السلام عليكم

انا بدخل في الموضوع علطول واتحملوني شوي

والدي خطب لي بنت صديقة وصديقة توفى منذ فترة طويلة واللي فهمته من والدي انه وعد صديقه انه يزوجني بنته ومشت السنين وكلمني والدي وانا رحت شفتها الشوفة الشرعية واعجبتني وخطبتها والحمد لله ارتحنا لبعض وامي وامها صديقات من قديم وامورنا في السليم وبعد كتابة العقد ومن خلال مكالماتنا اكتشتف ان البنت حساسة جدآ جدآ ولزقة لدرجة ماتتصور تصدقون انها تدق على قبل اي صلاة تدق تذكرني
وصلاة الجمعة تدق قبل الصلاة بساعتين وانا اقول في بالي وش على بالها ذي ما اصلى ولا تبغاني ازورها كل يوم قلت لها مااقدر قالت على الاقل في الاسبوع ثلاث مرات وبصراحة والدى مايخليني يقول عيب كل شوي وانت طاب عندهم اخبر قبل فترة زرتهم وكان عندهم عمها ودخلت البيت وحصلت عمها وجلست اسولف معاه وجات هي سلمت وسلمت عليها وجلست جنبي وانا اسولف مع عمها وشوي جا اخوها
واخذتنا السواليف وماتكلمت معها مرة وبعدها راحت ولا عاد رجعت وانا استغربت وبعدها رحت ودقيت عليها
ردت وجالسة تبكي قلت وش فيكي قالت انت جاي تشوفني ولا تشوف عمي قلت اشوفك بس وش اسوي
جيت وحصلتة موجود تبيني اسحب عليه واسولف معك والله عيب قالت طيب على الاقل طالع فيني ولا امسك يدي قلت كيف امسك يدك واهلك معنا ( وبعد نقاش طويلين عريضين خلصت المكالمة وكل طرف شايل على الثاني) واليوم الثاني دقيت عليها مرتين وماردت وتركتها اسبوع ودقت على وتراضينا ونسينا

لكن الطامة اللي حصلت وخلتني اكتب هالموضوع قبل اسبوعين سوينا حفلة الملكة وجاء وقت الزفة ودخلت عند الحريم وزفونا ولاحضت انها كانت تضغط على يدي بقوة انا قلت يمكن من رهبة الموقف وانا كنت عادي
هامل يدي بس ماسك يدها وجلسنا على الكراسي ولبستها الدبلة بس قبل لا البسها نسيت في اي اصبع
ادخله ودخلتة في الطويل بس صححت لي اختي ودخلتة في المكان الصحيح وخلال الحفلة وانا اتغزل فيها
واشيد بجمالها وبعدها رحت عند الرجال وخلصنا ورحت للبيت وعلطول رحت نمت ( وانا بطبعي عند النوم احط جوالي عالصامت ) ويوم قمت لقيتها داقة مرتين ودقيت عليها وكانت زعلالالالالالالالالالالالانة قلت السلام
عليكم قالت نعم قلت وش اللي نعم وماردت على قلت وش السالفة امس وش زيننا كنا حلوين قالت امس وين كنت قلت معاكي قالت جسد بدون روح ماسك يدي وكأنني غاصبتك وبالزفة تمشى بعيد عني وتسبقى بالخطوات وكل صديقاتي لاحظو هذا وماتعرف تلبس الدبلة وماتكلمت ولا كلمة وفوق هذا كله رحت ولا جسلت معي خمس دقايق لحالنا قلت اووووف كل هذا بقلبك بالنسبة لمسكة اليد يعني تبيني اكسر عضامك ولا بالزفة اكيد اسبقك شوي وانت تسبقيني شوي حنى محنا ألالأت مبرجمة وبالنسبة للدبلة ماكانت مقصودة وانا آسف اذا زعلتك بشي غير مقصود وحاولت اراضيها بس صرفتني وقالت انا الحين مشغولة اكلمك بعدين قلت لا مانتي مقفلة الا لين ماترضين قالت باي اكلمك بعدين وقفلت السماعة
وانا بصراحة ماقدرت امسك نفسي يوم قفلت السماعة وحطيت حرتي باجوال ورميتة وكسرته واخذلت لي واحد ثاني وسويت نفسي مانيب زعلان ودقيت عليها مرتين وماردت وبعدها ارسلت رساله تقول (( هذا تالي تقديرك )) ولنا اسبوعين ماكلمنا بعض وباقي على زواجنا 3 اشهر ونص وانا حالف اني ما ادق عليها
لاني مدري وش تحس فيه ذي البنت وخصوصآ مع (( مسكة اليد )) وتحب تفتعل المشاكل وحساسة جدآ
من اي كلمة واي حركة تراقبها .

انا بصراحة احبها وهي اكثر بس لو تخلي هالحساسية الزايدة وماتسمع كلام صاحباتها نكون حلويين وانا بعطيها لين قبل الزواج بشهر اذا مادقت ابا اروح لامها واعلمها السالفة ويمكن توصل للطلاق اذا بدايتها كذا
مشاكل ومافي اتفاق

انتم وش رايكم انا اتوقع ان البنت مريضة نفسيآ او فيها شي انا اجهله؟

ما اعتقد انها مريضة

بس يمكن خطيبتك متعلقة بزيادة وتبغى منك أهتمام بزياااادة

حآول أنك تخفف من الزيارات وتقول لها حتى نشتآآآق لبعض

وياليت لو ترووح لها بهدية بسيطة في زيارة مفاجئة اتوقع أنها بتنسى كل شيء بشوفتك

وياليت عند خطيبتي أهتمام فيني مثل خطيبتك خخخخخخخخ

ههههههههههههههه اسمحلي جاني الضحك!!!!!

عادي ياأخي البنات حساسات وأنا أولهم وهي حساسه وشكل في أحد يزودها عليها ياصاحباتها أو غيرهم!!

ومادري أنا حسيت انها ماحست معك بالامان وتوسوس انك ماتبيها!!!!!

وأنا من رأيي بعد فترة تدق وتقولها وتفهمها وتكون صريح ان حالتها هذي ماتمشي معك الحساسيه الزايد وباذن الله راح تخجل من تصرفاتها...


موفق.

__________________
ربي لا أعلم بما تحمله لي الأيام لكن ثقتي بأنك معي تكفيني ~

أخوي أنا أشوف انك تنسى الموضوع و تتجاهله تماما و لا تستغرب من بعض تصرفاتها فيبدو أنها عاطفية جدا و رومانسية في نفس الوقت و لاتنسى أن فقدها لوالدها أيضا أفقدها الكثير ....أتوقع أن الأمر طبيعي ولكن أنت بحاجة للحذر في التعامل معها الآن و ان شاء الله مع الأيام راح تفهمون بعض أكثر و أكثر و عسى الله يوفقكم ان شاء الله

انا بنت ومثلها والدي متوفي

وذحين ملكتي الاسبوع الجاي ان شاء الله

جالسه افكر ياترى هذا الشخص يستاهلني

ياترى راح يكون مصدر الامان لي سندي ذخري

هذا شئ طبيعي ترى شعور صعب الي فاقده ابوها

لانه هو امانها روح لها البيت حاول تتقرب منها اكثر

الحساسيه في كل بنت بالاخص الي فاقده ابوها

لانها بدونه تحس ولا شئ

انت خطيبها يعني زوجها تقدر تغير نظرتها وتحسسها إنك معها في كل لحظه

وتصرفاتك بدون قصد

واذا كانت حابه تشوفك كثير يمكن تبغا تفهمك اكثر

لان الكلام غير والزيارات غير (هذا كلام المجربات من البنات)

ويمكن هي سمعت كذا وتبغا تتقرب منك اكثر

خايفه يوم الزواج يجي وانت مو فاهمها وهي ماهي فاهمتك

الله يوفقكم ويصلح بينكم

هي عاطفية جدا و حساسة و إنت جامد و عملي جدا و رسمي

هي يتيمة لذلك يمكن عندها احتياج عاطفي لوالدها و حابة تحس انك تقدر تعوضها و تكون محل ابوها لذلك استحملها شوي و لما تلاقي الوقت المناسب فهمها انه مع كثرة الحساسية لي عندها ماراح يمشي الحال ... ربنا يهنيكو ببعض

الاخ الكريم حبيب طليقته ..

ترى اغلب النساء حساسات و لزقات فلا تتوقع ان تجد افضل مما لديك !
وضعك طبيعي و لا داعي لتكبيره و تهوليه ,,
كل ما في الامر انها تحبك و تهتم بك و تريد منك ان تهتم بها او لنقل تظهر اهتمامك بها ..
حاول تزيد جرعة الاهتمام بها و تحتويها سواءً باهدائها او بمتابعة امورها و ابداء اهتمامك بما تقوم به او ما يشغل بالها !

اما الطلاق فشيله من راسك نهائي نظراً لان ما تمر به خطيبتك امر طبيعي نظراً لبعدها عنك و رسميتك معها, و تأثير صديقاتها و من حولها سيزول بعد ان تنتقل الى عش الزوجية حيث سيطغى تأثيرك عليها على اي تأثير آخر كما انها ستبدأ تتأقلم مع طبعك و تتطبع به ,,,
كذلك لا انصحك بالتحدث لامها او لاي احد حتى لا تكسر حاجز الخصوصية في علاقتك مع خطيبتك و زوجة المستقبل ناهيك عن ان التدخل الخارجي غالباً آثاره سلبية ,,
لذا اسعى دائماً لحل مشاكلكم فيما بينكم ,,

و الله يوفقكم

بعض النساء يبنين أحلامهن الزوجية على ما يسمعنه من قصص الحب والرومانسية وكلام الصديقات ...

وبناء على ذلك يبالغن في وضع مواصفات في فارس الأحلام ...

ثم يبدأ الصراعى النفسي والوسوسة هل تتطابق الأحلام مع الواقع ؟

ولذلك فعند أي اختلال بين ما كان مرسوما له وبين ما هو ملموس فعلا تجد أن الفتاة تتحسس كثيرا

ولعلها انصدمت حين أخطأت مكان الدبلة فقالت في نفسها إن كان لا يجيد الأبجديات فكيف بغير ذلك من الرومانسيات

ثم بدأت تسترسل في أوهامها وتبالغ فيها حتى تمكنت منها الوساوس وتضايقت لأجل ذلك ...

هذا واقع بعض الفتيات ، والتعامل معهن يكون بالمسايسة تارة وبالتجاهل تارة لكن دون تهويل ..

__________________
إلى الماءِ يسعى من يغَصُّ بلقمةٍ ::
إلى أين يسعى من يَغَصُّ بِمَاءِ؟!

أأهليـــن اخي فارس

انا ماازورها الا كل اسبوع مرة وبالكثير بعد وماقد رحت لها الا ومعي شي حتى آخر مرة جبت لها i phone 4اللي ماهو موجود بالسعودية كلها وقبل فترة لابتوب بس مدري وش السوات معها
لالالا احمد ربك والله اللزقة والاهتمام الزايد تطفش بس المثل يقول لا تكن لين فتعصر ولا تكن قاسي فتكسر

اشكرك