السلام عليكم ورحمة الله وبركاتة ،،،

تحياتي للأعضاء / العضوات الكرام في هذا المنتدى ..

واود ان اسرد مشكلة حدثت لي منذ ايام واريد النصح عسى ان أجد الراحة من عذاب التفكير والتوتر الدائم ....



كالعادة - زوجي وحبيبي اعيش معه في حلم الكمال ،، انا وزوجي نحب بعض ولدينا ولدين جميلين ،، اقضي ايامي اهتم بشئون بيتي وعائلتي ،، وبحكم عمل زوجي حيث انه يعمل بوظيفه مرموقه فإني اعطي نفسي الإهتمام الكامل من ناحية الزينة والجمال ،، ادللــه مع انه جاف الا اني اتفهم وضعه كرجل يصعب عليه التعبير عن الحب وبحكم وظيفته التي تنهكه طوال النهار ........

يقضي معظم وقته في العمل ،، يستمر عمله من الصباح إلى المساء .. تمر ايام لا اراه سوى ساعتان او ثلاث ولكني متفهمة .. المفروض اني اتناسى احاسيسي بالوحدة واتفهم .. لآني اعيش بعيدا عن اهلي .. لأنه يحبني وانا احبه .. يجب ان اضحي كما يضحي .. وعلى كل حال هو في العمل .. يناضل من اجل المستقبل ..

المهم // لم اشك به .. لأني والسبب الأول هو (واثقه من نفسي) يعني انا حلوة ومتفهمة ومثقفه وادللـه واهتم ببيته واحترمه واحترم اهله .. لست كاملة ولكني حلم حتى ان اخواني يتمنون ان تتصف زوجاتهم بصفاتي .. المهم يعني احاااااول والله العظيم احاول ......


الموقف: بطاقة هاتف زوجي بإسم اختي - وفاتورة الهاتف تصل على عنوان بيت الوالد .. انا لا اعطي للفاتورة اهمية لأن زوجي يذهب كل شهر حتى يدفع الفاتورة يعني خلاص .. المهم ذاك النهار وقعت الفاتورة تحت يدي وانا لاني كنت فاضية فتحتها - كان المبلغ كبير !! والرسائل النصية كانت 348 رسالة نصية في شهر فقط !!!! طبعا عدد كبير .. ظننت ان الرقم غلط .. ولكني قررت ان اطلب سجل مكالماته بحكم ان اختي هي صاحبة الرقم وتستطيع ان تطلب ..

المهم ،، احسست بالذنب .. كيف اشك فيه؟؟؟ قلبي غير نظيف فعلا انا انسانة معقدة ....... ولكن اختي ذهبت لشركة الإتصالات خلاص يعني ساعات ويوصل السجل ........

وصل السجل .......... ووصلت اختي بإبتسامة صفراء ............ (رقم واحد فقط هو المتكرر!!!!!!!!!)
صدمة والله صدمة ........ الله يعين كل زوجه تصدم بخيانة زوجها ...... الله يعين قلب كل زوجه اكتشفت ان لزوجها عشيقة .. الله يعين كل زوجه تزوج زوجها عليها ..

الرقم اعرفه - الرقم كابوس - اعرفه من 4 سنوات ....... زميلته في العمل .. اكتشفت انها ترسل له رسائل نصيه وان بينهم اتصالات ولكنه برر انها زمالة وان ما في شي ثاني !!!!!!!! وانا مشيتها بكيفي والله ....... ما ابي اكبر الموضوع ....... يعني انه اعرف ان الرجال لو حب يسوي شي راح يسويه .. ما اقدر اعيش شرطية اراقبه وياكل القهر قلبي واموت من الهم ........... هذا من اربع سنوات والأن طلعت لي مرة ثانية وثالثة ورابعة ومئه ..

تخيلو السجل 28 صفحة لشهرين .. ومن هالــ 28 صفحة 22 صفحة بس رقمها ........... تقدرون تتخيلون؟؟؟!!!!!!!!!!!!! حتى يوم الجمعة اللي يكون فيه معاي والله العظيم 3 صفحات بس مسجات _ رقمها متكرر وطبعا بدون وجود النص المكتوب بس التوقيت .........

حلف وصدقته اقصد مشيتها .. قال صديقتي وبس ولا عمري قلت لها وحشتيني ولا عمري قلت لها عمري !! مكالماتهم ومسجاتهم كانت بعد الساعة 12 الفجر واوقات هو يكون في الفراش .. ويقول صداقة !!!!!!!!!! مشيتها مشيتها مشيتها

اعيش مطلقة؟؟ فكرت فيها .. تخيلت نفسي مطلقه .. اعيش بروحي مع عيالي .. وتخيلت عيال الحرام ورا بابي .. شنو اسوي؟؟ اتطلق او اعطيه فرصه ثانية ؟؟ عطيته فرصه ثانية ..

وقال نطوي صفحة جديدة .. قلت نطوي ليش لا؟ بس بقلبي كل شي محفور ولا يمكن يروح .. ما ابي الهم ياكلني .. ابي اعيش .. توني صغيرة ..

قراري _ آخر فرصة ولو غلط غلطة ثانية راح تكون مميته .. راح تقتل زواجنا .. وراح يكون هو الجاني !!!


بليز عطوني رايكم في اللي صار وعطوني رايكم في قراري !!

مسامحة لاني طولت بس ادري ان صدركم راح يتحملني !!


تحياتي للكل ..

نعم أختي أعطيه فرصة من أجل أطفالك
لكن لازم يشوف الحزم بعيونك و ما يتهاون بالأمر
هالايام القادمة حاولي ما تذكريه بخيانته
حاولي فقط تقوي ايمانه و مخافته من الله عز و جل
العلاقات المحرمة هي معصية قبل ان تكون خيانة للزوجة
الله يعينك
و يفرحك بهداية زوجك
آمين

__________________
.
.

استودعتك أهلي في سوريا يا من لا تضيع ودائعه

والله يا اختي مشكلة الخيانه مشكله ازليه ليس لها علاج او حل سوى ان يتمكن خوف الله من قلب كل الناس
اما ان الخيانه لها اسباب محدهه فهذه غير صحيحه
اغلب الرجال اذا خان تكون زوجته ملكة جمال وعايش في دلال وحب ونعيم وهنا ولكنها النفس الحقيره تبقى حقيرة
الطلاق مصيبه للمراه وخاصة معاها اطفال
تقل فرصة الزواج بالنسبة لها ونظرة المجتمع لاترحم
انا هنا لا اريد ان اقول لكي ارضي بخيانته ولكن اوضح لك النهايه للطلاق لكي الامور بمنضار الواقع بعيدا عن كل العواطف
والله يا اختي مصيبتك ومصيبة كل النساء الزوج اذا خان البقاء يعني الموت كل لحظه والطلاق يعني الدمار الشامل
نصيحتي لك توجهي لفاطر السموات والارض بالدعاء بقلب خالص لعل الله ان يهدي زوجك ويبعد عنه بنات الحرام
لاحول ولاقوة الا بالله

__________________
لن يكون شيء في الكون الا ما اراده الله سبحانه وتعالى فلاتبتئسو ولاتحزنو بل اصبرو وتفائلو

اخخخخخخخخ من الخيانه .. حاسه بيك والله .. خصوصا انك مو مقصرة معه .. يعني تستغريبين .. و التفكير يصير هوس .. ايش سويت؟ .. استاهل؟ .. مقصرة ؟ .. و القهر لو انتي مؤديه الواجب و أكثر ...

حبيبتي انا عطيت فرص مو فرصة .. و بكا دم انه ما يعيدها ..

لكن --- و اخخخخخ من لكن .. عادها تكراراااا و مراراااااا ...


عطيه فرصه , ان شاء الله يطلع زوجك احسن من زوجي و فيه احساس ..

الاهم انك انت بينك و بين نفسك سويتي اللي عليكي .. و سامحتيه .. عشان عيالك و عشان الحب و العشره تعطينه فرصه .. دامه زين و محترمك و كل ايجابياته .. عطيه فرصه .. عشانك انتي ..

و الزمن راح يبينلك .. الاهم من كل هذا - صفي قلبك .. لان لو قلبك مو صافي , و فيه شوي زعل : ما راح تكونين طبيعيه معه ..

الله يوفقك حبيبتي و يردلك زوجك لك ..

حبيبتي بعض الرجال مريضين مايقدر يخلص لمرأه واحده وهو عارف انك احلى امراه ويحترمك ولكن للاسف مايقدر مايلف ويدور ماادري زميلته بالعمل متزوجه ؟ والابنت وانتي من اي دوله

__________________
ربي اجعلني مقيما الصلاة و ذريتي ربنا وتقبل دعاء
يارب ارزقني واختي الاولاد الصالحين تامين الخلق والخلقه يااااااارب
اتمنى كل من يشوف توقيعي يدعيلي ويدعي لاختي

اولا الله يعينك ويوفقك
حبيبتي انتي لازم تتناسي الموضوع مو عشان شي بس عشان اطفالكم
وان شاء الله انو رح يندم ويحس بلي صار
بس اهم شي انتي حسسيه انو زعلانه بس ماتقصري بشي
الله يوفقك

__________________
يارب عوضني عاجلا غير اجل واجعل ابني شفيعا لنا واحفظ زوجي لي وارزقنا من حيث لانحتسب

وكيف بيكون حالك لو كنتي على اطلاع على كل مسج بينهم ؟؟؟؟

بقول لك نصحيتي من واقع تجربتي لاني لاحظت تشابه بين حالي وحالك ...انتي اقرئي وخذي اللي يناسبك على حسب حالكم ووضعكم

حبيبتي ,,, اللي مثل زميلته بالعمل تصيد ...يعني الذنب مو كله على زوجك ... وراح تلاحظي انها بتم ترسل له حتى لو هو تجاهلها .... ساعديه يتخلص منها ...امسكي أعصابك على قد ما تقدري ...امسكي أعصابك ولا تتشاحني معاه ... اذا شاف عندك نكد بيروح لها .. ممكن بعدين يكتشفها ويرجعك لكن ليش المخاطرة .. لا تعطيها فرصة ...

خليكي متابعة تليفونه واذا شفتي منها شي لمحي له بالكلام انك واثقة فيه وتعرفي انه مثل هذي البنت طمعانه بشخص بمنصبه وماله ...

خلي غيرك يذكر هذي المعلومة أمامه ( في كثير بنات تصيد الرجل وهي طمعانه بماله ومركزه وبس ...توهمه انها تحبه وهي كذابة ما همها غير ماله)..حتى لو ما صدق 100% راح يشك بكلامها وغزلها فيه .

خليه يشعر انه ما عنده وقت للعب وما يملك انه يلعب لانه عنده مسؤوليات ... اشركيه بمسؤولية الاولاد وتربيتهم ... اشعريه بحاجتك له بكل الامور ..اشعريه بمشاكل أهله وحاجتهم له ....لا تثقلي عليه لكن اطلبي منه طلبات بسيطة وبعد ما ينفذها لك امدحيه وقوليله انه لولاك كان ما قدرت أربي الولد مثلا ...أو أمشي أمور البيت ..أحتاجك جنبي ... حاجتك له ترضي غروره وبنفس الوقت تشعره انه لا يملك أن يفكر بثانية ...مو فاضي ...ايديه مليانه وما عنده وقت لشي ثاني ... فهمتي علي

متعود على المسجات ويحب يشوف غزل مكتوب ....اشبعيه مسجات ...انتي ارسليله ... لا تخليه يحس انها تركت فراغ بحياته ...

أكلمك من واقع تجربة ...مع فارق انه محروستي ابتعدت عنه بالعمل وما عاد يشوفها .الحمد لله يمكن هذا خلا معركتي أسهل ...لكن كان فرق العمر بيني وبينها مو بصالحي ...

عموما ..الحمدلله ..صارله الحين شهرين من وقت ما كلمها اخر مرة ومن بعدها تجاهل رسائلها واتصالاتها واستمرت هي تحاول شهر والظاهر يئست ... صارلها شهر تقريبا مالها حس... ربي يستر عليها وعلى بنات المسلمين وييسر لها زوج يناسبها

كم مدة زواجكم ؟؟؟ وكم يتحمل زوجك بمسؤولية أولادكم والبيت ومسؤوليتك ؟؟؟

بقول لك قناعتي ... ترى الرجال اللي يوقعوا بين مثل هالبنات مساكين وما ينلامون ...أنا كنت أقرأ كل مسجاتها من وقت ما اكتشفت الموضوع وظليت حوالي 4 شهور وانا بحرب باردة معها الى أن خلصت زوجي منها ...اعتبرتها مرض صاب زوجي ...

نظرت لها على انها هي المشكلة مو زوجي ...تعرفين ليش ...لاني أنا ..وانا زوجته كنت أحن عليها مرات لما أقرأ كلامها وشوي وأقتنع انها فعلا تحبه وميته فيه ... واشلون هو ..وهو مو بس يسمع كلامها ...لا ويشوفها بعد ... ويقعد معاها ...يدربها على الشغل يا عيوني

نسيت أقولك كيف تمسكي أعصابك ... عليك بقراءة القرءان والدعاء ... ما راح يهدي نفسيتك ويريحك الا القرءان ...كنت أيام أقرأها مرتين وثلات باليوم الواحد ...وأحيانا أدعي وأتعمد زوجي يشوفني ... يعني أوصل له رسالة اني متأثرة حيل ومصدومة لكني صابرة ومتحملة .. ما أعصب وبنفس الوقت ما أكون جامدة وكأنه الموضوع ما يهمني

ربي يعينك ويصبرك ويرد لك زوجك أحن من أول

السلام عليكم ورحمة الله تعالى وبركاته كان الله في عونك اختي ماعليك سوى

تفويض الامر الى الله وانا مع الاخت قلبا وقالبا اتبعي نصائحها .

__________________