوي

بالعكس كان حركتك حلوه ولطفت الجو الرسمي تبع الخطبه خصوصا انه البنت بتكون قلقانه ومستحيه فا انت حاولت اتشيل هالقلق

تمنياتي لك بالسعاده وعقبال كل العاوزين يارب

__________________

ههههههههه
شكلك صغير

عموما مبروك

__________________

ههههههههههههههههه الله يسعدك
لاتاخذك الأفكار وتوديك
بالعكس أنت ماسويت شي غلط .. لطفت الجو وكلامك كان عفوي
وراح تتذكرون هالموقف بعدين وتضحكون

ع البركه والله يتمم لك على خير : )

يا حبيبي أنتبه شخصيتك هي قيمتك عند البنت وأهلها , الركادة والرزانة هي رسمة لك أمامهم

والإنطباع الأول هو ما يحفر في أذهانهم ..

ههههههههههه ~>تخيلت أشكالكم

بالعكس لآتصرف خطآ ولا تاخذك الأفكار والوساويس ..
هاذي مجرد أرتبآك مع خوف وكلن يمر بهآ ... وبعدين لطفت وغيرت جوهم شوي

لو مآشروك مآوافقو عليك الله يسخركم لبعض ويتتم فرحتكم وعقبال العزابيه


البرنسيسه~N

__________________
اللهم أرزقني زوجآ صالحآ تقيا نقياً ؛ وممن ترضآه من الرجال عندك ..
واحفظ لي ياإلهي (أمي وأبي) ف هم اعز ماأملك ،

,
,

أضحك الله سنك

على فكرة إحمد ربك انه ابو البنت فاهم

لو غيره يمكن يقولون هذا الظاهر متعود ع البنات ويخوزز بهم واجد عشان كذا مانزل عينه من البنت والوضع عادي عنده !

الله يباركلك بأهم شي العشرة بالتي هي احسن وان تحسن إليها وتفرفشها

موفق لكل خير

,
,

يا ملح اللي ما عمره شاف بنات هههههههههه
ربي يوفقك .. وييسر أموركم ؛