يا تاريخي فَ لتشهد ! - منتدى عالم الأسرة والمجتمع

01-03-2011, 12:09 AM

Take Breath

عضو نشيط جدا

تاريخ التسجيل: Nov 2010

المشاركات: 287

يا تاريخي فَ لتشهد !

6 - 2009 : عروس زُفت لِ حياة وردية ، هكذا تخالها!

6-2010: عادت للبيت الذي منه خَرجت .. بقلب محطم ، وروح ترتعش خوف
وهناك نقطة في السماء
تحمل للسائلين أماني ..
فهل تتحقق ؟!

31 . 12 . 2011 : في قاعة المحكمة ، بكل قوة تُحدث القاضي
وهو بكل شجون يبكي ! ، تُرى على ما ؟ وبعدَ ماذا ؟

10 . 2011 : يبعث لي رسائل نصية
[ انتي ماتفهميني اهيه كانت تفهمني اكثر منج ]
[ اهيه حبها ما ينسى ]
لمَ للكمات أثر مدوي في نفسي ؟

25 . 12 . 2011
- انتي اتعرفين الاوضاع اشلون بالبحرين ، الواحد صار يطلع مو ضامن عمره
ابيج تسامحيني وتبرين ذمتي
- الله يسامح الجميع ... مابقلبي شي عليك
- آنه اتصلت فيج كذا مرة تيلفونج مغلق ، ابيج بموضوع
- ما استخدم موبايل ، مابينا مواضيع
- ابيج بموضوع عني وعنج .. ممكن نتقابل ؟
- أوكي .. باي
- لحظة
- تعشيتي ؟
- نعم ؟
- تشعيتي ؟
- لا للحين!! خير ؟
- تعشي واتحملي بروحج واهتمي بنفسج!

!!!!!!!!!!!!!!!!!!!!!!!!!!!!!!!!!

ترى هل تكفي كل علامات التعجب هذه لتصور لكم دهشتي !

27 . 12 . 2011
4:30
باركات الجامعة

سيارتان يقبعان في نهاية المواقف
كلاهما رماديتان ..
ونظرة تخترق نافذتي تصلني مباشرة ، ولكن لم أعد أشعر بذات دقات القلب التي كنت استشعرها
بنظراته هذه!!!

- مرحبا
- أهلاً
- شلونج ؟
- بخير
- ..............
- ..............
- نروح بسيارتي ولا بسيارتج ؟
- بسيارتك بس مابي مكان بعيد عندي محاضره ثانية ..

- انتي تدرين إن للحين احبج صح ؟
- لا مادري
- انزين ، آنا للحين أحبج
- أوكـي حبتك العافية!
- ابيج ترجعين لي ..

في قرارة نفسي لم أرغب بالعوده ، وحتى مقابلتي له بدافع إختبار نبضات القلب
والادريالين ! هل مازالا يعملان حينما أراه ، أم سقط النظام فيهما!
ولكن لا بأس بإختبار صغير ..

- أوكي عندي شروط
1- رقمك تغيره ، مابي كل يوم بنت تتصل عليك وتقول لي هذي بنت متزوجه ماله داعي تغارين منها
وهذي بنت اصغيره اصغر منج مثل اختي ..

- إن شاء الله ، آنه غلطان بهالشي من قبل ادري

2- الـ آكونت في الـ FaceBook ابيك تغيره ومابيك تسوي add حق بنات
3- أهلك مالي علاقة فيهم ، سلام عليكم السلام

فرأيت نظرة استهجان بانت على ملامحه فـ قلت " اي اللي جاني يكفيني ابعد عن الشر "

4- محد يتدخل بمشاكلنا لو إن شاء الله نحفر قبور بعض في شقتنا محد يدري عنا
5- الانترنت له ساعه فقط في اليوم مو أكثر .. لأن قبل كنت احسن ان النت ضرتي!
6- أصدقاء السوء ابيك تسوي لهم Refresh والأفضل Delet
7- ايميلك اتغيره .. ويُفضل لو ماكان عندك ايميل
8- الاكل آنه بطبخه مابناكل مع اهلك
9- مو مهم عندي علاقتك بأهلي لو إن شاء الله ماتسلم عليهم مايهم بس بدون مشاكل
10- مزح مع البنات في الشغل نووووو

- لهدرجه كنتي متضايقه مني؟
- إي ، ونسيت 10- بلييييز لا تدخن وآنه معاك ماتحمل وثانيا اتصير ريحتي مو حلوه
- آنه موافق على كل شي ، لأن ادري كل هذي الاشياء كانت تصير وكلها غلط بغلط
وآنه ماجيت لج إلا ابي اصلح علاقتنا ببعض

(( شعرت في قرارة نفسي بـ ميل خفيف بدأ يبزغ حتى قلت له ....... ))
- آنه بستخير ..
- ليش؟
- شنو ليش .. ابي الله يكتب لي اللي فيه الخير
- واذا مارتحتي ؟
- ماراح ارجع
- عيل لا تستخيرين ..
- أوكي يعني ماراح ارجع ..
- تستغنين عني ؟
- ...........
- سكوتج معناته تستغنين عني
- اجذب عليك اذا قلت ماستغني عنك .. الدليل شت بعيده عنك 9 أشهر ..

7:30

- انت تحبني ؟
- إي
- تذكر كلامك في الرسايل انها احسن مني؟ وانها تفهمك اكثر مني؟
- بس اهيه ماتت وارتحنا منها
- عفواً قصدك انتحررررت
- مايخصنا فيها

بدأت دموع بارده تنزل من عيني ..
- انت المشكلة تجرح وماتدري بحجم الألم اللي تسببه لي ؟
إنت سبب عدم ثقتي بنفسي وبالآخرين وعدم ثقتي فيك
لما دزيتلي الرسايل اللي تقول فيها إنها احسن مني تدري شسويت؟
قمت صليت ركعتين حق ربي ودعيت عليك إن الله يبليك بوحده تخونك
وتجرحك
وتعيشك نفس الألم اللي عشته!
طبعاً ماتحس بالألم اللي سببته لي .. وآنه ظليت أيام بغرفتي ما آكل ولا أنام ولا اطلع
مو إنت اللي يرتفع ضغطك بسبب الضغوط النفسية
طبعاً ما بتحس .. لأن آنه اللي قلبي احترق مو انت
لا تفكر دموعي هذي لأني أحبك لا
ولا لأنك تهمني بعد لا
دموعي هذي لأني كنت غبيه ، لما حبيتك وتحملت كل هذا باسم الحب
وانت باسم الحب اشسويت لي؟ بشنو جازيتني ؟
آنه صح لي اغلاط
عصبيتي
وغيرتي
وشكي
ما انكرهم
بس بسبب منو ؟
بسببك إنته انت وصلتني للشك
والغيره والعصبيه
آنه ما انكر عشت معاك أيام رومنسية مانكرها
بس ما اقدر انسى الالم اللي سببته لي ماقدر مو بيدي بس ماقدر
انت للحين تحبها .. مع إنها انتحرت بس للحين انت تحبها
ومافيه قلب يجمع ثنتين
لو اهيه للحين مامات جان ماجيتني صح؟

- لا مو صح ، لأن حتى لما كانت عايشه آنه تزوجتج وقبل لا تنتحر على قولتج كنت افكر ارد لج
وتردين لي ونرجع لبعض
وكنت احاول اصلح من نفسي كثر ما اقدر ..

- عموماً آنه للحين أحبك .. بس إنت جيتني بالوقت الغلط
جيتني متأخر وايد ..
آنه باقولك شي بس مابيك تزعل ..
آنه للحين أحبك
بس ماحس ان آنه احبك مثل قبل
حتى ألحين وايدك بإيدي مو حاسه فيها مثل احساسي قبل
ولما مسحت دموعي ألحين ماصار يعني لي الموضوع كثر مايعني لي قبل ..
أحبك إي بس أرجع لك لا..
لأن ماقدر انسى كل اللي صار

(( مثل كل تلكَ الأشياء التي نحبها ،
تأتي متأخرة بقدر عمر
ثم لا يسعفها الوقت لتكتمل
فـ ترحل بنقصها أو تموت أمامنا بعجز ))

28 . 12 .2011 : هذا هو آخر يوم في العده ، لا أعلم لمَ أشعر بالسعاده
هل لأنني شعرت بانه شعر أخيراً بقيمة فقداني ؟
أم لأنني شعرت بأنني بتُ طاهرة من حبه ؟
لا أعلم حقاً لمَ هذا الشعور يكسوني
ولكن أشعر بفرحة جميلة ,,
وأيام مشرقة أنتظرها بـ فارغ الصبر

والحمدلله على كل شيء

"

وأخيـراً تَنفست

__________________

الأمل بالله عرفته

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه