أحبه جدا وابكي لفراقه وهو لايشعر بي ولايريدني
السلام عليكم ورحمة الله وبركاته ..
ترددت كثيييير قبل ما أطرح بمشكلتي بس ما قدرت اتحمل أكثر وان شاء الله تفيدوني ..
ما أعرف كيف ابدأ بس بالأول انا عمري تقريبا 18 سنه عندي اخ واحد بالمتوسط واخت واحده متزوجة..
مشكلتي اني احب واحد من أقاربنا أكبر مني بسنتين تقريبا ولا احد من اهلي او صديقاتي يعرف وبعد هو ما يعرف .. من خمس سنين تقريبا وانا احبه
والله ولا يوم غاب عن بالي يعني بصراحة حبيته حب ما توقعت بيوم من الأيام ممكن اني اوصل له .. كنت معاه بكل صغيرة وكبيرة طبعا بدون ما يعرف .. حتى لمن تخرج وكان بيدخل الجامعة عرفت من اخوي انه محتار بين جامعتين رحت استخرت ربي اللي فيه خير يكتبه له .. واشياء كثيرة مشابهة لنفس هذا الموضوع
اساسا هو ساكن بمكان وانا بمكان ونادرا جدا ما اشوفه يعني تقدروا تقولوا بالسنه مرة مرتين هذا اذا شفته ..
بنيت كل احلامي معاه وليل نهار وانا ادعي ربي يكون من نصيبي .. كنت واثقة من ربي انه بيحقق لي اللي اتمنى من كثر ما ادعيه ..
لسى ما بدأت المشكلة ..
المشكلة قبل اسبوع تقريبا كنت احاول في أمي نروح نزورهم وأمي رفضت نروح وقالت بكره وانا انقهرت مررره وشكلي طفشت ماما من كثر ما اقولها بنروح ..((وهو عنده اختين واحده في سني وأعتبرها أكثر من صديقة وننبسط مع بعض)) ..
المهم اليوم اللي بعده رحنا عندهم وانا واخته 24 سوالييييييف وما ملينا .. ماما تمون على امه راحت قالت لها ((بنتي طفشتني كل يوم تقول بنروح عندهم وطفشتني من كثر ما تزن عليا متعلقة في بنتك مرررره ))
قالت امها
( ياليتها بتجلس عندنا على طوول والله اتمنى تعيش عندنا بس مو على كيفي وما بيدي شيء... )) ...[يعني مو نفس الكلام بالنص بس نفس المعنى ]...
والله انا بعدها احس اني انكسرت وتحطمت والدنيا مالها أي طعم , والله تعبت نفسيتي بعدها الى يومنا هذا احس خلااص الفرح اختفى من حياتي والله العظيم اتمنى ارجع اضحك من قلبي زي زمان بس ما اقدر حتى الناس لاحظوا علي ويقولوا لي اش فيكي تغيرتي ..
والله العظيم لو أقول لكم اني من يوم ما اصحى من النوم اتمنى بسررررررررعه يجي الليل عشان اروح انام واخذ راحتي في البكاء ولأني ما صرت ارتاح اجلس مع الناس وانا افكر فيه وما ادري عن الدنيا وصاروا الناس دايما ينتبهوا لي .. تصدقوا كنت زمان ابغى اصارح اختي بس خفت ما يصير نصيب وتصير تشفق عليا وترددت والحين أحمد ربي اني ما قلت لها ..
..
اعتذر للإطالة وادري يمكن ان مشكلتي ما لها حل .. بس والله احس نفسي مخنوووقة وابغى افضفض زيادة على المشكلة والهم احس اني مكبوته استنى يجي الليل بس اجلس افضفض لنفسي وازيد نفسي بكا ..
ما ادري اش اسوي احيانا احس اني واثقة بربي وادعيه واحاول اني اتجاهل اللي صار واحيانا مجرد اني افكر انه مع واحده غيري اخااف ويرعبني هذا التفكير أحس ودي اختفي من الدنيا ولا اشوفه وهو مع غيري
.. بانتظار ردودكم
22-09-2010, 04:13 AM
ضوابط المشاركة
العرض العادي
