زوجي على أبسط مشكله يهددني بالطلاق
السلام عليكم ورحمه الله وبركاته
أطرح لكم مشكلتي وأتمنى القى عندكم الجواب الشافي والراي السديد اللي يساعدني على حلها لأني صغيره وماعندي أخوات أكبر مني وماأبغى أدخل أمي او أبوي إلا عند الضروره
أنا إنسانه عمري 22 سنه ومتزوجه من أربع سنوات
والحين حاامل وبالشهر السادس
وزوجي عمره 29 سنه وأصغر أخوانه وأخواته بس عنده أخوان أكبر منه رافضين أنهم يتزوجون
بالبدايه كنت مرتاااحه معه وكنت أحس إني أسعد ماخلق ربي
الين بدت المشاكل أمه إنسانه قويه ومتسلطه تتعامل مع حريم أولادها كأنهم خدم عندها أطبخي وأنفخي وأنتي ساكته مع العلم أن عندها خادمه وقبل شهر جابت طباخه
وممنوع إني أسافر مع زوجي بوقت العطله ومره سافرنا تخيلو رجعت بعد ثلاث أيام لأنه كل مادق عليها تقفل السماعه بوجهه فرجعنا والشكوى لله
هذا غير الكلام اللي أسمعه منها بين فتره وفتره والسبب تافه وهو أنها تبيني أنزل من الساعه 8 الصبح وماأطلع إلا بعد الغدا وأنزل مره ثانيه العصر وماأطلع لشقتي إلا بعد أذان العشاء وربي أحيانا تدفني بظهري أو تسحبني بيدي بقوه كأني جايتهم من الشارع وتتحكم بلبسي وتغار لما ألبس شي جديد فصرت ماألبس عندها إلا لبستين وأكررها دايم
وماتبيني أطلع وأروح إلا لما أحط عندها خبر حتى لو كنت بروح عند أهلي
وكانت أحيانا تزعل مني ويزعل زوجي معها فأروح أبوس راسها وأرضيها
بصراحه أنا كنت أسوي كل شي تبيه عشان عيون زوجي بس مليت وحسيت أني ماأقدر أستمر على هالوضع
فقطعت علاقتي مع أهله وسرت ماأنزل لها إلا بين وقت ووقت وكنت أنزل وأيدي على قلبي لأني عارفه المحاضره والهواش اللي بيجيني
فكرهت أروح حتى عندها
كل هذاااا اللي قلته مو مهم عندي وأقدر أتحمل
لكن زوجي تغير علي وبقوووووه صااار قلبه قاسي من ناحيتي ودايم يقولي أنتي حساسه ومعقده وماتتحملين شي ونفسيه وكل عيوب الدنيا حطها فيني
ويقول أنا مالله وفقني بزواجي منك لأنك ماتراعين أمي وراح أتزوج وحده غيرك تراعيها
ودايم على أبسط مشكله يهددني بالطلاق ويقول إذا مو عاجبك أطلعي برا
وأنا وربي أتحمل كل هذا عشاني أحبه وأموت فيه وهو عارف بغلاته ومستغلها حتى لدرجه يقول :أتحدى تقدرين تعيشين بدوني
وهو طبيعه شغله تخليه كل شهرين لازم في دورات وأحيانا تكون بالخارج ولمده أسبوع أو عشره أيام فيحطني ببيت أهلي ويمر كل هالوقت ومايتصل ولايرسل يقوول المكالمات تكلف بقووه بصراحه هذا مو عذر
أدري بتقولون ليش أنتي ماتبادرين وترسلين أو تتصلين بس ورب البيت أحيانا أرسل مسج ولايعبرني ولو بكلمه حلوه وأنا أبيه يهتم بمشاعري ومايصير جافي لهدرجه
والله ماودي بالطلاق لأني عارفه أنه مو سهل بس تعبت من حياتي معه
وش تنصحوني فيه ؟؟؟
22-06-2010, 07:18 PM
ضوابط المشاركة
العرض الشجري