السلام عليكم
هذي أول مشاركة لي بمنتداكم اللي شفت انه يحل كثير من المشاكل لكن اتمنى تردو علي بسرعة لأن المغرب بينحسم الأمر ..
كان عمري 17 سنه وحدثت مشكلة كبيرة بين أمي و أبوي وانهارت نفسيتي ووداني ابوي وامي لمستشفى النفسية وجلست جلسة وحده مع الدكتور وطلعت من بعدها ماعاد راجعت المستشفى وبعد 3 سنوات تزوجت ورزقت ببنتين الأولى 6 سنوات والثانية 3 سنوات وبعد عشرة 5 سنوات طلقني لعدم تفاهمنا وسيطرت أهلة عليه وتزوج مباشره وأخذ بناتي 10 شهور كانت أشوفهم ساعتين فقط في الأسبوع وخالهم هو اللي يجيبهم ويردهم لأنه متسلط وصاحب مشاكل وأحنا في غنى عن مشاكلة لهذا مشينا الوضع معه مع أن قلبي ينحرق على بناتي ولكن زاد تحكمه وأخوي مارضى يوصلها لهدرجه وأخذ البنات وجابهم عندي وقال مافي الا المحكمه اذا كنت تطلب زيارة ورفض ينفق عليهم وبعد شهرين راح المحكمة وقدم دعوى مضمونها طلب حضانه لأني مريضة نفسياً وأراجع المستشفى وجاب معه وصفة انه هو وداني المستشفى وأنا يعلم الله انا مرة واحده كانت عرضية قبل زواجي ..
وكلت وأبوي عني في القضية وكان حكم القاضي اصلاحي بعد 5 شهور من عدم النفقة ويفيد الحكم أن يومين عند أبوهم ينامو و10 أيام في العطلة الكبيرة وأول يومين في العيد عنده ..
وش رايكم في هذا الحكم كونه متزوج وأنا لا وكيف صدر حكمه وهو ما ينفق (لأنه قال انتم ارفعو قضية عدم نفقة لأنها غير مرتبطه )
وموضوع النفسية اللي مادري ماسكه علي هل يدينني ؟ وأقدر اطعن في الحكم ؟؟
انتظر الرد لأن المغرب بينفذ الحكم باقي 4 ساعات هل اقدر أغير شيء ؟؟

الإشراف :

تم تعديل العنوان ليتناسب مع المضمون ..

هذا حكم محكمة ويجب تنفيذه ...أتوقع ممكن تستأنفي الحكم لكن عزيزتي لا تحرمي البنات من أبوهم بشكل كامل

الاطفال يحتاجو والدهم ... مهما كانت شخصيته ... يعني ليه برأيك لجأ للمحكمة حتى يشوفهم ...لو ما يحبهم ما اهتم ولا سأل فيهم ولا شافهم .
أتوقع انه وقف النفقة من باب الضغط عليكي حتى يتواصل مع أولاده ... حاولي تكوني لينه أكثر معاه وتفهمي رغبته بشوفة أولاده واتركي له المجال يشوفهم ..ومن بعدا اطلبي منه نفقتهم باللين ..واذا ما وافق الجئي للمحكمة .

ربي ييسر أرمك ويهدي زوجك ويهديك للصواب وما فيه مصلحتكم جميع

__________________

أنا ماحرمتهم من شوفت ابوهم الا لأنه رفض ينفق عليهم ورفض يعطيني حقوقي المالية والا والله كنت اقوله قبل يتم الطلاق يكونو عندي ايام وأيام عندك عشان نفسيتهم الحمد لله احنا في نفس الحارة هذا افضل شيء نكون قريبين كلنا منهم حتى لو ماعشنا في بيت واحد قال لا انتي روحي وبناتي عندي مافي حضانه ولا حقوق ..

أختي توكلي على الله وأرضي ، بعدين الحمد لله انه ما انحكموا له نهائياً غيرك أطفالهم بعيدين عنهم ما يشوفونهم الا بالسنوات !!
قولي الحمد لله على كل حال بناتك عندك ويشوفون أبوهم بين فتره والثانيه وكذا أحسن عشان نفسيتهم ، صدقيني أولادي أبوهم ما شافهم من يجي 6 شهور مع أني ما منعتهم عنه رغم عدم نفقته عليهم ولكن الولد الكبير تعبت نفسيته ويسأل كثييير لأن ابوه ما يسأل عنه هو ظلمك باللي سواه وكذبه على وضعك الصحي لكن إحتسبي ما أنتي فيه عند الله ، والله بينصرك لا تستعجلين النصر وإدعي الله والجئي إليه هو سبحانه بياخذ لك حقك..

__________________

جزاك الله خير أختي ..

الله ينصرنا اجمعين ووالله اني امدحه عند بناته واقول ابوكم يحبكم واللحين هو في دورة عشان كذا ماجاء يشوفكم ... ياليت يقدر بس.. صبر جميل والله المستعان ...

لا تنسين أختي أرفعي عليه قضية النفقة هذا حقك وحق بناتك والله ينصرك بس مهم أختي كثيراً يكون عندك وكيل ( رجال طبعاً ) متحدث عنك في المحكمه لأن قضاتنا الله يسامحهم لو شافوا الوحده تطالب بحقها ما يعطونها وجه وما ينصرونها ورفع صوت وتهزيء ويطلعونها غلطانه حتى لو هي على حق هذا اللي أقوله لك بعد اللي شفت بنفسي وشافوه بنااااات كثير غيري في المحاكم وما عندي وعندك الا الصبر هوني على نفسك وريحي نفسك وهدي بالك أصــــبري الله بينصرك ،، أنا رافعة قضية وضعي كثيييير شبيه لوضعك بس أنا إلى الآن قضيتي ما أنتهت وكانت اليوم الجلسة الأولى في المحكمه ،، الله يكتب لنا اللي فيه الخير وينصرنا على من ظلمنا ، وعند الله لا يضيع حق أنا واثقه كثيييير بربي انه بينصرني لأني أنظلمت كثييير ، الله يكون بالعون ..

__________________

انا وكلت ابوي في جلسة الحضانه وطلع هذا الحكم استشرت بنااات قالو يتعاطف القاضي من المراءه اكثر بالذات لما يحس بحرقتها وبكاها ما دري باشوف الجلسه الجايه وهي جلسة النفقه وحقوقي لأن حظرته ماخذ شنطة ذهبي وانا عروسه ومكمل البيت وانا كنت راضيه لأنه بيتنا وبعدين طلقني وجاب بنت خاله فيه واللحين لما طلبته يقول مالك شيء عندي الجلسة بعد شهر باحظرها واشوف الوضع ..
اختى اكثر شيء حارقني في حكم القاضي النومه عند زوجه ابوهم وانا عندي بنات صغار 6 و3 يعني يحتاجو اهتمام من حليب وحفائض وتغيير ملابس والله تعبانه ماعندي مشكله لو يزورهم 3 مرات بالأسبوع من الصباح حتى نص الليل بس ينامو عنده والله صعبه ... اليوم صحيت وانا اشوف كراسيهم وملابسهم والله تاثرت متضايقه ولا قدرت افتح كتاب واذاكر تعرفي اختبارت بالجامعه
الله يعين ويصبرني ..

الله يصبرك اختي ويعينك قبل ما يروحون أستودعيهم الله الذي لا تضيع ودائعة ويقعدون ان شاء الله بحفظه ورعايته حتى يرجعون لك ، وتواصلي مع اهله لو يكونوا عند أهله أهون لهم من القعده مع أبوهم وزوجته بس ان شاء الله تكون طيبه لهم ومتعاطفه معهم الله كريم أختي ـ سبحان الله موضه والله أخذ حقوق الناس انا عفشي رجع نصه اللي مافيه فايده واحتفظ بالباقي للعروس الجديده مع أني أنا اللي جبت أكثر الأثاث بس ما طالبت فيه وعوضي على الله سبحانه وتعالى عوض الله عندي خير من كل عوض .. أهم ما في الموضوع أتفقي معاه عشان خاطر البنات يعيشون عيشه كويسه سواء بالنفقه أو معاملتهم من زوجة أبوهم وإذا جوا يروحون لهم جهزي كل أغراضهم اللي يحتاجونها خصوصاً الصغيرة الله يحفظهم بحفظه ورعايته ، وصدقيني اني مستغربه من هالحكم لأنهم لسى صغار وما يقدروا يعتمدوا على أنفسهم كلية لازم أمهم تهتم فيهم وحااااسه وربي بشعورك والحال اللي إنتي فيه ومتخيله لو أولادي في هذا الموقف ،، والقضاة أسألي أي مطلقه تعرفينها أو عرفتي أنها راحت المحكمه كيف كان تعاملهم معاها ـ بكل غلظه وشده وقسوة وما أدري ليه كذا مافي أي تعاطف أبداً يحطون الغلط عليك في كل شيء وكأن الغلط ما هو مشترك بين الزوجين ـ
بناتك الله يخليهم لو بيكون جلوس بدون نوم يكون أهون والله ، عاملي أبوهم بكل لين وأرخي شوي يمكن إذا شاف لين وتسامح منك يتراجع عن النوم ويكتفي بزيارتهم له فقط وإذا كانت معاملته مع بناته كويسه هدي بالك ماراح يرضى فيهم أبداً أن زوجته تغلط وتقسى عليهم ... الله يفرج عليك ويربط على قلبك ويرجعون بناتك لحضنك بكل صحتهم وسلامتهم والله يوفقك في دراستك .

__________________

الله يكون بعونك .. ويفرج همك

انتي استودعيهم الله وهو كفيل بهم

والله لا يحرق قلبك عليهم ..

الله يفرج همك ويسير امرك

__________________
ياررب ارح قلبي وعوضني خير