مرررحبا ... أيها الساده أنا حروفي اليوم لن تكون مرتبه .. أنا مشتته وحائرة وخائفة ومتوتره ...أفتوني في أمري.. وهدؤوا من روعي ..أمن الله روعكم يوم تقوم الأشهاد. وادعوا لي ولأخوتي ووالدي ووالدتي أيضا بالخير والخيرة والعيشة الرضيه
... اللهم ومن أهداني رأيا سديدا فسدده وبارك له واكتب له من خير الدنيا والآخرة
.... لن أفصل وسأعطيكم مختصرا مفيدا فلساني عاجز عن الكلام المهم الوالدة حفظها الله وهداها متزوجة من والدي منذ مايقارب الخمس والعشرون سنه وحياتهما كانت حالمه هادئه ولا أدري ماالذي تغير فانقلبت الحياة جحيما وأعتقد أن حديث والدي عن الزواج بالثانيه قلب حياة أمي وأصبحت تتراءى لها خيالات وتفكر كثير ا ولا ترى للحياة طعم وكل شيء تفسره على السلبي وكذلك هي تميل للالتزام الديني ووالدي يميل للاعتدال ويختلفون كثيرا في التربيه والاراء ووالدتي تكبر المواضيع وترى أن والدي لايخاف الله في الأبناء وكثيرا ماتكون الاختلافات أمامنا وكذلك والدي رجل اجتماعي تاجر شاعر عاطفي قوي الشخصية وأمي باردة جدا وسلبيه قليلة الكلام قلقة شكاكه ومع هذا فهي ودود ولود تجيد الطبخ وتسعى وراء أبنائها وتشقى معهم ....
جدتي لأبي مرضت مرض الموت وأحضرها والدي لتعيش عنده ويرعاها وأمي كانت تبدي امتعاضها ولا تشارك في خدمتها وتفتعل قصصا عن جدتي وتجعل من الحبة قبه وكثيرة التنهد تقلق من حولها وتشعر من
حولها بالتوتر والخوف عليها
....... والدي لاأنكر أنه انسان صارم ولا يريد الزوجة أن تزور أهلها وقت ماشاءت ... وله آراء تضيق الصدر أحيانا لكن ماتصل اني أتوتر وأقلق ... ع العموم من عرفت نفسي وأمي كل سر بيتنا عند اخته كثير تتصل عليه وباليوم أكثر من مره وللأسف أمي تحسبه حلالة المشاكل وهي والله خرابة بيوت وكم مره نبهت أمي ان أسرار البيت ماتطلع وكنت أتقرب منها وأسألها وش اللي موترها مرات كثيرة تسكتني وقليل تحدثني وأكثر الأسباب تراكمات قديمه سلبيه وياما اختلقت شي وافترضته وبما اني بنتها البكر تعبت ومرات أعاني وأتعب وصار عندي تذبذب وقلق وتركت الدراسه وكثر ماأمي تتنهد وتتكلم بعض الأحيان بالحوقله والله انني
حتى وقت نومي أحاول أن أضع أربع وسائد على أذني حتى لاأسمع صوتها
.... تزوجت ولم تقف معي ولم تعطيني نصائح زوجيه ولا كيف أكسب زوجي وما يجب والحمد لله حياتي
مع زوجي جيده ولكن ماسببته لي الوالده من قلق وخوف متعب صرت متعبه
...... المهم في الموضوع كنت أمس جايه زياره بيت أهلي مادريت ان كان فيه شي وقبل يجي زوجي
بساعه تقريبا أخذت جوال أمي أبغى أدق على زوجي لأن جوالي مافيه رصيد وكان فيه رساله مستلمه وكأي رساله تجي جوال أمي فتحتها وصعقت وانهد حيلي وبكيت كانت الرساله من الوالد وهو قبل شوي كان مسافر مع زميله لمكه وودعناه كلنا الا أمي كانت جالسه ومكشره وكانت الرساله رد منه على رساله محتواها اني ماني قادره أتحمل أكثر وأبغى تسريح باحسان وكان رده مثل ماقلت لك قبل أنا ماراح أمنعك والله يساعدك وماراح أنسى الفضل وتواصلي معي وراح ماابخل عليك باللي يسعدك
..... طيب اذا كان قرار مثل هذا وتنتظر رساله هامه مثل هذي ليش تخلي الجوال بين ايدينا فرضا لو طاح بالرساله اخواني الصغار أنا احترت وضاق خلقي وكان زوجي بالطريق جاي ياخذني رحت لأمي وعطيتها الجوال ودمعتي بخدي وقلت لها أنا كنت ناويه أدق من جوالك وفجأه كان فيه رساله وقريتها وماكان مفترض تخلين الجوال كذا كان حرصتي يكون معك .. بكل برود أخذت الجوال ودق زوجي وماعرفت أرد ودق على البيت وردت أمي وعطتني واستسمحته يخليني أنام واعتذرت ان الوالده تعبانه شوي ودمعتي ماقادره أمسكه قالت أمي من قال أنا تعبانه مافيني شي ... ودخلت غرفتها ونامت وأنا مرعوبه مصدومه ولا كلمتني ولا عبرتني وعموما هي كذا ما تطبطب على الواحد حتى لو ايش ... أبوي أحن علي منها والله مع انها حبوبه وقريبه من الله وتحبنا بعمق بس جافه عاطفيا ... وقبل أنسى وضع أمي مع أبوي من فتره طويله مايسر العدو قبل الصديق هاجرته يدخل يطلع يتعب يمرض ترسل أكله له بالمجلس ماتطيق تجلس معاه تسوي المغرب قهوتين وحده لنا معه والثانيه لأبوي واللي يبغى منا يتقهوى معه والوضع ملاحظينه كل اخواني وياماعاتبنا وقلنا ونصحنا تقول أنا أدرى أنتم ماتدرون وش بيننا ولا أحيانا تسكت ... أنا للحين سهرانه ولا قادره أنام ولاأدري كيف اتطمن ع الوضع ولا كيف أشارك فيه أسكت أو أتكلم كيف بروح بيتي والوضع كذا وأبوي توه مسافر ماعنده من الشيطان طريق وخايفه تروح لأهلها أو تتهور واخواني ماأدري كيف الوضع
واختها اللي قلت لكم عنها أنا واجهت الوالد بضررها على الوالده واتصل عليها وهد دها ان تدخلت بشؤون الوالده أو بيتنا مايصير طيب لها ومن يومها مااتصلت لكن الوالده تعودت على الفضفضه عليها أنا ماأدري وش المشاكل اللي راكبه راسها الله يستر سبت الوالد واتهمته شي فيه وشي مافيه خايفه لو طلقها الوالد ترجع خالتي الخبيثه بزرع الحقد أو تفرق مابيننا وبين أمي وتتكلم على أبوي بحضرة اخواني الصغار ولو تطلقت هل بتكون ببيت أبوي ترعى اخواني وأنا عارفه أبوي ماراح يقصر عليها وبيكرمها ولا راح تترك الدار لنا واخواني ضحيه بعد ....آه ياراسي بينفجر
قبل انسى تذكرت الوالد الأسبوع اللي فات دق علي وقال وينك من زمان عنك جيت وناداني قال ترى الوالده تعبانه ونفسيتها تعبانه لا تضايقونها وكأنه لمح لي انه يمكن الواحد يفقد أغلى انسان بحياته حتى ولو بعد عشرة عمر ولو كان كاره هالشي وشفت دمعته بعينه وسألت وش تقصد خاف شكله علي وصرفها قال أنا أتكلم عموما الدنيا مفروض مانتعلق فيها هي كذا لقا وفراق والله يجمعنا بالجنه وكان مزاجه ماعجبني وحلفته وش فيك قال لا بس السكر مرتفع شوي وبس وطمني وعرض علي مشروع نسائي وطلب مني أديره أنا واختي وقال لازم الأسبوع هذا تفكرون بايجابيه للمشروع هذا وراح أدعمكم ونبي ابداع وأنا صراحه تحمست وتفاعلت لكن الحين صحيت للي كان يقوله
دلوني كيف اتصرف وآسفه ع الازعاج

__________________

أشوف الفراق حل متعبتنا معاه نفسيا لاهي اللي رجعت تأدي واجبها وترضي زوجها ولا اللي خلته يروح ويدور الرزق والوالد كثير بالقلق والأرق والتخيلات اللي ماأدري من وين
تزعل فجأه ولا مره بادرت لازم الوالد يجي ويفتح الموضوع وبالأخير تطلع خرابيط
ع العموم الوالد صار بين الحياة والموت سنين هاجرته تاركته بالمجلس وهو مريض سكر وكلسترول أنا اللي اعطيه علاجه واذا قلت ياماما ابوي تعبان تقول ايه شوفي وش يبي ..
ملاحظه .. لاتحسون أنا متحيزه للوالد بالعكس البيت كله واولهم ابوي ننتفظ عليه وأنا خصوصا يعلم الله أنني بذلت عمري وضحيت بدراستي وأجلت زواجي حرصا عليها ووقفت الى جوارها لكنها لاترضى الا بالقلق وتصنع ارقا من غير شيء وتفضل اللجوء لأختها وتجلس معنا قلقه متعبه دائما وتشك فينا وتقول أشياء غير واقعيه والوالد والله ضحى لأجلها وجلس لعيونها والتي تقول انشغل في سفرياته ليس صحيحا حتى تجارته يأخذنا معه في أكثر الأحيان ويداريها ويبحث عن راحتها والله لو يمسها أي اذى ننتفظ كلنا ولا يهدأ لنا بال بعكس الوالد يتعب ويدخل المستشفى وتحركاتنا لاتكون كوقوفنا معها
الوالده حتى معنا بارده ولا تعبر لنا كثيرا وتتهمني في بعض الأحيان
لكن تعودت على اختها تفضفض لها ولما منعها الوالد تكلمها راحت تكلم وحده داعيه والداعيه ملت منها قالت لاعاد تتصلين أنتي عندك مرض القلق والتخيلات
الحين أنا في بيت أهلي محتاره واختي ياقلبي اللي بالجامعه ماتدري عن الموضوع لكنه صارت بعد زواجي بالواجهه وعانت وشارفت على الموت جتني قبل شوي توريني رساله من أبوي تقول شكل أمي حامل وسقطت؟ قلت كيف قالت يقول لله ماأخذ اللهم أجرني في مصيبتي ويدعي لها ويقول مانيب ناسيك وأنا الحين بالحرم وهي ردت تشكره وتدعي له .. واختي ياقلبي تقول شكل الوضع تحسن ..ابتسمت له وأنا الدمعه حايره وقلت الله كريم قمت من عندها ولقيت الوالد مرسل لي (ماتت ام الرسول وأبوه وزوجته ومازاده الا ايمان وتصديق وقام ونفض عنه الخوف وحمل افضل رساله للبشريه ويدعي لي وللجميع
أنا رديت (حبيبي سترى مني جبلا راسيا أكثر بكثير مما تظن.. سأظل الوافيه الحانيه الحكيمه لك ولأمي ولاخوتي...) حسيت الوالد يبغاني أصير الكل بالموقف واحس انهرت وصرت ماني عارفه اركز كيف هل اروح الحين للوالده واواجهها واشوف وش ناويه وكيف بيكون الوضع واخواني واختي يارب ساعدني
شي أخير أحس بخوف وكره للحياة الزوجيه ومتردده كيف برجع لزوجي وصراحه كل المسببات اللي قادت الوالده والوالد للانفصال تصيربيني وبين زوجي وطيب لو رجعت أبغى احس بالأمان بحياتي والاستقرار ولو عرف زوجي بالسالفه فيما بعد يمكن يقول اقلب الجره على فمها تطلع على أمها لاتلوموني الحدث كبير علي هد حيلي وأتمنى تردون علي اليوم وهل أحتاج لتأهيل نفسي بعد المرحله

__________________