سووري سبق وان طرحت الموضوع لاكن طلع مو بمعرفي
آسف

دا الموضوع واتمنى الاقي عندكم الحلول
السلام عليكم

في البداية اعرفكم بنفسي .. شاب سعودي .. عمري 25 سنة .. تقدمت لفتاة قبل شهر تقريبا

وبعد السؤال عني من قبل ذويها جات الموافقة بالشوفة الشرعية .. شفت البنت .. وكشكل عجبتني .. طلبت من اهلها انو اكلمها قبل الملكة والمقررة بعد اسبوعين من الان .. جاء الرد بالرفض !!

قلت مو مشكلة بحكم انو ابوها مطوع مع اني ضد هذي العادات .. وماشوف فيها عيب لو الواحد كلم خطيبته قبل الملكة حتى يعرف على ايش مقدم .. (المهم مو موضوعنا دا ولا ابي احد يفتي على راسي فيها ..نص اسباب الطلاق عشان قضية الحبحب الي عندنا .. وانتو عارفينها .. شاف الشكل خلاص اوكي يجي بعد الملكة يتفاجا بالاسلوب والاخلاق يعني الشغلة حظ يابيض ياسود ))



المهم بعد مفاوضات سمحوا انها تكلمني مسن .. آآآه ياريتني ماكلمتها !! كان كلامها ابدن ولا كاني شخص صادق النية وجاي متقدملها .. من استخفااااف بالدم .. وكلمات المفروض ماتقولها لزوجها المستقبلي !! طبعا هيا كل يوم تكلمني ربع ساعه مو اكثر بالمسن وتتعذر باي شي .. مره ابويا ومرة امي .. من الكلمات الي حزت في نفسي .. كلمات يستخدموها البنات بينهم مثلا كيفك يامزة !! بالله في بنت توها تتكلم مع خطيبها تقوله كدا !!! ايش مررا المعرفة مقطعة بعض ؟!



انا استحي اكلمها بالاسلوب دا .. من مبدا احترامها .. بصراحة انا مليت الان 4 ايام بالاسلوب دا تطلع تروح تجي مبسوووطة ولا سائلة عني



انا قلت بانتظر اسبوع لو مشت معايا نفس الاسلوب حاكلم اهلها بانو مافي نصيب وكدا يكون احسن ليا ولها والله يوفقها بالولد الكول الي ينفعها اما انا اظن دي النوعية ماتناسبني بحكم شخصيتي الهادئة واحترامي للصغير والكبير



ارائكم ياسادة اتمنى مايكون فيها تعاطف لا ليا ولا لها ابغا الكلام السليم العاقل سواء كان ليا او ضدي



مشكورين مقدما وربي يحفظكم

اذا من اولها اخوي حاسس انو مو مرتاح لاتكمل
ماحدا رح يفيدك غير نفسك

__________________
يارب عوضني عاجلا غير اجل واجعل ابني شفيعا لنا واحفظ زوجي لي وارزقنا من حيث لانحتسب

أنا أشوف إن البنت وربما الشاب كمان فـ هذي الفترة يكون مختبص حبتين
وده يكسب الطرف الآخر بأسرع طريقه
يعني يمكن إنها قالت كذا تبى تطيح الميانة
أو مربوشة ماتدري وش تقول
انا عن نفسي . . يكفيني إني أعرف كل صفاتها قبل آخذها واذا عجبني شكلها آخذها وما أحكم عليها فـ بداية المكالمات لأنه مرات يجيني كلام وربي مايخليني انام
ويوم اكلمها عنه بعدها بفترة وربي شوي وتبكي وتعتذر وتقول سامحني ماني قاصدة ومن هالحكي
أنا اشوف إن الكثير يخونهم تعبيرهم في البدايات . . فـ أنا ماني من النوع اللي يحكم فـ البداية لأني مقدر وضعية الشاب والست ويكفيني الحكم المسبق من الأهل والقرايب ومعرفة تربية البنت
هذا رأيي . . والله يوفقك ويكتب لك الخير وين ماكان

مشكور اخوي ردك عاقل وواعي جدن .. واليوم قلت مالي الا اني اصارحها بضيقتي واشوف كيف ردها ؟
وبصراحة اعتذرت وحسيت انو فعلا صادقة في كل الي بتقوله وفعلا مربووشة وملخبطة

و هل إنت تجاريها في الأسلوب ؟

و لا تتكلم بأسلوب جاد نوعا ما ؟

يمكن إنها تفكر تستخف دمها ، علشان ما تنفر منها ؟

لكن إذا ما ارتحت لها ، فاستخير و قرر

لاتحكمـ بالمـسن .. انت اطلب انك تكلمـها بالتلفون تشوف اسلوبها بالمـسن مـاهو دليل

ضحكت على كلمة موزه اليوم موزه غدا شو تفاح



اهم شي انك صارحتها

صارحها باللي ما يعجبك وشوف ردة فعلها وبعدها قرر

ان شاء الله خير يا رب

__________________
http://live.gph.gov.sa/
اللهم اني استودعك اولادي

لاتتسرع انا مثلك اول اسبوع ااستغربت اسوب خطيبي

بعدين شكيت فيه وصرت ابكي ومابيه وقالو لي النااس اعطي نفسك فرصه شهر وبعدين احكمي عليه

لما مر شهر تغير الوضع لاتستعجل

اخوي البنات صدقني بالرسايل غير ..وبالمكالمة غير ..(من واقع تجربة)

وقبل كل شي عليك بالإستخارة ان ارتحت فتقدم واكتب عقدك وتوكل على الله سبحانة
(وعلى نياتكم ترزقون)
وان حسيت انك مو مرتاح بعد الإستخارة فتوكل على الله وترا البنات ياكثرهم

والله يوفقك أخوي

مثل ماقالوا الاخوان والاخوات في البداية يكون الوضع متلخبط الواحد مايدري يكون ثقيل او يطيح الميانة لكن انا اشوف الشخص يكون عادي قد ما يقدر ولا تستعجل في اي شي وحاول تاخذ الأمور بالهداوة

نقطة بس حبيت الفت انتباه الناس لها .. محادثة الخاطب لمخطوبته جائز شرعا حسب فتوى بن باز في موقعه والفتوى صوتيه وانا معاك في الشي هذا ومن مؤيدي اني اعرف خطيبتي قبل مايطيح الفاس في الراس لكن لا حياة لمن تنادي